Acateco (Kanjobal, Western) - 2001 Edition (NT)

Jix lawi tuꞌ xin, jix too Jesús tuꞌ bꞌey junxa skꞌaxepal jaꞌ mar Galilea. Chi yij pax jaꞌ mar tuꞌ, Tiberias. Ecꞌal ánima jix oc tzajan yintaj Naj, yu jix yil wan milagro ebꞌ jix xꞌoxoꞌ yet jix yakꞌon waꞌxoj can scꞌul ebꞌ yaꞌey. Jaꞌ Jesús tuꞌ, jix too yetoj ebꞌ scuywom bꞌey jun wonan, catuꞌ jix ey chotan yetoj ebꞌ tituꞌ. Tuxa chi jul stiempoal skꞌin Pascua ebꞌ Israel yet tuꞌ. Jix yilon Jesús tol caw ey ánima chi apni scꞌatan. Yuxan jix yal tet naj Felipe jaxca tiꞌ:
—¿Bꞌeytuꞌ oj cu man low wan ánima tiꞌ? ẍi Jesús tet naj. Tucꞌal jix skꞌanle cꞌal jaxca tuꞌ, yet watxꞌ chi yabꞌe tzet oj yal naj Felipe tuꞌ tet, yutol yotaj xa Naj tzet oj yute. Catuꞌ jix takꞌwi Felipe tuꞌ tet Naj jaxca tiꞌ:
—Caxcꞌal mi ey caabꞌoj cien denario, ¿tumi oj yabꞌ yin ebꞌ, catuꞌ chi yiꞌon niꞌoj yet masanil ebꞌ? ẍi naj tet Jesús. Ey pax junxa scuywom Jesús chi yij Andrés, yuẍtaj sbꞌa yetoj Simón Pedro, jix yal tet Jesús jaxca tiꞌ:
—Ey jun naj unin eyecꞌ cu xol tiꞌ, ey joebꞌ span cebada naj iꞌbꞌil yetoj cacꞌon pescado. ¿Tumi oj yabꞌ niꞌan tiꞌ yin masanil ánima? Ilaꞌ, tol caw ecꞌal ebꞌ, ẍi naj tet Jesús. Jix lawi jun tuꞌ xin, catuꞌ jix yalon Jesús tet ebꞌ scuywom tuꞌ:
—Alwej tet ebꞌ ánima tiꞌ, tol chi ey chotan masanil ebꞌ, ẍi Naj tet ebꞌ.
Catuꞌ jix sjijen ebꞌ yey chotanoj. Ey mi joebꞌoj mil winaj. Jaꞌ jun lugar bꞌey eyecꞌ ebꞌ tuꞌ, caw ey an chꞌim. Catuꞌ jix ẍaꞌon ecꞌ ixim pan Naj Jesús. Catuꞌ jix yalon yu diosalil tet Dios yu ixim. Catuꞌ jix spoꞌon ecꞌ yin ebꞌ scuywom tuꞌ. Jaxa ebꞌ cuywom, jix poꞌontoj yin ebꞌ jix ey chotan tuꞌ. Quey pax tuꞌ jix yute yetoj noꞌ pescado, jantaj cꞌal chi yoche scꞌul junjun ebꞌ. Jaꞌ yet jix xew slow ebꞌ sicꞌlebꞌil, jix yalon Jesús tet ebꞌ scuywom jaxca tiꞌ:
—Yambꞌawej a masanil ixim jix can tiꞌ, yet watxꞌ cꞌam niꞌoj ixim chi etextoj, ẍi Naj tet ebꞌ. Jaꞌ yet jix lawi ecꞌ yiꞌon a ixim ebꞌ, lacawebꞌ to xuc jix no can yu sobrail ixim joebꞌ pan cebada tuꞌ. Masanil ebꞌ ánima jix ilon jun milagro jix xꞌox Jesús, yuxan jix yal ebꞌ jaxca tiꞌ:
—Jaꞌton jun ẍejabꞌ Dios tiꞌ, tol echbꞌanebꞌil sjul ku bꞌey yul yibꞌankꞌinal tiꞌ, ẍi ebꞌ. Yotaj xacꞌaltaꞌ Jesús tol chi yoche ebꞌ tol chi smitxꞌaꞌ, catuꞌ chi yaon oc Naj sreyaloj ebꞌ, yuxan jix el xol ebꞌ, catuꞌ jix too xꞌojli bꞌey jun wonan tuꞌ junelxa.


