Gola - 2019 LIB (NT) Drama

Gola New Testament Translation and Literacy Project © Bible Society in Liberia, 2019.

“Sèè mùŋ nɔ̀ŋ nyìnìè e tòmò siaŋ e dèè Dayàa diɛŋ, ɓɔ̀ mùŋ nyɛ̀nɛ̀ŋ niŋ wèè ànyùùŋ àŋ doum yɛmɛ̀. Sèè mùŋ nyɛnɛŋ yɛi wèè anyùùŋ aŋ yɛ̀mɛ̀ e tɔ̀ɔ̀nyaàŋ e yèɛ mùŋ yaà nyinie lɛ̀, wo Dèda mɔɔ̀ŋ ko àìjɛnɛ̀ŋ wo naàum kìɛ̀ŋ e jìwààjɛ̀wɛ̀ siaŋ.
“Weètii sèè mùŋ kpuumàŋ wo nyuùŋ pɔ̀ɔɔ̀, ɓɔ̀ mùŋ fuunyàŋ niŋ è ɓuu diɛŋ. Tii nyùùŋ fɛ̀ɛ̀ ɗòònààkeì nyɛnɛŋ maŋ sààŋ zòòlò aŋ Juùù nyaŋ dìì, yaà maŋ dòmaŋ màŋ diɛŋ, esaɓù kɛ̀ àŋ manaŋ wèè anyùùŋ aŋ nyiŋ tɛnɛ̀ŋ. Miŋ woòum e tɔɔɓaaà kɛ̀ sèè mùŋ nyɛnɛŋ tii, kɛ̀ màŋ kpɛ̀ɛ̀yɛ̀ e jìwààjɛ̀wɛ̀ mɔ̀ɛ̀ yɛ̀mɛ. Kɛɛ sèè mùŋ kpuumàŋ wo nyuùŋ pɔ̀ɔɔ̀, ɓɔ̀ mùŋ nyɛ̀nɛ̀ŋ wò nyùùŋ gbiŋ wò do niŋ nyìmàŋ. Kpeiŋ kɛ̀ e nɛ̀ŋ kìɛŋ mɔ̀ɛ̀ e nɔ̀ŋ ke gbùnuo sùà. Yèè wo Dèda mɔɔ̀ŋ yɛmɛ̀ e nɛ̀ŋ nyɛ̀nɛŋ ke gbùnuo sùà wɔ, wò doum nàŋ kìɛ̀ŋ e jìwààjɛ̀wɛ̀ siaŋ.


