Taa -GP (NT) Drama

Wali yako etu ratamo temponya roa to rato’oka roa Pentakosta. Tempo etu samparia tau to mangaya i Yesu siromu ri samba’a banua ri kota Yerusalem. Tempo sira nja’u nja’u ria, kodi majoli sira mangandonge loo yako ndate yangi, loo etu ewa loo nu gempata. Pasi loo etu radonge juku ri raya banua to nakare’e nsira etu. Pasi tempo etu re’e seja anu to ewa kaa nu apu tudu pasi mandoo ri wawo mbo’o ntau etu samba’a pei samba’a. Wali tempo etu bae kojo karoso ndaya to nawaika i Nosa Mapasing sira samparia. Wali samparia sira to re’e ri raya banua etu mula magombo ri raya basa to yusa to taware igurunya. Wali basa to sira mangampake etu, ewa wimba i Nosa Mapasing mangawaika sira manganto’o, etu semo to sira manganto’o.
Wali tempo karata i Nosa Mapasing etu, boros to Yahudi to yako ri lipu lipu to yusa ri sambawo lino sira re’e seja ri Yerusalem. Tau etu tau to mampalaika i Pue Allah saba manga’angga Ia. Wali tau etu mangandonge seja loo to ewa loo nu gempata etu, panewa boros sira to yau mangampago banua to nakasiromu ntau to mangaya etu. Ojo kasiromu ntau boros nja’u banua etu, sira kayopo kojo rayanya mangandonge gombo ntau to mangaya, apa ponto-ponto tau rata etu mangandonge sira magombo ri raya basa to si iaja. Wali tau boros etu ipu kojo rayanya, sira manganto’o, “Gete, tau si’i bara si’anya to Galilea? Kesaa mawali naka pei kita mangandonge sira magombo ri raya basa ngkita samba’a pei samba’a? Kita yako ri tana Partia, Media, Elam, pasi re’e to yako Mesopotamia, Yudea, Kapadokia, Pontus, pasi Asia, pasi re’e seja to yako Prigia, Pampilia, Mesir, pasi to yako ri lipu-lipu ri tana Libia to mosu ri kota Kirene. Pasi re’e seja to yako ri kota Roma. Wali sangga’a kita to Yahudi pasi re’e seja to si’a to Yahudi, pei to mangalulu kojo ada nto Yahudi. Re’e seja tau to yako ri pulo Kreta pasi re’e seja to yako ri tana Arab. Wali kita samparia mangandonge sira magombo mangampake basa ngkita. Sira magombo mangkonong palaong to magaya kojo pasi to taa rapobiasa to naika i mPue Allah.” Etu semo to nato’o ntau boros. Wali tau etu ipu rayanya pasi tamo nansani to napobuuka. Pasi sira masipotanaka, sira manganto’o, “Kesaa batuanginya palaong si’i?”
Pei re’e sangga’a to ojo mampokore tau to magombo ri raya basa to yusa etu. Sira manganto’o, “Gete, sira ojo kayangu.”

Wali i Petrus sira sampuyu pei dua paka pomakau i mPue Yesu sira makore, panewa i Petrus mula mampogomboka tau boros. Ia maroso loonya manganto’o, “A’i-a’ingku to Yahudi pasi komi samparia to maroo ri kota Yerusalem si’i, padongeka kojo gombongku to mampakanasa batuanginya palaong to mawali si’i. Re’e komi to mangampobuuka kami kayangu, pei taa monso apa si’i dawurowa owo jam sio. Pei palaong to mawali si’i, etu semo to natulis yami nto pantuntu tuntu i mPue Allah tempo owi, i Yoel. Ia mangantulis gombo i mPue Allah, to’onya,
‘Ane rata ri kapuranya temponya to si’i Aku damangantudumaka NosangKu resi samparia to lino. Wali nganamu to langkai pasi to we’a sira damampakarebaka komi tuntungKu. Pasi ane to langkai to si komi to mangurawa sira damangkita pangkita to Aku mampapokitaka sira, pasi to tu’amo damampongipika mangkonong pangipi to daKuwaika sira.
Pasi to papolaongingKu seja ri tempo etu bara to langkai bara to we’a, sira seja daKutudumakaka NosangKu, wali sira seja damampakarebaka tuntungKu.
Pasi ri tempo etu Aku damangika ndate yangi anu to taa rapobiasa.
Pasi ri wawo lino Aku damangika palaong to mawali tondong resi tau to mangkita. Wali tau damangkita raa pasi apu pasi siampu .
Wali mata nu eo damawali wuri pasi mata nu wuya damawali mawaa ewa raa. Wali palaong etu damawali ri katawanya rata Eonya i Pue mula maporenta ri lino, eo to bae kojo batuanginya. Wali tempo etu i sema-sema to marapi sawang resi i Pue, tau etu darapalaes.’

