Text: © Alliance Biblique du Cameroun, 2002 Audio: ℗ 2011 Hosanna

Ghomala - 2002 Edition (NT) Drama

Nouveau Testament Ghomala © Bible Society of Cameroon, 2002.

Yə bɔ lə nə cyə, Yeso ghɔ nə yə mu' jʉɔ shyə lɑpʉə Galilea yə pu ŋkwi' ŋkhe gɑ shyə lɑpʉə Tiberia a. Mɑ vəŋ pɔ lə́ bɑ jʉm e, nə pa' pɔmnəŋ lə́ bɑ wap yɔ mtiŋ msya myə e lə ghə nə mkho'tə a. A lə pɑ̌ po'o Yeso kwɔ' dəm kuŋ, pu a pɑkhʉ̌ pyə cwə́ dəm o. A lə bɑwə shʉ' pɑ muywə paska yə a bɑ ŋwɛnyə pɑ Yudea a sɔ̌'. A lə pɑ po'o Yeso pu' mnyə myə́, jɔ mɑ vəŋ pɔ wap pɑwə sɔ' m bi e. E ghɔm bi Filipo gɑ: Pɑ gɔ yó msɛ hɑ tə́ wap ghə ywə yə wap gɔ tsʉ a? E gɔm po' nə dəŋtə Filipo, nə pa' e lə́ bɑwə jyə ywə yə e gɔ ghə a. Filipo ghɔm bi e gɑ: Pu yò msɛ̌ pɑ nə bɛ ŋkhap ŋkhəpʉə bɑ a tə gɔ ku' dəŋ yə bǎ ya mo lə́ gɔ kwi muywə po' ě a pɑ. Mu' mukhʉ̌ e yə tso tsyə bɑ Andreya, fɑ Simon Pɛtrɔ ghɔm bi é gɑ: Mu' mú mbɛ si tsɔ'ɔ bɑ e ghə msɛ mta' tɔ ba bapgu dùŋ pʉə; tə́ ǎ ku' kʉ̌ nə dəŋ pɔ pɔŋ gɑ ɑ? Yeso ghɔm gɑ: Po ghə wap cwətə si. Pa' mghě lə bɑ a yɔm tsʉ'u a, wap lə cwətə si; wap lə bɑ gwɛ a pɔ sha' tɔ. A lə pɑ̌ po'o Yeso kwi msɛ̌, go'tə Si, gaptə́ bi pɔ pyə wap lə bɑ si a; biŋ gə pɑ̀ po'o nə bapgu hɑ bǎ yə́ wɑlə́ dəŋ yə ě kuŋ a. Wap lə cəŋtə jwyə, Yeso ghɔm bi pɑkhʉ̌ pyə gɑ: Po laktə́ mbo' myə́ tə̌ sɔmywə kɑ pǐ nə́. Wap lə laktə mbo' myə́ bɔ, a lo nə msap shwɔppʉə mghǎm, mbo' myə́ myə a lə cʉ' a. Pɔ bɔ lə́ nə yɔ mtiŋ msya bɔ myə Yeso gə a gɔm gɑ: Mo yəŋ gɑ bɑ kwa' gɔm ghɔm Si yə nyənyɔ yə e sɔ' nthʉm dzʉ a. Da' gɑ Yeso nə zhyə gɑ́ pu gɔ sɔ' ghəm e nə ghə fo, biŋ kwi' nthəm do e, gɔ m dəm kúŋ.


A lə pɑ̌ bwadzʉ̌, pɑkhʉ̌ pyə tsəŋ tə́ ŋkhəm shyə lɑpʉə. Wap lə ko kənu' nə́ nə sa' gɔ Kapɛrnaum nə yə mu' kəŋ shyə. Dzʉ̌ lə wuŋ só, tə́ Yeso ŋkwyatə́ wap. Mu' mɑ fəfa lə bɑwə shʉ̌' tə shyə pɑwə bʉɔnyə. Wap lə́ bɑ wap sɔp shyə tə ŋkhəm nə gwɛ a mstadə shwɔptɔ mghǎm bʉə kɑ mgham ntha lə, jɔ Yeso, e pɑwə giŋ dəm shyə lɑpʉə, bɑwə sɔ' m bə̌ŋ kənu' yap. Wap pwɔk, da' gɑ́ tə́ Yeso ghɔm bi pu gɑ: A bɑ a, ka po pwɔk. Wap lə́ pɑ̌ shəŋ nə kwa e nthʉm kənu', da' gɑ́ nə yɔ bɑ wap kəm kəŋ shyə.

