If you have would like a copy of this version please contact info@davarpartners.org

Bareli Pauri New Testament, CC-BY-SA-4.0, Friends Missionary Prayer Band (Text), Bareli Pauri New Testament Audio Bible, CC-BY-SA-4.0, Davar Partners International, Bridge Connectivity Solutions, 2022 (Audio).

Bareli Pauri New Testament

Bareli Pauri New Testament (TLF)

Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.

“सावधान रोयू, तुमु माणसो काजे देखाळने कोरीन तुमरा धोरमोन काम मा कोरु, नीती तुमरा सोरगो मायला बासो जुव गोथो काय फोव नि जुळे.” इनान कोरता कि जेतार तू दान कोरे, ती आपने ओगोव पावी मा वाजवाळे, जोसा कोपट्या प्रार्थना घोरमा एने गोल्यामा कोरतेला छे, काहाकि माणसे इंदरी महिमा कोरे. मे तुमु काजे छाचलीन कोय कि चे आपना प्रतीफोव ली लेदला छे. बाकीन जेतार तू दान कोरे, ती जू तारू जेवळ्यु हात कोरे, ती तिनाक तारा डाखऱ्या हात काजे नि मालूम पोळनो जुवे. काहाकि तारो दान एखलामा रोये, एने तारु बास एखलामा देखे, तुसे प्रतीफोव आपसे.


“एने जेतार तू प्रार्थना कोरे, ती कोपट्या सारखी नि जुवे, काहाकि माणसो काजे देखाळनेण कोरीन प्रार्थना घोरोमा एने सोळकोन मुंडोपोर उभा रोयीण प्रार्थना कोरनो तीनु काजे वारू लागतलो छे मे तुमु काजे छाचलीन कोय कि चे आपना प्रतीफोव ली लेदला”. बाकीन जेतार तू प्रार्थना कोरे, ती आपना खुलीमा जा; एने झोपलु बोंद कोरीन आपना बासो पुठी जो एखलामा छे प्रार्थना कोर तेत्यार तारू बास जो एखलामा देखतलु छे, तुसेक प्रतीफोव आपसे. प्रार्थना कोरनेन टेमे दिसरा जाती सारखो बोक-बोक मा कोरे, काहाकि चे सोमजतला छे कि तिंदरा जादा बुलनेसी तिंदरो सोमवाय जासे. इनान कोरता तुमु तिंदरे सारखा मा बोनु, काहाकि तुमरू बास तुमरा मांगनेसी पेहेले जानतलु छे कि तुमुक काय जुवतलो छे.
“इनान कोरता तुमु इना रितीसी प्रार्थना कोऱ्या कोरजू
‘हे आमरा बासो, तू जु सोरगोमा छे; तारो नाव चुखो मानाय जाय.
तारो राज आवे तारी मोर्जी जोसी सोरगोमा पुरी होयतेली,
तोसी धोरती पोर भी होये.
आमरा आखा दाहळा भोरीन रुटू आज आमुक आप.
एने जिना रितीसी आमु आमरा गुणावावा काजे माफ कोरला छे,
तोसुत तू बी आमरा गुणा काजे माफ कोर.
एने आमु काजे परीक्षामा मा लावे, बाकीन बुराईसी वाचाड;
काहाकि राज एने पराक्रम एने महिमा हमेशा तारीत छे’ आमेन.”
“इनान कोरता कोबी तुमु माणसोन गुणू माफ कोरसू, ती तुमरू सोरगो मायलु बास बी तुमु काजे माफ कोरसे, एने ओगर तुमु माणसोन गुणू माफ नि कोरे, ती तुमरू बास बी तुमरो पाप माफ नी कोरे”.

“जेतार तुमु उपास कोरसु, ती दोगावा सारखो तुमरा मुयो पोर उदासी नी आवनो जुवे, काहाकि चे आपना मूय उतार रोयतला छे, काहाकि माणसे तीनुक उपवासी जाणे, मे तुमु काजे छाचलीन कोय कि चे आपना प्रतीफोव ली लेदला.” बाकीन जेतार तू उपवास कोरे ती आपना मुंडका पोर तेल लागाळ एने मूय धुव, काहाकि माणसे नी बाकीन तारू बास जू गुप्त मा छे तुसेक उपवासी जाणे इना हालतमा तारू बास जू एखलामा मा देखतलु छे, तुसेक प्रतीफोव आपसे.


