If you have would like a copy of this version please contact info@davarpartners.org

Text: Lahuali New Testament, CC-BY-SA-4.0, The Love Fellowship. -- Audio: Lahuali New Testament Audio Bible, CC-BY-SA-4.0, Davar Partners International, The Love Fellowship, 2022

Lahuali New Testament

Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.

दुह मुक्कारिंङ रज्ज़ा हेरोदेस कलीसियाओ रेह मीहतिंङ दुख रंड्रीमी थल्जी दोतिंङ कैद लेह च़रति। दोई सेनिका बि हुकुम रें कि प्रेरित याकूबो पुंज़ा ट्रिके च़रतु अंऊ प्रेरित यूहन्ना ओ मोह्ड़े न्वा तोहई। अपेहल रज्ज़ा हेरोदेसे खांई कि यहुदी सेंहणा दिरंङ खुश शवाहतोर ता दोई सेनिका तिंङ हुकुम रांई पतरस ला कैदी बणाके च़रतुंई ताकि दोबि ला सच़ी च़रपोर। दिह सुम मेह रोटी ऊ त्यार ओ टेम तोहई। दंङ रज्ज़ा हेरोदेस ए पतरस च़ुमने लेह जेलंङ केहच़ी च़रति, दंङ दोई पि-पि सेनिकातु पि झुंडो पहरा लगाके च़रति, दिह सोचेक्च़ा कि फसह ओ त्याहरो थल भत्ते मीहतु तुईज़ी दोऊ न्याय लोहग।

जेलंङ पतरस ओ रखवाली शुहबी लेहकी तोहई, पर कलीसियाओ मीहरे दोऊ थल्जी इच्च़ा सेहम शुहचे लगातार परमेश्वरारंङ साते प्रार्थना लहज़ी लेहकी तोईरे।
दंङ अंऊ मुक्का रज्ज़ा हेरोदेसे दोऊ न्याय लहज़िमी थल्जी दोबि मीहतु तुईज़ी हपि तते, दोऊ इच्च़ा रात तुहई पतरसो गुह्ट्रा बि झुह्ट शंङणी रंङ छ़ुसिह, झुह्ट सेनिकातु बिचंङ ईम लहज़ी लेहकी तोहई; दंङ पहरा रंड्रा पेतंङ टोईच़ी जेलो रखवाली लहज़ी लेहकी तोईरे। अचानक प्रभु ऊ इच्च़ा स्वर्गदूत पतरस ओ कछंङ अंज़े खड़े शुहचे इलि दंङ दुह कमराओ अन्द्रेग छंङी शुहचे इलि, दंङ दोई पतरस ओ रूहश्पोह टोईच़ी गुड़ केह्चे दुह खड़े लहरी, दंङ कुई, युरनाह अहच़ु। दंङ दोऊ गुड़ज़ि षंङणी युहप्चे दह्चे इलि। दंङ स्वर्गदूत ए दोरंङ साते कुई, “ऊम छ़ुह्च़ी, दंङ केनोह भूटर लेहकी च़रतु।” दोई ध्वांए लहरी, दोथर स्वर्गदूते दोरंङ साते कुई, “केनोह धखतेखी खम लेहच़ा गिऊ थलेच़ि अच़ा अता।”
दुह हुंच़ा दोऊ थले अच़ा इलि; पर दिह माह ञेंहच़ाते कि छिला धिर स्वर्गदूत लहज़ी लेहकी तोह, दुह हेले शुह, पर दिह च़ेहसी लेहकी तोहई कि दुह दर्शन खंड्री लेहकी तोह। दोथर दोरे मुण्डो पहरा दंङ अई पहरा पार लहज़ा दुह निह्लामो पेतंङो कछंङ पिचे इलिर, अंऊर च़ि शहरो हखा अम य्वाते। दुह पेतंङ दोतु थल्जी ऐनाह ए अल्सा इलि, दंङ दोरे धह्तेका हुंच़ा मुख्य गली रिंङ अतिर। दंङ ठ्रोहका शुचे इच्च़ा चौकरिंङ तचेक जोज़ी लेहतिर धोंणा रिंङ स्वर्गदूत अचानक पतरस बि केट्रा अच़ा इलि। दोथर पतरसे होशा रिंङ अंज़े कुई, “दा गेह हेले ञेंई केहतग कि प्रभु ज़ि एनोह स्वर्गदूत च़रच़ा गिह्बी रज्ज़ा हेरोदेस ओ कैद ओ दोरच़ी छुड़ाके च़रति, दंङ यहुदी सेंहणा तु भत्ते उम्मीद नाकाम लेह च़रति।”
दंङ दिह ञेंहच़ा कि परमेश्वरे दुह बचाके च़रते, पतरस दुह यूहन्ना ओ, अतु मिन मरकुस ला तोहई, दोऊ याह मरियमो चुंङ अति। दोर्तिंङ महसे बिशवासी मीहरे ठ्रोहका शुहचे प्रार्थना लहज़ी लेहकी तोईरे। अपेहल पतरसे धकते कि मोह्ड़े पेतंङरिंङ ठुखठुख लहरी, ता रुदे मिंदंङ इच्च़ा दासी कमरो पेतंङ अलज़िमी थल्जी अति।
दंङ पतरसो सग सेहषा महसे खुश शुहचे, धकते पेतंङ अल्ज़ी पेहषा इलि; दंङ दोथरे ज़रका रंड्रा तोंखा इलि, दंङ कुट्री लेहती कि पतरस धकते कि मोह्ड़े पेतंङो कछंङ खड़े तोह। दोच़ी दोरंङ साते कुहतो, “कांह बमजी शुनाह।” पर दुह एनोह गप्पा ओ टोहकठे पक्‍का शुहचे बंङज़िरी कि दिह पतरस ए शुह: दोथर दोरे कुट्री लेहतिर, “दोऊ स्वर्गदूत शोतो।” पर पतरस पेतंङ रिंङ ठुकठुक लहज़ी ए लेहकी तोहई दिऊ थल्जी दोच़ी तोंखी पेतंङ अल्दिर, दंङ दोबि खांई हेरान शुहचे इलिर। दंङ पतरसे दोतु हखा गुह्ट्र इशारा लहरी कि चुपे तोंई; दंङ दोतिंङ कंड्री लेहती कि प्रभु ज़ि छना ठ्रोह दोबी जेलंङ च़ि धह्तेका हुंच़े हति। दोथर कुई, “याकूब ए बिशवासी न्वातिंङ दिह गप्पा कुचे च़रतेन।” दंङ पतरस दोरच़ी हुंच़ा ऊई ठहरि रिंङ अच्च़ा इलि।
मुंजे सरके जेलङ सेनिकतु बिचंङ हलचल शुहबी लेहती ‍कि पतरस अंऊ खा अच़ा इलि। अंऊ मुक्का रज्ज़ा हेरोदेस ए दोबि पेट्रीमी हुकुम रेंई दंङ पेट्री मरती, ता सेनिकतु हखा रुहक्च़ी लेहती दंङ अंऊ मुक्का दोरे जुबाब रेह मरतिर ता रज्ज़ा हेरोदेस ए दोतिंङ मृत्‍यु दण्ड रेह च़रति: दंङ रज्ज़ा हेरोदेस यहुदिया प्रदेश केट्रा केसरिया शहरंङ इलजे थोड़े अरे टेम तचेक बंङज़ा इलि।

