If you have would like a copy of this version please contact info@davarpartners.org

Mandeali Bible, CC-BY-SA-4.0, The Love Fellowship (Text). Mandeali New Testament Audio Bible, CC-BY-SA-4.0, Davar Partners International, 2021 (Audio)

Mandeali New Testament

This work is licensed under Creative Commons Attribution-ShareAlike 4.0 License.

मरियम होर तेसरी बैहण मार्था रा भाई लाज़र ब्मार था जो बैतनिय्याह गांऊँआं रा रैह्णे वाल़ा था। ये सेई मरियम ई जेस्से बादा मन्झ प्रभु रे पैरा पर कीमती खुस्बूदार इत्र मली किन्हें आपणे वाल़ा किन्हें पुन्झ्या, एस्सा रा भाई लाज़र ब्मार था। लाज़रा री बैहणीऐं यीसू जो बुलावा भेज्या कि, “हे प्रभु, देख जेस जो तू प्यार करहा, से ब्मार आ।” ये सुणी किन्हें यीसूए बोल्या, “ये ब्मारी मौता रे कठे नी ई पर परमेसरा री महिमा कठे ई कि, तेसरे जरिए परमेसरा रे मह्ठा री महिमा हो।” यीसू मार्था होर मरियम होर तिन्हारे भाई लाज़रा किन्हें प्यार करहा था। पर जेबे तिन्हें सुणेया कि, लाजर ब्मार आ, ता तेस जगहा पर से था, से तेथी दो ध्याड़े होर रुकी रया। फेरी दो ध्याड़े ले बाद तिन्हें चेलेया किन्हें बोल्या कि, “आऊआ, आस्से दबारा यहूदिया ईलाके जो वापस चल्हा ऐं।” (क्यूंकि लाजरा रा गांऊँ बैत्नीयाह यहूदी जिल्ले मन्झ था)
चेले यीसू जो बोल्दे लगे, “हे गुरु, ऐबे ता यहूदी अगुवे तुजो पथराव करणा चाहें, होर क्या तू दबारा तेथी जाणा चाहां?” यीसूए जवाब दितेया, “क्या ध्याड़ी रे बारा घंटे नी हुंदे? अगर कोई ध्याड़ी-ध्याड़ी चले ता से ठोकर नी खांदा, क्यूंकि से सूरजा रा प्रयासा देख्हा। पर अगर कोई राती जो चले, ता से ठोकर खांहां, क्यूंकि तेस टैम प्रयासा नी हुंदा।” तिन्हें ये गल्ला बोली होर एता ले बाद से तिन्हा किन्हें बोल्दा लग्या कि, “आस्सा रा दोस्त लाज़र सई गईरा, पर हांऊँ तेस जो जगांदे चलीरा।” तेबे चेले तेस जो बोल्या, “हे प्रभु, अगर से सूतिरा ता तेस ठीक हुई जाणा।” यीसूए ता तेसरी मौता रे बारे मन्झ बोल्या था, पर स्यों समझे कि तिन्हें निन्द्रा मन्झ सई जाणे रे बारे मन्झ बोल्या। तेबे यीसूए तिन्हा किन्हें साफ बोली दितेया कि, “लाज़र मरी गया। होर तुस्सा रे कठे ही खरा हुआ कि हांऊँ तेथी नी था, ताकि तुस्से विस्वास करी सको। पर ऐबे आई जाऊआ, आस्से तेस वाले चल्हा ऐं।” तेबे थोमा तेस जो जे दिदुमुस भी बोल्हा ऐं, आपणे साथी चेले किन्हें बोल्या, “आऊआ आस्से भी तेस साउगी मरदे चल्हा ऐं।”