“Sèè mùŋ nɔ̀ŋ zoolo, ɓɔ̀ mùŋ nɔ̀ŋ mààŋ ànyùùŋ fɛ̀ɛ̀ ɗòònààkeì nyaŋ! Àŋ manaŋ kèè nyiŋ bi tɔ̀ɔ maŋ sààŋ zòòlò aŋ Juùù nyaŋ dìì yèè maŋ dòmaŋ màŋ diɛŋ. Àŋ nyɛnɛŋ tɛɛ̀ wèè aŋ tɔɔ̀ kɛ̀ àŋ yaà tɛ̀ɛ̀ ko ɓài. Miŋ woòum e tɔɔɓaaà kɛ̀ sèè mùŋ nyɛnɛŋ tii, kɛ̀ màŋ kpɛ̀ɛ̀yɛ̀ e jìwààjɛ̀wɛ̀ mɔ̀ɛ̀ yɛ̀mɛ. Kɛɛ sèè mùŋ woà mààŋ muŋ zoolò, jɔ̀à ko saaŋ zɔ̀nù moo muŋ yìlà wɔŋ gbemgbeeɔ̀. Zòòloò koɓɛ̀ wo Dèda mɔɔ̀ŋ ke gbùnuo sùà. Yèè wo Dèda mɔɔ̀ŋ naŋ nyìmè e nɛ̀ɛŋ mùŋ naŋ nyɛ̀nɛ̀ŋ ke gbùnuo sùà lɛ, wò doum nàŋ kìɛ̀ŋ e jìwààjɛ̀wɛ̀ siaŋ.
“Sèè mùŋ nɔ̀ŋ zoolo, ɓɔ̀ mùŋ nyɛ̀nɛ̀ŋ è zòòlo mɔ̀ɛ̀ è do mùnlàŋ màànààŋ anyuùŋ gò nyìmàŋ Dayà nyaŋ nyɛnɛŋ lɛ̀. Àŋ gongà kɛ̀ e zòòlo mùnlaŋ nàŋ nyɛnɛŋ wo Dayà wo niŋ jàà kùàŋ dìì. Ɓɔ̀ mùŋ fɔɔnɔ̀ŋ nyiŋ. Wo Dèda mɔɔ̀ŋ wò nyìmàŋ kɛ̀ kiɛ̀ŋ mùŋ manaŋ paŋgàà mùŋ nauŋ dawè. Kpeiŋ e ɗewe kii lɛɛ̀ sùà nìŋ kuwa naŋ zoolò.
‘Wo Dèda wiɔ̀ ko àìjɛnɛ̀ŋ,
tɔ̀ e dèè nɛɛmaŋ mɔ̀ɛ̀ e nɔ̀ŋ jòòwo niŋ.
Tɔ̀ e Kana mɔ̀ɛ̀ hnàŋ,
tɔ̀ e tùwo mɔ̀ɛ̀ nɔ̀ŋ yɛi e ɗuunyaàŋ diɛŋ màànààŋ è yaà ko àìjɛnɛ̀ŋ lɛ.
Kìɛ̀ŋ wi nàaŋ ke ɗɔɔ yɛɛ̀ e nɛ̀ŋjè nyaàŋ wilɛ̀.
Jùùyaà wi hakɛ̀ wèè maŋ keì nàànààŋ wi màŋ,
màànààŋ è juuyà aŋ dàwi wi nyàŋ hakɛ̀ wèè maŋ keì naanààŋ maŋ àŋ naŋ wi jàà maŋ.
Ɓɔ̀ mùŋ koà wi è wàa nyìnga dìì,
kɛɛ yɛ̀mɛ̀ wi diɛŋ e yìwìà koɓɛ̀ wo Nyùùŋ kɛ̀ɛ̀nɛ̀ŋ ke Kpèè Naanààaŋ.
Esaɓù kɛ̀ muàŋ nàŋ kanaŋ e kanaà, yèè e gààaŋ, yèè e jòòwoɛ̀ wèè julɔfɔ. Àmiinàŋ.’
“Sèè nìŋ juuyà aŋ dàwiiŋ nyàŋ hakɛ̀ wèè e keì naanààaŋ àŋ naiŋ jàà lɛ, wo Dèdaiŋ nɔɔ̀ŋ ko àìjɛnɛ̀ŋ wuŋ pɛɛ doiŋ nàŋ jùùyè hakɛ̀. Kɛɛ sèè nìŋ go jùùyà àŋ dàwiiŋ nyàŋ hakɛ̀, kɛ̀ wo Dèdaiŋ nɔɔ̀ŋ wo naàiŋ jùùyè hakɛ̀ wèè màŋ keì naanààŋ maŋ nìŋ naŋ nyɛ̀nɛ̀ŋ maŋ.

“Sèè mùŋ kuwo ke tɔùŋ, ɓɔ̀ mùŋ nyɛ̀nɛ̀ŋ wò nyùùŋ gbiŋ wò do nyìmàŋ kɛ̀ mùŋ yaà kè tɔùŋ, màànààŋ anyuùŋ jàà fɛ̀ɛ̀ keì foo nyàŋ nyɛnɛŋ lɛ̀. Miŋ woòum e tɔɔɓaaà kɛ̀ sèè mùŋ nyɛnɛŋ tii, kɛ̀ màŋ kpɛ̀ɛ̀yɛ̀ e jìwààjɛ̀wɛ̀ mɔ̀ɛ̀ yɛ̀mɛ. Sèè mùŋ kuwo ke tɔùŋ, vìlè e ɗì mɔ̀ɛ̀ muŋ kpalèè niŋ ɓù, yèè muŋ gùà wɔ̀ŋ feìŋ mɔɔ̀ŋ wɔŋ nɔ̀ŋ janjai, wèè kɛ̀ anyuùŋ joo bà go nàŋ nyìmè kɛ̀ mùŋ yaà kè tɔùŋ. Wo Dèda mɔɔ̀ŋ naŋ nyìmè e nɛ̀ɛŋ mùŋ naŋ nyɛ̀nɛ̀ŋ ke gbùnuo sùà lɛ, wò doum nàŋ kìɛ̀ŋ e jìwààjɛ̀wɛ̀ siaŋ.


