Komo: Ɔngana á Kɛ̌kɛ (New Testament+)

Ɔngana á Kɛ̌kɛ

Mpɔ, ɓakpa ndɔ ɓáɔmɛɛa ɓɔbu, ɓáonga na Yéso mosá á Pilátɔ. Ɓî ɓánjú ně kó, ɓáokpanga tɔnga akɛ, ɓáogea te: «Ɓetóndondi mɔgaa nde n'aǒdema ɓato á k'ékuna nɛsu, ka gea te, ɓákáphendɛmbɛ manjanja mɔtɛ á Kaisáa, goto agi te ande Moamɛ Masíya.»
Pilátɔ áomúsia te: «Onde moamɛ ndea Ɓayúda?» Yéso áonsikisia: «Oɓɛ ámbé ɔyɔngi.» Mpɔ, Pilátɔ áǒngoɗea ɓagbɛga á ɓatoɓeigi-phɛ́a na usɛsɛ á ɓakpa gea: «Kétandaɔɔna ɓojeɗe ka phɔa nkpa ndee.» Ɓâ ndiu osoea na yɔnga te: «Yɛ aeyombokisi ɓakpa na goisaga nɛkɛ. Atókpangi na Galiláya, áɔtɔmba Yudɛ́a bui na ka ɓî abiki ojúa wani.»

Cɔ, mbusa á Pilátɔ ɔ́ka nyɔngɔ ndɔ, áomúsia ka úba mmbe Yéso ande nto á na Galiláya. Ɓî ɗáúbi gea ɗátú kusi á kɔkɔta ndea Ɛlɔ́dɛ, áonteka Yéso mɔtɛ á Ɛlɔ́dɛ nga ɗátú phɔtɔ na Yɛusalɛ́ma ka ɓ'esa ndɔ. Mbenɔ nde Ɛlɔ́dɛ amɔni Yéso, áoɓá na maseye phɛɛ. Nga, ɗányɛ́nyi mbenɔ éndǎ n'ana mɔphɛ á ɔna akɛ. Ɓî ɗáɔɔ́ka mbino akɛ, áoɓá na nseɓeɔ gea te, Yéso antɔtɔkisiande ketangaɔ. Mpɔ Ɛlɔ́dɛ áomúsiaga Yéso, Yéso kansikisiɛ gǎkɛ tanda ka nyɔngɔ. Mpɔ, ɓagbɛga á ɓatoɓeigi-phɛ́a, ɓaɗundu-ɛɔphi ɓunde ɗáɓátú wa, ɓáɔntɔnga akpɛ. Wa, Ɛlɔ́dɛ kimoci na ɓato émani nɛkɛ ɓáontondea Yéso na tɛɓa akɛ, ɓáɔmɔ́lisa ngɔ́mbɛ ánjá phɛɛ na jisa akɛ goto mɔtɛ á Pilátɔ. Esa ndɔ Ɛlɔ́dɛ na Pilátɔ ɓáɔɔngana nga, ɗáɓátú na k'oɓiɓiá mosá.
Ɓî Pilátɔ ědondanisi ɓagbɛga á ɓatoɓeigi-phɛ́a, ɓagbɛga na ɓakpa, mpɔ áǒngoɗea te: «Cɔ, ɓɔɔna, ne ye músigi nkpa nde mosá anu mmbé ɓotómobikíí na yɛ, ɓô gea te, aeyombokisi ɓakpa. Eme gǎkɛ kɛɔni tanda nyɔngɔ ájeɗe nde ɓɔntɔngi kau. Ɛlɔ́dɛ phɔtɔ káɔni kau, ka ɓondɔ unge anjisi goto mɔtɛ-asu. Ande gea yɛ, kági ka kema nde akeni ákuiɛ ú. Nemɓindisande ndiu tɔ, mpɔ néonɗeketa.» [Ka jaí á Pasáka bui, Pilátɔ ɗáonjuanisa ka ɓɔ nto á mekakɔ moci.]
Mpɔ ɓáokoga kimoci gea: «Ambe Yéso ákuwɛ, ónjuanisɛ ndiu kasu Balába.» Ɗáɓámaki Balába ka mekakɔ ka nyɔngɔ á oyombɔ nde ɗátú ka ntanga-nji na mowa á ɓakpa. Pilátɔ â goto kǒúsia nga, ɗáogea ánsagɛ Yéso. Ɓâ gǎkɛ okoga te: «Nkɔkɛagani ee! Nkɔkɛagani yɛ ka moyangɔ.» Mpɔ Pilátɔ áǒúsia mɔngɔ á ko isaɔ gea: «Ɓojeɗe sina nde atógi? Nga, kɛɔni ka nyɔngɔ ájeɗe nde akeni ákuiɛ ú. Kaɓondɔ ne ye omɓindisa, nenɗeketande.»
Ɓɔ gǎkɛ, ɓâ tɔ osuia koga gea te ɓánkɔkɛɛgɛ Yéso ka moyangɔ. Nkogɔ nɛɓɔ áɔgɔnana. Mpɔ Pilátɔ áotena nyɔngɔ ndɔ gea te, aɓeeki ɛmɛmi nɛɓɔ. Áonjuanisa nkpa nde ɗáɓáɔmɛma ánjuanisɛ, mmbé ɗáɓámaki ka mekakɔ ka nyɔngɔ á oyombɔ na mowa á ɓakpa. Â ndiu onsaga Yéso ɓángeɛ ɓíndɔ ɗáɓáokonda.