Wali etu semo gombo i mPue Allah to natulis i Yoel mangkonong kama’i i Nosa Mapasing.”
Wali ojo karoonya i Petrus manganto’oka sira gombo i mPue Allah tempo owi etu, ia manganto’o wo’u, “A’i-a’ingku to Israel. Padongeka gombongku si’i. I Yesu to Nasaret etu, Ia semo to ma’i seore napokau i mPue Allah. Manasa Ia napokau i mPue Allah apa Ia nawaika i mPue Allah kuasa mangika palaong to taa rapobiasa pasi to mampakaipu raya ntau, pasi Ia rawaika seja kuasa mangika palaong to mawali tondong resi tau. Wali manasa seja resi komi i Yesu napokau i mPue Allah apa palaong to nikaNya etu Ia nangika ri tango mata ngkomi seja. Wali i Yesu etu Ia roomo raposora yau resi komi, pasi tempo Ia raposora yau etu komi mampopate yau Ia apa komi mangawaika tau maja’a mampaku Ia ri kaju pasape. Pei i Pue Allah nansani yami palaong etu damawali, apa palaong etu mangalulu songka to si Ia. Wali ojo karoonya komi mampopate yau i Yesu, i Pue Allah mampotuwu muni Ia yako ri kapateNya etu. I Pue Allah mangalapa Ia yako ri kuasa nu ngkapate apa kapate taa nakurang manganta’amaka Ia. Etu semo batuanginya gombo to natulis yami i Makole Daud tempo owi. Gombo to ia mangantulis etu manganto’o,
‘Aku sangkani mangangkita i Pue Ia re’e resi Aku. Ia re’e ri awengKu tondo ngkana, wali see naka Aku rodo rayangKu.
Wali apa saba etu see naka Aku masanang kojo rayangKu, pasi ngangangKu mangabarong Ia. Pasi nempo mate yau lembangKu, tiroowa re’e pansarumakangKu, apa Komi, i Pue Allah, taa ojo damangabiaka toniingKu maroo-roo la’u lipu ntau mate. Pasi Aku, to papolaong to si Komija, Aku kunsani Komi taa seja damangabiaka lembangKu naka boo yau.
Komi re’e mangansuduka Aku jaya to daKululuka damangarata katuwu. Pasi Komi dasiwaka pei Aku, wali Aku ndende kojo rayangKu.’

Wali etu semo gombo to natulis yami i Makole Daud tempo owi.”
Wali ojo karoonya i Petrus manganto’oka sira gombo to natulis i Daud tempo owi etu, ia manganto’o wo’u, to’onya, “A’i-a’i, aku maya mampakanasaka komi mangkonong gombo i Daud, bue ngkita tempo owi etu. Wali tempo ia magombo mangkonong lemba to taa nabiaka i mPue naka boo yau, manasa si’a lemba to si ia to nato’o etu. Apa manasa ia roomo namate yau pei rapongkeli yau pasi dayonya re’ewa ri lipu si’i. Pei i Daud ia to pantuntu tuntu i mPue Allah pasi ia mangansani parajanji i mPue Allah. Apa i Pue Allah mamparajanjika kojo ia, to’oNya, ‘Ri tempo to darata Aku damangokotaka samba’a wiyaa ngkorom damawali seja Makole sewaju ewa korom. Wali wiyaa ngkorom etu, Ia semo i Kerisitu, Makole Parajanjingku.’ Wali see naka i Daud mangansani yami pasi manganto’o yami mangkonong i Kerisitu, Makole parajanji i mPue Allah, Ia mambangu muni yako ri kapateNya. Wali etu semo batuanginya tempo ia manganto’o i Pue taa ojo mangabiaka Ia maroo-roo la’u lipu ntau mate, pasi taa seja mangabiaka lembaNya naka boo yau. Wali i Yesu etu, Ia semo to nawangu muni i mPue Allah yako ri kapateNya, pasi kami samparia mawali matamanasa palaong etu.
“Wali i Yesu tiokotaka damatunda ri tampa to bae angganya ri tondo ngkana i mPue Allah. Pasi i Pue Allah, Pa’aNya mangawaika Ia i Nosa Mapasing to room raparajanjika tempo owi. Wali i Yesu mantudumaka seja i Nosa Mapasing resi kami, wali palaong to nukita ngkomi pasi to nudonge ngkomi si’i batuanginya i Nosa Mapasing to natudumaka i Yesu etu naratamo resi kami. Apa si’a i Makole Daud to tiokotaka nto’u saruga, i Yesu semo. Pei Daud re’e manganto’o yami mangkonong gombo i mPue Allah resi i Yesu, to’onya,
‘I Pue Allah manganto’oka Puengku,
“Patunda ri awengKu ri sambali tondo ngkana,
sampe rata temponya Aku manganangi baliMu pei mangawaika Komi mangkuasang sira.”’

