Sahu - 2015 Edition (NT) Non Drama

Gena-ge pasala i'a, Yesus 'a dowanga 'ai ḏo-ḏagi da'a talaga Galilea kaci moi ga'a ngowa'a ya silomanga talaga Tiberias. Wakutu Yesus ngadolo da'a talaga kaci moi, ngowa'a manga repe 'aḏi mete'e Unanga, sababu ananga ya oḏi'i ḏua Unanga 'o 'a'a didina'o heranga: Unanga 'o si-la ngowa-ngowa'a siḏi. Yesus re 'Ai me-mete'e ananga mabere ie toma polono ma gagoro re 'aḏi tegoro toma ngi'i gena-ge. Toma 'orasa gena-ge Yahudi manga Paskah ma Wangere sa'i ri co-cori. Wakutu Yesus 'o oḏi'i ngowa'a manga repe 'aḏi sapolo ra Unanga, Unanga 'o kanau ra Filipus, “Ngene wo tibo ngo-ngoromo le'a, la ngowa'a repe gena-ge nyengara 'aḏi oromo?” (Yesus 'a waro 'oru ga'a Unanga 'o 'a'a, mada'a Unanga kanau so'o gena di'a 'O tai'i 'a Filipus 'ai ngo-ngaku.)
Filipus 'o sangoro, “Kalaha matengo re matengo sanga roti pa'i ceka'a ua, roti ma ijana pipisi salaka latu ḏiḏi mai ngadolo ua, di'a ngowa'a manga repe nena-ne.”
Yesus 'ai me-mete'e ma lelegu, 'a Andreas (unanga re 'a Simon Petrus gia nongoḏu) unanga 'o kanau, “ 'Ane ngowa 'olo na-nau'u matengo unanga rai roti ngai romotoa re 'ai nyao'o ngai ḏiḏi. Mada'a, tantu ḏua enanga gena-ge 'i ngadolo ua di'a ngowa'a repe nena-ne!”
Yesus 'o kanau, “Ngini ni soma'a ananga mo-moini 'aḏi tegoro tala.” Sababu tana'a gena-ge rurubu mitanga, dadi ananga mo-moini nyengara 'aḏi tegoro tala. Ngowa-ngowa'a gena-ge na-nau'u ḇato ḏa nga cala romotoa. Gena ḏua, Yesus 'a 'oro roti gena-ge re 'O sibere ie murasa ma la ra Ma Jou'ongu Madutu, kara 'A sibalangu roti gena-ge toma ngowa'a repe. So'o gena ḏi'i nyao'o gena-ge. Dadi ngowa'a repe 'aḏi oromo singadolo 'aḏi matai wunusu mo-moini. Wakutu ananga mo-moini raḏi oromo singadolo 'aḏi wunusu Yesus 'o kanau Tai me-mete'e, “Ni lomu roti ma jingianga, la awa singadolo budiga.” Wakutu ananga ya lomu ma jingianga togumu ḏua, ma jingianga gena-ge 'i roma-romanga pipigu nyagi moi re romoḏiḏi.
Ngowa'a repe ga'a ya oḏi'i Yesus 'o 'a'a ga'a hera-heranga gena-ge, ananga 'aḏi kanau, “Mode-mode'e Unanga nena-ne Nabi ga'a ngene wo singanono 'O sapolo toma dungia nena-ne.” Yesus 'a waro ananga raḏi sapolo remanga maksudu 'aḏi simau-mau Unanga 'o dadi ananga manga 'olana. Sababu gena-ge, Unanga 'o tagi masilalo'o toma daeraha sau-sau, la pa'i Unanga 'o matengo ḇato.


Wakutu 'orasa sa'i ri lobi'i, Unanga 'ai me-mete'e 'aḏi 'uci toma talaga, kara 'aḏi mabalene toma oti re 'aḏi amono tagi toma limau Kapernaum. Mada'a singadolo ri lobi'i Yesus 'o sapolo ra ananga nyangu. Toma 'orasa gena-ge ḏua, talaga mulaingi momoku, sababu karawiana lai siḏi. Wakutu ananga 'aḏi amono ma giḏanga ḏa kilo romotoa bolo kilo rarama, ananga 'aḏi oḏi'i Yesus 'o sapolo 'o tagi toma ḇanyo ma re'u 'a meta-meta ino manga oti. Ananga 'aḏi matai mojongo masala. Mada'a Unanga 'o kanau ra ananga, “Ngoi nena-ne, mojongo awa.” Ḏua remanga 'akala re sinyingara sa-sanangi ananga 'aḏi dawongo Yesus tamanga oti ma dara. Toma 'orasa gena-ge ḏua, kage-kage ananga raḏi ngadolo toma talaga ma 'uḏu, ngi'i ga'a ananga mau 'aḏi ngadolo.

