Athpariya 2023 WBT (NT) Non-Dramatized

Athpariya 2023 WBT (NT) Dramatized

हिट्‌नुङ् येसुङा याप्‌मिचिगा खिमेयाङ्‌मे लोक् ओचेलाचि नाड्‌डे लोडुचे, “धारमाबिधि काहिसिक्‍बाचि हिट्‌नुङ् फारिसि याप्‌मिचिङा मोसाङा छेप्‍टुना धारमाछाप्‍ला हिसिक्‍माना आधिकार ओटोगुएसुए॥ हिड्‌नाड्‌डेउङ् हिट्‌नागाँ खानि मालोडिगा ख्‍वाप्‍पा रिङ् टेन्‍डानि हिट्‌नुङ् चोगानुम्, टरो हिट्‌नागाँ ओचोगु गाड्‌डेम्‍बाक् चोक्‍नेनिन्, पोङ्‌भोने हिट्‌नागाँ आरु एरोक् उहिसिक्‍टुचिगा, टरो आप्‍पेम्‍बाक् ओचोगुन्‍गा॥ हिट्‌नागाँ लिसाडायागा धारमाङिगा रिति रिवाज ओचोगुङ् याप्‌मिचिङा चोक्‍मा डोक् उहिडुन्‍लोक् चोक्‍मा ओमेट्‌टुचिगा, टरो हिट्‌नागाँम्‍बाक् उन्‌चि ठिक् आङ्‌गुलिक्‌ङा धारि ओखोट्‌टुङ् घुवार ओफाडुन्‌चिन्‍गा॥
“नागाँ उन्‌चिगा ख्‍वाप्‍पा टोॽवा याप्‌मिचि निमेप्‍मा लोङ्‌सा एरोक् ओचोगुटु॥ हिट्‌नागाँ धारमाछाप्‍लाङिगा रिङ् ठेट्‌लोक् ठे-ठेगा ओछेप्‍टुङ् उन्‌चि नाम्‍धाङ्‌ङि हिट्‌नुङ् उन्‌चि पासुलाङि ओवाडुगा, हिट्‌नुङ् उन्‌चि लोट्‌लिङ्‌ङि केगा-केगा फुरका ओचोगुगा॥ हिट्‌नुङ् हिट्‌नागा भोज भातेरङि मान् ओचोगुना ठोङ्‌ङि हिट्‌नुङ् याहुदि छुम्‍मापाङ्‌ङिगा मुलि ठोङ्‌ङि युङ्‌मा निङ्‌ग्‍वा ओचोगुगा॥ हिट्‌नुङ् बाजार-बाजारङि सोब्‍बे याप्‌मिचिङा स्‍या ओमेट्‌टुचि हिट्‌नुङ् याप्‌मिचिङा ‘काहिसिक्‍बा’ ओलोडुचि नुङ् निङ्‌ग्‍वा ओचोगुगा॥
“टरो खानिम्‍बाक् साङा चा ‘काहिसिक्‍बा’ मालोडिन्‍चा, पोङ्‌भोने खानि काहिसिक्‍बाम्‍बाक् ठिबाङ् एना, हिट्‌नुङ् खानिम्‍बाक् सोब्‍बे ठिक्‍ए भुम्‍भु-झान्‍झाचि ए॥ ना नाराङि खान्‍याँ साक्‍चा ‘पाबा’ नुङ् लोनेन्‍नुम्‌चिम्, पोङ्‌भोने खानिना ठिबाङ् एना माङ्‌हाङ् पाबा वाहेट्, उन् टोनालोग्‌ङि युङ्‌ग्‍वा॥ खानिम्‍बाक् साङा चा ‘डाङ्‌बा’ मालोडिन्‍चा, पोङ्‌भोने खानि डाङ्‌बाम्‍बाक् ठिबाङ् एडोक् वाहेट्, उन्‌बाक् खिरिस्‍ट ए॥ खानि माड्‌डेङि सोब्‍बे नुङ्‌ना ठेना याप्‌मिम्‍बाक् खानि चाकार लियुक्॥ हिट्‌नुङ् आप्‍पे ठेलोक् काचोक्‍बा खाट्‌टिउना लियुक् हिट्‌नुङ् जुन्‍ङा खाट्‌टिना ए पिग्‌युक् हिट्‌ना ठेना लियुक्॥