Jaꞌ yet lalanxa skꞌejbꞌi, jix too ebꞌ scuywom Jesús tuꞌ stiꞌ jaꞌ mar. Jix octoj ebꞌ yul barco, Jichan jix yute ecꞌtoj ebꞌ bꞌey conobꞌ Capernaúm eyecꞌ stiꞌ jaꞌ mar tuꞌ. Caw kꞌej taninajxa yet jix too ebꞌ. Jal pax Jesús xin, cꞌamto chi apni scꞌatan ebꞌ. Lalan sbꞌey ebꞌ yibꞌan jaꞌ tuꞌ, catuꞌ jix tit jun miman kaꞌeꞌ caw jow. Catuꞌ jix a pomna jaꞌ mar tuꞌ, jix makꞌle a yu jun miman kaꞌeꞌ. Eyxam nanoj scaabꞌ legua xa bꞌey ey ebꞌ, catuꞌ jix yilontej ebꞌ tol lalan yapni Jesús yintaj ebꞌ. Chi bꞌey Naj yibꞌan jaꞌ yetoj yajan. Yuxan, caw jix xiwa ebꞌ. Jix yaltoj Naj tet ebꞌ jaxca tiꞌ:
—Jain ton Jesús jin tiꞌ an, manche jex xiwi, ẍi Jesús tet ebꞌ. Catuꞌ jix tzala a ebꞌ, jix ẍaꞌon octoj Naj ebꞌ yetoj yul barco. Jaꞌ yet lalan yoctoj Naj yul barco tuꞌ jix apni oc ebꞌ skꞌaxepal jaꞌ mar bꞌey lalan stoo ebꞌ tuꞌ yin jun mutzꞌsatil.

Ey cꞌal ecꞌ ebꞌ ánima tuꞌ yet yewial bꞌey skꞌaxepal ecꞌ jaꞌ mar tuꞌ. Catuꞌ jix snaꞌontej ebꞌ tol jun chꞌan teꞌ barco tuꞌ jix kꞌaxbꞌon ecꞌoj. Jix yil ebꞌ tol asan chꞌan ebꞌ scuywom Jesús jix too yul teꞌ. Catuꞌ ma octoj Jesús yetoj ebꞌ. Ey pax wan teꞌ barco jix tit bꞌey conobꞌ Tiberias, catuꞌ jix apni ebꞌ scawilal jun lugar bꞌey jix loꞌle ixim pan yet jix yakꞌon yu diosalil Naj Kaawil yu ixim. Catuꞌ jix yilontej ebꞌ ánima tuꞌ, cꞌamxa Jesús eyecꞌoj, catuꞌ cꞌam pax ebꞌ scuywom xol ebꞌ. Catuꞌ jix oc ebꞌ yul wan barco tuꞌ, catuꞌ jix too ebꞌ seyon ecꞌ Naj bꞌey conobꞌ Capernaúm.