रज्ज़ा हेरोदेस सोर ए सीदोन शहरो मीहतंङ साते महसे रोषेक्च़ा तोहई। दिऊ थल्जी दुह झुल्ला शहरो मीहरे इच्च़ा सेहम शुहचे रज्ज़ा हेरोदेस ओ कछंङ अतिर दंङ बलास्तुस बि अरि रज्ज़ा ओ इच्च़ा खास मुलाज़िम तु बिचंङ ज़ि इच्च़ा तोहई, मनाएच़ा मेल-मिलाप लहज़िमी कोशिश लहरिर; छना कुचे दोरे रज्ज़ा ओ इलाकारिंङ मीहतंङ साते ज़ेईमी समानो व्यापार लहज़ातेर। अंऊ ध्याड़ा रिंङ रज्ज़ा हेरोदेस ए दुह शहरो मीहतंङ साते दोईमी पाहठी सोचेक्ती दुह ध्याड़ा रिंङ दुह राजखमज़ेर लेहच़ा न्याय सिहासन ओ टोईच़ी बंङज़िरी, दंङ दोतु हखा भाषण रंड्री लेहती। दंङ मीहरे हाऊष रंड्रा कुट्री लेहतिर, “दिह ता मीहू सग माह शुह पर सद्द् तु सग शुह।” दुह ए मुक्का प्रभु ऊ इच्च़ा स्वर्गदूते रज्ज़ा हेरोदेस ओ टोहकठे हमला लहरी, छना कुचे दोई एनोह थल्जी लहसी मीहतु अराधना बि ग्रहण लहरी दंङ परमेश्वरा बि महिमा माह रांई झांह लेह दोऊ फुका रिंङ ओमड्रा लेहके इलि दंङ दुह सिए इलि। पर परमेश्वर ओ बचन फेलेके इलि दंङ बिशवासी तु गिनती बेसहा लहरी।
अंऊ मुक्का बरनबास ए शाऊल ए, यहूदिया प्रदेशंङ एनोहो सेवा ओ कम पुरा लेह केहरिर ता दोरे यरूशलेम शहरंङ च़ि अन्ताकिया शहरंङ वापिस अच़ा अतिर। यूहन्ना अतु मिन मरकुस ला शुह दोतंङ साते तोहई।

Listen to प्रेरित 12