“इनामा, निङ्‌ग्‍वा ओमाक्‍पाचि, खानि धारमाबिधि काहिसिक्‍बाचि लोक् फारिसि याप्‌मिचि! पोङ्‌भोने खानिङा टोनालोग्‌ङिना मुलुक्‌ङिना ढुवारिक् याप्‌मिचिगा नाभाक्‌ङि आछाक्‍टुएसुम्‍मे॥ खानि आप्‍पे चा आलिगिन्‍गा, हिट्‌नुङ् लिग्‍मा ओकोन्‍गा याप्‌मिचि चा लिग्‍मा आपिनिम्‌चिम्‍गा॥
[“इनामा, निङ्‌ग्‍वा ओमाक्‍पाचि, खानि धारमाबिधि काहिसिक्‍बाचि लोक् फारिसि याप्‌मिचि! पोङ्‌भोने खानिङा लाङ्‌मेप्‍माचिगा पाङ्‌ठाङ् आनाप्‍टुम्‌चिम्‍गा, हिट्‌नुङ् आरु निमेट्‌माचि लाउङ्‌सा होप्‍मो सोम्‍मा केलोक् बिन्‌टि आचोगुम्‍गा॥ नाड्‌डेउङ् खानिङा आड्‌डिक् टुक्‍लोक् साजाए आटोगुम्‍टुम्॥]
“इनामा, निङ्‌ग्‍वा ओमाक्‍पाचि, खानि धारमाबिधि काहिसिक्‍बाचि लोक् फारिसि याप्‌मिचि! पोङ्‌भोने खानिङा ठिबाङ् खानि धारमाङि चोक्‍मा लोङ्‌सा सामुन्‍दरा हिट्‌नुङ् नारा डोक् आलिन्‍डुम्‍गा, हिट्‌नुङ् हिट्‌ना खानि धारमाङि आचोगुमुङ् खानि नुङ्‌ना चा टुक्‍लोक् योनालोग्‌ङि साजाए टोगुना हिट्‌ना आचोगुम्‍टुम्॥
“इनामा, खानि याङ्‌कानिनिबा ओठेडोङ्‌चि! खानिङा ‘माङ्‌ठाना उनिङ्‌ङि चामारसिङा चोगुम्‍नाँ पाक्‍चा लिनिना, टरो माङ्‌ठानाङिना साम्‍मेङ् उनिङ्‌ङि चामारसिङा चोगुम्‍नाँ हिट्‌ना रिङ्‌ङा रेक्‍टुटु’ नुङ् आमाट्‌टुम्‍गा॥ खानि मुरखा लोक् याङ्‌कानिनिबाचि, खोनाम्‍बाक् ठेना? साम्‍याङ् इ साम्‍याङ् सेङ्‌सेङ् चोगुना माङ्‌ठाना इ? हिट्‌नुङ् फेरि खानिङा ‘कोइङा बेदि उनिङ्‌ङि चामारसिङा चोनाँ पाक्‍चा लिनिना, टरो बेदिङि ठाङ्‌बालाक् उनिङ्‌ङि भेटि खोट्‌टुङ् चामारसिङा चोगुम्‍नाङा हिट्‌ना रिङ्‌ङा रेक्‍टुटु’ पिक्‍सा आमाट्‌टुम्‍गा॥ खानि याङ्‌कानिनिबा याप्‌मिचि, खोनाम्‍बाक् ठेना? बेदिङि ठाङ्‌बालाक् भेटि इ भेटि सेङ्‌सेङ् चोगुना बेदि इ? हिड्‌डेउङ् कोइङा बेदि उनिङ्‌ङि चामारसिङा काचाबाङा बेदि हिट्‌नुङ् हिट्‌ना उठुङ्‌ङि ठाङ्‌बालाक् सोब्‍बे थोक्‌ङाना चामारसिङा चोटु॥ हिट्‌नुङ् माङ्‌ठाना उनिङ्‌ङि चामारसिङा काचाबाङा माङ्‌ठाना लोक् माङ्‌ठानाङि युङ्‌ना उनिङ्‌ङि चामारसिङा चोटु॥ जुन्‍ङा टोनालोग्‌ङिना उनिङ्‌ङि चामारसिङा चोटु, हिट्‌नाँ माङ्‌हाङ्‌ङाना सिङासान् हिट्‌नुङ् हिट्‌ना उठुङ्‌ङि युङ्‌ना माङ्‌हाङ्‌ङाना डोक् चामारसिङा चोटु॥