Ma ḇiḇini ino, ngowa'a repe 'ane toma talaga kaci moi moju 'aḏi sapolo disa Yesus, sababu ananga ya waro oti pa'i rimoi toma talaga ma 'uḏu 'au nyigo. Ananga raḏi oḏi'i Yesus 'ai me-mete'e raḏi si'a da'a kaci moi reo oti gena-ge, re waro ḏi'i Yesus 'o mete'e ua. Ḏua ngowa-ngowa'a toma limau Tiberias da'a kaci moi 'aḏi sapolo remanga oti 'ane, co-cori ngi'i ga'a Ma Jou ro sibere ie murasa ma la ra Ma Jou'ongu Madutu, kara 'o sibalangu roti re nyao'o toma ngowa'a repe di'a 'aḏi oromo. Wakutu ngowa'a repe 'aḏi oḏi'i Yesus re 'Ai me-mete'e raḏi cua toma ngi'i gena-ge, ananga ḏi'i 'aḏi mabalene toma oti-oti ga'a da'a talaga kaci moi ino, re 'aḏi amono si'a da'a kaci moi toma limau Kapernaum 'aḏi disa Yesus.

Ananga 'aḏi ngadolo da'a talaga kaci moi re 'aḏi ma'u sanga ra Yesus re 'aḏi sano, “Rabi, 'au ngau ngana no ngadolo 'ane?”
Yesus 'a sangoro, “Ni ngaku mode-mode'e 'Ari demo-demo nena-ne: I'a sa'olo ngini ni disa Ngoi? Sababu ni oḏi'i Ngoi to 'a'a ga'a hera-heranga re ni sahe ga'a gena-ge ma ngale 'oru?! Ua! Ngini ni disa Ngoi sababu ngini reni oromo singadolo reni wunusu! Awa ngini ni munara pa'i disa ḇato di'a ngo-ngoromo ga'a 'i capati cira. Jobilaha ngini ni munara disa di'a ngo-ngoromo ga'a kama cira ua, re ga'a sigasa toma 'ahu kasingado-ngadolo i'a. Ngo-ngoromo gena-ge Ngoi, Manusia ma Ngowa'a Nau'u, nyengara to pula'a di'a ngini, sababu Ma Jou'ongu Madutu ro sijumu mangale Unanga ro cumutu Ngoi di'a siḏagi munara gena-ge re Ngoi tu sisanangi Unanga.”
Ḏua ananga 'aḏi sano ra Yesus, “Ngomi balasu mi 'a'a 'oru, la nyengara mi sisanangi Ma Jou'ongu Madutu?”
Yesus 'a sangoro ra ananga, “Ma Jou'ongu Madutu 'o mau ra ngini nena-ne: Ngini balasu ni ngaku Ngoi ga'a Ma Jou'ongu Madutu Ri 'utusu.”
Dadi ananga 'aḏi kanau, “Na'o so'o gena, no 'a'a ga'a hera-heranga, la ngomi ma oḏi'i re mi ngaku Ma Jou'ongu Madutu 'o 'utusu Ngana. Wakutu ngomi minga ete re dotumu toma daeraha baulaco, ananga 'aḏi oromo manna, ma tero sa'olo 'i silefo toma Boku 'Ofi-'Ofi so'o ne: ‘Unanga 'o pula'a ananga roti da'u soroga tala.’ ”
Ḏua Yesus 'o kanau ra ananga, “Ni ngaku mode-mode'e 'Ari demo-demo nena-ne: Roti gena-ge 'a Musa ua 'a pula'a, mada'a 'Ari Ḇaḇa. Re Unanga gena-ge ḏi'i 'O pula'a ra ngini roti mode-mode'e da'u soroga tala. Sababu roti ga'a Ma Jou'ongu Madutu 'a pula'a, gena-ge Ngoi nena-ne, ga'a To 'uci da'u soroga tala re To pula'a 'ahu kasingado-ngadolo i'a toma manusia.”
Ananga 'aḏi kanau, “Jou, no pula'a ḏi'i roti gena-ge di'a ngomi.”
Yesus 'o kanau ra ananga, “Ngoi nena-ne roti ga'a sigasa 'ahu. Ngowa'a ga'a sapolo ra Ngoi, ananga kama sawini riwara re ngowa'a ga'a ngaku Ngoi, ananga manga camala kama dudungu riwara.
