Bena - restored so as to lose project history and reduce project size

Bena

Fyasigiye figono fivili ukufikila ikyaka kya Paasaka ni kyaka kya mikaate igingaya luhaafu. Avateekedzi avakomi na vawulanidzi va milagililwe vaatemulaga ingʼaasi kinyele iya kumwibatila uYesu, ukuta vamukome. Viitigilaga, “Fitane ukuvedza figono fya kyaka, ukuta avaanu vatane ukuhula ilyowo.”


Umusika ugo, uYesu aali ku Betaniya mu nyumba ya Simoni ye aali nu wutamwa uwa kinyamuvili pa kutala. Pe ali kuliya, iikwingilaga umwayuuva ányamuwe isupa ya liganga iyinya mafuta matalamu. Amafuta ago gaali nu lunuusi lunofu, kangi gaali ga magoobeli goloofu. Gaawuyiipwe ukuhuma ku kimelo ikiitambulwa naludo. Neke apimulage isingo ya supa iyo, amuhululidzilage uYesu pa mutuwe. Avaanu avangi avaali baaho pe valuweene ulo, viiviipaga hiilo viitigilaga, “Kye kiki ukuyadza amafuta matalamu ago? Kiba ngana gakali gagudzwe ukulutila idinaali magana gadatu (300), neke amagoobeli ago vagavilwe avahangala!” Avaanu viivangaga ukumukenyela mbandu umwayuuva uyo.
UYesu akuvalongelaga iitigilaga, “Mumuleke! Kye kiki mukumudaasa? Amalimo aga ge áandimiye manofu. Avahangala muli navo ifigono fyonda, ponda pe mwikeela musiilemwa ukuvatanga. Neke kangi uneene musili naane ponda. Umwayuuva uyu álimile mwe ágeliye. Águbakile amafuta umuvili gwangu ukugugelanidza ukusiilwa kwangu. Ndakyene ndikuvalongela ndiitigila, ponda pe yiidalikwa iMola iNofu mu lidugulu lyonda, avaanu valiiwuka nu kugalonga amalimo aga manofu ge áandimiye umwayuuva uyu.”


Neke baaho uYuda Isikalyote, yumwinga mu vanyigendwa vanyikyumi na vavili (12), ahelelage ku vateekedzi avakomi, ukuta amusutule uYesu ukwawo. Pe vaaviye vápuliike ulo viikeelaga hiilo, neke vamuhuuvidzage uYuda ukumupeela amagoobeli. Suwe uYuda iivangaga ukutemula umusika umunofu ugwa kumusutula uYesu ukwawo.


Ikigono ikya kutala ikya kyaka kya mikaate igingaya luhaafu kiifikaga. Ikyo kye kigono ikya kuhindzwa indzanangʼolo iya Paasaka. Avanyigendwa va Yesu vakumuwuudzaga viitigilaga, “Kwe kwiya kwe wiisaka tuhelele tukakugelanidzile pa kuliila ikyakuliya kya Paasaka?”
UYesu iitumaga avanyigendwa vavili iitigilaga, “Muhelelage ku wudzenge wa Yelusalemu, mudzitaangʼana nu mwadaada íitwikile indziilo ya lulenga. Mumuniniilage ukufikila mu nyumba ye iikwingila, apo mumulongelage umunya nyumba uyo mutigilage, ‘UMuwulanidzi iiwuudza ukutigila, “Kigenda kwiya ikiyumba kya vagendzi? Ndiisaka ukuliilasa na vanyigendwa vangu ikyakuliya kya Paasaka.” ’ Uyo ahadza akuvawoneesa ikiyumba ikikomi kya kukyanya ku goloofwa íkigelaniidzwe pa kwikala. Umo mwe mwene mukatugelanihidzile.”
Avanyigendwa viihelelaga ku wudzenge, neke vakawonage dzonda dzili ngita kye ávalongiye uYesu. Neke vagelanidzage ikyakuliya kya Paasaka. Pe yaafikile ikyamihe, uYesu pamwinga na vanyigendwa vaakwe vanyikyumi na vavili viifikaga mu kiyumba ikyo. Pe vali mu kuliya, uYesu akuvalongelaga iitigilaga, “Ndakyene ndikuvalongela ndiitigila, yumwinga umwenyo ahadza akuusutula, uyo ye mwene ye iiliilasa naane!” Avanyigendwa viihuguvalaga mbandu, yumwinga yumwinga akumuwuudzaga uYesu iitigilaga, “Ongo, ndiivedza siye neene?” UYesu iihigaga iitigilaga, “Ye yumwinga umwenyo vanyikyumi na vavili, ye iidzaba umukaate mu kitonga pamwinga naane. Ndakyene uMuswamuve va Muunu iihelela kukomwa, ngita kye lúsimbiilwe wiimila wa mwene. Neke kangi ali nu lukali uyo ye akumusutula uMuswamuve va Muunu! Kiba umuunu uyo akali atane ukuholwa.”


