Bagri

संसार में झिका बिंगा चेला बिंगी आग्या मानता हा बानै यीसू भोत प्रेम करतो हो, अर अंत तांई बिंयाई प्रेम करतो रेयो। जद फसह गै त्यूंहार ऊं पेलां बण जाण लियो कै संसार छोड़गे पिता परमेसर गै कनै जाण गो टेम आ'ग्यो है। जद यीसू अर बिंगा चेला आथण गी रोटी खावै हा अर सैतान समौन गै बेटै यहूदा इस्करियोति गै मन में बात घाल दी कै बो यीसू नै दुसमण गै हात में पकड़वावैगो। यीसू ओ जाण गे कै पिता सारी बाता पर अधिकार बिंगै हात में दे दियो है अर बो परमेसर कनूं आयो है अर परमेसर गै कनैई पाछो जाण लागरयो है। ईंखातर बो रोटी छोड़गे खड़यो हो'ग्यो। बण उपर पेरेड़ा गाबा उतार दिया। अर साफो लेगे आपगी कड़तू बांध ली। जद एक बठळ में पाणी घालगे चेला गा पग धोया अर झिको साफो आपगी कड़तू गै बांदयो हो। बिंऊं पूछण लागग्यो। फेर जद बो समौन पतरस कनै पूग्यो, पतरस बिनै केयो, “प्रभु के थे मेरा पग धोवोगा?” यीसू बिनै उतर दियो, “झिको मैं करूं हूं तूं बिनै अब कोनी जाणै पण इंगै बाद में समझैगो।” पतरस बिनै केयो, “थानै मेरा पग कदी धोणा कोनी चईयै।” ओ सुणगे यीसू बिनै केयो, “जे मैं तनै ना धोऊं तो तूं मेरो चेलो कोनी बण सकै।” जद समौन पतरस बिनै केयो, “प्रभु फेर तो एकला पग ई कोनी पण मेरा हात अर सिर बी धो दे।” यीसू बिनै केयो, “झिको नहा लियो है बिनै आपगै पगां गै सिवाय ओर कीं बी धोण गी जरूरत कोनी है। बो पूरी तरियां सुद्ध है। थे लोग पूरी तरियां सुद्ध हो, पण सारा सुद्ध कोनी।” यीसू बिनै जाणै हो झिको बिनै धोखै ऊं पकड़ाण आळो हो ईंखातर बण इंया केयो, थारै मू सारा सुद्ध कोनी है। जद बण सारां गा पग धो दिया तो फेर बण आपगो गाबो पाछो उपर ले लियो अर आपगी जिग्यां पर बेठ ग्यो। अर बानै केयो कै, “थे जाणो हो कै मैं थारै सागै के करयो है?” “थे लोग मनै ‘गुरू अर प्रभु’ केवो हो अर थे सई केवो हो क्यूंकै मैं बो ई हूं। जे मैं प्रभु अर गुरू होगे एक दास बणगे थारा पग धोया है बिंयाई थानै बी एक दूसरै गा पग धोणा चईयै। क्यूंकै जिंया मैं थानै एक नमुनो दिखायो है जिंया मैं थारै सागै करयो है बिंयाई थे बी करो। मैं थानै साची साची केऊं हूं, दास आपगै स्वामी ऊं मोटो कोनी होवै अर ना'ई भेजण आळो आदमी भेजेड़ै आदमी ऊं छोटो होवै। झिको मैं थानै अबी कर'गे दिखायो है, बो थानै समझ आयो है। ईंखातर जे थे बिंयाई करोगा तो परमेसर थानै आसिस देवैगो। परमेसर आसिस देवैगो इयां मैं कोनी केऊं। क्यूंकै जद ऊं मैं थानै चुण्या है जद ऊं मैं जाणूं हूं कै थे किंया हो? अर झिको मनै धोखो देवैगो बिनै बी मैं चुण लियो है। क्यूंकै परमेसर गै बचन में झिको लिखेड़ो है बो सई होणो चईयै। परमेसर गै बचन में ओ लिखेड़ो है कै झिकै मेरी रोटी खाई, बण ई मेरै आ'गै टांग अड़ाई। अब आ घटना घटणै ऊं पेलां ई मैं थानै बता दी है अर जद आ घटना घटै जद थे बिस्वास करियो कै मैं बो ई हूं। झिकै गै बारै में मैं थानै केयो हो कै थे बिंगै उपर बिस्वास करो।” मैं थानै साची साची केऊं हूं कै बो झिको मेरै भेजण आळै नै मानै है बो मनै मानै है। अर झिको मनै मानै है, बो बिनै मानै झिकै मनै भेज्यो है। ऐ बातां बतागे यीसू आत्मा में भोत दुखी हो'ग्यो अर बानै साफ साफ बता दियो कै मैं थानै साची साची केऊं हूं कै थारै मू एक जणो मनै दुसमण गै हात में पकड़वावैगो। चेला चिंता करी कै बो किंगै बारै में केवै है बे सारा एक दूसरै गै सामै देखण लागग्या। बां चेला मू एक जणो झिकै नै यीसू बोळो प्रेम करतो हो, यीसू गी छाती कानी झुक गे बेठयो हो। जद समौन पतरस बिं चेलै कानी हिसारो कर'गे केयो, “यीसू नै पूछ तो सरी कै बो किंगै बारै में केण लागरयो है।” जद बण बिंयाई यीसू गी छाती कानी झुकगे पूछयो, “हे प्रभु बो कुण है?” यीसू उतर दियो, “मैं रोटी गो टुकड़ो लोटै में डूबगे झिकै नै देऊंगा बो ई है बो।” फेर यीसू रोटी गो टुकड़ो लोटै में डबोयो अर बिनै समौन इस्करियोति गै बेटै यहूदा नै दे दियो। अर यहूदा गै रोटी गो टुकड़ो खाण गै बाद यीसू बिनै केयो, “झिको तूं करणो है जल्दी कर।” जद सैतान गो अधिकार बिं पर हो'ग्यो। पण बठै बेठैया मू किनैई समझ कोनी आई कै यीसू आ बात क्यूं कैई है। यहूदा कनै पीसां गी थैली रेवंती। यहूदा रोटी गो टुकड़ो खाण गै बाद जल्दी बारै उड़ग्यो। बो रात गो टेम हो।

