If you have would like a copy of this version please contact info@davarpartners.org

Text: Rana Tharu New Testament, CC-BY-SA-4.0, The Love Fellowship. -- Audio: Rana Tharu New Testament Audio Bible, CC-BY-SA-4.0, Davar Partners International, The Love Fellowship, 2023

Rana Tharu New Testament

Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.

मए याकूब, जा चिट्ठीके लिखरहो हओं। मए परमेश्वर और प्रभु येशू ख्रीष्टको सेवकके तरफसे बे इस्राएल देशके बाह्र कुल जो संसार भर बिग्दे हएं, बिनके नमस्कार।

हे मेरे बिश्वासी ददाभइयओ, जब तुममे बहुत किसिमके परीक्षा आमंगे, तओ जाके बडो खुसीको बात समझीयओ। काहेकी तुम जानत हओ, कि जब तुमर बिश्वास जाँचो जाबैगो, तओ तुमर सहान बारो शक्ति बढैगो। तुमके सब कुछ सहान सिखन पणो, ताकी तुम आत्मिक रुपसे मजबुत और सिद्ध होबओ, और कोइ फिर अच्छो गुणको कमी नाए रहाबए। अगर तुम मैसे कोइके बुद्धिकी कमी हए, तओ दोष नाए लगान बारो परमेश्वरसे मागओ, बा तुमके देबैगो। जब तुम परमेश्वरसे मागत हओ, तओ तुमके बिश्वास करनके चाहो, काहेकी जो शंखा करत हए, बे हमेसा बद्लत रहात हएं, बे समुन्दरको लणुरा कता होत हएं, जो हबाके भरमे बद्लत और उछल्त रहात हए। बे अपनो मन बद्लत रहात हए, और आदमी बिनके उपर भरोसा नाए करपात हएं। बे आदमी दुई मन बारे हएं, और बिनके सब चालचलनमे स्थिर नाए रहेपात हएं।

बे बिश्वासी जो गरीब हएं, उनके खुसी होन पणत हए, कि परमेश्वर उनके आदर करीहए। और जौन बिश्वासी धनी हएं, बे खुसी होनके चाहो, कि परमेश्वर बिनके नम्र बनाइ हए। काहेकी आदमी जंगलको फुला कता हएं, जो अइलियाए जएहएं। दिन निकरतए बहुत घामु लगत हए, और जंगलको फुलाके सुखाए देतहए, और बोको फुला झरजातहए। उइसीयए, एक धनी बिश्वासी अपनो काम करतए-करत मरजाबैगो।

बे आदमी धन्यके हएं, जो परीक्षामे स्थिर रहात हएं, काहेकी बे इमान्दार साबित होत हएं, और बे कभी फिर अन्त नाए होन बारो जीबनको मुकुट पामंगे, जौनको प्रतिज्ञा परमेश्वर बे सबके दइहए, जो परमेश्वरसे प्रेम करत हएं। जब कोइको परीक्षा होबए, तओ बो जा नाए कहाबए, कि मिर परीक्षा परमेश्वरके घेनसे होतहए, काहेकी परमेश्वर कभी फिर गलत बातके ताहीं परीक्षामे नाए डार सकत हए, और नए त कभी फिर कोइके परीक्षा करत हए। बल्कि, आदमी अपनी खराब इच्छाके मारे गलत करनके चाँहत हएं। जा एक जानबर जैसो हए जौनके फाँसी घेन आकर्षित करत हए और बो फाँसीमे बो अप्ननए पणतहए। फिर जाके पिच्छु, जब बो पाप करनके ताहीं सोँचत हए, तओ पापको जनम हुइजात हए, और अन्तमे, बो हमेसाके ताहीं मर जात हए। हे मेरे प्यारे बिश्वासी ददाभइयओ, मुरख मतबनओ। काहेकी हरेक असल बरदान और हरेक असल दान हमर दौवा परमेश्वरके घेनसे आतहए, जौन स्वर्गमे सब बादरमे भओ ज्योतिके सृष्टि करी। परमेश्वर हमेसा एकए हानी रहात हए, और बो छाहीं हानी नाए बद्लत हए। परमेश्वर अपनी इच्छासे हमके सच्चाईको बचनसे नयाँ जीबन दइहए, ताकी परमेश्वरको सृष्टि करोभओ सब चीजमे हम सबसे महत्वपूर्ण हुइ पामएं, जैसेकी फसलको पहिलो हिस्सा सबसे खास हिस्सा होतहए।

हे मेरे बिश्वासी ददाभइयओ, जा बात जानलेओ: हर एक आदमी सुननके ताहीं जल्दी और मस्कनमे होसियार और गुस्सानमे कम होन पणत हए। काहेकी जब कोइ आदमी गुस्सा करत हए, तओ बो बहे धार्मिक तरिकासे नाए रहिपात हए, जो परमेश्वरके खुसी करत हए। जहेमारे सब खराब बात और सब दुष्टसे दुर होबओ। नम्र हुइके तुमर मनमे धरो भओ परमेश्वरको बचनके अपनो बनाओ, काहेकी तुमर प्राणके जहे बचन बचाबैगो। पर परमेश्वरके बचन पालन करन बारे होबओ, और सुनन बारे इकल्लो हुइके अपनएके धोखा मतदेओ। कोइ आदमी बचन सुनत हए, पर पालन नाए करत हए, कहेसे बो एक अइसो आदमी जैसो हए, जौन अपन मुँहुँके दरपनमे देखत हए। जहेमारे बो अपनएके देखत हए, और चलोजात हए, और कैसो रहओं करके तुरन्त भुल जात हए। पर बो आदमी जो परमेश्वरको सिद्ध मोशाको नियम कानुनके ध्यानसे पढत हए। जो मोशाको नियम कानुन आदमीनके पापसे स्वतन्त्र करबात हए। और जो बो सुनी हए, बोके बो नाए भुलत हए। पर उइसी करत हए, जैसे मोशाको नियम कानुन बोके सिखात हए। जहे कारणसे परमेश्वर बोको सब काममे बोके आशिष देहए।

अगर कोइ आदमी अपनएके धर्मी समझतहए, पर अपनो जिभके लगाम नाए लगात हए, कहेसे बो अपनएके धोखा देतहए, और बोको धरम-करम व्यर्थ होतहए। हमर दौवा परमेश्वरके अग्गु शुद्ध और पबित्र धरम-करम जहेहए, कि अनाथ और बिधुवनको दु:खमे रेखदेख करनो और अपनएके जा संसारके खराब बातसे अलग रहानो हए।

Listen to याकूब 1