Jaꞌ yet jix ecꞌ apnoj ebꞌ ánima skꞌaxepal ecꞌ jaꞌ mar tuꞌ xin, jix ilcha Jesús yu ebꞌ. Catuꞌ jix skꞌanlen ebꞌ tet Naj jaxca tiꞌ:
—Jaach Cuywam, ¿janicꞌ jix jaach jul titiꞌ? ẍi ebꞌ tet Naj. Catuꞌ jix yalon Naj tet ebꞌ jaxca tiꞌ:
—Caw yel chi wal ey jex an, asan yu jix no je cꞌul yu jix wakꞌ pan je loꞌ tuꞌ, yuxan chin jul je seyon ecꞌoj. Man yu oj tol jix je yil wan milagro jix jin txꞌox an, catuꞌ jix naꞌcha el je yu tzet yeloc apnoj wan milagro tuꞌ. Man ojabꞌ yin tzet chi cu loꞌ che yaoc je naꞌbꞌal je seyoni, yutol tucꞌal chi lawi eloj. Ey junxa tzetyetal jaxca tzet chi cu loꞌ tuꞌ, jal jun tuꞌ, tol cꞌam bꞌakꞌin chi lawi. Jaꞌ chi akꞌon je kꞌinal tol ey cꞌal yin tobꞌalkꞌinal. Yuxan, jaꞌ ojabꞌ jun tuꞌ che yiꞌatej je cꞌul je seyoni. Jain oj wakꞌ jun tuꞌ ey jex an, yutol Akꞌbꞌil Wopiso xol ebꞌ ket animail yu Dios, jix jin txꞌoxel cu Mam Dios an, ẍi Jesús tet ebꞌ. Catuꞌ jix skꞌanlen ebꞌ tet Naj jaxca tiꞌ:
—¿Tzet chi yun cu seyon ecꞌ jun tzet chi yoche scꞌul Dios tuꞌ jon xin? ẍi ebꞌ tet Naj. Catuꞌ jix yalon Jesús tet ebꞌ jaxca tiꞌ:
—Tol jaꞌ jun tiꞌ chi yoche Dios che yunne, chi yoche tol che yaoc je cꞌul win an, yutol jaꞌ jix jin chejontej, ẍi Jesús tet ebꞌ. Jix lawi yabꞌen ebꞌ jun tuꞌ xin, jix skꞌanlen pax ebꞌ tet naj junelxa jaxca tiꞌ:
—¿Tzet milagroal junoj cha txꞌox ey jon xin, catuꞌ chi kaon oc cu cꞌul ja win? ¿Tzet chi skeꞌ ja wu? Jaꞌ ebꞌ kichmam, ey jun milagro ilbꞌil yu ebꞌ yet peyxa tuꞌ, yet jix sloꞌon maná ebꞌ bꞌey jun cusiltaj txꞌotxꞌ jaxca yalon yul An Juun Tzꞌibꞌebꞌilcanoj, ẍi ebꞌ tet Jesús. Yuxan jix yal Jesús tet ebꞌ jaxca tiꞌ:
—Caw yel chi wal ey jex an, manaj Moisés jix akꞌon jun satcanil loꞌbꞌe tuꞌ tet ebꞌ. Tol jaꞌ jin Mam, jaꞌ chi aontej jun jaꞌcaw loꞌbꞌe chi tit satcan tuꞌ. Yutol jaꞌ jun loꞌbꞌe chi wal tol chi yakꞌ Dios tiꞌ, jaꞌ bꞌey satcan jix eytej. Ey ebꞌ bꞌey yul yibꞌankꞌinal tiꞌ oj ẍaꞌ skꞌinal ebꞌ tol ey cꞌal yin tobꞌalkꞌinal yu, ẍi Jesús tet ebꞌ.