UYesu na vanyigendwa vaakwe pe vali mu kuliya, iinyamulaga umukaate, akugufuunyililaga, iimegulingʼasaga, akuvapeelaga avanyigendwa vaakwe, iitigilaga, “Kote muliyage, ugu gwe muvili gwangu.” Neke anyamulage ikinywelo ikili ni difwayi, amuhongedzage uNguluvi, avapeelage, vonda vanywelage ukuhuma umo. Iilongaga iitigilaga, “Iyi ye danda yangu ya lufingo, iyiikwitika wiimila wa voloofu. Ndakyene ndikuvalongela ndiitigila, sindilaanyuwa kangi idifwayi ukufikila ikigono pe ndilaanyuwa idifwayi imiya ku wutwa wa Nguluvi.” Neke viimbage ulwimbo lwa kumulumba uNguluvi, vahegage vahelelage ku Kidunda kya Miseyituni.


UYesu akuvalongelaga avanyigendwa vaakwe iitigilaga, “Unyeenye nyivonda muhadza mwinyila nu kuundeka, pakuva lúsimbiilwe ukutigila,
‘Ndihadza ndikumutova umudiimi va ngʼolo,
nadzi ngʼolo dzihadza dziipalaangʼana.’
“Neke kangi pe ndiivedza ndídzulubwike, ndihadza ndikuvalongola ukuhelela ku Galilaya.” UPetulo iitigilaga, “Nde vavedzage vakukuleka vonda, uneene sindikukuleka.” UYesu akumuhigaga iitigilaga, “Ndakyene ndikukulongela ukutigila, ikilo iya neengʼuli pe yisinaa yivika indzogolo ulwa kavili, wiivedza úungʼaanile nyakadatu.” UPetulo iikangadzaga hiilo iitigilaga, “Nde ndivedzage ndili munya kufwilasa, uneene sindikukaana nambi!” Avanyigendwa avangi vonda, navo viilongaga ndeeni.


UYesu na vanyigendwa vaakwe vaaheliye apoono apiitambulwa Getisemane, akuvalongelaga iitigilaga, “Mwikale baaha, uneene pe ndiihelela kulapangila.” Akuvanyamulaga uPetulo, uYakobo nu Yohana iihegaga navo. Neke uYesu avangage ukuhuguvala nu kunyengʼemala hiilo, atigilage, “Inumbula yangu yili nu wuhuguvafu mbandu, ngita kufuwa. Mwikale baaha, muvedzage miiho.” UYesu aahegeliye pawutalo padebe, iigwisile paanyi kinyalileme, aalapangilaga kwa Nguluvi iitigila, ngana lwivagila, amuhedzehedze umusika gwa mumuko ugo. Mu ndapangilo idzo iitigilaga, “Aba, ve Daada kisikukulema kiinu. Ndiinyilika uunyedzehedze ikinywelo kya mumuko iki. Neke kangi si kutigila lulimikage lwe ndíkeeliye uneene, nda haamu, lulimikage lwe úkeeliye uveeve!”
Iipilukaga, iiwonaga avanyigendwa vonda vágoneeliye. Neke amuwuudzage uPetulo atigilage, “Uveeve Simoni, úgoneeliye? Úlemiilwe ukuvedza miiho nambe kivalilo kimwinga? Muvedzage miiho nu kulapangila, ukuta ingemyo dzitane ukuvalema. Inumbula dzeenyo dzíitawuwe, neke kangi imivili gingaya ngufu.”
Iihelelaga kangi kulapangila dziidzila dze álapangiye ulwa kutala. Pe iipiluka, iiwonaga vágoneeliye kangi, pakuva amiiho gaawo gaali ni tulo. Sivaludzeeliye ulwa kulonga. Iihelelaga kulapangila ulwa wudatu. Pe aapilwike, iitigilaga, “Mwave múgoneeliye nu kupola? Suwe! Ikivalilo kífikile. Lolage, uMuswamuve va Muunu iisutulwa mu mawoko ga vanya ndzanangifu. Mwime! Tuhege! Lolage, umunya kuusutula ali biihi.”


UYesu pe ali mu kulonga idzi, uYuda yumwinga mu vanyigendwa vanyikyumi na vavili, iifikaga pamwinga ni lilugu lya vanya mapanga ni sondzo. Vátumiilwe ukuhuma ku vateekedzi avakomi, avawulanidzi va milagililwe na vavaha va Vayahudi. Umunya kumusutula uyo aali ávapeeliye ikimanyilo ukutigila, “Umuunu ye ndihadza ndikumunoonela pe ndikumuhungila, ye mwene. Mumwibatage muhegage nave ali mu mawoko ga vakolakyanda.”
Umusika guugo, uYuda iihelelaga kwa Yesu, akumulongelaga iitigilaga, “Muwulanidzi!” Akumunoonelaga. Avaanu avo vakumwibataga uYesu. Neke yumwinga mu avo avaali pamwinga nu Yesu, ahoonolage kisaatu ilipanga, amumyatulage ilisiikidza umulimila-vangi va muteekedzi umuvina. UYesu akuvawuudzaga iitigilaga, “Mwádzile na mapanga ni sondzo kuundzibata, ngita ndikuyigaluka isilikaale? Ifigono fyonda, ndikali naanye mu lipaala lya tembeli, ndikiiwulanidzaga kangi musikaandzibatiige! Neke kangi dzonda idzo dzíhumiye, ukuta uWusimbe uWiimike wukwile.” Avanyigendwa vaakwe vonda vakumulekaga uYesu viinyilaga.
Aali pwali umudiimi yumwinga ye amuniniilaga uYesu, aafwalile umwenda umudekedeke. Vaasakaga ukumwibata, umwene akuvalekelaga umwenda mu mawoko gaawo, iinyilaga wufuula.


