Bible translation: Sidama © Bible Society of Ethiopia, 2017 Recording of the New Testament ℗ 2020 Hosanna

Sidama - 2017 BSE (NT) Non Drama

Sidama - 2017 BSE (NT) Drama

Qeesootu roorrichi Isxifaanoosi, «Kuni yinanni coyi garaho?» yee xa'mi.
Isxifaanoosino, «Roduuwa'yanna annuwa'ya, hanni macciishshe! Anninke Abirihaami Kaaraani gobba ha'rara albaanni Mesiphexoomiyaho hee'reenna, ayirrinyu Magani leellinosi. ‹Gobbakkinni fulte, fiixikkiwiinni baxxite, ani leellisheemmohe gobba ha'ri!› yiinosi. Hatte yannara Keledootu gobba agure mare Kaaraani hee'rino. Annisi reyihu gedensaanni Maganu Kaaraani gobbanni kayise, kune techo ki'ne heedhinanni gobba abbinosi. Dayi yannara kaxxe uurranno darga nafa diuyinosi. Ikkollana hattenne gobba isiranna sirchisira iqqa asse aara xaarino. Xaarinohu Abirihaami ooso ilikkinniiti. Sirchisi allaggu gobbara wosi'ne hee'rannotanna hakkiichono shoole xibbe diro borojje ikke, kadame galannota kulinosi. Maganu qole, ‹Insa borojje asse gashshi'ranno manni aanano yoo yeemmo. Hakkunni gedensaanni borojjimmatenni fulte, hakkiichonni magansidhannoe› yee coyi'rino. Hakkunni gedensaanni barcimate gondooro uyinosi; kunnira Yisihaaqi ilamihunni settikki barra barcimshiishino. Yisihaaqino beettosi Yaiqoobi barcimshiishino. Yaiqoobino gosate annuwa ikkitinore tonaa lamenta oososi barcimshiishino.
«Yaiqoobi ooso rodoonsa Yooseefi hinaasse Gibitsete gobbara borojjicho ikke hee'ranno gede hirtinosi. Maganu kayinni ledosi no. Qarru baalunkunnino fushshe, Gibitsete moote Feriooni albaanni ayirrinyenna egenno uyinosi. Mooteno Gibitsetenna minisira baalaho hajajaancho assinosi. Hatte yannara Gibitsetenna Kana"aani gobba baalate lowo qarra abbitino hude ubbino. Annuwankeno sagale afi'ra didandiitino. Yaiqoobi Gibitsete gobbara gidu noota macciishshe, umo asse annuwanke hakkiichira soyino. Layinkimeeshsho Gibitse hadhu yannara Yooseefi roduuwisira isonoo egensiisino. Ayiddesino Ferioonira egensiisino. Hakkunni gedensaanni Yooseefi annasi Yaiqoobinna ayiddesi baala isiwa dagganno gede assino. Kiironsa lamalayina onte mannaati. Yaiqoobino kae Gibitsete gobba ha'rino; isino annuwankeno hakko reyitino. Miqqansa Sekeemi haa'ne ha'ne Abirihaami Hamoori oosowiinni woxunni hidhino waammara madaarroonni.
«Maganu Abirihaamira xaare uyino hexxo wo'mitanno yanna gambissuta, Gibitsete hee'rannohunniti manninke kiiro batidhino. Kuni ikkinohu Yooseefi egenninokkihu wolu moote Gibitsete gobbara mooha geeshshaati. Kuni haaru moote manninkera gano gane annuwanke gadadisino. Qaaqquullinsa reyara fushshite gobba huntanno gede annuwanke qarrisino. Muse hatte yannara ilamino. Isi Maganu illera xuma qaaqqooti. Sase agana annisi mine lophino. Gobba fushshine hunni yannara Feriooni beetto affe adhite ilase gede assite lossidhino. Isi Gibitsete gobba egenno baala rose, coyinninna loosunni jawaata ikkino.
«Muse shoyilloo diro ikkisita fiixasi Israeele towata hasi'ri. Insa giddonni mitto, mittu Gibitsete manchi gawajjannanna tuganna afe, rabbate hakkonne Gibitsicha gane shiino. Maganu isi widoonni qole borojjimmatenni fushshannonsata gosasi qaaggannoha lawinosi. Insa kayinni tenne diqaaggino. Layinki soodono lamu Israeelooti mimmitu ledo giwantanna afe araarsara hasi're, ‹Ki'ne diroduuwaho, mayira giwantinanni?› yiinsa. Roduu ledo giwamanni noohu Muse ka'a qole tuge, ‹Ate ninkera gashshaanchonna yoo yaattoha asse worinohehu ayeti? Be'ro Gibitsicha shiitto gede aneno shaattoeraati?› yii. Muse konne coye macciishshe, Gibitsete gobbanni xooqe Midiyaami gobba ha're hakko wosinchimma hee'rino. Hakkiicho lame labballi ooso ilino.
