Sénoufo, Nyarafolo

Bà pe sɛ́ni nɔ̀gí Zerizalɛmi kàʔa nɛ̄ gè, Bɛtifaze nɛ́ Betanii vòyo táanni yè, baa Wolivi Tiire nyagurugo táanni gè, a Zezi wi 'wi pìtɛnmɛnɛ pálì siin tun nɛ́ pe yɛ: «Yeri waa baa vògo gáà mɛ́ gè, n'gɛ baa we yiʔɛ mɛ́ gè. A yeli sɛ́nì nɔ̀ wè, yeli bé sèfɛnbile nyaa puɔlɔ, siɛn fìɛ tánʔa ni nɛ̄ʔ; ye- ni sáʔa yeri báan. A siɛn 'yeli yúgo: ‹Gáa nɛ̄ yeli nɛ kire kpínʔini ?› ye- wi yɛ: ‹Kàfɔli wi màakuu yē ni nɛ̄, a wi 'kúɔ wi bé koli ni tórigo náʔa, fáari fáari.› »
A pìtɛnmɛnɛ pe 'láʔa nɛ̀ kɛ́, nɛ̀ sɛ́nì sèfɛnnɛ nyaa lè puɔlɔ saʔa káà wìile táanni koligo nyuɔ nɛ̄ gè, a pe 'ni sáʔa. Siɛnnɛ bílì pe 'puu baa bèle, a pe 'pe yúgo: «ʔɛn, gíi ye kpínʔini mmɛ gè ? Ki mɛni á yiyē nɛ sèfɛnbile sáʔala lè ?»
A pìtɛnmɛnɛ pe 'siɛnnugoro kɛn dè pe mɛ́ dìi Zezi wi cé juu pe mɛ́ dè. A pe 'pe yaʔa a pe 'kɛ́. A pe sɛ́nì sèfɛnbile kɛn lè Zezi mɛ́ wè, nɛ́ pe bururo fòlilo dè nɛ̀ taʔala ni nɛ̄. A Zezi wi 'tánʔa nɛ̀ tɛ́ni ni nɛ̄. Siɛnnɛ sáa cé pe bururo fòlilo dè nɛ̀ cáan koligo nī gè. A pàli 'kɛ́ nɛ̀ sɛ́nì wabunro kúnminɔ nyàʔa nī nɛ̀ pɛ́nì cáan koligo nī gè. Bìli pe 'puu yiʔɛmɛ gè, á bìli ní kàduʔumɛ gè, a pe mìɛni fali nɛ yékpuʔulo wáari sɛni níɛ wáa:
«Wozana  !
Ye- tí we- kpuʔɔrɔ taʔa
Kulocɛliɛ nɛ̄ !
Siɛn ŋáà wi báan
Kàfɔli wi míʔɛ nɛ̄ gè,
Kulocɛliɛ wi- kpuʔɔrɔ taʔa wi nɛ̄  !
Ki 'yɛli Kulocɛliɛ wi- kpuʔɔrɔ taʔa
weli tuuliʔɛ Dawuda kùlofɔligɔ nɛ̄ gè,
gàa ki báan nɛ tíin gè !
Wozana, nyìʔɛnɛ tiɛliiliye
yi mìɛni yiri
fundaanra kpínʔini
ki wori nɛ̄ dè  !»
A Zezi wi sɛ́nì jíin Zerizalɛmi kàʔa nī gè, nɛ̀ fali Kulocɛliɛ Gbùʔɔrɔsaʔa mɛ́ gè; nɛ̀ sɛ́nì jíin nɛ̀ wéli nɛ̀ màʔa ki kàluʔulo ke mìɛni nī. Kire lɛ̀lɛ nī lè cɛngɛ ki yé kúɔ nɛ̀ kúɔ. A pe 'yiri wire nɛ́ wi pìtɛnmɛnɛ kiɛ nɛ́ siin ní bèle nɛ̀ Betanii vògo koligo líɛ.


