Ẹkụkwọ-nsọ Ọnụ Ịka

Ụhụọhịn ohu, ebe Jesu rị a kuzi, e zi oziọma imẹ Ụlọ-nsọ, ndị-isi nchụn-ẹjan lẹ ndị-nkuzi Iwu lẹ ndị-isi nọ pụha, sị a, “Gwa ẹnyi, onyẹ gwa ị mẹ ihiẹn ndịnị ị rị e mẹ? Onyẹ zi i?” Jesu nọ za wẹ, sị, “Mmẹ nwẹn jẹnkọ d'a jụ ụnụ ajụjụ ohu: gwa nị m, onyẹ sị Jọnụ mẹ Mirin-Chuku o mẹ? Chuku rị elu-igwee zi ẹ, ra ịhịan?”
Ya wẹ nọ tụgbama iroro, sị ibe wẹ, “Ẹnyi sị, ‘Ọ gha elu-igwee bịa,’ o k'a sị, ‘Kị haịn ụnụ gilẹni gi oku ẹ dọn?’ Kanị ẹnyi sị, ‘Ọ gha ẹka ịhịan bịa,’ wẹ jẹnkọ d'e gi ọmụma magbu ẹnyi makẹni wẹ ile kweri ni Jọnụ wụ onyẹ-amụma.”
Ya wẹ nọ sị a, “Ẹnyi amarịn ebe ọ gha bịa.”
Ya Jizọsị nọ sị wẹ, “Mmẹ nwẹn agwakọ ụnụ onyẹ sị m mẹ ihiẹn ndịnị.”


Ya kẹ Jesu nọ tanị ndị ile rị ebahụn iluni: “Okẹnnyẹ ohu nwọn ugbo-vaịnị, ya k'ọ nọ we ẹ ye ndị jẹnkọ d'a rụnn'a e-gbu-e-ke, ọ nọ shi alị-ịhịan d'a nọbie. Ogẹn vaịnị e ru, ọ nọ zi odibo ohu jẹnni ndị hụ rị a rụn ugbo hụ nị wẹ ye ẹ hụn run'ẹ; kanị, ndị hụ nọ gbu odibo ẹ ili, gba a ẹka la. Ọ nọ zijẹn odibo ọzọ; kanị wẹ nọzị gbu ẹ ili, gbe ifẹnrẹn ye ẹ ihun, gba ya nwẹn ẹka la. O zijẹn odibo hụn mẹ wẹ ẹtọ; wẹ nọ rụdẹ ọhụn ẹhụ, chụpụ a. Onyẹ hụ nwọn ugbo-vaịnị hụ nọ sị, ‘Kị m'e mẹ nwan? M jẹnkọ d'e zi ezi nwa m, ikẹnkwọ nị wẹ gbayeghọ a!’ Kanị, ogẹn ndị hụ gi hụn a, wẹ nọ sị ibe wẹ, ‘Ọnwan wụ hụn sikọ d'e nwọnrin ugboni omẹgụ, nị ẹnyi gbu ẹ nwan kẹni ihiẹn nkẹ e ru ẹ ẹka họnrin nke ẹnyi!’ Ya wẹ nọ gha imẹ ugbo-vaịnị hụ dọkpụnpụ a, gbu ẹ.
“Jesu nọ sị: Kị onyẹ hụ nwọn ugbo jẹnkọ d'e mẹ ndị hụ rị a rụnn'a? O sikọ d'a bịa d'e gbu wẹ, we ugbo hụ ye ndị ọzọ.”
A nụ wẹ ihiẹnni, wẹ nọ sị, “Chuku a jụ!”
Kanị, Jesu e bu ẹnya zinmẹ wẹ, sị, “Kị wẹ den'ẹ nwan imẹ Ẹkụkwọ-nsọ nị
‘Ọmụma hụ ndị rị a tụn ụlọ jụ
e họnringụọ ọmụma gi ụlọ’?
Ọmụma hụ jẹnkọ d'e tikpọ onyẹ ọwụlẹ dankwasịn'a; kanị o jẹnkọ d'e gweriẹn onyẹ ọwụlẹ ọ dankwasị.”
Ya kẹ ndị-nkuzi Iwu lẹ ndị-isi nchụn-ẹjan nọ mẹ nị wẹ nwụnrụn Jesu ozigbo, makẹni a ghọtagụọ wẹ nị uwẹ k'ọ tụnị ilu hụ; kanị, egun igunrun ahụn anịnị wẹ.


