 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

وَکَّتِ مَنْ يِمْࢡٜ عُجِنٜىٰجٜ مٛوࢡٛتِرِ حَا ࢡٜطٛنْ نجَاࢡْنجَاࢡْتِرَ؞ عِيسَى ڢُطِّ وٛلْوَنْغٛ ݠُکَرَعٜنْ مُوطُمْ‏: «کَکِّلَنٜ عُڢْنِرْطُمْ ڢَرِسَعٜنْ، وَاتٛ نَاڢِکَاکُ؞ شُوطِيطُمْ ڢُو وَنغَنْ، سِرِّيجُمْ ڢُو ڢَامٛتٛ؞ نغَمْ کٛ مبٛلْوُطٛنْ ندٜرْ ࢩِࢡْرٜ ڢُو، طُمْ نَنٜتٜىٰطُمْ ندٜرْ أَلنّٛورَ؞ کٛ عٛنْ شٛڢْندٛتِرِ ندٜرْ شُوطِ، طُمْ نغٛويْنٜتٜىٰطُمْ ندٜرْ بَنغُطُمْ؞»


«مِطٛنْ وِعَ عٛنْ طُمْ، عٛنٛنْ سٛوبِرَاࢡٜ عَمْ‏: تَا کُلٜ وَاوَنْࢡٜ مبَرُغٛ ࢡَنْدُ، عَمَّا ࢡٜمبَاوَتَا وَطُغٛ کٛو طُمٜ کٛ ࢡُرِ نٛنْ؞ مِحٛلَّنْ عٛنْ مٛ کُلٛتٛنْ‏: کُلٜ مٛ وَاوِ مبَرُغٛ، مٛ وٛودِ بَاوْطٜ سَکِّنْغٛ ندٜرْ يِيتٜ جَحَنَّمَايٜ بٛو؞ نٛنّٛنْ، مِطٛنْ وِعَ عٛنْ، کَنغْکٛ حَانِ حُلٜىٰغٛ؞
«ࢡٜشٛورَّتَا شٛلّٛيْ نجٛوٛيْ بٜى سُلٜيْجٜ طِطِ نَ؟ عَمَّا اَللَّه يٜجِّتِتَّا کٛو غٛوتٜلْ مَاکٛيْ؞ کٛو غَاسَاجِ کٛعٜ مٛوطٛنْ لِمَاطِ ڢُو؞ تَا کُلٜ سَمْ، سَمَنْ مٛوطٛنْ ࢡُرِ شٛلّٛيْ طُوطْکٛيْ؞»


«مِطٛنْ وِعَ عٛنْ، کٛو مٛيْ سٜىٰدِ يٜىٰسٛ يِمْࢡٜ عٛعَنْدِ يَمْ، ࢡِي-نٜطّٛ بٛو سٜىٰدٛتٛ عٛعَنْدِمٛ يٜىٰسٛ مَلَاعِکَعٜنْ اَللَّه؞ عَمَّا مٛ يٜدِّ يَمْ يٜىٰسٛ يِمْࢡٜ، عٛ غٜدّٜتٜىٰطٛ بٛو يٜىٰسٛ مَلَاعِکَعٜنْ اَللَّه؞
«کٛو مٛيْ وٛلْوِ کَلُّکَ دٛوْ ࢡِي-نٜطّٛ ، حٜࢡَنْ يَاڢُيٜ؞ عَمَّا مٛ وٛلْوِ کَلُّکَ دٛوْ رُوحُ شٜنِيطٛ، عٛيَاڢَتَاکٜ سَمْ؞
«تٛ ࢡٜنجَحْرِ عٛنْ حِيتٜىٰغٛ ندٜرْ شُوطِ دٜوَلْ يَحُودُعٜنْ مَلَّ يٜىٰسٛ لَامِيࢡٜ عٜ مَرْࢡٜ بَاوْطٜ، تَا ࢡِلّٛرٜ نُمُغٛ نٛ مبَنغِنِرْتٛنْ حُجَّ مٛنْ مَلَّ کٛ مبِعٛتٛنْ؞ نغَمْ رُوحُ شٜنِيطٛ عٜکِّتِنَنْ عٛنْ کٛ مبِعٛتٛنْ ندٜرْ سَاعِيرٜ مَنْ؞»

