Mixtec, Southwestern Tlaxiaco: Mixtec. Southwest Tlaxiaco (New Testament)

Mixtec. Southwest Tlaxiaco

Jee nka̱jiéꞌé tuku Jesús xinéꞌénꞌ re̱ꞌ nu̱u̱nꞌ rá ñɨvɨ yuꞌú nteñúꞌún. Jee nku̱tútú víꞌí ñɨvɨ nu̱u̱nꞌ re̱ꞌ, saáva nki̱vɨ Jesús ña̱kuneeꞌ re̱ꞌ iniꞌ ɨɨn barkúꞌ ya̱ ñúꞌún nu̱u̱nꞌ nteñúꞌún. Jee ntáká rá ñɨvɨ nééꞌ yuꞌú nteñúꞌún. I̱ña̱jée nxi̱néꞌénꞌ víꞌí re̱ꞌ Tu̱ꞌun Ndiosíꞌ nu̱u̱nꞌ ráa jín rá tu̱ꞌun ya̱ kúnkunuún káꞌánꞌ. Sáá xínéꞌénꞌ re̱ꞌ, jee nkachiꞌ re̱ꞌ:
―¡Teso̱ꞌo rán! Ɨɨn te̱e jiákɨ́nꞌ tataꞌ sáꞌá nkene re̱ꞌ kua̱kakɨnꞌ re̱ꞌ nikɨn tataꞌ. Jee sáá xínáváꞌ‑a nikɨn tataꞌ nu̱u̱nꞌ ñu̱ꞌún, jee sava rá nikɨn tataꞌ ñe̱te̱ꞌ yuíchí. Jee nkenta rá saaꞌ jee nyajiꞌ rátíꞌ maa. Sava ráa ka̱ꞌ ñe̱te̱ꞌ nteñu yu̱u̱ꞌ nu̱u̱nꞌ ntu̱ví víꞌí ñuꞌun, jee ya̱chi̱ꞌ ni nta̱ꞌvi̱ꞌ nikɨn yukuán chi ntu̱né káá kókún ñuꞌun. Soo sáá nkenta nka̱niiꞌ jee nkasun ráa ya̱ sááꞌ, chi ntu̱ví kue̱ꞌe̱ꞌ yoꞌo‑o, jee nnachi‑i. Jee sava ráa ka̱ꞌ ñe̱te̱ꞌ nteñu rá yu̱ku̱ꞌ iñu. Jee ñaꞌnu rá yu̱ku̱ꞌ iñu jee nsi̱káꞌáꞌ ráa maa. Saáva ntu njiáꞌa‑a tataꞌ. Rá inka ka̱ꞌ nikɨn ñe̱te̱ꞌ nu̱u̱nꞌ ñu̱ꞌún váꞌa jee njia̱ꞌa‑a tataꞌ váꞌa. Nta̱ꞌvi̱ꞌ‑i, jee ñaꞌnu‑u, jee ta ɨɨn njia̱ꞌa‑a o̱ko̱ꞌ u̱ji̱ꞌ (30), jín u̱ni̱xiko (60), jín sientúꞌ (100) nikɨn ka̱ꞌ.
Jee nkachiꞌ Jesús:
―Ñɨvɨ ya̱ íyó rá so̱ꞌo sáva teso̱ꞌo, jee teso̱ꞌo va̱ꞌa.


Jee sáá nxi̱nóo maá rá ñɨvɨ Jesús, jee rá ñɨvɨ nkino̱o ka̱ꞌ jín rá u̱xu̱vi̱ꞌ (12) te̱e ni̱ka̱tu̱ꞌún ráa maa ná kuíni káchíꞌ tu̱ꞌun vá.
Jee nkachiꞌ re̱ꞌ nu̱u̱nꞌ ráa:
―Nu̱u̱nꞌ ránoꞌó chi ntaji Ndiosíꞌ tu̱ꞌun re̱ꞌ ya̱ nyɨse̱ꞌí, jie̱ꞌe̱ꞌ ya̱ na̱ja kívɨ ñɨvɨ naꞌá Ndiosíꞌ jee tátúníꞌ re̱ꞌ nu̱u̱nꞌ ráa. Soo nu̱u̱nꞌ rá inka ka̱ꞌ ñɨvɨ, ntáká tu̱ꞌun jiáꞌa‑a nu̱u̱nꞌ ráa kúvi tu̱ꞌun ya̱ kúnkunuún káꞌánꞌ‑a, sáva,
súka̱ꞌ néꞌyá ráa rá tiñu sáꞌá Ndiosíꞌ,
soo ntu néꞌyá ráa maa,
jee súnika̱ꞌ tésóꞌo ráa,
soo ntu jiáku̱ꞌun iniꞌ ráa,
sáva nsáꞌ níkó iniꞌ ráa sáva nsáꞌ kunekáꞌnú iniꞌ Ndiosíꞌ jie̱ꞌe̱ꞌ kua̱chi ráa
―nkachiꞌ Jesús.


