Mixe de Coatlan - 1976 Edition (NT) Drama

Mixe de Coatlan - 1976 Edition (NT)

Co Jesús ycapxtaay ymɨydactaay mɨɨd je mayjäy huɨdi anajty jɨm amɨdo'ijtp, chi ytɨgɨɨy jɨm Capernaum. Jɨm anajty tüg Capɨtán tüg ytumbɨ hue' anajty pɨ́jcɨp, janch tɨm ögaanɨp anajty, e je soldado huindzɨn ooy anajty tzocy je ytumbɨ. Co je capitán ayuc mɨdooy jadu'n nej Jesús ytuñ, chi quejxy judío mɨjjäydɨjc, huen nɨcxy mɨnuucxtaaccɨxy Jesús co je' yminɨpy ma ytɨjc yajtzögɨɨyb je' ytumbɨ. Chi je mɨjjäydɨjc ajcxy ymiiñ ma Jesús, chi ajcxy cohuanɨɨy ooy, pɨjctzou may'ajt, nɨmay:
―Jadayaabɨ capitán ymɨhuaad co mbubedɨpy, com yajmɨj'ajtpy ɨɨch ajcxy ngajp, tɨ cojy ɨɨch ajt naymujctac.
Chi Jesús ñɨcxy mɨɨd je' ajcxy. Co ajcxy mɨhuingooñ je tɨjc, chi je capitán quejxy ymɨgüg huen nɨcxy jɨjpcobadɨ̈y Jesús, nɨmähuɨpy:
―Huindzɨn, ca' nej mnayjɨhuɨ̈yii, ca' ɨɨch mɨhuaadɨty co mdɨgɨ̈huɨpy ma ɨɨch ndɨjc. E paady ca' ɨɨch njot tɨ mɨctuñ co ɨɨch miich cɨ'm nɨ́cx n'ixtäy. Jëda'ajty miich nɨgoo capx, e tɨ anajty ndumbɨch chögy. Nañ jadu'n ɨɨch nmɨɨdɨch soldados ajcxy huɨdi ajcxy xycapxcöbɨjcpɨch. Nɨmäyɨch tüg: “Nɨcx”, e nɨcxp; nɨmäyɨch jadüg: “Min”, e mimb; nɨmäyɨch ndumbɨ: “Tun jada”, e ytumyb.
Co Jesús mɨdoy nej je capitán ymɨnañ, chi jɨhuɨɨy ooy, chi ni'ijxhuimbijty nɨmay ajcxy huɨdi pamiinɨp:
―Ɨɨch miich yɨm nɨmaaygɨxyp co ca' nbaadyɨch Israel jäy huɨdibɨ xymɨbɨ́jcpɨch jadu'n nej jadayaab agatz jäy.
Co ajcxy je quexyöybɨ yhuimbíjtcɨxnɨ ma je tɨjc, chi oy páatcɨxnɨ je tumbɨ tɨ anajty y'agɨdägy.

Chi jadu'n yjajty huin'it xɨɨ co Jesús anajty ñɨcxy ma tüg cajp huɨdi anajty yxɨɨ Naín. Mɨɨd anajty ñɨcxy jadyii ydiscípulos ajcxy etz mayjäy. Co yhuingooñ ma anajty ycajp tɨgɨ̈huaanɨ, chi mɨnaybaatɨ jäy ajcxy, ñɨcxy anajty ajcxy tüg öcpɨ yajnaaxtɨgɨɨygɨxy, huɨdi anajty ungdaj tügpajc y'ung'ajtpy. Hue' je' anajty co'ögy je töxyjäy, e mɨɨd anajty ñɨcxy maycajpjäy. Co je Huindzɨn Jesús ijxy, chi pa'ayogoty je töxyjäy, chi nɨmay:
―Ca' myäxy.
Chi Jesús ymɨjhua'cy, nïdoñ je öcpɨ cajón. Chi ajcxy ytɨnayxɨjpy je huɨdi anajty ajcxy öcpɨ cɨyñɨcxp. Chi Jesús ymɨnañ:
―Yëydɨjc, ɨɨch miich yam nɨmaayb, pɨdɨ̈g.