Ɓî ɗáɓáonga na Yéso, ɓáondonda Simɔ́ni nto á na Kuɛ́nɛ n'aotóka na ciko, ɓáonkpoka na moyangɔ ka gea ákumbɛ ú mbusa á Yéso.
Usɛsɛ á ɓakpa n'aomɓea, phɔtɔ na ɓake ɓáogáma na taɓokanaga ka nyɔngɔ á Yéso. Mpɔ Yéso áǒpháia nci nde ɓake ɓáɔ, na ngoɗea ɓɔ gea: «Ɓaseka á ka Yɛusalɛ́ma ɓókogámɛmbɛ ka phɔani, ógámeani ndiu ɓɛnu sisanu na ɓaniki nɛnu! Ka nyɔngɔ nde ka ɓ'esa ndɔ aobika, ɓɔɔnande ɓî ɓakpa ɓáyɔngande gea: ‹Maseye ka ɓangomba ɓunde ɓákáonjimbɛ mɔnɔ na ungisa!› Â goto ɔyɔnga, ɓakpa ɓákpangande ngoɗea á mamba gea: ‹Ósóguia!› Na ngoɗea etondoo: ‹Ɔ́sɔ́sɔmɛa!› Nga, kaɓɛ na ɓági ɓende ka phɔa á me á dɛka, cɔ, aɓáeka ɓó ka phɔa me á kɔ̌mɔkaka?»
Mpɔ ɓâ phɔtɔ kǒga na ɓuangbo ɓato ájeɗe ɓaɓɛ ka mowa á ɓɔ kimoci na Yéso.
Ɓî ɗáɓájú k'ɔ́ma ndɔ ɗáɓáɔɔphana: «Gangata», wa, ɓáɔnkɔkɛa Yéso gǔ á moyangɔ kimoci na ɓato ájeɗe ɓaɓɛ. Moci ɓáonkɔkɛa nci á njaga á mǔku á Yéso, ɓaangbo gǎkɛ áoɓá nci á njaga akɛ á nkei. [Mpɔ Yéso áɔyɔnga gea: «Abɛ íma ɓojeɗe nɛɓɔ nga, ɓákáoúba kema nde ɓáogea.»] Wa, ɓáogabisana ngɔ́mbɛ nɛkɛ mbusa á ɓɛta ɓana-mɛlɔɛ kau. Ɓakpa ɓáoika wa ka ɛnjia akɛ, ɓakɔta ɗáɓáɔntɛbɛa na yɔnga te: «Cɔ, ɓî yɛ atoéamisi ɓakpa ɓuangbo, ambe éamisɛ pɛ yɛ sisakɛ, kaɓɛ n'ande Masíya mmbé Mokonga ɗánsɔmbu!» Ɓato émani ɓâ phɔtɔ k'ɔntɛbɛa na sɛkɛɗa bíbí ka opha akɛ divai nde aángai-ngai, ɓáɔyɔnga gea: «Aoɓá n'onde moamɛ ndea Ɓayúda, óamisa phɔ́ sisakɔ.» Mpɔ ɓáoɗundua ka gaó gǔ á mɔ̌ akɛ ɓe: «Mmbé ande Moamɛ ndea Ɓayúda.»
Wa, ka ɓato ájeɗe ɓunde ɗáɓěkɔkɛigi na yɛ ka moyangɔ áombóma Yéso te: «Kóma gǎkɛ Masíya? Éamisa sisakɔ na amisa asu phɔtɔ!» Mmbɔ ɓaangbo â ndiu komphenea na yɔnga te: «Caa! Kóma komɓanga Mokonga, oɓɛ ímbɔ ɓáɔkɔkɛigi phɔtɔ ɓea yɛ? Ka phɔasu áɓɛ ɓó nga ɓɛtɔí nnde aengemeani na tambɛa asu. Yɛ gǎkɛ, kági tanda ka ɓojeɗe.» Mpɔ áongoɗea Yéso te: «Ómokanisiambɛ ka koɓoamɛ nɛkɔ mbenɔ nde obikaeka.» Mpɔ Yéso áonsikisia te: «Eya, neongoɗi ɗoni gea, kesande oɓande kimoci n'eme suɓi á Paadísɔ.»