Etu semo gombo i mPue Allah resi i Yesu tempo owi.
“Wali a’i-a’ingku to Israel, aku mampaponsanika komi samparia see manasa kojo i Yesu to nupaku ngkomi ri kaju pasape etu, Ia semo to naokotaka i mPue Allah mawali Pue pasi mawali Makole to naparajanjikaNya.”
Wali tempo tau boros mangandonge gombo i mPetrus etu sira soso kojo rayanya, wali sira mangampotanaka resi ia pasi pomakau to yusa etu, sira manganto’o, “A’i-a’i, ane ewa see kesaa to kami damangika?”
Wali i Petrus mangansono, ia manganto’o, “Ewa si’i danuika ngkomi. Pajea pasi rabaptis komi samba’a pei samba’a see sa’e mangansani komi mangayamo i Yesu Kerisitu. Ane komi mangika ewa see, dosa ngkomi daralapas, pasi komi seja damangarata sora yako resi Pue Allah, etu semo i Nosa Mapasing. Apa i Pue Allah, Pue ngkita, roomo mamparajanjika damangawaika i Nosa Mapasing etu resi samparia tau to Ia damampokio. ParajanjiNya etu Ia mangika resi komi pasi resi wiyaamu, pasi samparia tau to maroo nja’u longko.”
Wali yako etu boros wo’u gombo to nato’o i mPetrus mampakanasaka sira mangkonong songka i mPue Allah pasi mampatiendoka sira. Ia manganto’o, “Pajea see komi taa damangarata seja huku to danarata ntau to maja’a to tuwu ri tempo si’i.” Wali tempo i Petrus magombo etu boros tau to mangaya anu to nato’o pasi sira rabaptis. Wali ri eo etu kaborosinya tau to mangaya i Yesu radugangika wo’u bara togo nsowu tau.

Wali tau to mangaya i Pue Yesu etu sira samparia paka madota kojo mangampodongeka anu to napotundeka mpomakau i mPue Yesu, pasi sira sangkani masingkatao siromu sindara-ndara. Sira seja mandudu ngkani mangkoni sindara-ndara mangangendo kapate i Yesu pasi sira seja siromu makai-kai. Tempo etu boros palaong to taa rapobiasa naika mpomakau i mPue Yesu. Wali tau to mangangkita pasi to mangandonge palaong etu sira samparia paka ipu kojo rayanya. Pasi tau to mangaya sira tare pandoonya masintuwu. Wali ngaya-ngaya to re’e resi sira, samparia sira puenya. Sira mampobalu yau ngaya-ngayanya panewa doinya etu natilaka yau nsira samparia. I sema to taa gana to napake, ia mangantima yako ri tila nu doi etu. Wali ponto eo sira siromu mampue mampakabae i Pue Allah ri banuaNya. Pasi sira seja masanang kojo pasi buya raya nsira mangkoni sindara-ndara ri banua nsira samba’a pei samba’a, mangendo kapate i mPue Yesu. Pasi sira tare pandoonya mangabarong i Pue. Wali tau boros samparia masanang kojo resi tau to mangaya i Pue Yesu etu pasi ponto eo i Pue mangadugang wo’u kaborosinya tau to rapalaes.

Listen to Palaong mPomakau i mPue Yesu 2