Chi je yëydɨjc ɨñayɨ̈gy huɨdi anajty tɨ y'ögy, e ytɨgɨɨy mɨydaacp. Chi Jesús yajcɨ̈dɨgɨɨyñɨ je' ytaj. Chi ajcxy nidüg'ócɨy ooy ñay'adzɨgɨygotɨ, e Dios jäymejch cömay, ymɨnaangɨxy:
―Tüg mɨjpɨ Dios tɨy'ajtmɨɨtpɨ cham yajpatp ma ɨɨch ajt.
Nañ jadu'n ajcxy ymɨnaangɨxy:
―Tɨ Dios ni'ijxcɨdägy yɨ yñaax ycajp.
Ooy Jesús yajcömay ma tüg'ócɨy Judea naaxjot, etz ma tüg'ócɨy jac huinduy agonbɨ naax cajp.

Chi je jäy ajcxy huɨdi anajty Juan je Bautista yaj'ixpɨjcpy nimɨydactay jadu'n nej mɨɨd ytunɨ yjajtɨ Jesús. Chi Juan huooy metz yɨ' ydiscípulos ajcxy, e quejxy ma Jesús yajpaady. Chi Juan nɨmay co huen nɨcxy amɨdoogɨxy Jesús, pen yɨ' je' je Cristo huɨdi anajty miinaam, o pen n'ahuíjxpy ajcxy huingbɨ. Chi je Juan yquejxyöybɨ miiñ ma Jesús nɨmay:
―Yɨ Juan je Bautista ɨɨch ajcxy tɨ xyquéxyɨch ma miich amɨdohua'ñ pen miich je' je Cristo huɨdi minaamb, o ¿n'ahuíjxypɨch ajcxy huingbɨ?
Tɨm huin'ítɨy Jesús ooy mayba'mjäy yajtzoocy. Yajtzoocy nañ jadu'n huɨdi anajty ajcxy ooy mɨj yuu mɨj pa'm yaj'ayoyii, etz nañ yajtzoocy pɨnjaty anajty ca'oybɨ mɨɨd ma yjot yhuinma'ñ. Chi Jesús je Juan yquejxyöybɨ nɨmaayɨ:
―Nɨcx nɨmaaygɨx je Juan jadu'n nej tɨ m'íjxcɨxy tɨ mmɨdoogɨxy, co yɨ huintzpɨ tɨ yhuindɨcxɨ̈gy, yɨ tecyma'tpɨ tɨ yöyɨ̈gy, yɨ nïbützpa'mmɨɨdpɨ tɨ chögy, je cönatpɨ tɨ ymɨdohuɨ̈ccɨxy, je öcpɨ ajcxy tɨ yjugypɨjcy, e ngapxhuäcxyɨch oybɨ ayuc ma ayoobtɨjc. Jotcujc yɨ' ajcxy huɨdi ca' huinma'ñytɨgooygɨxy mɨɨd ɨɨch ycɨxpɨ.
Co je Juan yquexyyöybɨ yhuimbijttay, chi Jesús nimɨydaccoty je Juan ma je mayjäy ajcxy, ymɨnañ:
―Co ajcxy tɨ m'oy mɨjtɨgɨ̈duum, ¿ti tɨ m'íjxcɨxy? ¿Nej tɨ m'íjxcɨxy tüg jäy ametz jotmetz, jadu'n nejhuɨ̈y tüg nähuaax huɨdi pojmiimb pojxɨjp? Chi jada', ¿ti oy tɨ m'íjxcɨxy? ¿Tüg yëydɨjc huɨdi mɨɨd oy yhuit yxöxyɨty? Yɨ jäy ajcxy oy yxojxypɨ huɨdi agujc jotcujc tzɨnaaygɨxp hue' ajcxy yajpaady ma yɨ rey ytɨjc. ¿Ti ajcxy tɨ m'ixy jɨm mɨjtɨgɨ̈duum? ¿Tüg jäy huɨdi Dios ytɨy'ajt mɨɨd? Janch tɨ m'íjxcɨxy tüg Dios ytɨy'ajtmɨɨdpɨ, etz jacnïgɨ ymɨ́jɨty je' ca'ydɨ Dios y'ayucnajtzcapxɨɨybɨ huɨdi jecy'ajty tzɨnay. Je' jada je jäy huɨdi Dios ñigapxyp ma ñecy ma Dios jadu'n ymɨnañ:
Cham nguejxyɨch ɨɨch nguexyöybɨ jayɨjp ma miich, je' yaj'oyɨ̈huɨp je jäy ajcxy yjot yhuinma'ñ mɨɨd ɨɨch ycɨxp, tɨm jadu'n nipaady nej jɨhuɨ̈y jäy tü'aa yaj'oyɨ̈y co rey ymina'ñ yjäda'ñ.