«Muse hatte gobbara shoyilloo diro hee'rihu gedensaanni, Siina Ilaalira nootera halallitte gobbara, buwanni noo citi giddo Maganu sokkaasinchi leellisi. Muse konne coye lae lowo geeshsha maala'li. Citunniwa shiqqi yee la"anni hee'reenna, ‹Ani annuwakki Abirihaami, Yisihaaqi, Yaiqoobi Maganooti› yitanno huuro macciishshi. Lowo geeshsha masino daafira, hakka qole la"a waajji. Mootichu, ‹Uurrootto dargi Qullaawahona lekkakki koatte fushshi. Gibitsete gobbara noohunniha manni'ya qarra addinta afoommo; qarrunnita raarensano macciishshoommo. Kunnira gatisammonsara dirroommo. Xa ate Gibitsete gobba soyammoheraatina amo› yii.
«Israeelete manni Muse, ‹Ate ninke aana gashshaanchonna yoo yaattoha assihehu ayeti?› yite gibbinosi. Maganu kayinni hakko Musenni citi giddo leellisi sokkaasinchi widoonni qole gashshaanchonna wolassannoha asse insawa soyino. Gibitsetenna Duumu Baari aana dhaggenna maalale leellishanni Gibitsetenni fushshe shoyilloo diro massaginonsahu isooti. ‹Maganu ane kayisinte gede roduuwi'ne giddonnino himanaancho soyanno'ne› yee coyi'rino Muse isooti. Halalla songe noo manni ledonna Siina Ilaali aana coyi'ri sokkaasinchinna annuwanke ledo noohu isooti. Maganunniha heeshshote qaale ninkera sayisinonkehu Muse isooti.
«Annuwanke kayinni hajajama gibbinosi; wodaninsanni galagalte Gibitse higgara halchitino. Aaroonira, ‹Hakku Gibitsetenni fushshinkehu Muse maikkinoro dianfoommona, albankeenni hadhanni massaggannonke maganna seekkinke› yitino. Hatte yannara siitu misile seekkite isera kakkalo shiqishshino. Angansanni seekkidhinorira hagiidhite jila ji'litino. Maganu kayinni insawiinni fafino. Gordu beeddahe magansidhanno gede assinonsa. Hakkuno himanaanote maxaafira,
‹Ki'ne Israeelete manna,
shoyilloo diro wo'ma,
halalla kakkalonna fushshaate,
shiqishshinoonnihu aneraatini?
Haadhine hadhinoonnihu Molooki dukkanaatinna,
Rafaani magani beeddakko misileeti.
Insa, magansidhinansara yitine,
anga'nenni seekkidhinoonni misillaati.
Kunni daafira qafadote Baabilooni gobba soyemmo'ne› yiino.
«Annuwankera halalla farci'rote dukkani noonsa. Hakko dukkana Muse Maganu kulinosinna leellishinosi garinni seekkino. Maganu albinsanni shorre huni daga gobba ragidhu yannara, annuwanke hakkonne dukkana Iyyaasu ledo hakkiichira haadhe massitino. Daawiti yanna geeshshano hakkiicho keeshshino. Daawitino Maganu albaanni ayirrinye afi're, Yaiqoobi Magani Kaaliiqi galanno mine minara huuccatto assi'rino. Maganu mine mininohu kayinni Selemooniiti.
«Ayirradu Magani kayinni mannu minino mine digalanno. Hakkuno himanaanchu,
‹Gordu ayirrinyu barcima'yaati;
baatto lekka'yanni kaxxoommowaati.
Anera mintinannie mini hiittoohoyya?
Fooliishshi'reemmo dargino hiittoohoyya?› yaanno Mootichu.
‹Konne baala dianga'ya loossino?›
yaanno» yee borreessino gedeeti.
Qoleno, «Ki'ne mokkookkootu wodananna macca beebbinoonniri! Ki'ne Annuwa'nente gede Qullaawa Ayyaana gibbinanni. Annuwa'ne xiibbinokki himanaano nooni? Insa Qullaawu daannota umo assite kultinore shitino. Ki'neno xa konne Qullaawa sayissine uyitine shitinoonni. Ki'ne sokkaasinete widoonni Seera adhitinoonni; ikkollana diagadhitinoonni» yii.

Songote miilla konne coye macciishshite lowo geeshsha hanqite, Isxifaanoosira suume ga'midhu. Isi kayinni Qullaawu Ayyaani wo'meennasi iima hige lae Maganu ayirrinye lai. Yesuusano Maganoho qiniiteenni uurre nooha afi. Kunnira, «Kuneeti, gordu fa'nameenna Manchi Beetti Maganu qiniiteenni nooha la"anni noommo» yii.
Hatte yannara insa lowo geeshsha cancitu. Macca cu'midhe mitteenni isiwa higge doddu. Katamu gobbaanni fushshite kinnatenni awwaaltusi. Naqqassannori uddannansa Saawuli yinanni wedellichi lekka mule wodhitu.
Isxifaanoosi kinnatenni awwaaltanni heedheennasi, «Mooticha'ya Yesuusa, lubbo'ya atewa haa'ri!» yee huucci'ri. Guluphe lowo qoonqonni raare, «Mooticha'ya, tenne sao kiirtootinsa!» yee kae reyi.

Listen to SOQQAMAASINETE LOOSO 7