येसुना सेवातिगा आसकना मदत

1असके पजा, येसु सेहेर-सेहेर नाट-नाटेने हन्जुन, परमेस्वरना राज्यता सबोय सोबाता पोल्लोतुन वळकसोरिन अनि वेहचोरिंग वलियन्दुर, येसुनोरक बारा खास चेलालोरक वने ओनासंग मतोरक। 2अनि दुष्टात्मांगताल अनि बिमारिहताल सुदरेह किस मतोर हुचुक आसक अनि सात दुष्टात्मांग टन्डस मतोर मगदलनिता मरियम#मत्ति २७:५५,५६; मर १५:४०,४१; लूका २३:४९ , 3अनि हेरोदेस राजानोर कोटीवाले कुसाना मुत्ते योहन्ना; अनि सुसन्नाह; अनि आपुना संपतिते येसुना अनि ओनोर चेला लोकुरकुन सेवा किन्दुंग दुसरो पकाय आसक वने ओनासंग मन्दु।

विजा वीत्वालना पिटो

(मत्ति १३:१-९; मर ४:१-९)

4अनि सेहेर-सहेर नाट-नाटेनोरक लोकुरा उन्दि पकाय हजोर भीळ येसुना हेरे वायिला लाकतुरक असके येसु लोकुरकुन उन्दि पिटो वेहतुर: 5“वरोर विजा वीतवाल मानेय विजा वितान साटि हतुर। अनि ओर विजा वितानपा हुचुन विजा हरदा हेरे अरतुंग; अनि लोकुरक हनेक-वानेक ओयकतुरक, अनि आबारतांग पिटेंग वासुन अवेहकुन तितुंग। 6अनि दुसरो हुचुन विजा कल्कनिगा अरतुंग, अनि मोळियतुंग, मति वल हिले आसि इन्जोर वतितुंग। 7अनि दुसरो हुचुन विजा काटा पोदेलानांग नडुम अरतुंग, अनि अव काटा पोदेलाना संगेय बोरसुन काटा पोदेलंग विजातुन नोवचतुंग। 8अनि दुसरो हुचुन विजा सोबाय जागातिगा अरतुंग। अनि अव होळियसुन उन्दि नुर पट इचोन फसल आतुंग।” अनि पजा येसु हजोर लेंगते “निमाट बाताल केन्जान्तोरिट अदेन पकाय ध्यानते केन्जुन सम्जेकिम्ट” इन्जोर इतुर।

विजा वीत्वालना पिटोता अर्थ

(मत्ति १३:१०-१७; मर ४:१०-१२)

9अनि येसुनोरक चेलालोरक येसु वेहतोर अद पिटोता अर्थ बाताल मन्ता इन्जोर पुच्चेमातुरक। 10असके येसु आपुनोर चेलालोरकुन इतुर, “मिकुन परमेस्वरना राज्यता गुप्त पोल्लोतुन समजेमायान साटि समज हितोर। मति दुसरोलोरकुन,

‘ओरक हुळान्तोर मति हुळवाप साटि

अनि केन्जुन वने मति समजेमायवाप साटि’

पिटोते करिहला लागतुर#यश ६:९।”

11असके येसु पिटोता अर्थतुन वेहतुर: “विजा परमेस्वरना पोल्लो आन्दु। 12हुचुलोर लोकुरक परमेस्वरना पोल्लोतुन केन्जतुरक मति ओरक विस्वास किसुन मुक्तितुन कलियमा इन्जोर सयतान वासुन बदाम आबारतांग पिटेंग विजानुंग तितुंग अदामे ओरा मन्दे परमेस्वरना पोल्लोतुन टन्स हिन्तोर। ओरक हरिता हेरेटांग अरतांग बिजा लेहका मन्तोरक। 13दुसरो हुचुलोर लोकुरक परमेस्वरना पोल्लोतुन केन्जुन गिरदा आसोरिंग विस्वास किन्तोरक, मति हिर हिले मरा लेहका ओरा विस्वास कमि मन्ता इन्जोर हुचुक बेरांग विस्वास किन्तोरक। मति पजा ओरागा परिक्षा वान्ता अद बेरा आपुना विस्वास हरचिंतोरक, ओरक कलदा जागादिगा अरतांग विजा लेहका मन्तोरक। 14अनि दुसरो हुचुलोर लोकुरक परमेस्वरना पोल्लो केन्जुन विस्वासते मुने दान्तोरक मति ओरक आपुना धन संपतितुन अनि जिवोतमेन तिन्दान-उन्डानातिगा पसेमास बराबर विस्वासता अनुसार बरोबर मनो आयनुरक। ओरक काटा पोदेलातिगा अरतांग विजांग लेहका मन्तोरक। 15मति इमान्दारिते अनि सहेनकिस पोसोरिंग परमेस्वरना पोल्लो मानेमास ताकान्तोरक ओर लोकुरक सोबाता जागाते अरतांग विजांग लेहका मन्तोरक।”