Ɨɨch miich ajcxy yam nɨmaayb co huɨdijaty ajcxy töxyjäydɨjc yajpi'c'ajtpy, ca' ji ni tüg Dios y'ayucnajtzcapxɨɨybɨ huɨdibɨ jacnïgɨ ymɨ́ jɨty ca'ydɨ Juan, je Bautista. Chi jada' je jac mutzpɨ huɨdi jiiby tzajpjoty yajpaatp ma Dios y'ane'my, jacmɨj je' ca'ydɨ Juan.
Co ajcxy je mayjäy jadu'n mɨdoy nañ jadu'n je yajcogüejtpɨdɨjc ajcxy huɨdi anajty nɨɨbéjtcɨxy ma Juan, chi ajcxy mɨnañ co Dios ytudägyɨty. E je fariseos ajcxy etz je escribas ajcxy huɨdi anajty ca' nɨɨbéjtcɨxy ma Juan, ca' ajcxy mɨjpɨdacy huɨdi anajty Dios ytunamy mɨɨd je' ajcxy ycɨxpɨ. Chi je Huindzɨn Jesús ymɨnañ:
―¿Ti mɨɨd nyajquipxɨ̈huɨbɨch jadayaabɨ jäy huɨdi tzɨnayb ma jadachambɨ tiempo? ¿Huɨdi mɨɨd nyajtügɨ̈huɨbɨch? Jadu'n nej pi'ctɨjc huɨdi ajcxy ɨyɨɨyb ma jäy yjuygɨxy ytooccɨxy. Mɨjhuan mɨjjɨhuɨɨygɨxy ymɨgügtɨjc: “Tɨ njayajxüxɨch flauta e ni ca' tɨ m'éjtzcɨxy; tɨ nja'ɨɨhuɨ ajcxy ɨɨy jotmaymɨɨdpɨ, e ca' tɨ myaaxcɨxy.” Chi Juan je Bautista ymiiñ, e je' ca' anajty cay, ni ca' vino ügy, chi miich ajcxy mɨnaangɨxy co Juan ymɨɨd ca'oybɨ. Chi ɨɨch, je jäy huɨdi tzoon tzajpjoty, nmiñɨch, chi caaybɨch uucpɨch, e miich ajcxy mɨnaangɨxy: “Ijxcɨx, cha tüg yëydɨjc janch cax janch vino uucp, huɨdi mɨgüg'ajtpy yajcuëjtpɨdɨjc etz pocyjäydɨjc.” Je tɨy'ajt ji je' ñiguëxɨ̈gy ma je pɨnjaty nigapxp nimɨydaacp tɨy'ajt.