“इनामा, निङ्‌ग्‍वा ओमाक्‍पाचि, खानि धारमाबिधि काहिसिक्‍बाचि लोक् फारिसि याप्‌मिचि! पोङ्‌भोने खानिङा नाम्‍ना राॽवा, धानिया लोक् जिराङाना दासांसा आटाडुम्‍गा, टरो न्‍याए, लुक्‍माटुक्‍मा हिट्‌नुङ् बिस्‍वासङाना रिङ् गाड्‌डेगा धारमाबिधिङिगा मुलि रिङ्उम्‍बाक् खानिङा यान्‍दा डोक् आचोक्‌निम्‍गा॥ खानिङा दासांसा चा पिमा कोन्‌युक्, टरो हिट्‌नागा मुलि रिङ्‌चि चा खानिङा यान्‍दा चोक्‍मा कोन्‌युक्॥ खानि याङ्‌कानिनिबा ओठेडोङ्‌चि, खानिङा नाबुछाम्‍बाक् नुलोक् आपुयुमुङ् आहोट्‌टुम्‍गा, टरो उँटा भोने आमिलुम्‌डिसुम्‍गा॥
“इनामा, निङ्‌ग्‍वा ओमाक्‍पाचि, खानि धारमाबिधि काहिसिक्‍बाचि लोक् फारिसि याप्‌मिचि! पोङ्‌भोने खानिङा ठालि लोक् खोरे भारा एरोक् आवासिडुम्‍गा, टरो भिट्‌राउम्‍बाक् खानिङा लोभ हिट्‌नुङ् ओभेन्‍गा निङ्‌ग्‍वाङा आइप्‍टुम्‍गा॥ हाउ याङ्‌कानिनिबा फारिसि याप्‌मिचि! पाइले ठालि लोक् खोरेङाना भिट्‌रालेङ् वाहिलेङ् वासिडानुम्, हिट्‌नुङ् भारालेङ् चा वाहिलेङ् उलियाक्॥
“इनामा, निङ्‌ग्‍वा ओमाक्‍पाचि, खानि धारमाबिधि काहिसिक्‍बाचि लोक् फारिसि याप्‌मिचि! पोङ्‌भोने खानिम्‍टे कामेरोङा ओलेङ्‌डुना ओहुम्‍पाचि गाड्‌डेगा डोक्॥ हिट्‌ना पुयुम्‍नाँ भारालेङ् ओचेट्‌नुना ठेट्‌युक्, टरो भिट्‌रालेङ् भोने उसियागा याप्‌मिचिगा ओसारुॽवाचि हिट्‌नुङ् सोब्‍बे आसुद्‌दो थोक् एडोक् उलियुक्॥ हिड्‌डे डोक् खानि चा भाराम्‍बाक् याप्‌मिचि टोकानाङि धारमोति गाड्‌डे आनिङ्‌सिगा, टरो भिट्‌रा भोने आड्‌डिक् निङ्‌ग्‍वा ओमाक्‍पा लोक् पापङा खानि निङ्‌ग्‍वा आइप्‍टुएसुमे॥