A lə́ pɑ yə mu' jʉm dzʉ̌, pɔ pyə wap lə cʉ̌' nə yə mu' jʉɔ a, yɔ gɑ kənu' lə bɑ tsʉ'u pɑ yɑmu', bɑ Yeso kě tə yap jʉm pɑkhʉ̌ pyə nthʉm yap kənu', nə pa' wap lə́ bɑ wap ghɔ pɑ̀ dǒ pú a. A piŋ bɑ po'o bɑ shɑ mkənu' fɑ Tiberia ŋwak bəŋ tsʉ' yə pɔmnəŋ lə pfɑ̌ msɛ, bɑ Cyəpɔ gho'tə Si nə a. Pɔmnəŋ lə nə́ yɔ gɑ Yeso pu a pɑkhʉ̌ pyə tə yɑ̌ tsʉ'u pɑ̀, biŋ ŋkho nthʉm mkənu' gɔ Kapɛrnaum nə cəŋ Yeso. Cwə yə wap lə yɔ e nə yə mu' jʉɔ shyə lɑpʉə a, gɔm bi e gɑ: Rabi o sɔ' cwə kɑ?
Yeso pa' bi pu gɑ: Kwa' nyənyɔ nyənyɔ, po tə shəŋ a m pa' po jɔ mtiŋ msya a pɑ̀, po shəŋ a m pa' po npfɑ́ msɛ tə jwyə a. A shəŋ gɑ̀ po fǎ' tə́ m nə ghə yəŋ ywətsʉ yə a bɔptə a pɑ̀; po fa' m nə ghə ywətsʉ yə a shwə nə vɔk mama a, ywətsʉ yə Mú mo gɔ sɔ' hɑ bi po a, nə pa' a bɑ yʉ tə Ta yə e bɑ Si a bɑ e yap mtiŋ myə́ nə e.
Wap ghɔm bi e gɑ: Pyə gɔ ghə gɑ́ kɑ tə́ fa' nə mfa' Si? Yeso pa' bi pu gɑ: fa' Si bɑ nə piŋ mo yə e nthəm e a. Wap pa' yap bi e gɑ: Kwa' wə gɔ ghə mǎ mtiŋ msya tə́ pyə yɔ nə biŋ o? Fa' tsʉ̌ bɑ tsa a? Mtá pɔk lə pɑ̌ ghakgo npfɑ mana pa' bɑ pu və gɑ: E lə hɑ ywətsʉ bi pu, a pɑ́ msɛ̌ myə a fi' fɑ kɛbəŋ a. Da' gɑ́ Yeso ghɔm bi pú gɑ: Kwa' nyənyɔ nyənyɔ, gɑ̌ siŋ wɔ, Mosɛ lě tə hɑ msɛ myə a fɑ kɛbəŋ a bi po; nə pa' Tá a nə hɑ kwa' msɛ nyənyɔ myə a fɑ kɛbəŋ a. Nə pa' msɛ̌ Si, bɑ mo yə é fi' fɑ kɛbəŋ biŋ bɑ hɑ vɔk bi dzʉ̌ a.
Wap lə ghɔm bi e gɑ: A pɑ po'o m Cyəpɔ o pɑ hɑ msɛ bɔ bi pyə guŋ mcwə awɛ.
Yeso ghɔm bi pu gɑ: Myə̀ nə bɑ́ msɛ vɔk; mo yə e sɔ' bəm a bɑ jikǔ' tə gɔ kwi' yɛ e pɑ; mo yə e piŋ a, bɑ ji shyə tə gɔ la' kwi' yɛ e pɑ́. Tə́ a bɑ gɑ̌ siŋ wɔ yá: Pǒ yɔ, ba tə́ po'o po lə piŋ. Guŋ pɔ awɛ pyə Tá hɑ wap bəm a gɔ sɔ' sɔ' bəm, a mo yə ě nəŋ sɔ' bəm a, ŋ də wa' e pɑ́. Nə pa' ŋ da tə́ fi' fɑ kɛbəŋ nə ghə ywə yə gɑ̌ shəŋ a pɑ́, ŋ də fi m nə ghə ywə yə mo yə e nthəm a shəŋ a. Ywə yə mo yə e nthəm a shəŋ a nəŋ bɑ gɑ́ ŋ khɑ ghə sɔmmo nə pɔ pyə e hɑ wap bəm a pi, gɑ̌ gɔ sɔ' yám wap nə jʉɔjʉ̀m tyɛ'dzʉ́. Ywə yə Tá a shəŋ a bɑ gɑ mo yə ě yɔ Mú biŋ e a, vɔk mama pɑ́ bi e; a sɔ' jám e nə jʉɔjʉ̀m tyɛ'dzʉ́.