“आपनेन कोरीन धोरती पोर धोन एखठो मा कोरु, जां किडा एने कुदु बिगाडतला छे, एने जां चुटा घोर फुळीन चुरी कोरतेला छे.” बाकीन आपनेन कोरता सोरगोमा धोन एखठा कोरु, जा नि ते किडू एने नी कुदु बिगाडतलो छे, एने चा चुटू नी घोर फूळतलु एने नी चूरी कोरतेलू छे. “काहाकि जा तारो धोन छे चा तारो मोन बी लागलो रोयसे.”


डीलोन दिवू डूवू छे इनान कोरता ओगर तारू डूवू चुखलु छे, ती तारो आखो डील बी विजावो रोयसे. बाकीन ओगर तारु डूवू भुंडू होसे, ती तारो आखो डील बी आंदारलो होयसे; इनान वोजेसी चो विजावो जो तारेमा छे ओगर आंदारलो होय जाय ती आंदारलो कोतरो मोटो होसे.


“काहनलु माणूस दुय मालक्यान सेवा नि कोर सोकतलु, काहाकि चू एक पोर दुष्मोनी एने दिसरा पोर मोंग कोरसे, नि ती एक पुठी साते रोयसे एने दिसरा काजे विटेवलु माणसे तुमु परमेश्वरोन एने धोन दुयोन सेवा नी कोर सोकतला”. इनान कोरता मी तुमु काजे कोयो कि आपना जीवन कोरता जी चिंता घोन कोरता कि आमु काय खासु एने काय पिसू; एने नि आपना डीलोन कोरता कि काय पेहेरसू काय जीव खाणासी, एने डील छिंदरासी बोळीन नी होय? वादवा मायला चिल्ला काजे देखू! चे नी वेरतेला, चे नी काटतेला छे, एने नि कुठामा एकठा कोरतला; ते बी तुमरू सोरगो मायलु बास हिनु काजे खावाळतेलु छे, काय तुमु हीनु गोथा जादा किमतीवान नि राखतला? तुमरेमा कून छे, जो चिंता कोरीन आपना जीवाय मा एक घोळी बी बोढाय सोकतलु छे?
“एने तुमु छिंदरान कोरीन काहा चिंता कोरतेला? जोंगली फुलोपोर ध्यान कोरु कि चे कोसा बोढतला छे; चे ते नी मेहनत कोरतेला, नि काटतेला छे”. ते बी मे तुमु काजे कोयो कि सुलेमान बी, आपना आखा कला मा हीनुमा गोथो कुदा सारखा छिंदरा पेहेरलु नी होतु. इनान कोरता जेतार परमेश्वर धोरतीन खोडा काजे, जो आज छे एने वाहने भट्टीमा घालाय जासे, होसला छिंदरा पेरावतलु छे, ती हे कोम भुरस्या, तुमु काजे चू इंदरेसी बोढाविन काहा नि पेरावे?
“इनान कोरता तुमु चिंता कोरीन यो झुन कोयता कि आमु काय खासु, कोबी काय पिसू, कोबी काय पेहेरसू”. काहाकि दिसरा जात्या इना आखा चीजोन हेरेमा रोयतलु छे, बाकीन तुमरू सोरगो मायलु बास जानतलु छे कि तुमुक इना आखा चीजोन जरूरत छे. इनान कोरता पेहेले तुमु परमेश्वरोन राजोन एने तेरा धोरमोन हेरे कोरु ती जे आखा चीजे बी तुमुक जोळ जासे. एरेन कोरता वाहनेन चिंता मा कोरु, काहाकि वाहनेन दाहळू आपनी चिंता खुद कोर लेसे; आजून कोरता आजून दुख सोवटो छे.

Listen to मत्ती 6