Ẹkụkwọ-nsọ Ọnụ Ịka

Ya kẹ Ndị-isi Nkịkwama hụ ile nọ lihi ọtọ, we Jizọsị jẹnni Paịleti, Gọvanọ rị a kịnị ndị Rom. Wẹ nọ kinmẹ, sị, “Ẹnyi nwụn okẹnnyẹni k'ọ rị e dufie ndị alị ẹnyi, a sị wẹ akụzịlẹ eze-kanị wụ Siza ụgwọ-isi, a kpọ enwẹn ẹ Kraịstị hụn wụ eze.”
Paịleti nọ jụ Jesu, sị, “Ịyụ wụ eze ndị Ju?”
Ọ nọ sị a, “Y'e kugụọ a.”
Ya kẹ Paịleti nọ sị ndị-isi nchụn-ẹjan lẹ igunrun hụ, “Ahụnnị m ihiẹn m'e gi ma okẹnnyẹni ikpe.”
Kanị, a tọ wẹ e ku ẹ, a sị, “O gi nkuzi ẹ e se isusu alị Judia ile. Galili k'ọ gha bidọn; o rugụọ nwan ebeni.”

Ogẹn Paịleti gi nụ ihiẹnni, ọ nọ jụ wẹ kẹ onyẹ Galili rọ. Ogẹn o gi marịn nị azụụn Hẹrọdụ rị a kị k'ọ gha bịa, ọ nọ zi ẹ jẹnni Hẹrọdụ. Hẹrọdụ nkẹ rị imẹ Jerusalẹm ogẹn hụ. Ogẹn Hẹrọdụ gi hụn Jesu, ẹfọ nọ sụọ a ụsụọ ọda-ọda, makẹni o tekẹ ọ chọma n'ọ hụn a. Makẹni, ọ nụgụọ otiti ẹ, a tụ ẹnya n'ọ hụn a ebe ọ rị a rụn ọrụn-atụmẹnya. Ya ọ nọ jụma Jizọsị ajụjụ bu ọda, kanị Jizọsị a shịarịn'a ihiẹn ọwụlẹ. Ndị-isi nchụn-ẹjan lẹ ndị-nkuzi Iwu turuhụkwọ ebahụn e kin, e kinshi ikẹn.
Hẹrọdụ lẹ ndị-agha a nọzị gi Jesu gu egu, mụ a ẹmụ. Ya Hẹrọdụ nọ yimẹ ẹ ẹkwa ma mma, zikinni Paịleti ya. Ya kẹ Hẹrọdụ lẹ Paịleti nọ sụọkin ụhụọhịn hụ; wẹ te wụ eṅẹnrẹn mbụ.

Paịleti nọ kpọgbama ndị-isi nchụn-ẹjan lẹ ndị-ọkịkị lẹ ndị alị hụ ile, sị wẹ, “Ụnụ wẹhẹni m okẹnnyẹni n'ọ rị e dufie ndị alịnị. E lelegụọ m'a nwan idẹnya ụnụ; ahụnnị m eje-ihiẹn ndị hụ ụnụ sị nị ya k'o mẹ. Hẹrọdụ lẹ enwẹn ẹ ahụnzịkwọnị eje-ihiẹn ọwụlẹ o mẹ, ya k'o gi zikinni ẹnyi ya. Lee ẹ, onwọnni ihiẹn okẹnnyẹni mẹ hụn wẹ e gi gbu ẹ. M jẹnkọ nwan d'a sị wẹ fịan a mkpịnsịn, a hatu m'ẹ.”
Ogẹn Mmẹmmẹ-nghafe ọwụlẹ Paịleti e wepụharịrị nị wẹ onyẹ-ngan ohu.
Kanị igunrun hụ ile nọ yimẹ, “Wepụ onyẹni elu-ụwa! Wepụhanị ẹnyi Barabasị!” (Barabasịnị rị ngan makẹ isusu o se imẹ obodo hụ lẹ ọchụn o gbu.)
Makẹni Paịleti te chọ n'ọ hapụ Jizọsị ye, ọ nọ gwazị igunrun hụ oku. Kanị wẹ ile a tọkwọ e yi, “Kpọgbu ẹ! Kpọgbu ẹ!”
Paịleti nọ gwazị wẹ hụn mẹ mgbe ẹtọ, sị, “Kị haịn? Elee eje-ihiẹn k'o mẹ? Ahụnnị m ihiẹn ọwụlẹ o mẹ hụn wẹ e gi gbu ẹ! M jẹnkọ nwan d'a fịan a mkpịnsịn, hatu ẹ ye.”