Tə́ fɑ pa' Yeso lə ghɔm gɑ: Gɑ̌ bɑ msɛ myə a fi' fɑ kɛbəŋ a, pɑ Yudea lə to' nə pɑ́ gɔmtə nə é. Biŋ bɑ gɔm gɑ: E tə́ bɑ Yeso mú Yosɛp a lə́? Pɑ̀ ka zhyə tap e pu map e a? Tə bi a pɑ e ghɔm cwəlɔ gɑ: Gɑ̌ fi' fɑ m kɛbəŋ m gɑ kɑ? Yeso lə́ piŋ dɑ ghɔm gɔm bi pu gɑ: Ka po kwi' gɔmtə cəcɑ̌ po. Bi a pɑ sɔmmo lə sɔ' bəm tə́ a bɑ́ gɑ Tá yə e nthəm a, nə fəŋtə́ e nə sɔ', a nəŋ sɔ' jám e nə́ jʉɔjʉ̀m tyɛ'dzʉ́. A bɑ nthʉm ŋwa'nyə pɑ ghɔm ghɔm Si bɑ pú lě bvə gɑ: Si gɔ sɔ' zhi'tə wap awɛ. Bǎ wɑlə́ yə ě yu' ywə yə a fɑ bi Tá á, bíŋ ŋkwi ywə yə e ji'tə a, mo bɔ sɔ' bəm. Nə pa' sɔmmo la m jɔ Tá tə ně da' mo yə e fɑ m nə Si a. Mo bɔ bɑ ě yɔ Tá. Gɑ̌ siŋ wɔ kwa' nyənyɔ nyənyɔ gɑ mo yə ě piŋ á a, vɔk màmà bɑ bi e. Gɑ̌ bɑ́ msɛ vɔk. Mtá pɔ lə pfɑ mǎnà ghakgo, wap lě pfʉtə́. Pa' msɛ myə a fi' fɑ kɛbəŋ nə bɑ a, mo yə e gɔ la' pfɑ a tə gɔ la' pfʉ pɑ́.
Gɑ̌ bɑ́ msɛ vɔk myə a fi' fɑ kɛbəŋ a. Mo yə ě pfɑ msɛ bɔ a gɔ la' vɔk pɑ́ màmà. Msɛ̌ bɔ myə gɑ gɔ hɑ a, a piŋ bɑ́ bap nɑ́ a, yə pú hɑ gɑ́ dzʉ̌ nə gɛvɔk a.
A lə́ pɑ̌ po'o pɑ Yudea to' nə́ tɛshwə cəcɑ̌ pu tə thə́ gɑ: Bi a pɑ mo bǎ hɑ bap nɑ́ e bi pɑ gɑ́ pɑ pfɑ́ m gɑ́ kɑ? Yeso ghɔm bi pu gɑ: Kwa' nyənyɔ nyənyɔ gɑ̌ siŋ wɔ gɑ́ po pɑ tə́ pfɑ́ bapnɑ Mú, biŋ bɑ tə nwə mcyə myə́ bɑ po tə́ gɔ ghə vɔk nə po pɑ. Mo yə ě pfɑ bapnɑ a biŋ nwə mcyə mə̌ a bɑ ě ghə vɔk màmà, a biŋ sɔ' jám e nə jʉɔjʉ̀m tyɛ'dzʉ. Nə pa' bapnɑ a bɑ kwa' ywətsʉ nyənyɔ mcyə mə̌ a piŋ bɑ kwa' ywə nwənwə̌ yə nyənyɔ. Mo yə ě pfɑ bapnɑ a, biŋ nwə mcyə mə̌ a shwə́ nə m̀, bɑ shwə́ nə e. Dəŋdəŋ pa' Tá yə e shwə nthʉɔ a nthəm a, ŋ biŋ bɑ bvɔk m nə Tá, a dəŋdəŋ po'o tə́ mo yə e gɔ sɔ' pfɑ bapnɑ a gɔ sɔ' vɔk m nə m̀. Pa' msɛ myə a fi' fɑ kɛbəŋ a nə bɑ a: A tə bɑ pa' myə mtá pɔ lə pfɑ̌ biŋ pfʉtə a pɑ́. Nə pa' mo yə ě pfɑ́ msɛ mɔ gɑ á gɔ sɔ' vɔk màmà. Mɔ̌ bɑ́ mnwə myə Yeso lə́ ji'tə nthʉm sinagogə Kapɛrnaum a.

