Zapotec, Guevea de Humboldt: Zapoteco, Guevea de Humboldt NT (New Testament)

Zapoteco, Guevea de Humboldt NT

Dze-guzlo Dioz bzaa me guiedzylie, ba gahc nu ni le Diidz, no nu me no Dioz, no Dioz gahc‑e leeme. No dze-güyaa guiedzylie ba gahc nu me no Dioz. No por leegahcme bzaa Dioz gyre ni nu, no ñahcu dac por leeme, nehx ñuꞌ mbehty ni ba nu. Ladzyña me nu guîlmbahñ, no guîlmbañ-rieꞌ nacu beeiy byniꞌ par gyre meññ. Byni-rieꞌ naꞌ, rdalgueu beeiy lo guibcawy, no ni nac beeiy guibcawy di raḻ csiee leeu.
Güyuꞌ to mpyquie ni pshahl Dioz lee, ni le Juaṉ. Biahd me lehdy gynii me no gdee me diidz dxu lee nac beeiy byniꞌ, lehdy gyre meññ gylíladzy de dxu ganii Juaṉ. Dac‑e Juaṉ nac beeiy byniꞌ, mazyg biahd me lehdy gdee me diidz dxu lee nac beeiy byniꞌ. No ni ulihbu lee nac byni-rieꞌ, ziaad me lo guiedzylie, zidno me guîlbyniꞌ par gyre meññ.
Leegahcme ni le Diidz, biahd me lo guiedzylie; no nîcze por leegahcme güyaa guiedzylie, per meññ-nu lo guiedzylie nehx bzaclo leeme. Biahd me lahd meññ-xguiedzy me, per meññ-xguiedzy me nehx bylaby leeme. Per gyre meññ ni cuaꞌ xtiidz me xtâ leññ xguîlmbahñ no bylíladzy leeme, ptzoo me leeyahc xiiñ Dioz. No meññ-rieꞌ yahc nehx guhl yâme mod-rahl meññ-nu lo guiedzylie, ni dac mod-rahp meññ xiiñ, ni dac porni to mpyquie biuꞌladzy gacu ze, mazyg Dioz ne gac yâme xiiñ me.
No leegahcme ni le Diidz, guhl me lo guiedzylie no güyuꞌ me dlahd noꞌ, no nu laꞌy leeme, no ptzoo me pur ni nac ni uli. No bwieꞌ noꞌ xguîlbyniꞌ me ni neññ leeme we nac Xiñ-ngahc Dioz ni nac xTad me lee. Juaṉ bdee diidz de leeme, no ne:
―De leeme we ni ren hor-günin: “Nu sto ni guiaad lux de ni biaḻaꞌ ni ma rsahc que naa, porni ba gahc nu me ma xtze diaa antzy que naa.”
De gyre ni xroꞌ ni mos ni nu no Dioz cuaꞌ nó gyre nó, no nehx rsandzie ni rguꞌ xlaꞌy me nó. Dioz pshahl me leiy no Moiséz, per xlaꞌy Dioz no ni nac ni uli, bidno Jesucrist leeyahcu. Nehx nu ndruhty ba bwieꞌ Dioz ni to; mazyg Xiñ-ngahc me, ni nu tohzy no leeme, wé we bluu nó dxu we leeme.


Nirieꞌ we diidz ni bdee Juaṉ, dze-meññ-Isṟael ni rtzoo yahc mdad pshahl yâme lahd bahl tohzy no meññ-nac levit ni nu Jerusaléṉ, bignabdiidz yâme leeme, ra yâme:
―¿Dxu we lii?
Nehx pcaꞌdzy Juaṉ, ra me leeyâme:
―Dac‑e naa nac Crist.
Zegahc günabdiidz yâme, ra yâme leeme:
―¿Dxuz‑e lii? ¿Lii we profet-Elíaz la?
Ra Juaṉ leeyâme:
―Dac‑e naa.
Gyzac ra yâme leeme:
―¿Lii we profet ni gabiaaz noꞌ guiaad la?
Ra me:
―Yac.
Ra yâme leeme:
―¿Dxuz‑e naꞌ lii? Rahp noꞌ de ni tziyno noꞌ diidz lo meññ-pshahl noꞌ. ¿Bia neꞌy de lii gahc?
Were ra Juaṉ leeyâme:
―Naa we to meññ ni rquee riedz lo yu-bihdzy, ne: “Lâ cshal xguîlmbahñ laꞌd beeiy rxal to ñaz-ndohp par dze-guiaad Señor”, ―mod-günii profet-Isaíaz ba xtze.
Meññ-bignabdiidz Juaṉ, meññ-nac yahc fariseu we pshahl leeyâme. No günabdiidz yâme, ra yâme leeme:
―¿Biaz nacu rchôbnihsiꞌ meññ bâḻ dac lii nac Crist, ni profet-Elíaz, ni profet ni gabiaaz noꞌ guiaad?
Ra Juaṉ leeyâme:
―Naa rchôbnisaꞌ meññ no nzeꞌ, per lahd gahc laꞌd nu to ni nehx rzaclo laꞌd dxu lee. Leeme we guiaad lux de ni biaḻaꞌ. Leeme ma rsahc me que naa, per ni xduu xguidguial me nehx rsahcaꞌ par nshacaꞌu.
Nirieꞌ guhcu to guiedzy ru le Betania ni nu stiby chehsh guiagü-Jordáṉ, ñaz-ru rlahñ ncübidz, ru gachôbnihs Juaṉ.