Kanị wẹ hụkwọ e yi, a sị a kpọgbu Jizọsị. Oro wẹ a karị ẹka, nke wẹ nọ bụn. Ya Paịleti nọ ma Jizọsị ikpe hụ wẹ chọ n'ọ ma a. Ọ nọ hatu onyẹ hụ wẹ chọ, onyẹ nwẹn wẹ tụ ngan makẹ isusu lẹ igbu-ọchụn.
Ọ nọ we Jizọsị ye wẹ nị wẹ kpọgbu ẹ ọkpọgbu ahụn wẹ chọ.


Ebe ndị-agha dukọ a, wẹ nọ kwọndọn Saịmọnụ, onyẹ alị Saịrini, hụn gha alị-ọfịa lala imẹ obodo, buye ẹ obe hụ, sị a buru ẹ sọnmẹ Jesu.
Igunrun ịhịan hụ e sọn Jizọsị, wẹ lẹ ikpoho ndị rị a kwannị Jizọsị ẹkwan, e goo. Jesu nọ gbehutọ, sị wẹ, “Ikpoho Jerusalẹm! Akwanlẹ ni ni m ẹkwan, ka kwanmanị nị enwẹn ụnụ lẹ ụmụ ụnụ ẹkwan. Makẹni ogẹn zeni lala hụn wẹ e gi sị, ‘Ndị-agan lẹ ikpoho mụlẹni ụmụ lẹ ndị yetulẹni nwa ẹran e nwọnkẹ ngọzi.’ Ogẹn hụ, ịhịan k'a gha a sị ugu, ‘Dodo, dankwasị ẹnyi’, a sị òke, ‘Dodo, kpumẹ ẹnyi!’ Makẹni, omẹni ihiẹnni kẹ wẹ rị e mẹ osisi rị ndụn, kị wẹ k'e mẹ hụn kpọgụ nkụn?”


O nwọnzi ikẹnnyẹ ẹbụọ ndị mẹ eje-ihiẹn wẹ duru wẹ lẹ Jesu d'a kpọgbu.

E ru wẹ ebẹhụ w'a kpọ “Okpokomisi”, wẹ nọ nọ ebẹhụ kpọma Jesu ye elu obe, ịya lẹ ndị hụ mẹ eje-ihiẹn: onyẹ ohu rị a ẹka-nni, hụn-ẹbọ rị a ẹka-ekpẹn.
Jesu nọ sị, “Baba, gbagharị wẹ, n'a marịn wẹ ihiẹn wẹ rị e mẹ.”
Ogẹnni kẹ ndị-agha kpọgbun'ẹ gi tụ nkpọ, gi ẹ keri ẹkwa a.
Igunrun ịhịan turu ebẹhụ, e lee ile; kanị, ndị-isi ndị Ju hụ a mụ a ẹmụ, a sị, “Ọ zụọgụọ ndị ọzọ, ya zụọ nwan enwẹn ẹ, omẹni ịya wụ Kraịstị Osolobuẹ, Onyẹ hụ Osolobuẹ họrị!”
Ndị-agha a mụzịghọ a ẹmụ: A bịa wẹ d'e kunrun ẹ, ye ẹ manya rụ-ụka, sị a, “Omẹni ịyụ wụ eze ndị Ju, zụọpụha enwẹn i!”
O nwọnzikwọ ihiẹn wẹ deye obe hụ. Ihiẹn wẹ de wụ, “Ọnwan wụ eze ndị Ju.”
Onyẹ ohu imẹ ndị hụ mẹ eje-ihiẹn wẹ kpọma elu obe nọ kparimẹ ẹ, a sị a, “Ẹlẹ yụ wụ Kraịstị? Zụọpụha nwan enwẹn i, y'a zụọpụhazịkwọ ẹnyi!”
Hụn-ẹbọ nọ jụgbọ hụn ku ihiẹnni, sị, “Y'a ra tụdẹ egun Osolobuẹ, ebe o mẹ ni ikpe ohu kẹ wẹ mazị yụ nwẹn? Ikpe wẹ ma ẹnyi hụghọ mma, makẹni ihiẹn ẹnyi chọ kẹ ẹnyi rị a hụn; kanị onwọnni ihiẹn okẹnnyẹni mẹ.” Ya ọ nọ sị Jesu, “Jesu, ogẹn y'e gi bịa rịkẹ eze, dodo nyanhankwọ m!”
Jesu nọ sị a, “M rị a gwa ị ezioku, mmẹ lẹ yụ sikọ d'a rị Alị Ezumikẹn wụ Paradaịsị tannị.”