“Ɓɔ̀ mùŋ banè è sùlò hàa kià è ɗuunyaŋ lɛɛ̀ sùà, ko yèei aŋ gbiimiŋ do niŋ nàŋ gbìlè lɛ, yèè e kùwà maŋ kààlo, e kìlà anyuùŋ wùa aŋ hnàŋ aŋ gɔ̀ɛ̀ɛ̀ wɔŋ gbemgbeeɔ̀ yèè aŋ niŋ wùà. Kɛ̀ɛ̀ gbìaìŋ e sùlò nɛɛnɛiŋ nɛ̀ ko àìjɛnɛ̀ŋ, ko yèei aŋ gbiimiŋ nyàŋ yaà maŋ kààlo naàŋ niŋ pɔɔpɔ̀ɔ̀ lɛ, e kìlà anyuùŋ wùa naàŋ hnè àŋ do gɔ̀ɛ̀ɛ̀ wɔ̀ŋ gbemgbeeɔ̀ wèè aŋ niŋ wùà. Esaɓù kɛ̀ maŋ jiiŋ màŋ do nàŋ nɔ̀ŋ koɓɛ̀i e sùlò bàneiŋ nɛ̀ yaà lɛ e teenga gbiŋ.


“Le fɛ̀ɛ̀ mɔ̀ɛ̀ è yaà mààŋ e laumpò wèè ke kpùnaŋ mɔɛ̀ŋ. Sèè le fɛɛ̀ mɔ̀ɛ̀ è nɔ̀ŋ sengei, ke kpùnaŋ mɔɛ̀ŋ gbiŋ do nàŋ nɔ̀ŋ e gbolòùŋ sùà. Kɛ̀ɛ̀ sèè le fɛɛ̀ mɔ̀ɛ̀ è go nɔ̀ŋ sengei, ke kpùnaŋ mɔɛ̀ŋ do nàŋ nɔ̀ŋ ke nyìwì sùà. Sèè e gbolòùŋ nɛ è nɔ̀ùm sùà lɛ è nɔ̀ŋ ke nyìwì, kɛ̀ tɔɔɓaa mùŋ yaà ke nyiwì gbee sùà.


