Папулярныя біблейскія вершы з Mphattuwelo 6

Падзяліцца

Vano Mwanene Nluku aheera: Koonne wene kaapankaka atthu mwiilaponi mu, ni iyo yahonrusiha venci wanrimani wawe.

Mwanene Nluku ahoona wiira itampi ca atthu caanatepa winciva mwiilaponi ni moopuwelo, omunrimani mwaya yaari ukati wothene upanka paahi coonanara.

Nanso Nowee ahophwanya nnema wamiithoni wa Mwanene Nluku.

Nnya phi cookhumelela co'nethi wa Nowee. Nowee aari ntthu mayasariya, ookhweli na atthu o yooyo ukati uyo. Uyo eetta ni Nluku.

Mwanene Nluku aheera: Kinawamalamaliha mwiilaponi atthu yapankilyaka, atthu ni ciicammo inama cuulupale ni cikani ni asaanuni o wirimu. Koonne wene kipattusaka cothene nnya.

Waapacenryaya atthu wuncererannyaa mwiilaponi ni yaayaracaka asaana asithiyana, asaana asilopwana a Nluku yahoona wiira asaana asithiyana a atthu ayo yaari ooreraca, ni yahaathela ale yaatepile waacivela. Vano Mwanene Nluku aheera: Nlattu wo'tampi ca atthu, Nnepa aka khunhala waana ukati wothene ni atthu, kontha ntthu ri irutthu ni nohala ukhala myakha iminya wo sirini (120) paahi. Yoole ukati ule, mwiilaponi yahaawo atthu oosancamaca. Wahoolo asaana asilopwana a Nluku waathukumanannyaya asaana asithiyana a atthu ni yaayaranaka asaana. Ayo phaari anakhotto okhalayi o'kuru ni ooruma ncina.

Nowee ahopanka toko caahimeriyawe ni Nluku. Commo phaapankilyawe.

Nluku ahomwiirela Nowee: Kinawamalamaliha atthu othene, kontha ilapo yothene ihocara coonanara cimpankaya. Phimaana mi kinawakwanyulaca ni ilapo eyo.

Nanso we, upanke ikalawa yo'thaapwa co mpila. Ukawanihace, cikhale ikatti mwittayi mwaya ni uttiyace ni nimula nhina ni vate.

Woonnyawe wiira ilapo ihotankanyaa, kontha atthu othene omwiilaponi ahohapuwa malamulo aka.

Ni cothene cimmumula co khula ikhapila yo'nama, yo nlopwana ni yo nthiyana unlamuliya ukelana nkalawani mmo piili piili, wiira usunke ukumi aya ni we.