Pɑkhʉ̌ pyə tə jɔm lə́ nə yu' ghɔm tsyə, ntho' nə ghɔm gɑ: Ghɔm tsɔ gɑ tʉɔ! Pɑ̀ wɑ̌ piŋ ŋkwi' ju' e?
Da' gɑ Yeso zhyə nthʉm tʉm e gɑ́ pɑkhʉ̌ pyə lə́ bɑwə gɔmtə nwə nə ghɔm bɔ, gɔm bi pu gɑ: Jyə gɑ́ ǎ cʉ' pɑ ywə fa'tə̀ bi po lə́? Tə́ po piŋ jɔ Mú mo kwɔ́' tsʉ' yə e lə́ da' bɑ́ nə a o? Zhwenyə nə gə́ mo vɔk, bapnɑ tə́ ŋkwitə́ pɑ. Mghɔm myə gɑ̌ gɔm bi po a bɑ zhwenyə pú vɔk. Da' gɑ shɑ pɔ bɑ cəcɑ̌ po wap lə pɑwə biŋ. Yeso lə́ bɑwə jyə́ pɔ pyə wap la tə́ bɑwə biŋ a pɑ ba mo yə e lə́ bɑ gɔ la' hɑ e tə fɑ tə̀ tyɛ' nə to'. E lə kwi' gɔm gɑ: A bɑ ywə yə a gə tə́ gɔm bi po gɑ: Sɔmmo ka ku' nə sɔ' bəm tə a bɑ́ gɑ Tá nə hɑ bi e a.
Tə fɑ cwə o bɔ, bo'gwyə pɔ nə pɑkhʉ̌ pyə́ təm, pu a pu lə kwi' bəmtə́ gǐŋ. A pɑ́ po'o tə Yeso ghɔm bi pɔ shwɔppʉə mgham gɑ: Ba wɔ yɔ, po ka sɛ yɔ nə ghɔ a? Da' gɑ Simon Pɛtrɔ ghɔm bi e gɑ: Cyəpɔ pyə gɔ ghɔ m bi wɑ? Mghɔm vɔk mama bɑ́ bu. A piŋ bɑ́ bɑ pyə̌ piŋ, bɑ pyə̌ piŋ jyə́ gɑ́ o bɑ Mo Dɔlɔ̌ fɑ m bi Si. Yeso pa' bi pu gɑ: Tə myə nə lə́ shwɔ' wɔ, wɔ shwɔppʉə mgham a lə? Da' gɑ́ mu' mo nə́ po bɑ Sata. E lə́ gɔm po'o bɑ gɔm Yuda mu Simon yə Iskariɔt; nə pa' yʉ yə e bɑ mu' nə pɔ shwɔppʉə mgham a nə lə bɑ gɔ la' hɑ e.

Listen to YOHANE 6