غٛطّٛ ندٜرْ مٛوࢡْرٜ وِعِ عِيسَى‏: «مٛودِبّٛ، وِعْ دٜىٰرْطِرَاوٛ عَمْ سٜنْدَنَ مِنْ ندٛنْنغُ نغُ بَابَ عَمِنْ عَشِّ؞» عِيسَى وِعِمٛ‏: «حٜيْ عَنْ‏! مٛيْ وَطِ يَمْ کِيتٛووٛ دٛوْ مٛوطٛنْ مَلَّ شٜنْدٛووٛ جَوْدِ مٛنْ؟» ندٜنْ عٛوِعِ ࢡٜ‏: «ندٜىٰنْتٜ عٜ سُونٛوجِ کٛو طِيٜ، نغَمْ نغٜىٰندَمْ نٜطّٛ عِوَتَا حَا جَوْدِ مُمْ، کٛو نٛ عٛرِسْکِرِ ڢُو؞» عٛوٛلْوَنِ ࢡٜبَلْنْدٛلْ نغٛعٛلْ‏: «وٛودِ غٛطّٛ دِسْکُطٛ، عٛوٛودِ غٜسٜ، طٜ مبَطَنِمٛ ࢨَامْندٜ طُوطْندٜ؞ عٛنُمِ ندٜرْ ࢡٜرْندٜ مَاکٛ‏: کٛ مبَطَنْمِ؟ نغَمْ مِوَلَا بَبَلْ حَا مٛوࢡْتَنْمِ ࢨَامْندٜ عَمْ؞ عٛوِعِ‏: يٛوَّ، ندَا کٛ مبَطَنْمِ‏: مِڢُسَنْ بٜىٰمبٜ عَمْ، مِمَحَ ࢡُرْطٜ مَوْنُغٛ، مِمٛوࢡْتَ عَلْکَمَارِ عٜ جَوْدِ عَمْ ڢُو حَا تٛنْ؞ ندٜنْ مِوِعَنَ يٛنغْکِ عَمْ‏: عَوٛودِ جَوْدِ طُوطْندِ سِغَاندِ، حٜعَنْدِ نغَمْ دُوࢡِ طُوطِّ‏! سِوْتَ، ࢩَامْ، يَرْ، سٜيَ‏! عَمَّا اَللَّه وِعِمٛ‏: سٛويَ-حَکِّيلٛوجٛ، جٜمَّارٜ ندٜعٜ مِحٛوسَنْ يٛنغْکِ مَ، کُوجٜ مَاطَ مٛوࢡْتَاطٜ طٜعٜ ڢُو، مٛيْ مَرَتَ طٜ؟ بَنَ نِي طُمْ لَاتَنْتٛ مٛ مٛوࢡْتَنِ حٛورٜ مُمْ جَوْدِ، مٛ لَاتَاکِ دِسْکُطٛ يٜىٰسٛ اَللَّه؞»