वेळिचितुन मकिहच इरमाट

(मर ४:२१-२५)

16अनि येसु असा इतुर, “टिवरितुन पय्टेकिसुन बोरे अळका अडिय मुच इरोरक अनि कटुल अडिय वने इरोरक। मति लोपा हनवालोरकुन वेळिचि आयि इन्जोर कोपेलातिगा इरान्तोरक#मत्ति ५:१५; लूका ११:३३ । 17अनि सबोय रहस्य बाहरो दिसार अनि बाताले मकिहतोर अद वने बाहरो दिसार, बाहरटोर सबोयलोरकुन समजेमायार#मत्ति १०:२६; लूका १२:२। 18इन्जोर निमाट नावा पोल्लो बदाम केन्जान्तोरिट इन्जोर हुशयार मन्ट। सोबाय मन लावेकिसुन केन्जान्तोर ओरकुन सबोय समजेहकियानुर, अनि सोबाय मन लावेकिस केन्जोर ओर लोकुरकनिकेडाल आपुना समजेमान्तोर अदेन वने वापस येतानुर।”

येसुना खरोय अवहरि अनि तमोलोरक

(मत्ति १२:४६-५०; मर ३:३१-३५)

19येसुना अवहरि अनि येसुनोर तमोलोरक येसुना हेरे वातुरक, मति लोकुरा भीळता मारे येसुना हेरे हन्दिला परोर आतुरक। 20असके वरोर मानेय येसुना हेरे हन्जुन, “निया अवहारि अनि निवोर तमोलोरक बाहरो नितितोरक, अनि निकुन मिलेमायान साटि वातोरक” इन्जोर इतुर। 21इद केन्जुन येसु लोकुरकुन, “परमेस्वरना पोल्लोतुन केन्जुन अदेन मानेमान्तोरक ओरक नावोर अवाल अनि तमो आन्दुरक” इदाम उत्तर हितुर।

येसु हुरेमाटियालतुन शान्ति हिन्तोर

(मत्ति ८:२३-२७; मर ४:३५-४१)

22अनि उन्दि दिया येसु अनि ओनोरक चेलालोरक डोंगातिगा अन्जतुरक अनि येसु चेलालोरकुन इतुर, “वाट, माक इद हजोर नहारता आरपार दाकाट” अनि ओरक डोंगातुन टन्डसितुरक। 23अनि डोंगा हन्दिला आस मन्दु, अनि येसु डोंगातिगा हुन्चतुर। असके नहारतिगा हजोर हूरेमाटियाल वात, अनि डोंगा एते निन्दिला लाकतु, अनि ओरक पकाय तकलिपते मन्तोरक। 24असके चेलालोरक येसुना हेरे वासुन ओन तेहतुरक, “स्वामि! स्वामि! माक ते नहारतिगा मुळंच हायिला आतोरोम!” इन्जोर इतुरक। असके येसु तेचुन हुरेमाटियालतुन अनि एतांग हजोर लाटानुंग रांगतुर; अनि अव कमेक आतुंग, अनि शान्ति आतु। 25असके येसु चेलालोरकुन, “बाक्या निमाट नावागा इचोन कमि विस्वास किन्तोरिट बहे?” इन्जोर इतुर। मति चेलालोरक वरियस, “येर बोर आन्दुर? ओद हुरेमाटियालतुन अनि एतुन वने आग्या हिन्तोर, अनि अव सबोय येसुनांग केन्जान्तांग” इदाम वरोन दुसरोनसंग दंगे मास वळकिला लाकतुरक।

दुष्टात्मा पयताल मानेयतुन येसु सुदरे किन्तोर

(मत्ति ८:२८-३४; मर ५:१-२०)