—Mamin, akꞌ cꞌal jun loꞌbꞌe tuꞌ ey jon tobꞌalkꞌinal, ẍi ebꞌ tet Naj. Catuꞌ jix yalon tet ebꞌ jaxca tiꞌ:
—Jain tiꞌ, jaxca loꞌbꞌe wei, yutol akꞌom kꞌinale jin an, tol ey cꞌal yin tobꞌalkꞌinal. Jaꞌ ebꞌ chi jul ey jin an, cꞌamxa bꞌakꞌin oj tit swail ebꞌ. Jaꞌ ebꞌ chin aon oc yin scꞌul, cꞌamxa chi tit pax stajin tiꞌal ebꞌ. Yuxan jaxca taꞌ jix yun walon ey jex an, caxcꞌal chin je yilaꞌ, ¿tumi oj je yaoc je cꞌul win an? Masanil ebꞌ chi yakꞌ cu Mam Dios ey jin an, oj jul ebꞌ ey jin tiꞌ. Jaꞌ ebꞌ chi jul ey jin tiꞌ an, cꞌam junoj ebꞌ man oj jin chaꞌ. Jain tiꞌ, jix jin tit satcan, jaꞌ yochwan jun jix jin chejontej chi jul wun an. Man yu oj wunen wochwan yul wet jin txꞌojli, yuxan jix jin tita. Jaꞌ jin Mam jix jin chejontej, chi yoche scꞌul cꞌam junoj mac xol ebꞌ chi yakꞌ ey jin tiꞌ an, oj qꞌueycan eloj. Chi yoche tol jain, oj wakꞌ pitzcꞌu a ebꞌ yet slawubꞌ cꞌual. Jaꞌ yochwan jin Mam tuꞌ, tol masanil mac chi abꞌen jin kꞌaneal, catuꞌ chin yaon oc ebꞌ yin scꞌul, chi ẍaꞌ can skꞌinal ebꞌ tol ey cꞌal yin tobꞌalkꞌinal. Yuxan jain, oj wakꞌ pitzcꞌu pax a ebꞌ yet slawubꞌ cꞌual tuꞌ, ẍi Jesús tet ebꞌ. Jaꞌ yet jix yabꞌen a ebꞌ yaaw yeoc bꞌey Judea wan tuꞌ, pena jix yal ebꞌ yin Jesús. Yutol jix yal Jesús jun tiꞌ: “Jain ton jaxca loꞌbꞌe wei, bꞌey satcan jix jin eytej,” ẍi Jesús tet ebꞌ. Yuxan jix yal ebꞌ jaxca tiꞌ:
—Jaꞌ jun winaj tiꞌ, jaꞌton Naj Jesús, Naj scꞌaal naj José. Kotaj smam cꞌal xutx Naj. Ilaꞌ lalan yalon pax Naj tol bꞌey satcan jix eytej yaloni, ẍi ebꞌ yaaw yeoc bꞌey Judea tuꞌ. Catuꞌ jix yalon Jesús tet ebꞌ jaxca tiꞌ:
—Manche jin je bꞌuchuꞌ. Cꞌam junoj mac tucꞌal chi yakꞌ jul sbꞌa ey jin an, ta manaj jin Mam chi chejontej ebꞌ ey jin an. Jaꞌ ebꞌ chi jul ey jin tiꞌ an, oj wakꞌ pitzcꞌu a ebꞌ yet slawubꞌ cꞌual. Ey jun xol ebꞌ ẍejabꞌ Dios jix tzꞌibꞌencan ey jaxca tiꞌ: “Oj cuyle masanil ánima yu Dios,” ẍi can Naj. Yuxan, masanil mac chi yaoc xiquin yabꞌen tzet chi yal cu Mam Dios, ta chi naꞌcha el yu ebꞌ tzet chi yalaꞌ, oj jul ebꞌ ey jin an. Man lalan oj walon an, ta tol ey junoj mac jix ilon yin cu Mam Dios. Asanne jin wotaj yili, yutol jix jin tit bꞌey eyecꞌoj. Caw