ࢡَاوٛطٛنْ عِيسَى وِعِ ݠُکَرَعٜنْ مُوطُمْ‏: «نغَمْ مَاجُمْ مِطٛنْ وِعَ عٛنْ‏: تَا شَکْلَنٜ نغُورٜ مٛوطٛنْ، وَاتٛ کٛ عٛنْ ࢩَامَتَ مَلَّ کٛ عٛنْ ࢡٛرْنٛتٛ؞ نغَمْ يٛنغْکِ ࢡُرِ ࢩَامْدُ سَمَنْ، ࢡَنْدُ بٛو ࢡُرِ لِمْشٜ سَمَنْ؞ ندَارٜ لٜىٰکُوجٜ‏: طٜ عَاوَتَا، طٜ شٛدَتَا، طٜ مٛوࢡْتَتَا کٛو طُمٜ ندٜرْ شِغٛرْطُمْ مَلَّ بٜىٰمبَلْ، عَمَّا اَللَّه طٛنْ ࢩَامْنَ طٜ؞ عٛنْ ࢡُرَتَا شٛلِّ سَمَنْ ݠِوْ نَ؟ مٛيْ شَکَ مٛوطٛنْ وَاوِ ࢡٜسْدُغٛ بَلْطٜ مُوطُمْ کٛو سٜطَّ بٜى سَکْلٜرٜ مُوطُمْ؟ ندٜ عٛنْ مبَاوَتَا وَطُغٛ کٛو ݠٜىٰتُمْ، نغَمْ طُمٜ شُکْلَنْتٛوطٛنْ لُتُّطُمْ؟ ندَارٜ ݠِنْدِ لَدّٜ نٛ ندِ مَوْنِرْتَ؞ ندِ حُووَتَا، ندِ سَنْࢩَتَا، عَمَّا مِطٛنْ وِعَ عٛنْ‏: کٛو سُلَيْمَـٰنُ بٜى دَرَجَ مُوطُمْ ڢُو مٜىٰطَايْ ࢡٛرْنَاغٛ لِمْشٜ بٛوطّٜ بَنَ نغٛورِ مَنْ؞ اَللَّه ࢡٛرْنِ حُطٛوجِ طِ تَوٜ حَنْدٜ ندٜرْ لَدّٜ، جَنغٛ بٛو طِ شَکِّنٜ ندٜرْ يِيتٜ؞ تٛ نٛنْ کَمْ، عٛࢡٛرْنَتَا عٛنْ کٛ ࢡُرِ نٛنْ نَ، عٛنٛنْ ڢَمْطَ-نُطِّنْکِعٜنْ؟ تَا ࢡِلّٛرٜ کٛ ࢩَامٛتٛنْ مَلَّ کٛ نجَرٛتٛنْ؞ تَا شَکْلٜ کٛعٜ مٛوطٛنْ؞ حٜىٰڢٜىٰرْࢡٜ دُنِيَارُ شُکْلَنْتٛ کُوجٜ طٜعٜ ندٜ وٜىٰتِ ڢُو؞ عَمَّا بَابِرَاوٛ مٛوطٛنْ عَنْدِ عٛنْ نغٛودِ حَاجٜ کُوجٜ طٜعٜ؞ عَارْتٜ سُکْلَنَاغٛ لَامُ مَاکٛ، ندٜنْ عٛحٛکَّنْ عٛنْ کُوجٜ طٜعٜ ڢُو بَنَ ࢡٜسْدَارِ؞»


«تَا کُلْتٛرٜ، عٛنٛنْ تٛکّٜرٜ ڢَمَرْدٜ، نغَمْ بَابِرَاوٛ يِطِ حٛکُّغٛ عٛنْ لَامُ مُوطُمْ؞ شٛورّٜ کٛ مَرْطٛنْ، شَاحٜ طُمْ تَلَکَعٜنْ، مبَطَنٜ کٛعٜ مٛوطٛنْ بٛورٛوجِ سِغَاغٛ شٜىٰدٜ طِ مبٛنَّتَاکٛ عٜ جَوْدِ ندِ رٜعَتَا حَا عَسَمَ‏: حَا تٛنْ غُجّٛ ࢡَدَتَاکٛ، غِلْطِ بٛو مبٛنَّتَا طُمْ؞ نغَمْ حَا جَوْدِ مٛوطٛنْ وٛنِ، تٛنْ ࢡٜرْطٜ مٛوطٛنْ بٛو نغٛنَتَ؞»