26असके येसु अनि ओनोर चेलालोरक गिरासोनिया देशतिगा#८:२६ गिरासोनिया यरदन नदिता पूरव बागता उन्दि देश मता। अवतुरक, अनि इद गलील प्रदेशता मुने मन्ता। 27अनि येसु नहारता टकातिगा अवतुर असके अद सहेरतोर वरोर मानेय येसुन मिले मायान साटि वातुर, ओनिगा दुष्टात्मांग मन्दुंग। पकाय दियांग मुनेटाले दुष्टात्मांग ओन पयिस मन्दुंग। अनि ओर पकाय दियांगताल कपळांग करोर आस अनि लोतिगा मनोर आस बिच गुडिनांग नडुम मन्दुर। ओना कय अनि कालकुन साकळिते दोहन्दुरक मति ओर अवेकुन देहचिंदुर अनि दुष्टात्मा ओन सुनसान जागातिगा ओसुन अगा ओन वलिहिन्दुंग। 28येसु अद दुष्टात्मातुन ओर मानेयनिकेडाल पसियस हन्दाना आग्या हिस मन्दुर। 29अनि दुष्टात्मांग पयतोर मानेय येसुन हुळसुन किलसोरिन येसुना मुने अरसुन “हे सबोयताल हजोर परमेस्वरनोर मरि, निकुन नावाताल बाताल बुतो मन्ता? नाकुन पकाय तकलिप हेमा इदाम नना निकुन विनन्ति किन्तोना!” इन्जोर हजोर लेंगदे इतुर।

30अनि येसु दुष्टात्मा पयतोर मानेयतुन, “निया बाताल पोरोय मन्ता?” इन्जोर पुच्चेमातुर ओर इतुर, “सेयना,” बाक्याकि पकाय दुष्टात्मांग ओनिगा उच मन्दुंग। 31माकुन नरकता गुमयाते हन्दाना आग्या हेमा इदाम दुष्टात्मांग येसुन विनन्ति कितुंग।

32अनि अद मटातिगा पदिना हजोर उन्दि गोहडि मेयिला आस मन्दुंग अवेहकुन हुळस माकुन अव पदिनिगा हन्दिला हिम इन्जोर दुष्टात्मांग येसुन विनन्ति कितुंग। अनि येसु दुष्टात्मातुन हन्दाना आग्या हितुर। 33अनि दुष्टात्मांग ओर मानेयतिगाडाल पसियसुन पदिंगनिगा होळियतुंग, अनि अव पदिना गोहडि घाटाडताल विचोरिंग हजोर नहारतिगा हन्जुन अरतुंग अनि मुळिन्चुन हातुंग।

34असके पदिंग मेहवालोरक इव सबोय पोल्लोतुन हुळसुन अगडाल वितितुरक अनि सेहेरतिगा अनि नाहकनिगा हन्जुन ओरक हुळताल पोल्लोनुंग वेहतुरक। 35अनि आता पोल्लोनुंग हुळान साटि लोकुरक पसियस येसुना हेरे वातुरक, दुष्टात्मांग पसियिस मता ओन सन्दरांग करसुन सोबाय बुद्धिते येसुना काल्कना हेरे कमेक उदितोर हुळसुन लोकुरक वरियतुरक। 36दुष्टात्मांग पयताल मानेय बदाम बेस आतुर इन्जोर पदिंग मेहवालोरक ओर लोकुरकुन वेहतुरक। 37असके गिरासेन देशतोरक हेरे गुरेटोरक सबोय लोकुरक पकाय वरियस मावा हेरेटाल हन इन्जोर येसुन विनन्ति कितुरक। अदाम येसु डोंगातिगा उचुन मलस हन्दिला लाकतुर।

38असके दुष्टात्मांग पसियस हतोर ओर मानेय येसुनासंग मन्दिला साटि परवांगि तलकतुर, 39मति येसु ओन इतुर, “निमा आपुना लोतिके मलस हन्जुन परमेस्वर निया साटि कितोर हजोर हजोर बुतोतुन लोकुरकुन वेहा” इदाम वेहचुन येसु ओन लोहतुर। अनि ओर मानेय हन्जुन येसु नावा साटि बदाम हजोर हजोर बुतो कितोर इन्जोर सबोय सेहेर नाहकनिगा वेहन्दुर।

आयिरना पेडि अनि उन्दि बिमार आळ

(मत्ति ९:१८-२६; मर ५:२१-४३)