Nanga ɗátú ye tɔ bíbí á kantende keiphe ɗágbukumi mokonda bui ka mbenɔ isaɔ. Maní áoímika. Ngɔ́mbɛ á suɓi éndu á Mokonga áɔnyɔka ka měme. Mpɔ Yéso áokoga k'ɛ́sɔ akpɛ te: «Cɔ, Abɛ! Nesikisi měma ani ka njaga akɔ.» Ka yɔnga akɛ nndɔ, áɔɗɔɛa. Mbenɔ nde mɔkɔta á ɓato émani ɗáɔni nnde ɗányɛ́nyi, áombeba Mokonga na yɔnga te: «Eya! Nkpa nde ɗátú nto á koɗoni.» Cɔ, ka ɔna nnde ɗányɛ́nyi, ɓakpa ɓɔbu ɓunde ɗáɓáontêa ɓáoja na ɓáɔ̌ɓɛta k'égogo. Ɓakpa ɓɔbu ɓunde ɗáɓáomúba Yéso na ɓake ɓunde ɗáɓáomɓea ka toka na Galiláya, ɓáɔɛnjia nnde ɗáɔnyɛ́nya na ɓáiki ɗanga.


Cɔ, mǒko moci ina akɛ Yɔsɛ́phu, ɗátú nto á Alimatɛ́a, nji á Ɓayúda. Ɗátú nto á koɗoni na měma ánjá, ɗá phɔtɔ oɓondea koɓoamɛ ndea Mokonga. Ɗátú ka ɓato á ntua á tena nyɔngɔ, ɗákáɓeekeani gǎkɛ na ɓɔ ka mɔangɔ ndɔ. Áoga mɔtɛ á Pilátɔ k'aphe á mɛma mǒnda á Yéso. Mpɔ áodidisa mǒnda ka moyangɔ, áokombea ú na sanda na úmbá í suɓi á bóta nde ɗáɓátongi ɓea kubu ókanga, nnde ɗáɓákámúmbimbɛ mɔnɔ nkpa suɓi í. Ɗátú esa á ko ɓɔku bíbí á kpangá á saɓáto.
Mpɔ ɓake ɓunde ɗáɓáomɓea Yéso ka toka na Galiláya ɓáomɓea Yosɛ́phu, k'aphe á ɛnjia bóta na ɔna mmbe ɓátóúmbi mǒnda akɛ ɓo. Mpɔ ɓáoja ka ɓɔngisia ɔphɔ á su ánjá na nkoki ka nyɔngɔ á mǒnda á Yéso. Nga, ɗáɓáoúmbia esa á saɓáto ɓíndɔ ɛɔphi nɛɓɔ asosi.

Listen to Lóka 23