If you would like a copy of this version please contact info@davaraudiobibles.org

Birjia Bible New Testament, CC BY-NC-ND 4.0, New Life Literature (NLL), 2023. (Text)
Birjia New Testament Audio Bible, CC BY-NC-ND 4.0, Davar Partners International, 2025. (Audio)

Birjia New Testament (NLL)

“चँड़चित दोहोनपे, आपे होड़कु एरञेले तआ धरमिकता रआ काम अलोपे करावे, कोवन दो आपे अपन सिरमा रेनि परमेसर बबा एतेन चितान फयदा हों एरोपे ञम लेए।”
“आपे जब गरीबकु तआ दान एमेअपे, दो होना रआ डिगरी अलोपे एर ठोकावके, जे लेका कपटी होड़, बिनती ओड़ाः जोटोः गलियारी ते करावेआकु, जेकर से होड़कु हुँनि रआ बड़ाइए। इञः आपे सनारी कथावा यतपेअइञ हुँकू अपन इनाम ञम चुकाव तड्अकु। आपे जब दान एमेअपे दो आपे रआ कोंजरा अती अलो ठुवाके चि आपे रआ जोम अती चिताना पड़ी यानय। ताकि आपे रआ एम लआ दान अलोकु ठुवाके आपे रेनि हुँनि बबा जे आपे उकु केते दान एम तड्अपे होना हों ञेल यतेअय, हुँनि आपे तआ इनाम ओवापेअय।”


“जब आपे बिनतीयापे दो कपटी होड़कु लेका कोवन! हुँकू बिनती ओड़ाः रे, जोटोः चउक रे तींगु कोते बिनती तआ पसींदेएकु ताकि होड़कु हुँकू ञेलकु इञः आपे सनारीञ कथावा यतपेआ चि हुँकू अपन इनाम पहिल रे ञम चुकाव केदाकु। बकिन जब आपे बिनतीयापे, दो अपन कोठली रे सेनपे जोटोः दुवार सीङ केते अपन बबा एतेन जे कपे ञेल बोजाया बिनतीपे। तब आपे रेनि बबा जे मन रआ दुखमा ञेलेअय हुँनि आपे इनाम ओवापेअय।”
“बिनतीए बेरा गैर-जहुदीकु लेका जिलिङ-जिलिङ अलोपे बिनती। हुँकू समझाव वोओकु चि बगरा बिनती रेदो हुँकू तआ उतारा ञमेआँ। हिना तआ हुँकू लेका अलोपे पड़ीकोः चितानतआचि आपे रआ कोए एतेन पहिल रे आपे रेनि बबा ठुवा वानय चि आपे तआ चितान-चितान रआ दरकार इदानआँ। दो नोंका बिनतीपे,
“‘ओय सिरमा रे दोहोनी आले रेनि बबा,
अमः ञुमुन रआ महिमा होयावोः,
अमः रआ राइज वेजोः,
अमः रआ हिछा जे लेका सिरमा रे पुरा योओ हेंका धरती रे हों होयावोः।
आले तआ तीहिञ दिन भाइर रआ जो-जोमा ओवालेमी।
जोटोः जे लेका आले अपन गुनाहगारकु माफ तड्कुआले,
हेंका अमः हों आले रआ गुनाह माफ लेमी।
जोटोः आले परखाव रे अलोम एर पड़ाव केले,
बकिन आले बुराइ एतेन बंचाव लेमी।’
“अगर आपे एटाः-ई रआ गुनाह माफे आपे, दो आपे रेनि सिरमा रेनि बबा हों आपे रआ गुनाह माफ पेअय। अगर आपे एटाः-ई रआ कपे माफे दो, आपे रेनि सिरमा बबा हों आपे रआ गुनाह एरोय माफ लेए।”

“जब आपे उपासेअपे दो कपटी होड़कु लेका मेड्-अहा अलोपे उदास के। चितानतआचि हुँकू अपन मेड्-अहा ञुर तआकु, जेकर से होड़कु समझावओकु चि हुँकू उपास यतेअकु, इञः आपे सनारी कथावा यतपेअइञ, चि हुँकू अपन इनाम ञम चुकाव तड्अकु। आपे जब उपास रे दोहोनापे दो अपन बोहोः रे सुनुम ओजाः गेपे जोटोः अपन मेड्-अहा अबोःपे, ताकि होड़कु तआ कोवन, सिरीप आपे रेनि बबा तआ जे गुप्त रीया, आपे उपासे ठुवापे, नोआँ पता चलावओ चि आपे रेनि बबा जे गुप्त रिया होना हों ञेलेअय, आपे तआ होना रआ इनाम ओवापेअय।”