40अनि येसु गिरासेना देशतिगाडाल मलस हन्जुन गलील प्रदेशतिगा अवतुर असके सबोय लोकुरक गिरदा आसोरिंग येसुन मिलेमातुरक, बाक्याकि ओरक येसुन पोसन्दुरक। 41अनि अचोन बेरा आयिर पोरोयतोर वरोर मानेय वातुर, ओर यहुदि समाज मन्डलिता मुक्याल मन्तोर, अनि ओर येसुना काल्कनिगा अरस ओना लोतिगा देय इदाम विनन्ति कियाला लाकतुर, 42बाक्याकि बारा वरसाना ओना उन्दिय मियाळ हायिल आस मन्द। अनि येसु आयिरना लोतिके हन्दिला लाकतुर असके मानेयकना पकाय भीळ एका-मेका लोकुरक दुरस-दुरसुन येसुना परके हन्दिला लाकतुरक।

43असके उन्दि आळ मता अदेन बारा वरसाताल नतुर हन्दाना बिमारि मता, अनि अद आपुना बिमारितिगाडाल सुदरेमायान साटि डाक्टेरनिके हन्जुन आपुना सबोय धनसंपतितुन मारिहतु ते वने बोरे तान सुदरे कियापरोरक आतुरक। 44अनि अद बिमार आळ येसुना परकेडाल कमेक हन्जुन येसुना सन्दराता कोडितुन इटतु, अचोन सान्डे ताना नतुर हन्दाना बन्द आत। 45“नाकुन बोर इटतुर?” इन्जोर येसु पुच्चेमातुर। असके सबोय लोकुरक नना आयो नना आयो इदाम इतुरक, असके पतरास अनि ओनोर संगे मन्तोरक, “हे गुरु, निया ते परके सबोयतिकेडाल लोकुरा भीळ वायिला आता अनि निकुन हुळान साटि लोकुरक दुरस-दुरस निया हेरे वान्तोरक” इदाम इतुरक। 46मति येसु इतुर, “बोरे नाकुन इटतोर; नावागडाल लाव पसियता इन्जोर नना पुतान।” 47अनि नना ते इदेक मकिला परोन इन्जोर अद आळ हुळस कसिंगसोरिंग वासुन येसुनांग काल्कनिगा अरतु। अनि अद बाक्या येसुन इटत अनि बदाम सान्डे सुदरे मात इन्जोर सबोय पोल्लोंग लोकुरा मुने वेहिला लाकत। 48अनि येसु आळदुन, “नोनि, निया विस्वास निकुन सुदरेकिता, निमा शान्ति आसुन हन” इन्जोर इतुर।

49अनि येसु तान इदाम हन्दिला आस मन्दुर असकेय यहुदि समाज मन्डलितोर मुक्याल मानेयना लोतिगाडाल बोरे वासुन, “निया मियाळ हातु, इन्जोर निमा गुरुन असा तकलिब हेमा” इदाम इतुर। 50असके येसु केन्जुन, “निमा वरियमा; केवल विस्वास इरा, अनि निया मियाळ बेस आयार” इन्जोर ओन इतुर।

51अनि येसु समाज मन्डलितोर मुक्याना लोतिगा वातुर असके येसु अनि पतरासिन अनि युहन्ना अनि याकुबिन अनि पेडिना अवाल-बाबोन तासि दुसरो बोने आपुनासंग लोन लोपा वायिला हेवोर आतुर। 52सबोय लोकुरक अद पेडिन साटि किलिला आस मन्दुरक असके येसु ओरकुन इतुर, “किलमाट, अद हायो मति हुन्जिला आता।” 53अनि अद पेडि हाता इन्जोर सबोय लोकुरक पुन्ज मन्दुर इन्जोर येसुन कविला लाकतुर। 54अनि येसु पेडिना कयदुन पयतुर, “हे पेडि, तेदा!” इदाम केयसुन इतुर। 55अनि अद पेडिना जिवा मल्स वातु, अनि अद सान्डे तेच उदित। अनि अद पेडिन बाताले तिन्दिला हिसिम्ट इन्जोर येसु आग्या हितुर। 56अनि अद पेडिना अवाल-बाबो दंगे मातुरक, मति इगा बाताल आत अद पोल्लोतुन बोने वेहमाट#८:५६ यहुदिलोकुरक येसुन विरोद किन्दुर इन्जोर येसु चमत्कारतुन यहुदिलोकुरकुन वेहमाट इन्दुर मति दुसरो जातितोर लोकुरकुन वेहाट इन्दुर। इन्जोर येसु ओरकुन चेतेकितुर।

Listen to लूका 8