जद यहूदा बारै उड़ग्यो तो यीसू केयो, “अब परमेसर लोगां नै दिखावैगो कै मिनख गो बेटो कितो म्हान है। मिनख गै बेटै गै द्वारा लोगां नै ठा लागसी कै परमेसर कितो म्हान है। जे मेरै द्वारा लोगां नै ठा लागै है कै परमेसर कितो म्हान है तो परमेसर बां लोगां नै दिखावैगो कै मिनख गो बेटो कितो म्हान है अर बो जल्दी करैगो। हे मेरा प्यारा टाबरों, मैं थोड़ी देर खातर में थारै सागै हूं, बिंगै बाद थे मनै ढूंडोगा, थारै सागै कोनी रेऊंगा। अर जिंया मैं यहुदियां नै केयो बिंयाई मैं थानै बी केऊं कै जठै मैं जाऊं हूं बठै थे कोनी आ सकोगा। मैं थानै एक नुई आग्या देऊं हूं कै एक दूसरै ऊं प्रेम राखो जिंया कै मैं थारूं प्रेम राख्यो। बिंयाई थे बी एक दूसरै ऊं प्रेम राखो। जे आपसरी में प्रेम राखोगा तो इंयूं ई सारा जाणैगा कै थे मेरा चेला हो।”


समौन पतरस बिनै पूछयो, “हे प्रभु थे कठै जाण लागरया हो।” यीसू उतर दियो, “तूं अब मेरै लारै कोनी आ सकै, पण बाद में तूं मेरै लारै आवैगो।” पतरस बिनै केयो, “हे प्रभु अबी मैं थारै लारै क्यूं कोनी आ सकूं। मैं थारै खातर आपगी जान बी दे देऊंगा।” यीसू उतर दियो कै, “तूं आपगी जान देवैगो, मैं तनै सच्च सच्च केऊं हूं। जद तांई तूं मेरो तीन बारी इनकार कोनी कर लेवैगो जद तांई कुकड़ो बाग कोनी देवैगो।”

Listen to यूहना 13