Vakumusindikaga uYesu ku nyumba iya muteekedzi umuvina. Avateekedzi avakomi na vavaha va Vayahudi, pamwinga na vawulanidzi va milagililwe vakumulundanilaga apo. Pe vamusindikaga, uPetulo amuniniilaga uYesu pa wutaali, iifikaga pa lipaala lya muteekedzi umuvina. Apo akwikalaga pamwinga na vakolokolooni iikoota mooto.
Avateekedzi avakomi pamwinga ni kiwungu kyonda ikya Vayahudi, viisakulaga uwoolesi wa wudesi uwa kumutaaha uYesu, ukuta vamukome. Neke kangi vasawuweene uwoolesi wuwuvedzaga. Avaanu voloofu voolelelaga uwoolesi wa wudesi, neke kangi uwoolesi waawo siwaapuliingʼanaga.
Avangi mu avo, viimile ukoolela uwoolesi wa wudesi viitigilaga, “Tukaapuliike iitigila, ‘Ndihadza ndiimamula aPiimike pa tembeli apaadzengiilwe na vaanu, kangi mu figono fidatu ndiidzenga iyingi iyisiidzengwa na vaanu.’ ” Na mu lukaani ulo, uwoolesi waawo siwiidiingʼiine.
Neke umuteekedzi umuvina iimage pagati, amuwuudzage uYesu atigilage, “Ongo, we woolesi wuki uwu we viileeta avaanu wiimila waako? Usiihiga kiinu?” Neke kangi uYesu atanage ukuhiga kiinu. Umuteekedzi umuvina iiwilaga ukumuwuudza iitigilaga, “Uveeve ve Mesiya, Muswamuve va Mufuunywa?” UYesu iihigaga iitigilaga, “Ye neene. Neke kangi muhadza mukumuwona uMuswamuve va Muunu íikalile ulubali ulwa kundiyo ulwa Nguluvi uMunya Ngufu, pe iikwadza mu mafunde ga kukyanya.” Umuteekedzi umuvina iideemulaga umwingila gwakwe, iitigilaga, “Twisakula kiki kangi ukuvedza na voolesi avangi? Mwípulikiye yuunye uwulonga fivi waakwe! Unyeenye mwitigila wuli?” Vonda viihigaga viitigilaga, iivagila akomwage.
Neke baaho avangi vamufuunyilage amati, vamudindage nu mwenda ku miiho, vamutovage ni fundzi, vamulongelage vatigilage, “Salile, ye ani ye ákutovile!” Avakolokolooni vakumunyamulaga, vakumutovaga ifivaate.


Umusika gonda ugo, uPetulo aali mu lipaala, paanyi pa kiyumba apoono pe aawuudzwaga uYesu. Baaho iikwadzaga umuhindza umulimila-vangi va muteekedzi umuvina. Pe aaviye ámuweene uPetulo iikoota umooto akumulolaga mbandu, akumulongelaga iitigilaga, “Uveeve naave ukali pamwinga nu Yesu umuhuma ku Nasaleti yula.” UPetulo iikaanaga iitigilaga, “Sindiidzeela nambe kulufika lwe wiilonga uveeve!” Neke ahelelage ku mulyango. Baaho yiivikaga indzogolo.
Pambele umuhindza uyo akumuwonaga kangi, neke awiilage ukulonga ku vaanu aviimile apo atigilage, “Uyu nave ye yumwinga navo.” UPetulo iikaanaga kangi.
Pe gwaviye gúhelaniidze musika mudebe, avaanu avaali víimile apo viitigilaga, “Ndakyene uveeve ye yumwinga mu vaanu avo, pakuva uveeve naave wiihuma kuuko ku Galilaya!” UPetulo iivangaga ukwiyiigilidza nu kuyiiga iitigila, “Umuunu ye mwitambula uyo, sindimudzeeliye!”
Musika guugo indzogolo yiivikaga ulwa kavili, neke uPetulo iiwukage amadzwi gala ge amulongiye uYesu ukutigila, “Indzogolo pe yisinaa yivika ulwa kavili, wiivedza úungʼaanile nyakadatu!” Neke avangage ukuvemba hiilo.

Listen to Maluko 14