yel chi wal ey jex an, jaꞌ mac chin aon oc yin scꞌul, ey skꞌinal yin tobꞌalkꞌinal. Jain tiꞌ, jaxca tol loꞌbꞌe jin, yutol akꞌom kꞌinale jin tol ey cꞌal yin tobꞌalkꞌinal. Jaꞌ ebꞌ kichmam, jix sloꞌ maná ebꞌ bꞌey cusiltaj txꞌotxꞌ, jix cam pax el ebꞌ masanil. Jal pax mac chi loꞌon jun loꞌbꞌe jix eytej satcan tiꞌ xin, cꞌam bꞌakꞌin oj cam ebꞌ. Jain ton jix jin eytej satcan tuꞌ, laan jin jaxca loꞌbꞌe, yutol akꞌom kꞌinale jin tol ey cꞌal yin tobꞌalkꞌinal. Yuxan, jaꞌ mac chi loꞌon jun tiꞌ, iquis cꞌal ebꞌ tobꞌalkꞌinal. Jaꞌ jun tzetyetal laan jaxca loꞌbꞌe chi wakꞌ loꞌle tiꞌ, jaꞌton jin mimanil. Chi wakꞌ an, yet watxꞌ chi skeꞌ yiquisbꞌi cꞌal ecꞌ masanil ánima yin tobꞌalkꞌinal, ẍi Jesús tet ebꞌ. Catuꞌ jix steelen a sbꞌa ebꞌ yaaw yeoc bꞌey Judea tuꞌ yin tzet jix yal tuꞌ, catuꞌ jix yalon ebꞌ jaxca tiꞌ:
—¿Tzet oj yun yakꞌon smimanil jun winaj tiꞌ cu chiꞌ, chi snaꞌ? ẍi ebꞌ. Catuꞌ jix yalon Jesús tet ebꞌ:
—Caw yel chi wal ey jex an, ta cꞌam che chiꞌ jin mimanil tiꞌ, catuꞌ cꞌam che yucꞌ jin chiqꞌuil tiꞌ, jain Akꞌbꞌil Wopiso xol ebꞌ ket animail yu Dios, ma skeꞌ je chaꞌon je kꞌinal. Yuxan, yal cꞌal mac oj chiꞌon jin mimanil tiꞌ, catuꞌ oj yuqꞌuen pax jin chiqꞌuil tiꞌ, ey skꞌinal ebꞌ yin tobꞌalkꞌinal. Jain cꞌal oj wakꞌ pitzcꞌu a ebꞌ yet slawubꞌ cꞌual. Yutol jaꞌ jin mimanil tiꞌ, caw laan jaxca loꞌbꞌe, cꞌal jin chiqꞌuil tiꞌ, laan jaxca tzet chi ucꞌlei. Yal cꞌal mac oj chiꞌon jin mimanil tiꞌ, catuꞌ oj yuqꞌuen pax jin chiqꞌuil tiꞌ, junxane chi yun can wetoj. Ey cꞌal ecꞌ win an, catuꞌ ey jin pax ecꞌ yin. Jaꞌ cu Mam Dios iquis cꞌal Naj yul yet. Jaꞌ jix jin chejontej. Yu Dios, yuxan iquis jin pax oj. Yuxan, jaꞌ mac chi chiꞌon jin mimanil tiꞌ, oj wakꞌ skꞌinal ebꞌ tol ey cꞌal yin tobꞌalkꞌinal. Jaꞌ jun jaxca loꞌbꞌe jix eytej satcan chi waltej tiꞌ, jaꞌ jun tiꞌ, man laan oj jaxca maná jix sloꞌ ebꞌ kichmam yet peyxa. Caw miman jix sloꞌ ebꞌ, ilaꞌ tol jix cam pax ebꞌ. Jal pax mac oj loꞌon jun jaxca loꞌbꞌe tiꞌ, oj ẍaꞌ skꞌinal ebꞌ tol ey cꞌal yin tobꞌalkꞌinal, ẍi Jesús tet ebꞌ. Jaꞌ wan cuybꞌanile tiꞌ, jaꞌ bꞌey snail sculto ebꞌ Israel bꞌey conobꞌ Capernaúm, jaꞌ tituꞌ albꞌil yu Jesús.