Ki kpìɛnduu gè, bà pe kɛ́nì yiri Betanii vògo nī gè nɛ waa wè, a fungo 'Zezi taa wè. A wi 'sàanfiidiige káà wéli nɛ̀ nyaa baa liʔi, wɛrɛ 'puu ki nɛ̄. A wi 'líɛ nɛ̀ kɛ́ tiige mɛ́ gè nɛ sɔ̀ngí wire báa yasɛnrɛ nyaa baa ki nɛ̄. Wiì sɛ́nì yafiɛn nyaaʔ, nɛ̀ yiri wɛrɛ nīʔ. Ki 'nyaa tiige ki sɛn lɛ̀lɛ niì cé fìɛ nɔ̀ʔ. A wi 'jo: «Siɛn sǐ ní muɔ yasɛngɛ káa bè nyaa púloʔ.» A wi pìtɛnmɛnɛ pe 'ki siɛnrɛ lúʔu dè.


A pe 'koli nɛ̀ kɛ́ Zerizalɛmi kàʔa mɛ́ gè. Bà Zezi wi sɛ́nì jíin Kulocɛliɛ Gbùʔɔrɔsaʔa dàligɛ nī gè, nɛ̀ fali nɛ yaparilɛ pe mìɛni cìrá nɛ yigi kpànʔanɛ peli nɛ́ yasuɔlɔ ní bèle baa Kulocɛliɛ Gbùʔɔrɔsaʔa dàligɛ nɛ̄ gè, nɛ́ walifɛnivɔlilɔ pe tabalilɛ ŋɔrigɔ bèle nɛ̀ cáan nɛ́ gòtoparilɛ pe kácuɔnrɔ ní dè.
Wiì puu nɛ siɛn yɛri wi- yakaa líi nɛ Kulocɛliɛ Gbùʔɔrɔsaʔa pari gè nɛ jiniʔ. A wi 'fali nɛ̀ séli nɛ pe tɛnmɛ nɛ́ pe yɛ: «Gíi ki 'juu baa Kulocɛliɛ siɛnsɛbɛrɛ nī dè ? Kiì jo léʔ: Pe bága de mi saʔa yeri gè náarigɛ saʔa kùlogolo ke mìɛni wuulo mɛ́ bèle lé  ? Á yeli sí pɛ́nì ki kpíʔile kàyuulo kòridiʔɛ.»
A kacuɔnrilɔ kàfɔlilɔ pe 'ki siɛnrɛ lúʔu dè, peli nɛ́ Fànʔa Siɛnrɛ sɛbɛcɛ́nminɛ ní bèle. A pe 'fali nɛ kɛnmɛ caa bè wi woli cúʔɔ lè. Fíɛrɛ cé sí puu nɛ pe cògí, bɛ̀ siɛnnɛ pe 'puu nɛ cúru wi tɛnmɛnɛ nɛ̄ lè. Zezi tɛnmɛnɛ ni cé tɔ̀ni nɛ̀ siɛnnɛ pe funyɔ cò yè kpuʔɔ.
Ki cɛnguʔɔ gè, a Zezi nɛ́ wi pìtɛnmɛnɛ pe 'yiri kàʔa nī gè.


