छेम-ल्वा
पावलका कोरिन्‍थीमिमलाई र्‍याक्‍तु़म ओराम ङादोम सेलाखाजेम सो़। कोरिन्‍थ शहरडा पावलका कोले मण्‍डली गड्‍डु़म बाइडा। मेसिन्‍डाम मु़चु़मिमका ख्रीष्‍टलाम ल्‍वाम्‍डिम त्‍वारो़म नुङ ख्रीष्‍टडा थो़रलु़म्‍डिमका हापा दु़खा थारीमिम रोक्‍ताम बाइडा। मेर्मिमगोडा मेप्‍माम दु़खामिम मेरोमिनु़ र्‍वाक्‍पा नका पावलका ओराम सेलाखाजेम र्‍याक्‍तु़म बाइडा। मेराम थारीका कोरिन्‍थ खोत्‍ले नेब्‍दीनुङ हेम-खेम बाट्‍पा कोले डोक्‍पु ग्रीक शहर बाइडा। ओराम शहर ने रोमी डोक्‍पु नेब्‍दीगोडाम अखैया र्‍वाक्‍मा याक्‍के नेब्‍दीकाम किब्‍दी बाइडा। मेराम शहरडा भ्रेपा भ्रेट्‍पा खारी छो़म दु़स्‍थाल्‍ला मा उनी त्‍वाकाङा बेम्‍खेट्‌मिडिम डु़म्‍ला रु़दु़म वो छो़म बर्तो लस्‍ताम बाइडा। बान्‍ते मेनो मेजो़पा बासी-दोसीमिम बाइडा। खाल खालकाम डु़म्‍ला बेपामिम वो मेसिन्‍डा बाम्‍डी।
पावलका कोरिन्‍थ मण्‍डलीकाम लागि छो़म मिम्‍ताम-सो़र्ताम बु़डु़म बाइडा। मेर्मिम ल्‍वा ने ओर्मिम ङा सो़: मण्‍डलीडा गो-फ दु़म्‍पा मा मेजो़पा बासी-दोसीमिम, वोस्‍चो़-मेसेमकु हेमकेम नुङ लालीकुन्‍दाकु दुथाममिम हिलाहिसीमिम, नेप्‍चीकु दुथाम, मण्‍डलीका र्‍वामिम थो़मु बासिक्‍पा ल्‍वामिम, माम्‍चु़नी-पेललाममिम राप्‍लावा, सिमुलाम बम्‍गेमुकु दुथामिम ल्‍वा। आरेप्‍माम हिलाहिसीकु दुथाम गुका माम्‍चु़नीलाममिम नेप्‍चीका ओराम सेलाखाजेमडा सीड्‍डु़मिम बु।
माम्‍चु़नीका उनीमा त्‍वाकु मु़चु़मिमलाई ग्‍वाम्‍डिम राप्‍लावामिमगोडाम खोत्‍लेडाम जो़पा ल्‍वा रिखाम ङा र्‍वाक्‍साका आसिन्‍डा १३ अध्‍यायडा रेम्‍बु़डु़म बु। ओराम सेलाखाजेमडा खोत्‍लेडाम नङ दोपा अध्‍याय ओराम ङा सो़।
र्‍याक्‍मा ल्‍वामिम
छेम-ल्‍वा १:१-९
मण्‍डलीगोडा गो-फ १:१०–४:२१
वोस्‍चो़ नुङ मेसेमकु हेमकेम मा त्‍वाकु नेमगोडाम ५:१–७:४०
ख्रीष्‍टियनमिम नुङ ङाटा सेव साट्‍पामिम ८:१–११:१
मण्‍डलीडाम त्‍वारो़म नुङ सो़रलोले ११:२–१४:४०
ख्रीष्‍ट नुङ थो़रलु़पामिमकु १५:१-१८
यहूदियाडाम ख्रीष्‍टियनमिमकाम लागि ग्‍वा-ग्‍वा १६:१-४
त्‍वाकाम ल्‍वा नुङ हुम-द १६:५-२४

१ कोरिन्‍थी

Listen to १ कोरिन्थी छेम-ल्वा