Kalaha rini oḏi'i Ngoi, ngini ni ngaku ua moju. Gena-ge ma tero sa'olo Ngoi reto kanau ra ngini, Mada'a ngowa'a mo-moini 'Ari Ḇaḇa 'o sidoa'a ra Ngoi, ananga gena-ge ḏuanga i'a 'aḏi sapolo ra Ngoi. Re 'a guna ḇato ga'a sapolo ra Ngoi, Ngoi ta'u itomo ua. Sababu Ngoi reto 'uci da'u soroga tala mete'e Ngoi 'ari mau masiretene ua, mada'a mete'e Unanga ga'a Ro 'utusu Ngoi, Unanga gena-ge 'ai mau. Re Unanga ga'a Ro 'utusu Ngoi, Unanga 'ai mau nena-ne: Ngowa'a mo-moini ga'a Unanga sipula'a ra Ngoi, matengo i'a mai ua 'aḏi iranga. Siḏibo ḏi'i, Ngoi ḏuanga i'a dadunu Ta'u si'ahu moju ananga gena-ge toma Kiamata ma Wangere. Nena-ne 'Ari Ḇaḇa 'ai mau: ngowa'a mo-moini ga'a oḏi'i Ngoi, Manusia ma Ngowa'a Nau'u, re 'aḏi ngaku Ngoi, ananga gena-ge 'aḏi sanga 'ahu kasingado-ngadolo i'a, re toma Kiamata ma Wangere, Ngoi dadunu ta'u si'ahu moju ananga gena-ge.”
Ḏua ngowa-ngowa'a Yahudi mulaingi 'aḏi kuḏubungu mangale Yesus, sababu Unanga 'o kanau, “Ngoi nena-ne roti ga'a 'uci da'u soroga tala.” Ananga 'aḏi kanau matengo re matengo, “Yesus nena-ne 'a Yusuf 'ai ngowa'a nau'u! Ngomi mi nana'o 'Ai ḇaḇa re 'Ai ngina. I'a sa'olo Unanga 'o kanau mangale Unanga 'uci da'u soroga tala!”
Ḏua Yesus 'o kanau ra ananga, “Awa ni kuḏubungu. Na'o 'ari Ḇaḇa ga'a 'utusu Ngoi, Unanga 'o sigasa ua ananga ra Ngoi, ḏua matengo i'a mai ua nyengara 'aḏi sapolo ra Ngoi. Re 'a guna ḇato ga'a sapolo ra Ngoi, ḏuanga i'a toma Kiamata ma Wangere, Ngoi dadunu ta'u si'ahu moju ananga. Toma nabi-nabi manga boku ma dara ri silefo so'o ne: ‘Ananga mo-moini ḏuanga i'a 'aḏi madoto'o ra Ma Jou'ongu Madutu tala.’ Dadi ngowa'a mo-moini 'aḏi 'isene re madoto'o Tari Ḇaḇa, ananga gena-ge 'aḏi sapolo ra Ngoi. Matengo i'a mai ua 'o oḏi'i 'Ari Ḇaḇa, ḏuga-ḏuga pa'i Ngoi ga'a to sapolo da'u ra Ma Jou'ongu Madutu tala; pa'i Ngoi gena-ge ḇato to oḏi'i 'Ari Ḇaḇa.
Ni ngaku mode-mode'e 'Ari demo-demo nena-ne: 'A guna ga'a ngaku Ngoi, unanga gena-ge ro sanga 'ahu kasingado-ngadolo i'a. Ngoi masiretene roti ga'a sigasa 'ahu. 'Ua re 'au wali ninga ete re dotumu toma daeraha baulaco ananga 'aḏi oromo manna. Mada'a ngene wo waro enanga gena-ge 'i pula'a 'ahu ua, sababu ananga mo-moini 'aḏi sengene. Mada'a roti ga'a 'i 'uci da'u soroga tala so'o gena-ge ua. Ngowa'a ga'a oromo roti gena-ge ananga ḏuanga i'a 'aḏi sengene ua. Ngoi nena-ne roti 'ahu ga'a 'i 'uci da'u soroga tala. Na'o 'a guna ḇato oromo roti gena-ge, ḏuanga i'a 'o 'ahu kasingado-ngadolo i'a. Roti gena-ge 'Ari lese ga'a ḏuanga i'a ta sidoa'a, la manusia nyengara sanga 'ahu.”
Wakutu ngowa'a Yahudi ya 'isene i'a Yesus 'ai demo-demo gena-ge, ananga 'aḏi ma'u rubutu matengo re matengo. Ananga 'aḏi kanau, “Ma duhu sa'olo ngowa'a nena-ne 'o pula'a 'ai lese di'a ngene wa oromo?!”