Ihiẹn nọkẹ ọkụrọkụ mmẹbụọ efinnaị ẹnyanwụn gi a rị isi, ọhịhị nọ gbagbarị alị hụ ile d'e ru ọkụrọkụ ẹtọ efinnaị, anwụn amụnị. Ogẹnni kẹ Ẹkwa wẹ gi gbọnbepụ Ebẹhụ Kachanrịn Nsọ imẹ Ụnọ-NSỌ gi gbawa ẹbụọ. Ya Jesu nọ gi okẹn olu yi, “Baba, e bu m mmọn m che i ẹka!” O kugụ ihiẹnni, ọ nọ kwọnbepụ.
Ogẹn onyẹ-isi agha ahụn kị ndị-agha kpọgbun'ẹ gi hụn ihiẹn mẹni, ọ nọ ja Osolobuẹ mma, sị, “Ezioku-ezioku, ẹka okẹnnyẹni rị ọchan!” Ogẹn ndị hụ ile gbakikomẹ ebahụn e lee ilee gi hụngụ ihiẹn mẹni, wẹ nọ lama fịankọ ẹka obi. Ndị ile marịn Jesu ọhụnma lẹ ikpoho ndị ahụn gha Galili sọnhẹn ẹ nọtezi ẹkẹrẹ, e lee ihiẹn ndị rị e mẹni.


O nwọn okẹnnyẹ ohu ẹfan a wụ Josẹfụ hụn wụ onyẹ ohu imẹ Ndị-isi Nkịkwama. Onyẹ obodo Arịmatịa rị Judia k'ọ wụ; ezigbo ịhịan kụrụ ọtọ rọ. O kweyenini ndị-isi ibe ẹ nị wẹ mẹ Jesu ihiẹn wẹ mẹ ẹ. Ọ rị ndị rị e che ọbịbịa Alị-eze Osolobuẹ.
Ọ nọ jẹn d'e kunrun Paịleti, sị a buye ẹ ẹhụ Jizọsị. Ya ọ nọ butu ẹ elu obe, gi ẹkwa linẹ kwama a, bu ẹ che imẹ ili wẹ liyetulẹni ịhịan hụn wẹ gu rịkẹ mmughẹ ye imẹ ọmụma kẹ w'e mẹ. Ụhụọhịn wẹ gi a kwademẹ Ezumikẹn rọ, Ụhụọhịn Ezumikẹn e d'e bidọn ẹnyasị hụ.
Ikpoho ndị ahụn gha Galili sọnhẹn Jizọsị nọ sọnmẹ Josẹfụ, wẹ nọ hụn ili hụ, hụnzị kẹ wẹ dọnmẹ ẹhụ Jizọsị. Ya wẹ nọ lama d'a chọtọ udẹn lẹ ihiẹn ndị ọzọ wẹ gi a kwama ozun.
O ru Ụhụọhịn Ezumikẹn, wẹ nọ zu ikẹn kẹ Iwu dọn ku.

Listen to Luku 23