Jaꞌ yet jix yabꞌen ebꞌ scuywom wan kꞌane tuꞌ, ecꞌal ebꞌ jix alon jaxca tiꞌ:
—Caw pena jun chi yal tiꞌ. ¿Mac oj ẍaꞌ scꞌul yabꞌen wan chi yal tuꞌ? ẍi ebꞌ. Yotaj xa pax Jesús tzetyetal lalan yalon ebꞌ, yuxan jix yal Naj tet ebꞌ jaxca tiꞌ:
—¿Tumi chi somcha el je naꞌbꞌal yu wan kꞌane chi wal tiꞌ an? Jain tiꞌ, Akꞌbꞌil Wopiso xol ebꞌ ket animail yu Dios. ¿Tzet je chi ta che yil yet oj jin paxa bꞌey jix jin tit an? Jaꞌ Yespíritu Dios chi akꞌon kꞌinale tol ey cꞌal yin tobꞌalkꞌinal. Jal cu mimanil xin, cꞌam yopiso yin yakꞌon kꞌinale. Jaꞌ wan kꞌane chi wal ey jex tiꞌ an, caw yel yet Espíritu. Yuxan, jaꞌ chi skeꞌ yakꞌon je kꞌinal tol ey cꞌal yin tobꞌalkꞌinal. Ey pax jaywan jex cꞌam chin je yaoc yin je cꞌul, ẍi Jesús tet ebꞌ scuywom tuꞌ.
Queytuꞌ jix yute yalon Jesús tet ebꞌ jaxca tuꞌ, yutol yotaj xa yet tax yichbꞌanil mactxequel ebꞌ man tꞌinan oj yaon oc scꞌul yin. Yotaj pax Naj mactxequel jun tꞌinan oj aon oc Naj yul skꞌabꞌ camich. Jix yalon pax Naj jaxca tiꞌ:
—Yutol ey jex cꞌam che yaoc je cꞌul win an, yuxan jix wal ey jex, tol cꞌam junoj mac tucꞌal chi yakꞌ jul sbꞌa ey jin an, ta manaj jin Mam chi iꞌon juloj, ẍi Jesús tet ebꞌ. Yet tax cꞌal tuꞌ xin, ecꞌal ebꞌ scuywom tuꞌ jix meltzo yintaj junelxa. Ma xacꞌal yal scꞌul ebꞌ jix tzajlo yintaj Naj. Yuxan, jix skꞌanlen Jesús tet ebꞌ lacawan jaxca tiꞌ:
—¿Jal jex, jaex tiꞌ, ma che yoche chex meltzo je yintaj pax oj? ẍi Jesús tet ebꞌ. Yuxan jix takꞌwi Simón Pedro tuꞌ tet Naj jaxca tiꞌ:
—Jaach Cuywam, cꞌam junojxa mactxequel bꞌey oj cu oc tzajanoj. Yutol jaꞌ yin wan kꞌane cha wal ey jon tiꞌ, jatuꞌ oj cu chaꞌ cu kꞌinal tol ey cꞌal yin tobꞌalkꞌinal. Jaon tiꞌ, tuxa jix jaach kaoc yin cu cꞌul. Kotaj tol jaach tiꞌ, Cristo* jaach. Jaach tiꞌ, Scꞌaal jaach Dios iquis, ẍi naj Pedro tet Jesús. Catuꞌ jix yalon Jesús tet ebꞌ jaxca tiꞌ:
—Jaex lacawan jex tiꞌ, jain jix jex jin sicꞌ can eloj. Ey pax jun je xol tol ẍejabꞌ diablo yei, ẍi Jesús tet ebꞌ. Yu naj Judas, scꞌaal naj Simón Iscariote, yuxan queytuꞌ jix yun yaloni. Yutol jaꞌ Judas tuꞌ tꞌinan cꞌaltaꞌ yale oc naj yul skꞌabꞌ camich yu. Tol yet cuywomal pax sbꞌa yetoj ebꞌ juslucꞌwan tuꞌ.

Listen to Juan 6