Jee nkachiꞌ re̱ꞌ nu̱u̱nꞌ ráa:
―¿Á ntu jiáku̱ꞌun iniꞌ rán tu̱ꞌun yaꞌá ya̱ kúnkunuún káꞌánꞌ? ¿Ré ntu̱ví jiáku̱ꞌun iniꞌ rán yaꞌá, na̱ja ki̱ku̱ꞌun iniꞌ rán nɨꞌɨ rá inka ka̱ꞌ tu̱ꞌun ya̱ kúnkunuún káꞌánꞌ rúja? Te̱e xínáváꞌ nikɨn kúvi kuéntáꞌ ɨɨn te̱e stékútu̱ꞌún tu̱ꞌun váꞌa Ndiosíꞌ. Jee sava ñɨvɨ kúvi ráa kuéntáꞌ íyó ñuꞌun káá iniꞌ ichi vá nu̱u̱nꞌ xínáváꞌ re̱ꞌ nikɨn. Jee sáá tésóꞌo ráa tu̱ꞌun vá, jee ntañúꞌún kuitɨꞌ va̱ji i̱toꞌoꞌ ta̱chi̱ꞌ néꞌí, naní Satanás, jee ixtá‑a tu̱ꞌun ya̱ njia̱ꞌa te̱e vá nu̱u̱nꞌ ráa.
’Jee suni sukuán sava rá ñɨvɨ ka̱ꞌ kúvi kuéntáꞌ rá íyó nteñu yu̱u̱ꞌ sáá xináváꞌ te̱e vá maa. Sáá tésóꞌo ráa Tu̱ꞌun Ndiosíꞌ, jee kúsɨ́ɨꞌ iniꞌ ráa, jee kuísá tɨ́ɨn ráa maa. Soo ntu kúun yoꞌo tu̱ꞌun vá iniꞌ ánímaꞌ ráa, jee ntu kúkutú ráa ntu kúníꞌin ráa jín Tu̱ꞌun Ndiosíꞌ. Sáá táꞌánꞌ ráa tu̱nóꞌó, áxí sáá jíto u̱ꞌvi̱ꞌ ñɨvɨ ráa, jie̱ꞌe̱ꞌ Tu̱ꞌun Ndiosíꞌ, yukuáni jee níkóyátá iniꞌ ráa nu̱u̱nꞌ Tu̱ꞌun Ndiosíꞌ.
’Jee sava rá ñɨvɨ ka̱ꞌ kúvi kuéntáꞌ rá nikɨn ña̱kava‑a nteñu rá yu̱ku̱ꞌ iñu sáá nxi̱náváꞌ te̱e vá maa. Suviráa kúvi rá tésóꞌo tu̱ꞌun vá, soo nániꞌvɨꞌ víꞌí iniꞌ ráa jie̱ꞌe̱ꞌ kue̱ꞌe̱ꞌ tiñu íyó iniꞌ ñɨ̱vɨ́ yaꞌá. Jee kuíni ráa kukúká ráa jee yaꞌá xínáꞌví‑i ñɨvɨ vá, jee kuíni víꞌí ráa inka nantíñú. Jee nɨꞌɨ yaꞌá ya̱ ñúꞌún kúvi iniꞌ ráa jee sátéꞌéꞌ yaꞌá Tu̱ꞌun Ndiosíꞌ, jee ntu jiáꞌnu ráa ntu jíjia ráa jín Tu̱ꞌun Ndiosíꞌ, kuéntáꞌ ntu kénta ku̱ꞌva nikɨn tataꞌ.
’Soo rá inka ka̱ꞌ ñɨvɨ kúvi ráa kuéntáꞌ rá nikɨn íyó nu̱u̱nꞌ ñuꞌun váꞌa nu̱u̱nꞌ nxi̱náváꞌ te̱e vá maa. Suviráa kúvi ya̱ tésóꞌo tu̱ꞌun váꞌa Ndiosíꞌ, jee tɨ́ɨn ráa tu̱ꞌun vá. Jee maáráa kúvi kuéntáꞌ jiáꞌa‑a tataꞌ váꞌa ya̱ ɨɨn nikɨn jiáꞌa o̱ko̱ꞌ u̱ji̱ꞌ (30), jín inka u̱ni̱xiko (60), jín inka sientúꞌ (100) nikɨn ka̱ꞌ.