“इनामा, निङ्‌ग्‍वा ओमाक्‍पाचि, खानि धारमाबिधि काहिसिक्‍बाचि लोक् फारिसि याप्‌मिचि! पोङ्‌भोने खानिङा माङ्‌काटाचिगा ओहोम्‍पाचि आचोगुम्‍गा, हिट्‌नुङ् धारमोति याप्‌मिचिगा ओहुम्‍पा चा ओचेट्‌नुलोक् सिगारपाटार आचोगुम्‍गा॥ हिट्‌नुङ् खानि आपिगिगा, ‘आन्‍याँ टुबाठेबाचिगा पालाङि लिसिङाना बे, माङ्‌काटाचि सेप्‍मा लोङ्‌सा आन्‍याँ घुवार फानेट्‌निम्‌चिम्‍मा बे॥’ नाट्‌डे आमाट्‌टुमुङ् खानि आप्‍पेङा माङ्‌काटाचि कासेट्‌बाचिगा छालेट्‌चि नुङ् पारमान् आपिडुएसुम्‍मे॥ हाट्‌ले खाडानि, हिट्‌नुङ् खानि टुबाठेबाचिङा ओचोगुना पापङाना टोॽवा लाट्‌टानुम्॥
“हाउ बिखालु ओप्‍पुङा ओछालेट्‌चि! खानिङा खोड्‌डेउङ् योनालोग्‌ङिना साजाए टोक्‍मालाम्‍मा होम्‍माना निङ्‌ग्‍वा चोक्‍मा आहिडुम्‍टुम्‍ना? हिड्‌डेउङ् आङा खानि सोरि माङ्‌काटाचि, ठोना उलिसागा याप्‌मिचि हिट्‌नुङ् धारमाबिधि काहिसिक्‍बाचि पाङ्‌सुङ्‌चिङ्‌चिङ्॥ हिट्‌नागा माड्‌डे आम्‍टेप्‍मा जाना खानिङा आसेडुम्‌चिम्‌चिम् हिट्‌नुङ् आम्‍टेप्‍मा खाप्‍चेङि आछुडुम्‌चिम्‌चिम्, हिट्‌नुङ् आम्‍टेप्‍मा जाना खानि छुम्‍मापाङ्‌ङि कोरराङा आलेम्‍सुम्‌चिम्‌चिम्, हिट्‌नुङ् आम्‍टेप्‍मा जाना खालाङ्‌गा-खालाङ्‌गाङि आरिक्‍टुम्‌चिम्‌चिम्॥ हिट्‌डेउङ् नाराङिगा ख्‍वाप्‍पा धारमोति याप्‌मिचिगा हेलिक्‌ङाना फाट्‌टुर खानि उठुङ्‌ङि ठायुक्, धारमोति हाबिलङाना ओहेलिक्‌लाम्‍मा बेरेक्‍याहङाना उइछा जाकारियाङाना ओहेलिक् सोम्‍मा, उन् खानिङा माङ्‌ठाना लोक् बेदिङाना माझै आसेडुम्‍मे॥ छेम्‍बा डोक्, आङा खानि लोनाँनि, नागा ख्‍वाप्‍पा रिङ् ना टालाङिगा याप्‌मिचिगा टेप्‍टेबाङि डोक् ठायुक्॥


“हाउ यरुसलेमङिगा याप्‌मिचि, खानिङा माङ्‌काटाचि आसेडुम्‌चिम्‍गा हिट्‌नुङ् माङ्‌हाङ्‌ङा खानि सोरि पाङ्‌सुचिगालाउङ्‌सा लुङ्‌गेॽवाङा आलेप्‍टुम्‌चिम्‍गा॥ वाङा वाजिलेट्‌चि कुप्‍टुचि गाड्‌डे डोक् आङा याप्‍मा खेप् काछालेट्‌चि छुम्‍मा निङ्‌ग्‍वा चोगुङे, टरो खानि आटेन्‍डेट्‌टिन्॥ नाहि खेम्‍सानुम्, खानि पाङ् धुरिठोङ् लिलोक् नाडाइसे॥ पोङ्‌भोने आङा खानि लोनाँनि, जाइले सोम्‍मा ‘टाङ्‌बा उनिङ्‌ङि टायाना माङ्‌हाङ्‌ङा आसिक् पिडुटु’ नुङ् आपिगिन्‍गा टब सोम्‍मा खानिङा आङा याङ्आनिसिन्‍नागा॥”

Listen to मात्‌ति 23