Ḏua Yesus 'o kanau ra ananga, “Ni ngaku mode-mode'e 'Ari demo-demo nena-ne: Na'o ngini ni oromo ua Ngoi 'ari lese, Ngoi Manusia ma Ngowa'a Nau'u, re ni ka'e ua Ngoi 'ari ngaunu, ngini sanga ua 'ahu kasingado-ngadolo i'a 'A guna ḇato 'o oromo 'Ari lese re 'o ka'e 'Ari ngaunu, unanga gena-ge ro sanga 'ahu kasingado-ngadolo i'a re Ngoi dadunu tu si'ahu moju toma Kiamata ma Wangere. Sababu 'Ari lese gena-ge ngo-ngoromo 'i sigasa 'ahu, re 'Ari ngaunu gena-ge ngo-ngo'e 'i sigasa 'ahu. 'A guna ḇato 'o oromo 'ari lese re ka'e 'ari ngaunu, unanga gena-ge 'o marimoi ra Ngoi, re Ngoi to marimoi ra unanga. 'Ari Ḇaḇa, Unanga 'ahu ma cimi, Ro 'utusu Ngoi re Ngoi to 'ahu ra Unanga ino. So'o gena ḏi'i, ngowa'a ga'a oromo 'Ari lese, ananga 'aḏi sanga 'ahu ra Ngoi. Ngoi nena-ne roti ga'a 'uci da'u soroga tala. Ngoi ma tero ua manna ga'a ninga ete re dotumu ya oromo 'ua re 'au wali. Kalaha ananga ya oromo manna gena-ge, ananga 'aḏi sengene ḏi'i. Mada'a ngowa'a ga'a oromo roti gena-ge, ḏuanga i'a 'aḏi 'ahu kasingado-ngadolo i'a.”
Yesus 'o kanau mo-moini gena-ge, wakutu Unanga 'o doto'o ngowa-ngowa'a toma wala puji toma limau Kapernaum.

Togumu i'a ananga ya 'isene Yesus 'o kanau so'o gena-ge, ngowa'a manga repe Tai me-mete'e manga sigolona, ananga 'aḏi kanau, “Do-doto'o gena-ge tubuso masala, 'a guna nga'unu 'a mete'e?!”
Yesus masiretene 'a waro 'Ai me-mete'e 'aḏi kuḏubungu mangale 'Ai do-doto'o. Dadi Unanga 'o kanau, “I'a sa'olo ngini porata, Tari demo-demo gena-ge? Na'o so'o gena-ge, ḏuanga i'a enanga ma dadi sa'olo na'o ngini ni oḏi'i Manusia ma Ngowa'a Nau'u 'o pere maḏibo Tai ngi'i ma siḏa?! Ga'a si'a'a manusia 'aḏi 'ahu, gena-ge Ma Jou'ongu Madutu 'ai Roh. Manusia manga de-de'e, ma faeda 'i cua di'a sigasa 'ahu kasingado-ngadolo i'a. Demo-demo gena-ge ga'a Ngoi ta sikanau ra ngini, demo-demo nena-ne ra Ma Jou'ongu Madutu 'ai Roh ino ga'a sigasa 'ahu kasingado-ngadolo i'a. Mada'a 'age ḏi'i taninga sigolona ananga 'aḏi ngaku ua.” Yesus 'o kanau so'o gena, sababu toma mulaingi i'a moju Unanga ra waro ananga ga'a 'aḏi ngaku ua re 'a guna 'o sipula'a Unanga Tai lawana. Dadi, Yesus dadunu 'o kanau moju, “Ma sababu gena-ge, Ngoi ta siajele ra ngini, matengo i'a mai ua nga'unu 'o sapolo ra Ngoi, ḏuga-ḏuga unanga sanga saele Tari Ḇaḇa masiretene.”
Mulaingi toma 'orasa gena-ge 'Ai me-mete'e manga repe 'aḏi sisoi'i tala Yesus, re 'aḏi mete'e Unanga riwara. Dadi Yesus 'o sano Tai me-mete'e nga nyagi moi re nga muḏiḏi, “Sa'olo ngini? Ngini ni sisoi'i tala Ngoi ḏi'i?”
Simon Petrus 'o kanau, “Ma Jou, ra guna moju ngomi mi mete'e? Ma Jou, pa'i 'Ani demo-demo ḇato 'i sigasa ngomi toma 'ahu kasingado-ngadolo i'a; re ngomi remi ngaku re waro mode-mode'e Ma Jou Ngowa'a 'Ofi-'Ofi ga'a Ma Jou'ongu Madutu 'U 'utusu.”
Yesus 'a sangoro, “Ngoi masiretene to cumutu ngini nga nyagi moi re nga muḏiḏi nena-ne. Mada'a 'age rema ngowa'a matengo taninga sigolona unanga ma tero sa'olo 'Iblisi!” (Yesus 'ai maksudu 'a Yudas - Simon Iskariot 'ai ngowa'a nau'u. Kalaha Yudas 'o osama nyo-nyoimi ra Yesus 'ai me-mete'e nga nyagi moi re nga muḏiḏi, unanga ḏuanga i'a 'o sipula'a Yesus Tai lawana.)

Слухаць Yohanes 6