“Wo nyùùŋ gbiŋ fè ɓɛ̀nɛ̀ŋ nɔ̀ŋ wò ɗo wèè àŋ kààmɔ̀ɔ̀ŋ ɗì tìyèe. Mùŋ do nàŋ mɔ̀nɔ̀ŋ wò guùŋ e nìàŋ wo bàa, ɔ̀ɔ̀ mùŋ do nàŋ jɔ̀ɔ̀lɔ̀ wò guùŋ dìì e nìàŋ wo bàa. Muŋ fè ɓɛ̀nɛ̀ŋ zòòlò wò Dayà yaà è nɛɛnɛŋ.
“Esaɓùɛ lɛɛ̀ mìŋ woàìŋ mìàŋ kɛ̀, ɓɔ̀ nìŋ gongò è kèè è nɛ̀ŋjeɛ̀ yaà è nɛ̀ɛŋ nìŋ do nàŋ tìè lɛ wèè naŋ kɛ̀ɛ̀nɛ̀ŋ wɔŋ nyiiŋ gèe. Ɓɔ̀ nìŋ gongò kɛ̀ kiìŋ màŋ dèè nìŋ do nàŋ kpàà màŋ kpùnaiŋ màŋ. Yɛ̀mɛìŋ aŋ wòì nyaŋ ke nyiliɛ̀! Aŋ fè nyùàŋ lè kuù kòmàŋ. Aŋ fè kpàà màŋ nɛ̀ŋjè ɓù wèè aŋ miŋ gbìàŋ màŋ kɛiŋ. Yɛi nɔŋ è yaà wo Dèdaiŋ nɔɔ̀ŋ ko àìjɛnɛ̀ŋ gɔɔyɛ̀ nyìŋ. Niŋ gò gongò kɛ̀ nìŋ kuwa sɛmɛmaŋ e nìàŋ àŋ wòì nyaŋ? Wo nyùùŋ gbiŋ ɓɛ̀nɛ̀ŋ nɔ̀ŋ ke jii sɛ̀ɛ sùà wèè wo pɛɛ hàà ke ɗɔ̀ɔ̀ guùŋ maŋ ɗɔ̀ɔ̀ nyiiŋ gèeuŋ màŋ diɛŋ?
“Wèè kiìŋ nìŋ sɛɛ̀ jìì wèè maŋ dèè? Yɛ̀mɛìŋ e ɗeweɛ̀ maŋ kuù jàà fɛ̀ɛ̀ maŋ dɛkɛ̀ yɛi. Maŋ fè tomo ɔ̀ɔ̀ maŋ bànè màŋ dèè wèè miiŋ bi. Kɛɛ tɔ̀ miŋ woòiŋ kɛ̀, wo Salemaŋ naŋ wa pɛɛ banè e mààŋ nyààŋ, kɛɛ wo kuwà wa pɛɛ màŋ deè kpàa maŋ nyɛ̀nɛ̀ŋ sìàŋ maŋ nìàŋ maŋ kuùfɛ̀ɛ̀ mɛɛ̀ŋ bà gbiŋ. Wo Dayà nàŋ kpaa maŋ dɛɛ ɓou màŋ gbiŋ ke fòungàa. Jòòpɛɛ màŋ yaà nàaŋ kià kɛɛ màŋ miŋ ɓɛ̀nɛ̀ŋ kɛ̀ɛ maŋ miŋ gbìàŋ ko hmɔ̀ɔ̀ŋ nàwèè maŋ hèwà. Wo Dayà ngèè ɓɛ̀nɛ̀ŋ nyɛ̀nɛ̀ŋ e gbee niŋ e weèum. Wèè kiìŋ mùŋ kuwa yɛi e hààwe jɔa tòloò?
“Weètii ɓɔ̀ nìŋ gongò nààŋ, ‘Kòò è doiŋ nàŋ gè e nɛ̀ŋje wèè eiŋ jè? Ɔ̀ɔ̀ kòò è doiŋ nàŋ gè e nɛ̀ŋ tìa wèè eiŋ tìà? Ɔ̀ɔ̀ kòò è doiŋ nàŋ gè maŋ dèè wèè eiŋ kpàà?’ Anyùùŋ nyaŋ nɔŋ gongà maŋ keì mɛɛ̀ŋ e teenga gbiŋ nyàŋ nàŋ yaà anyùùŋ nyaŋ fè àŋ Juùù nyaŋ. Wo Dèdaiŋ nɔɔ̀ŋ ko àìjɛnɛ̀ŋ nyìmàŋ kɛ̀ nìŋ naŋ kpɛɛ̀ŋ wèè manɛ̀ŋ mɛɛ̀ŋ gbiŋ. Kɛɛ eɓìèmàŋjɛ̀wɛ̀ e keì ɗewe gbiŋ, nyɛ̀nɛìŋ e tòmò Dayàa tiiŋ jiɛ̀ màànààŋ wò manaŋ lɛ̀. Kpeiŋ kɛ̀ wòiŋ kìɛ̀ŋ manɛ̀ŋ gbànaŋ mɛɛ̀ŋ gbiŋ. Weètii ɓɔ̀ mùŋ gongò wèè nàwèè. Nàwèè kuwa maŋ gòngò kiìŋ bi. Gòngò sèè nàwèè hnàŋ.

Слухаць Maafiù 6