Ni byre guiaal bwieꞌ Juaṉ ziaad Jesúz gadziñgahsh leeme, no günii Juaṉ, ne me:
―¡Lâ güieꞌ mpyquie-rieꞌ, leeme we Xiily ni rdee Dioz, wé rboo xguîlquie meññ-nu lo guiedzylie! De leeme we günin: “Dze-ba bylux biaḻaꞌ guiaad sto mpyquie ni ma rsahc que naa, porni ba gahc nu me ma xtze diaa antzy que naa.” Naa nehx bzacloꞌn leeme; per biaḻaꞌ gachôbnisaꞌ meññ no nzeꞌ lehdy gzaclo meññ-Isṟael leeme.
No zegahc bdee Juaṉ diidz, ra me:
―Bwien byruu Spirt-Sant gybaa beeiy to palom ni biaht no biaꞌn lguia Jesúz. Nehx bzacloꞌn leeme, per Dioz ni pshahl naa zidchôbnisaꞌ meññ no nzeꞌ, ra naa: “Dxu güieꞌy guiaht diSpirtaꞌ lguia, wé we ni gdee Spirt-Sant beeiy to guîlrrôbnihs.” Naa bwien, no rdedyaꞌ diidz leeme we Xiiñ Dioz.

Ni byre guiaal, gyzac zu Juaṉ uga no chohp de lahd xmeññ me. Hor-bwieꞌ Juaṉ gadedy Jesúz, ra me:
―¡Lâ güieꞌ mpyquie-rieꞌ, leeme we Xiily ni rdee Dioz!
Niwé bieññ gyrop xmeññ Juaṉ, náḻ gahc yâme ru za Jesúz. Bidzguiat lo Jesúz, bwieꞌ me náḻ chohp xmeññ Juaṉ leeme, ra me leeyahc:
―¿Bia gayo laꞌd?
Ra yâme leeme:
―Muextr, ¿bá glo nuy?
Ra Jesúz leeyâme:
―Lâ te lehdy güieꞌ laꞌd.
Were güya gahc yâme no gunn yâme bá glo nu Jesúz, no biaꞌn yâme no leeme dze-caḻ, porni ba udzie, ba beeiy las-cuatr.
De lo gyrop meññ-bieññ ni günii Juaṉ, no ni za yahc ru za Jesúz, to me le Ndréz, behtzy Simoṉ-Pedr. Ndréz, nier bigyo me behtzy me Simóṉ, no ra me lee:
―Bydzial noꞌ dxu lee nac Mesíaz ―ni rnii neu, ni nac Crist.
No Ndréz ziyno gahc me Simóṉ ru nu Jesúz. Ru bwieꞌ Jesúz Simóṉ, ra me lee:
―Lii we Simóṉ, xiiñ Jonáz, per tzu ley Cefas ―ni rnii neu, Pedr.

Ni byre guiaal biuꞌladzy Jesúz za me lo ṟegioṉ-Galilea, no uga bydzial me Felipy, no ra me lee:
―Náḻiꞌ naa.
Felipy naꞌ, meññ-Betsaida leeme, ru nac gahc xguiedzy Ndréz no Simóṉ. Felipy bigyo me Natanael, no ra me lee:
―Bydzial noꞌ to meññ ni de lee bzaa Moiséz lo guehtzy ru queꞌ leiy, no ni de lee bzaa profet yahc. Leeme le Jesúz, xiiñ José ni nu guiedzy-Nasaret.
Ra Natanael leeme:
―¿Nehxni beeiy nruu meññ-tziaawy Nasaret?
Ra Felipy Natanael:
―Güde lehdy güieꞌy.
Ru bwieꞌ Jesúz gadziñgahsh Natanael leeme, ne me:
―Neꞌ ziaad to ni ulihbu meññ-Isṟael lee ni nehx nu guîlrisquiee no lee.
Were ra Natanael Jesúz:
―¿Bia mód rzacloꞌy ni nacaꞌ?
Ra Jesúz leeme:
―Antzy ni dzigyo Felipy lii, bwien lii xán yag-duug.
Ra Natanael Jesúz:
―Muextr, lii we Xiiñ Dioz; lii we xṞeiy meññ-Isṟael.
Ra Jesúz leeme:
―¿Rlíladzyiꞌ naa nunzy porni ren bwien lii xán yag-duug la? Zrieñ ni ma xroꞌ we zwieꞌy que niwé.
Zegahc ra me lee:
―Naa we Mpyquie-Pshahl Dioz Lee, no gapyaꞌ laꞌd ni uli, zwieꞌ laꞌd gybaa nxalu, no x‑ángel yahc Dioz riehpy no riaht ru zuun.

Слухаць JUAN 1