“अपन तआ ओत रे धनखुरजी अलोपे जवारे, जे एडे घुन जोटोः चितियावओ ते होना नास एंडायय जोटोः लो-लोकड़ेकु फोंगाः केते लोकड़े लआकु। बकिन सिरमा रे अपन तआ धनखुरजी जवारेपे, होंडे न चितियावओ, न घुन जोमेआ जोटोः न चोर फोंगाः केते चोरायकु। चितानतआचि जे एडे अमः रआ धनखुरजी इदानआँ, हेनेन रे अमः रआ मन हों लगल दोहोना।”

“होड़ो रआ ढीबरी मेड् हके, अगर अमः रआ मेड् सफाआ दो अमः रआ गोटा होड़ो मरसाल इदानआँ; बकिन अमः रआ मेड् बुरा इदानआँ दो अमः रआ गोटा होड़ो हों ञोताआ। हिना करने होना मरसाल जे आपे एडे इदानआँ अगर ञोतायोओ दो होना ञोता चिलका सेंड़ा होयावओ!”


“ओके होड़ हों बरिया मुवार मिसत रे एरोय सेवा-सुसार बेजालेए, चितानतआचि हुँनि मियड् तुली दुलारेए जोटोः एटाः-ई सुधा बइरीयय, चहे मिहोंड़ सुधा मिलाल दोहोनय जोटोः एटाः-ई सुधा घिनावीयय। आपे परमेसर जोटोः धनखुरजी बनार रआ एरोपे सेवा-सुसार बुजालेए।”
“इञः आपेइञ कथावा यना, आपे अपन जीवि तआ चितानाइञ जोमा चितानाइञ ञूआँ जोटोः न होड़ो तआ चि इञः चितानाइञ होड़हड्आ अलोपे फिकीरोः। चिताना जीवि जो-जोमा एतेन बाइढ़के कोनाआँ। जोटोः तना होड़ो गेन्दराः एतेन बाइढ़के कोनाआँ? अगास रेनकु ओड़ेकु ञेल कुपे, हुँकू न दो बेरेअकु न ईरेअकु जोटोः न गरना रे जवारेएकु। सेकरो रे आपे रेनि सिरमा रेनि बबा हुँकू खियाव कुआय। तना आपे हुँकू एतेन कीमती कुनीपेआ? आपे मे से ओके फिकीर कोते अपन उमेर मी घड़ी तआ हों बढव सकावेआय?”
“गेन्दराः तआ चितान तआपे फिकीर रोओ? पहार रआ बहा ञेलेपे। होना चिलका सेंड़ायोओ? होना न दो कामेअँय जोटोः न अपन तआ गेन्दराः रोगेअय। सेकरो रे इञः आपेइञ कथावायना चि सुलेमान राजा हों अपन पुरे ठट-बट रे हुँकू मे से ओके लेका हों गेन्दराः काय होड़हड् लेना। ओय दरपुरा सारीयोःकु! ओत रआ बीर तीहिञ भाइर इदानआँ जोटोः गपा सेंगेल रे झोला एंडाया। अगर होना हों परमेसर नोंका सिंगरावेए, दो आपे चितान तआ एरोय होड़हड् लेपेआ?”
“हिना तआ आले, ‘चितानले जोमा? चितानले ञूआँ? जोटोः चितानले होड़हड्आ?,’ मेनकेते अलोपे फिकिरकोः। (नोआँ गोटा जीनिस रआ खोज रे गैर-जहुदीकु बनाल दोहोनाकु।) आपे रेनि सिरमा रेनि बबा ठुवा वानय चि नोआँ गोटा जीनिस रआ दरकार इदानआँ। आपे गोटा एतेन पहिल परमेसर रआ राइज जोटोः हुँनि धरमिकता रआ ञ-ञम रे दोहोनपे दो नोआँ गोटा जीनिस आपे तआ एम एंडायय। गपा तआ अलोपे फिकीरोः। चितानतआचि गपा रआ अपन फिकीर खुद करावेआपे। तीहिञ तआ तीहिञ रआ दुख अगामा।”

Слухаць मती 6