Ki kpìɛnduu sínbinimɛ táanni bè, a pe sɛ́nì sàanfiidiige nyaa gè a ki 'nyígi nɛ̀ kùu (gàa Zezi cé dɛngɛ gè), a ki nìre ti mìɛni 'kùu. A Piɛri 'sɔ̀ngi nɛ̀ taa nɛ̀ jo: «Tɛnmɛfɔli, nyaa, tiige gíì muɔ cé dɛngɛ gè, ki 'waʔa.»
A Zezi wi 'siɛnnugoro kɛn pe mɛ́ nɛ́ pe yɛ: «Ye- tɛ́ngɛ Kulocɛliɛ nɛ̄ wè. M'bé ki juu yeli mɛ́ kányiʔɛ nɛ̄, a siɛn 'juu nɛ́ nyagurugo gáà ní gè nɛ́ ki yɛ: ‹Kɔ́n náʔa gè ma sa tuu kuʔɔjii nī wè !›, a siɛn wiì káala wi fungo nī gèʔ, nɛ́ sí ti juu nɛ́ tɛ́ngɛ ki nɛ̄ gàa wire 'juu ki bé kpíʔile wè, bɛ̀ ki bé kpíʔile siɛn mɛ́ wè. Kire nɛ̄, m'bé ki juu yeli mɛ́, a yeli nɛ yɛgɛ ó yɛgɛ caa nɛ́ ki náari gè, ye- tɛ́ngɛ ki nɛ̄ yeli 'ki taa, bɛ̀ ki bé kpíʔile yeli mɛ́. Nɛ̀ pínɛ a yeli 'yɛ̀ nɛ̀ yéri lɛ̀lɛ ó lɛ̀lɛ níɛ Kulocɛliɛ náari wè, a ki yē siɛn 'kaala kpíʔile yeli nɛ̄, ye- ki yaʔa siɛn nɛ̄ wè, gìi ki bé tí yeli Tuu ŋáà wī baa nyìʔɛnɛ nī lè, wire míɛni wi- yeli tuudiʔɛlɛ wuʔu yaʔa gè yeli nɛ̄. [Á kire 'laa, a yeli wè ki yɛri bìli nɛ̄ bèleʔ, yeli Tuu ŋáà wī baa nyìʔɛnɛ nī lè, wire míɛni wiǐ yeli tuudiʔɛlɛ wuʔu yaʔa gè yeli nɛ̄ʔ.]»


A pe 'koli nɛ̀ pɛn Zerizalɛmi kàʔa mɛ́ gè. A Zezi wi kɛ́ni nyaari nɛ tòrí baa Kulocɛliɛ Gbùʔɔrɔsaʔa nī gè, a kacuɔnrilɔ kàfɔlilɔ pe 'sìʔɛrɛ nɛ̀ kpɔni wi nɛ̄, peli nɛ́ Fànʔa Siɛnrɛ sɛbɛcɛ́nminɛ ní bèle nɛ̀ fàri liɛlɛ nɛ̄ bèle. A pe sɛ́nì wi yúgo nɛ́ wi yɛ: «Ŋáasiɛn fànʔa nɛ̄ muɔ nɛ kele gálì kúu gèle ? Ŋáasiɛn wi 'kire kàfɔligɔ kɛn gè muɔ mɛ́ nɛ́ jo muɔ de ti kúu ?»
A Zezi wi 'pe yɛ: «Ye- tí mi yeli yúgo bínɛ kaala nigbe ní yákuɔ. A yeli 'siɛnnugoro kɛn dè m'mɛ́ dè, m'bé nɛ́ ki juu yeli mɛ́ ŋáa fànʔa nɛ̄ mi nɛ kele gálì kúu gèle. Ŋáa wi cé Zan tun wè wi- pari siɛnnɛ batiize bèle ? Kulocɛliɛ wi cé wi tun lé, dí siɛnnɛ bīɛlɛ ? Ye- kire siɛnnugoro kɛn dè m'mɛ́ wêli.»
A pe 'pìye kìɛ kìɛ, nɛ́ kɛ́nì jo: «A we 'jo Kulocɛliɛ mɛ́ wè, wi bé jo gáa nɛ̄ wiyè cé sí tɛ́ngɛ wi siɛnrɛ nɛ̄ dèʔ ? A we sí ní nɛ̀ ki juu nɛ́ jo siɛnnɛ mɛ́ wè, ʔá.»
Pe 'puu nɛ fìʔɛ́ siɛnnɛ nɛ̄ bèle kire tiɛlɛ náà nī lè, nɛ̀ taʔa gíi nɛ̄, siɛnnɛ pe mìɛni tɔ̀ni nɛ puu nɛ Zan tɔ́ri wè Kulocɛliɛ siɛnjuuwo wáà kányiʔɛ. Kire tiʔɛ gáà nī gè, a pe 'Zezi yɛ wè: «Weli sì cɛ́nʔ.»
A Zezi míɛni wi sí pe yɛ: «Ao, mi míɛni sǐ ga tíi bé ki juu yeli mɛ́ʔ, ŋáa fànʔa nɛ̄ mi nɛ kele gálì kúu gèleʔ.»

Listen to Mariki 11