Chi tüg fariseojäy may'ajt pɨjctzoy, co Jesús anajty mɨɨd ycaya'ñ. Chi Jesús ytɨgɨɨy ma je fariseojäy ytɨjc, chi ɨñay'ahuɨɨy ma mesa. Chi jɨm anajty tüg töxyjäy huɨdibɨ anajty jɨbɨc tzɨnaayb jɨbɨc jugy'ajtp ma je jɨmbɨ cajp. Co je' nejhuɨɨy jiiby Jesús ma fariseojäy ytɨjc ɨñäy ma mesa, chi mɨmiiñ tüg quiig aceite huɨdibɨ ooy oy xuugy, chi mɨdɨgɨɨy tɨgoty. Chi ypɨguetz'ahuɨy ma Jesús ytecy ymɨjc, e chi yajxoocɨ Jesús ytecy mɨɨd huinnɨɨ e yajpöt mɨɨd ycöhuay, chi yajjaaxy je aceite huɨdi ooy oy xuugy. Co jadu'n ijxy je fariseojäy, je' huɨdibɨ anajty tɨ huoy Jesús, chi jot'ajtɨ ymɨnañ:
―Co ixyipy jada Jesús y'ocjëjɨty Dios ytɨy'ajtmɨɨdpɨ, y'ijxcajpy ixyipy pɨn jäy nejpy jäy yɨ töxyjäy huɨdibɨ nïdoonɨp co yɨ' yjɨbɨctzɨnäy yjɨbɨcjugy'aty.
Chi Jesús ymɨnañ:
―Simón, cham ɨɨch tüg ayuc nmɨ́ɨdɨdyɨch huɨdi nyajnɨmähuamy.
Chi je' y'adzooy:
―Yajnɨmaaygɨch, Huindzɨn.
Chi Jesús ymɨnañ:
―Tüg comeeñyjäy ymɨɨd anajty metz jäy huɨdi tɨ ñuucxy. Tüg jäy anuucxy mɨgoox mɨgo'px denario meeñ, e je jadügpɨ anuucxy huixchɨgui'px majc. Com je' ajcxy ca' anajty mɨɨdɨty ti mɨɨd cuedɨp, chi je comeeñyjäy huinmecxy nimetz. Miich ocnɨmaaygɨch, ¿je metzpɨ jäy huɨdi nuucxy, huɨdibɨ je' nïgɨ chojpy?
Chi Simón y'adzooy:
―Hue' n'a'ɨxɨɨyɨch je tɨɨbɨ huinmecxy jac'anaxy.
Chi Jesús ymɨnañ:
―Tɨ mdɨygapxy.
Chi Jesús ni'ijxhuimbijty je töxyjäy, e nɨmay Simón:
―¿Nej m'ijxyp jadayaabɨ töxyjäyɨ? Co ndɨgɨɨyɨch ma mdɨjc, ca' miich nɨɨ xymooyɨch co ndecy nbújɨbɨch. Jadayaabɨ töxyjäy ɨɨch ndecy tɨ xypújɨp mɨɨd yhuinnɨɨ, e tɨ xyméexyɨch ndecy mɨɨd ycöhuay. Ca' ɨɨch miich tɨ xychücxy. Jada töxyjäy jadu'n nej tɨ ytɨjc tɨgɨ̈y, xychücxtɨɨyb ɨɨch ndecy. Ɨɨch miich ca' aceite mbɨdägy ma ɨɨch ngohuajc. Jada töxyjäy tɨ xyajjaaxɨ ndecyɨch aceite huɨdi ooy oy xuugy. Paady ɨɨch miich nyajnɨmäy co jada töxyjäy huinmeecxɨ yɨ' ymaybocy, co tɨɨbɨ oyhuinma'ñ yajtuñ cɨxyjot huinɨjot. Pɨnjaty hueenɨ ypocy yajhuinmecxɨ, hueenɨ yɨ' chójcɨn yajniquëxɨ̈gy.
Chi Jesús je töxyjäy nɨmay:
―Tɨ miich mbocy yajhuinmecxtäy.
Pɨnjaty anajty ɨñaayb ma je mesa ñayñɨmáayɨgɨxy miñ xyɨpy:
―¿Pɨn jäy jada jada' co nañ yhuinmeecxɨpy jäy ypocy?
Chi Jesús nɨmay je töxyjäy:
―Tɨ m'alma ñïdzögy co tɨ xymɨbɨcyɨch. Nɨcx jotcujc.

Listen to SAN LUCAS 7