Jee suni nkachiꞌ‑i nu̱u̱nꞌ ráa:
―¿Á nsáꞌ va̱ji ráa jín ɨɨn kantil, sáva tuví ráa maa chi̱ji ɨɨn ñenkóꞌó áxí chi̱ji ɨɨn i̱to rúja? Soo ntu̱ví. Chisaꞌ chísó súkún ráa maa rúja. Chi nɨꞌɨ rá yɨ́yuꞌuꞌ tu̱vi nu̱u̱nꞌ nijínꞌ. Jee suni nɨꞌɨ rá yɨ́séꞌí kenta nu̱u̱nꞌ nijínꞌ.
’¡Retú néni ɨɨn ñɨvɨ íyó so̱ꞌo sáva teso̱ꞌo, jee teso̱ꞌo va̱ꞌa‑a!
Jee suni nkachiꞌ‑i nu̱u̱nꞌ ráa:
―¡Tɨɨn kuéntáꞌ va̱ꞌa rán Tu̱ꞌun Ndiosíꞌ ya̱ tésóꞌo rán! Na̱ja kua̱ꞌ ñúkúꞌvá tɨ́ɨn rán Tu̱ꞌun Ndiosíꞌ, suꞌva taji re̱ꞌ nu̱u̱nꞌ rán ya̱ ki̱ku̱ꞌun iniꞌ rán. Suni sukuán taji re̱ꞌ ka̱ꞌ nu̱u̱nꞌ rán. Ɨɨn ñɨvɨ ya̱ tɨ́ɨn tu̱ꞌun váꞌa Ndiosíꞌ, ku̱ꞌva re̱ꞌ ka̱ꞌ ki̱ku̱ꞌun iniꞌ‑i. Soo ɨɨn ñɨvɨ ya̱ ntu tɨ́ɨn tu̱ꞌun vá, jee ne̱ tu̱ꞌun ya̱ jiáku̱ꞌun iniꞌ‑i kaneeꞌ re̱ꞌ maa nu̱u̱nꞌ‑u ―nkachiꞌ Jesús.

Jee suni nkachiꞌ re̱ꞌ:
―Suꞌva tátúníꞌ Ndiosíꞌ nu̱u̱nꞌ ñɨvɨ yɨ́ꞌɨ́ naꞌá re̱ꞌ. Kuéntáꞌ ɨɨn te̱e xínáváꞌ nikɨn nu̱u̱nꞌ ñu̱ꞌún. Jee kíxíꞌ re̱ꞌ yakuááꞌ jee nákóo re̱ꞌ nuví, jee táꞌvíꞌ rá nikɨn, jee jiáꞌnu ráa, jee suvire̱ꞌ ntu jíníꞌ sáá kúvi suꞌva. Jee maá nu̱u̱nꞌ ñu̱ꞌún vá xtáꞌvíꞌ tataꞌ. Xíꞌna táꞌvíꞌ ya̱va̱ꞌ, saájee kénta yoko, jee kuíre chítú iniꞌ yoko vá jee jíjia nikɨn. Ré nkenta nkuvi nikɨn nijia, jee nakeꞌen ráa maa jín yuchiꞌ kanchúꞌ, chi ya̱ nkenta tiempúꞌ nakeꞌen tataꞌ.