«تَاسْکِتِنٜ کٛعٜ مٛنْ، ݠِتِّرْلَاجِ مٛوطٛنْ بٛو جَمْنَاطِ؞ لَاتٜ بَنَ يِمْࢡٜ رٜىٰنَنْࢡٜ جَاغٛرْطٛ مُوطُمْعٜنْ غَرْتَنْطٛ دِغَ ࢡَنغَلْ، نغَمْ ࢡٜمَࢡِّتَنَ مٛ تٛ عٛيٛتَّکٜ، عٛتَݠِّ دَمُّغَلْ؞ بَرْکَ لَاتَنٛ سُکَعٜنْ ࢡٜ جَاغٛرْطٛ مُمْعٜنْ يَاکٜ وَرْتَتَ، تَوَ طٛنْ عَيْنَ؞ غٛونغَ مبِعَنْمِ عٛنْ، عٛتَادٛتٛ، عٛجٛعِّنَنْ ࢡٜ حَا تَابَلْ ࢩَامْدُ، عٛࢡَدِتَنْ ࢡٜ، عٛحُووَنَنْ ࢡٜ؞ بَرْکَ لَاتَنٛ سُکَعٜنْ ࢡٜعٜ، کٛو تٛ عٛوَرْتِ شَکَ جٜمَّ مَلَّ سَالِ سٜطَّ، عٛتَوِ ࢡٜ ࢡٜ طٛنْ عَيْنَ؞ ݠَامٜ بٛوطُّمْ‏: تٛ جَوْمُ سَارٜ عَنْدِنٛ سَاعِيرٜ ندٜيٜ غُجّٛ وَرَتَ، عٛعَشَّتَانٛ غُجّٛ نَسْتَ مٛ سَارٜ؞ عٛنٛنْ بٛو، لَاتٜ تَاسْکِيࢡٜ، نغَمْ ࢡِي-نٜطّٛ وَرَنْ ندٜرْ سَاعِيرٜ ندٜ عٛنْ تَمَّاکِ سَمْ؞»


ݠِيٜرْ وِعِمٛ‏: «جَوْمِرَاوٛ، مِنِنْ تَنْ مبٛلْوَنْطَ بَلْندٛلْ نغٛعٛلْ نَ مَلَّ يِمْࢡٜ ڢُو؟» جَوْمِرَاوٛ جَابِ‏: «مٛيْ وٛنِ کَلِيڢَاجٛ کٛولَاطٛ، کَکِّلْطٛ، مٛ جَاغٛرْطٛ مُمْ تَمِّ دَرْنُغٛ دٛوْ حُووٛوࢡٜ مُمْ، نغَمْ عٛحٛکَّ ࢡٜ غٜطَلْ ࢩَامْدُ مَࢡّٜ ندٜرْ وَکَّتِ مَنْ؟ بَرْکَ لَاتَنْتٛ کُووٛووٛ عٛو، تٛ جَاغٛرْطٛ مَاکٛ وَرْتِ، تَوْتِمٛ عٛطٛنْ سُکْلَنِ کُوغَلْ نغَعَلْ؞ غٛونغَ مبِعَنْمِ عٛنْ‏: جَاغٛرْطٛ دَرْنَنْ مٛ دٛوْ جَوْدِ مُوطُمْ ڢُو؞ عَمَّا تٛ کُووٛووٛ مَنْ وِعِ ندٜرْ ࢡٜرْندٜ مُوطُمْ‏: جَاغٛرْطٛ عَمْ نٜىٰࢡِ وَرْتُغٛ، ندٜنْ عٛڢُطِّ ڢِيُغٛ حُووٛوࢡٜ وٛطْࢡٜ، وٛرْࢡٜ عٜ رٜوْࢡٜ، عٛطٛنْ ࢩَامَ، طٛنْ يَرَ عٜ وُيْکَ، جَاغٛرْطٛ وَرْتٛيَنْ ࢩَلَادٜ ندٜ سُکَ عٛو تَمَّتَاکٛ عٜ ندٜرْ سَاعِيرٜ ندٜ عٛعَنْدَا؞ عٛرِيوَنْ مٛ، عٛحٛکَّنْ مٛ نغٜىٰنَارِ نَاڢِکِعٜنْ؞
«کُووٛووٛ عَنْدُطٛ کٛ جَاغٛرْطٛ مُمْ يِطِ، عَمَّا تَاسْکِتِنَايْ کٛو طُمٜ کٛ جَاغٛرْطٛ مَاکٛ يِطِ، عٛحٜࢡَنْ ݠِيْطٜ طُوطّٜ؞ عَمَّا مٛ عَنْدَا کٛ جَاغٛرْطٛ مُمْ يِطِ، وَطِ کٛ حٜعِ ڢِيٜىٰغٛ، عٛحٜࢡَنْ ݠِيْطٜ سٜطَّ نٛنْ؞ مٛ ࢡٜندٛکِّ طُوطُّمْ، ࢡٜࢨَمَنْ مٛ طُوطُّمْ بٛو؞ مٛ ࢡٜکَلْڢِنِ طُوطُّمْ، ࢡٜࢨَمَنْ مٛ کٛ ࢡُرِ طُوطُغٛ؞»