यीसू होर तेसरे चेले बैत्नीयाह गांऊँ मन्झ पूजे तेथी आई किन्हें तेस जो ये पता लग्या कि लाजरा री ल्हासा जो डुआर मन्झ रखीरे चार ध्याड़े हुई चुकिरे थे। बैतनिय्याह गांऊँआं यरुस्लेम सैहरा ले लगभग तीन किलोमीटर दूर था। होर बौह्त यहूदी लोक मार्था होर मरियमा वाले तिन्हारे भाई रे बारे मन्झ सांति देणे रे कठे आईरे थे। मार्था यीसू रे आऊणें री खबर सुणी किन्हें तेस किन्हें मिलदे चली गयी, पर मरियम घरा बैठी रैही। मार्थे यीसू किन्हें बोल्या, “हे प्रभु, अगर तू एथी हुन्दा, ता मेरा भाई कधी नी मरदा। पर ऐबे भी हांऊँ जाणहां ईं कि, जो कुछ तू परमेसरा ले मांगघा, परमेसरा तुजो देणा।” यीसूए तेस्सा किन्हें बोल्या, “तेरे भाईया मरिरे मन्झ ले जिउंदे हुई जाणा।” मार्थे तेस किन्हें बोल्या, “हांऊँ जाणहां ईं कि, आखरी ध्याड़े मरिरे मन्झा ले जी उठणा रे टैमा मेरे भाईया जिउंदे हुई जाणा।”
यीसूए तेस्सा किन्हें बोल्या, “हांऊँ से आ जेह्ड़ा मरिरे जो जिउंदा करहा, जो कोई मेरे पर विस्वास करहा से अगर मरी भी जान्घा, तेबे बी तेस जिउंदे रैहणा। होर जो कोई जिउंदा आ, होर मेरे पर विस्वास करहा, तेस कधी भी नी मरणा, क्या तू ऐस्सा गल्ला पर विस्वास करहा ई?” तेस्से तेस किन्हें बोल्या, “हां, हे प्रभु, हांऊँ विस्वास करी कि, परमेसरा रा मह्ठा मसीह जो संसारा मन्झ आऊणें वाल़ा था, से तू ई आ।”

होर ये बोली किन्हें मारथा चली गई, होर तेस्से आपणी बैहण मरियमा जो चुपके जे सादी किन्हें बोल्या, “गुरू एथी आ होर से तुजो सादेया करहा।” होर से ये सुणदे ई झटपट उठी किन्हें तेस वाले चली गई। यीसू हल्ली गांऊँआं रे बाहर था, जेथी जे मार्था तेस किन्हें मिली थी। तेबे जो यहूदी लोक तेस्सा रे घरा आईरे थे, तेस्सा जो सांति देआ करहा ऐं थे, तिन्हें देखेया कि मरियम झटपट उठी किन्हें बाहर चली गई। होर तिन्हें ये समझी किन्हें कि से डुआर पर रोणे रे कठे चली गई। इधी कठे स्यों भी तेस्सा रे पीछे चली गये। जेबे मरियम तेथी पूजी जेथी यीसू था, ता तेस जो देखदे ही से तेसरे पैरा पई गई होर तेस किन्हें बोल्या, “हे प्रभु, अगर तू एथी हुन्दा ता मेरा भाई नी मरदा।” जेबे यीसूए तेस्सा जो होर तिन्हा यहूदी लोका जो जेह्ड़े तेस्सा साउगी आईरे थे रोंदे देखे; से आत्मा मन्झ बौह्त दुआस हुआ, होर दुआस था। होर तिन्हें बोल्या, “तुस्से तेसरी ल्हास केथी रखिरी?” तिन्हें तेस किन्हें बोल्या, “हे प्रभु, आऊआ चली किन्हें देखी लऊआ।” होर यीसू रे आंसू बैह्न्दे लगे। तेबे यहूदी लोक बोल्दे लगे, “देखा, से लाजरा किन्हें कितना प्यार करहा था!” पर तिन्हा मन्झा ले कई बोल्हा ऐं थे, “इन्हें काणा माह्णुं ठीक कितेया। क्या से लाजरा जो मरणे ले नी बचाई सक्दा था?”