Jee suni nkachiꞌ Jesús:
―¿Na̱ jie̱ꞌe̱ꞌ kúvi ya̱ sánuún‑ó jín na̱ja tátúníꞌ Ndiosíꞌ nu̱u̱nꞌ ñɨvɨ yɨ́ꞌɨ́ naꞌá re̱ꞌ?, áxí, ¿né ɨɨn tu̱ꞌun kuvi nakani‑ó ya̱ kúnkunuún káꞌánꞌ jín‑i? Suꞌva sátíñú Ndiosíꞌ iniꞌ ñɨvɨ yɨ́ꞌɨ́ xi̱ntíín re̱ꞌ, kúvi‑i kuéntáꞌ ɨɨn nikɨn yutun kúlíꞌ maá lúlí xá, ya̱ lúlí ka̱ꞌ nu̱u̱nꞌ ntáká nu̱u̱nꞌ nikɨn táji nu̱u̱nꞌ ñu̱ꞌún. Soo sáá táji maa nu̱u̱nꞌ ñu̱ꞌún, jee jiáꞌnu‑u, jee kénta kukáꞌnú‑u ka̱ꞌ nu̱u̱nꞌ ntáká rá yuveꞌ, jee kénta jíkóꞌ nayúkuꞌ‑u, jee rá saaꞌ jíkó súkún, kuvi kɨꞌɨ rátíꞌ nu̱u̱nꞌ kátɨ́‑ɨ jee sáꞌá rátíꞌ takaꞌ ―nkachiꞌ Jesús.


Kue̱ꞌe̱ꞌ rá tu̱ꞌun ya̱ kúnkunuún káꞌánꞌ suꞌva, nxi̱néꞌénꞌ re̱ꞌ Tu̱ꞌun Ndiosíꞌ nu̱u̱nꞌ ráa, na̱kua̱ꞌ kúvi ki̱ku̱ꞌun iniꞌ ráa. Ntáká íchí nkaꞌanꞌ re̱ꞌ jín ráa, jee sukuáni nkaꞌanꞌ re̱ꞌ rá tu̱ꞌun ya̱ kúnkunuún vá. Soo nkachiꞌ sɨ́ɨ́n re̱ꞌ nu̱u̱nꞌ rá te̱e, ya̱ súkuáꞌa re̱ꞌ ráa, ná kuíni káchíꞌ ntáká rá tu̱ꞌun vá.


Sáá nkua̱a̱ꞌ ki̱vɨ̱ꞌ yukuán, nkachiꞌ Jesús nu̱u̱nꞌ rá te̱e súkuáꞌa re̱ꞌ ráa:
―Kɨ̱jia̱ꞌa‑órán íyo ka̱ꞌ ichi yúnteñúꞌún.
Jee nxi̱nóo ráa rá ñɨvɨ kue̱ꞌe̱ꞌ jee kua̱ꞌa̱nꞌ ráa jín re̱ꞌ jín barkúꞌ ñúꞌún re̱ꞌ. Jee nku̱táꞌán inka ka̱ꞌ rá barkúꞌ jín re̱ꞌ. Jee nkenta ɨɨn ta̱chi̱ꞌ níꞌin xéénꞌ. Jee nute jísóꞌ nkani ni̱ꞌin nu̱u̱nꞌ barkúꞌ, saáva va̱ji chítú nute iniꞌ barkúꞌ. Soo nkixiꞌ re̱ꞌ nu̱u̱nꞌ ɨɨn saꞌma iniꞌ ya̱ta̱ꞌ barkúꞌ. Jee nxi̱nóto ráa re̱ꞌ, jee nkachiꞌ ráa nu̱u̱nꞌ re̱ꞌ:
―¡Mestrúꞌ! ¿Á ntu̱náꞌ jítú iniꞌ nú ya̱ kuviꞌ‑ó?
Nnoto re̱ꞌ jee nku̱xeenꞌ re̱ꞌ nu̱u̱nꞌ ta̱chi̱ꞌ níꞌin jee nkachiꞌ re̱ꞌ nu̱u̱nꞌ nteñúꞌún:
―¡Nu̱ma̱ꞌ! ¡Níín!
Nku̱niꞌín ta̱chi̱ꞌ jee ña̱kui̱ñɨ̱ꞌ nteñúꞌún. Jee nkachiꞌ Jesús nu̱u̱nꞌ ráa:
―¿Na̱ kuvi chi yúꞌví víꞌí rán rúja? ¿Á ntiáꞌan kúneí iniꞌ rán nuꞌuꞌ?
Jee nyu̱ꞌví víꞌí ráa jee jíkátu̱ꞌún táꞌán ráa:
―¿Na̱ te̱e ka̱ꞌ kúvi te̱e yaꞌá ya̱ ne̱ ta̱chi̱ꞌ víjin jín ne̱ nteñúꞌún káníjiá ráa maa?

Listen to Marcos 4