Ya kẹ wẹ nọ kemẹ Jesu nke. Wẹ nọ zi ndị wẹ zi d'e kunrun ẹ, sị wẹ mẹ nọkẹ sị wẹ gi ezioku bịa kẹni wẹ hụn ụzọ gi ihiẹn o k'e ku kwọndọn ẹ, bu ẹ che ẹka Gọvanọ hụn ndị Rom tumẹ. Wẹ nọ sị a, “Onyẹ-nkuzi, ẹnyi a marịnghọ nị oku-ọnụ ị lẹ nkuzi i kụrụ ọtọ; y'a ra lee ịhịan ẹnya ihun, kama, y'a kuzi ụzọ Osolobuẹ k'ọ rịchanrịn. Gwa ẹnyi, Iwu ẹnyi e kwerighọ nị ẹnyi kụ eze-kanị wụ Siza ụgwọ-isi ra o kwerini?”
Kanị, Jizọsị a ghọtagụọ nị ẹro kẹ wẹ gi bịa, ọ nọ sị wẹ, “Ghọsịdẹle ni m akpụrụ egho dinarịọsụ: isi onyẹ lẹ ẹfan onyẹ rị a?” Wẹ nọ sị a, “Siza.”
Ya Jesu nọ sị wẹ, “We ni nwan ihiẹn Siza ye Siza; ụnụ e we nke Osolobuẹ ye Osolobuẹ.”
A sanị wẹ nwan ẹka gi oku-ọnụ a nwụndọn ẹ idẹnya ndị ahụn. Oku hụn ọ shịarị wẹ a tụ wẹ ẹnya ọda-ọda, wẹ nọ kpumẹ ọnụ.


Omẹgụ, ụfọdụ ndị Itu-Sadusi nọ bịa d'e kunrun Jesu. (Ndị Itu-Sadusi sị nị ndị nwụnnị ara lihi.) Wẹ nọ jụ a ajụjụ, sị a, “Onyẹ-nkuzi, Mozizi deni ẹnyi ya imẹ Ẹkụkwọ Iwu nị: ‘Omẹni okẹnnyẹ a nwụnhụn bụ nwunyẹ ẹ amụnị nwa, nwẹnẹ ẹ sikọ d'a lụrụ nwunyẹ ẹ, mụdọnni ẹ nwa.’ O nwọn nwan umunẹ ikẹnnyẹ ẹsa. Nke ibuzọ a lụrụ nwunyẹ kanị ọ mụnị nwa o we nwụnhụn; hụn mẹ ẹbụọ nọzị lụrụ okpoho hụ, ọ nwụnhụn, ọ mụnị nwa; hụn mẹ ẹtọ nọ lụrụzị a, ẹrịra k'ọ rịzị ndị ọzọ ile họdụnị d'e ru nị wẹ ẹsa a lụgbarị okpoho hụ, a nwụnhụnchanrịn wẹ, bụ amụnị wẹ nwa. Omẹgụ, hụn okpoho hụ nkẹ nọ nwụnhụn. O ru ogẹn ndị nwụnnị e gi lihi, nwunyẹ onyẹ kẹ okpoho hụ jẹnkọ d'a wụ imẹ wẹ ile, ebe o mẹ ni wẹ ẹsa lụgbarị a?”
Jesu nọ sị wẹ, “Ndị ogẹnni sụọ a lụ di lẹ nwunyẹ; kanị ọ rịkọ ẹrịra ogẹn hụ lalanị. Makẹni, ndị hụ Osolobuẹ jẹnkọ d'e weri nị wẹ furu efuru, ndị hụn o k'a gha ọnwụn weli kẹni wẹ bi ogẹn hụ, alụkọ di lẹ nwunyẹ. Wẹ sikọ d'a nọ kẹ ndị mmọn-ozi; anwụnkọzị wẹ. Wẹ wụ ụmụ Osolobuẹ — makẹni wẹ wụ ndị gha ọnwụn lihi. O mẹ nke iweli ndị nwụnnị, Mozizi lẹ enwẹn ẹ e kugụọd'a ebe ọ nọ ku oku akụ-ọfịa hụ, ebẹhụ ọ nọ kpọ Di-nwọnni-ẹnyi ‘Chuku Ebraham, Chuku Aziki, Chuku Jekọpụ’. Chuku ndị rị ndụn k'ọ wụ, ẹlẹ nke ndị nwụnnị, makẹni ịhịan ile rị ndụn ẹnya a.”
Ụfọdụ ndị-nkuzi Iwu nọ sị, “Onyẹ-nkuzi, y'a zagụọ ọhụnma!”
Egun anịnị wẹ jụzị a ajụjụ.


Ya Jesu nọ sị wẹ, “Kị haịn wẹ gi e ku ni Kraịstị wụ nwa Defidi? Bụ Defidi lẹ enwẹn ẹ e kuọlẹ imẹ ẹhụhụọ Ẹbụ-ọma, sị,
‘Di-nwọnni-ẹnyi sị Di-nwọnni m,
“Nọdị alị ẹka-nni m,
d'e ru mgbe m gigụ ndị iṅẹnrẹn i
họnrin ihiẹn i gi a tụkwasị ụkụ.” ’
O mẹ nwan nị Defidi kpọ Kraịstị ‘Di-nwọnni m’, nanị k'o dọnzi nwan wụrụ nwa Defidi?”


Ebẹhụ ịhịan ile rị e gọn ẹ ntịn, Jizọsị nọ sị ndị nsọnmazụụn a, “Kpachanpụnị nị ndị-nkuzi Iwu ẹnya: ọ sụọ wẹ nị w'e yi ẹwuru tueni a ghahunmẹ lẹ ni w'e kele wẹ ọhụnma ogbe lẹ nị wẹ a nọdị isi-oche imẹ ụlọ-ofufe lẹ ebe wẹ nọ e ri oriri. W'e rigbu ikpoho di wẹ nwụn, e gi ekpere sueni e kpumẹ ẹ! Wẹ jẹnkọ d'a narịn afụnfụn kanị.”

Listen to Luku 20