यीसू आत्मा मन्झ बौह्त दुआस हुई किन्हें डुआरा पर गया। से डुआर एक गुफा थी, होर एक पात्थर तेता पर रखिरा था। यीसूए बोल्या, “पात्थरा जो हटाई देआ।” तेस लाजरा री बैहण मार्था तेस किन्हें बोल्दे लगी, “हे प्रभु, ऐबे ता ल्हासा ले बास आया करदी हुंगी; क्यूंकि तेस जो ता मरिरे चार ध्याड़े हुई चुकिरे।” यीसूए मारथा किन्हें बोल्या, “क्या मैं तेरे किन्हें नी बोल्या था कि अगर तू विस्वास करघी, ता तुध परमेसरा री महिमा देखणी।” तेबे तिन्हें से पात्थर टाह्या, फेरी यीसूए स्वर्गा वखा जो देखी किन्हें बोल्या, “हे बापू, हांऊँ तेरा धन्यावाद करहा कि, तैं मेरी सुणी लई। होर हांऊँ जाणहां था कि, तू हमेसा मेरी सुणहां, पर जो भीड़ ओरे परे खड़िरी, तिन्हारी वजहा ले मैं ये जोरा किन्हें बोल्या, ताकि स्यों विस्वास करी सके कि, तैं हांऊँ भेजिरा।” ये बोली किन्हें से जोरा किन्हें बोलेया कि, “हे लाज़र बाहर निकल!” जो मरी गईरा था, से कफना मन्झ हाथ पैर बान्हिरा बाहर निकली आया होर तेसरा मुंह कपड़े किन्हें लपेटिरा था, यीसूए तिन्हा किन्हें बोल्या, “एसरे कफना रे कपड़े जो खोल्ही देआ होर एस जो जाणे देआ।”


तेबे मरियमा साउगी आईरे कई यहूदी लोके, यीसू रा ये काम देखी किन्हें तेस पर विस्वास कितेया। पर तिन्हा मन्झा ले कई एह्ड़े थे जिन्हें फरीसी लोका वाले जाई किन्हें यीसू रे कामा री खबर दिती। एता पर मुख्य याजके होर फरीसी लोके खास सभा सादी होर बोल्या, “आस्से क्या करिए? ये माह्णुं ता बौह्त चिन्ह दस्हा। अगर आस्से तेस जो इंहां छाडी देहंगे, ता सभीया तेस पर विस्वास करी लैणा होर रोम देसा रे लोक आई किन्हें आस्सा रे मंदर होर देस दुहींयां पर कब्जा जमाई लैणा।”
तेबे तिन्हा मन्झा ले कैफा बडा याजक जो यहूदी माहसभा रा सदस्य था, से तेस साला रा बडा याजक था। तिन्हें तिन्हा किन्हें बोल्या, “तुस्से ता एह्ड़ा बोल्हा ऐं जिहां जे तुस्से कुछ नी जाणदे। होर ना ये जाणहां ऐं कि, तुस्सा रे कठे ये खरा आ कि, आस्सा रे लोका रे कठे एक माह्णुं मरे, होर ये नी कि पुरे देस रे लोक मरी जाए।” ये गल तिन्हें आपणी तरफा ले नी बोली, (क्यूंकि यीसूए कई बारी आपणे मरणे रे बारे बोल्हा था) पर तेस साला रे बडा याजक हुंदे हुए कैफे ये भविस्यवाणी किती कि यीसूआ इस्राएल देसा रे लोका रे कठे मरणा। होर ना सिर्फ तिन्हारे कठे, पर तिन्हारे कठे भी कि से परमेसरा रे बाहर भटकीरे बच्चेया जो कठा करी सके। एता कठे तेस ध्याड़े लेई किन्हें यहूदी अगुवे यीसू जो मारणे रे कठे सलाह करदे लगे। इधी कठे यीसू तेस टैमा ले यहूदी लोका रे बीचा मन्झ सभिरे साम्हणें नी घुमदा था। पर से तेथी ले जंगला रे नेडे बस्सी रे ईफ्राइम सैहरा जो चली गये; होर आपणे चेले साउगी से तेथी रैहंदा लग्या।
होर ऐबे यहूदी लोका रा फसहा रा साजा नेडे था, होर बौह्त लोक फसहा रे साजे ले पैहले गांऊँआं ले यरुस्लेम सैहरा जो चली गये ताकि स्यों आपणे आपा जो मन्दरा मन्झ रूआजा रे मताबक सुध करी सको। तेबे स्यों यीसू जो तोपदे लगे होर मन्दरा मन्झ खड़ी किन्हें आपु मन्झ बोल्दे लगे, “तुस्से क्या समझ्हा ऐं? तेस फसहा रे साजे मन्झ नी आऊंणा?” मुख्य याजके होर फरीसी लोके भी हुक्म देई दितिरा था कि, अगर कोई ये जाणदा हो कि यीसू केथी आ ता जरूर दसे, ताकि स्यों तेस जो पकड़ी सके।

Слухаць यहून्ना 11