«مِوَرِ نغَمْ سَکِّنْغٛ يِيتٜ دٛوْ لٜسْدِ؞ مِيِطِنٛ نغٜ حُࢡّٜ جٛنْتَ‏! وٛودِ بَݠْتِسْمَ کَ نجَࢡَنْمِ، مِࢡِلِّ حَا طُمْ حٜبِّتِنٜ؞ عٛنْ تَمِّ مِوَرِ نغَمْ وَدُّغٛ سَلَامَنْ دٛوْ لٜسْدِ نَ؟ مِطٛنْ وِعَ عٛنْ، نَا سَلَامَنْ، عَمَّا شٜنْدُکِ؞ نغَمْ يٜىٰسٛ طٛ، يِمْࢡٜ نجٛوٛ ندٜرْ سَارٜ وٛورٜ شٜنْدٛتٛ‏: تَتٛ نَرَّتَا بٜى طِطٛ، طِطٛ بٛو نَرَّتَا بٜى تَتٛ؞ بَابَ وَادَنْ بٜى ࢡِيُمْ، ࢡِطّٛ غٛرْکٛ بٛو بٜى بَابَ مُمْ؞ دَادَ وَادَنْ بٜى ࢡِيُمْ دٜبّٛ، ࢡِطّٛ دٜبّٛ بٛو بٜى دَادَ مُمْ؞ عٜسِرَاوٛ دٜبّٛ بٛو وَادَنْ بٜى عٜسُمْ دٜبّٛ؞»


عِيسَى وِعِ مٛوࢡْرٜ ڢَحِنْ‏: «تٛ عٛنْ نغِعِ رُولْدٜرٜ عُمَّکٜ حَا حِيرْنَانغٜ، لَوْ عٛنْ طٛنْ مبِعَ عِيٜىٰندٜ تٛࢡَنْ، طُمْ وَطَنْ بٛو؞ تٛ عٛنْ نغِعِ حٜنْدُ عِوِ ڢٛمْبِنَ بٛو، عٛنْ طٛنْ مبِعَ‏: غُلْطُمْ وَطَنْ، طُمْ وَطَنْ بٛو؞ نَاڢِکِعٜنْ‏! عٛنْ عَنْدِ ڢَسِّتِرْغٛ کٛ لَاتٛتٛ دٛوْ لٜسْدِ عٜ کٛ لَاتٛتٛ حَا دٛوْ، نغَمْ طُمٜ عٛنْ عَنْدَا ڢَسِّتِرْغٛ زَمَنُورُ جٛنْتَارُ ندُعُ؟»


«نغَمْ طُمٜ عٛنْ کٜࢡْتَنْتَا کٛعٜ مٛنْ کٛ حَانِ وَطُغٛ؟ تٛ عَطٛنْ يَحْدَ بٜى مٛ نجٛکِّرْطَ حَا ݠٜلّٜلْ کِيتَ، حَࢡْدُ نَرُّغٛ بٜى مَاکٛ دِغَ لَاوٛلْ، نغَمْ تَا عٛيَحْرٜ حَا کِيتٛووٛ، ندٜنْ کِيتٛووٛ حٛکّٜ حَا سٛوجٜعٜنْ عٜ سٛوجٜعٜنْ بٛو نَسْتِنٜ ڢُرْسِنَ؞ مِطٛنْ وِعٜ‏: عَوُرْتَتَاکٛ تٛنْ سَمْ، سٛنَا تٛ عَيٛࢡِ کٛ ࢡٜکِيتِ مَ ڢُو؞»

Слухаць لُکَ 12