Luku 20
20
Kiyi'afu kigi sipi'a kimi'ehinabe lite Yesuhi loka he'ahana
Mt 21:23-27; Mk 11:27-33
1Mone yupahi Yesu boana'i sipi mono nonugu enele'mo nupa huloto kaga lu epito to ka lamana'a lu epito nohigo enali sipi mono noto kaba hi'ahana bo yagi enali keya kaga keheli bati hulata bo yagi to asaga boana'magi kaba bo'ani yagi enali asaga'i Yesutoga ete ma lite loka he'ahana: 2Kai lu limibo. Kai hena huse kigi li'ohuto ya'ma asaga'na li huto nohane? To kiyi'afu ya'mana sipi kigi kimi'ehigo ya'ma lili'na noline? 3Ya lite loka hago Yesu ma luto ka'anilo ma luto lu'ehina: Yatai lenali kehelilo. Nani kaga mone lenoloka halunagi lenali lu nimilo. 4Yoniu nagami'i folo epololata hu'ehinanaba kokulumalugu'na ni'ifi fa'mene bona'magi hina ni'ibe? 5Ya ligo ana bona'magi enali ai bugu egago ai bugu egago hilete komopa'anigu kenasabo bilete ma lite li'ahana: Hena hibe luto ka'alo lilune? Hu'mamofitogati yabe liluta ai ma luto lilina'mu: Hena hibe lite lenali Yonihi keheli meneemibe? 6To lali fa'mene bona'magi hina yabe luto liluta asaga bona'i ma nehanamagi efa kosatu'i he'milago hehe hite lahalana'mu yabe. Hena'mugope enali Yoniu lu yege hose bo yabe lite amuya melete keheli neemina yabe lite li'ahana. 7Ya lilete Yesuhi ka'alo ma lite nona'a li'ahana: Yoniu nagami nofolo epalanana hiya hepatogati o'ehifi lali mekeheli'ohune. 8Ya lago Yesu ma luto lu epi'ehina: Ana huto nani lili'na nolunamofihi hapa'a lu melepiluna'mu yabe.
Foya kofo'ehina kilihe'i
Mt 21:33-46; Mk 12:1-12
9To Yesu boana'magihi kilihe'i mone lu epi'ehina: Bo moneuba naga'i foya kofoloto'a, to kaba bona'mo enele'mo ho tito buto, foto hepatoga buto minoba minoba hu'ehina yabe. 10To alihi legeya'a hoto uya'i lago legeya'a mone'a ligilube luto, kele kele pana'a mone ho lifigo bigo enali luba sabo hite osahi emite kene igo meligise fa'mene o'ehina yabe. 11Ya hi etago foya afo'afu kele kele pana'a mone hiti ho lifigo bigo enali ai'i ana hite osahi emite to golahi hite le'mete bite fegutoga he'mi ete'ahana. Ai ana huto meligise i behe huto fa'mene o'ehina. 12To foya afo'afu kele kele pana'a mone hiti ho lifigo bigo enali ana hite, osahi emite fegutoga he'mi ete'ahana. 13Ya hi etago foya afo'afu: Hena'ni hilube? luto, nani'ni pana'nimo nibita hu'ehina pana'mo ho lifilube. To ho lifilenogo bigo enali bu gete enelesa'ani lite ka'a kehelilafiye? bu galube, luto lu'ehina. 14To ho lifigo bigo enali bu gete kaga lite li'ahana: Oho. Ya'ma yege pana'a noabe lite, ho fililototi foya'a laliti lilune'mu nohune lite, 15le'mete bite fegutoga he'mi etete ho fili'ahana yabe.
Yesu enoloka ho'ehina: Ya hago foya afo'afu keheliloto hena hu epalalibe? 16Ai buto enali enoho su holoto'a foyamo fato bona'mo epinogo kaba hilabe. Yesu ya luto lu epi'ehina kilihe'i yabe. Ya lu epigo boana'magi kehelilete ma li'ahana: Abo, ya'ma kaba bona'magi ya hilalafi? O'e, ya mehilabe. 17Yalo Yesu enubu goloto ma luto lu epi'ehina: Kehelilo, hena kagauba ya'maguti mono ka fayahi ge'ahana ninagu hapa'a legeya'a huto hilibe?
Ya'ma efapo lapusa'a lili'nalo bomagi
bati mehina yabe lite
li he'mi'ahana
aku'i yatai yuhufa noto
folaganugu lapusa finogo
amuyana hetofana minalina'mu yabe.
18Asaga bona'i ya'mana lapusa'amofihi hapa'aluga felete minalana enali asaga'i i gofa he su halana'mu yabe. To ya'mana lapusa'a limo ito bo mone'mofihi halina ana bo ai pehena legi huto i keye luto me'i lolo hu etalina'mu yabe.
Takisi efahi he'mise'namu Yesu loka he'ahana
Mt 22:15-22; Mk 12:13-17
19Ana yupahi keya ka babafi bo to sipi mono noto kaba enali kumu luto Yesu bame ka ligo enali keheli sibina hilete Yesuhi ana hepato naga'i emilune'mu hana babu boana'magi mege'i nemalago koli he'ahana yabe. 20Ya hago enali fato kanalo naga'i emilune lite mapahi fite bi'ahana. To Yesuhi mapahi fite minalabe lite bona'i luga enoho lifigo bi'ahana yabe. Enali ya'mana bona'i enali bati bona'i suhi hite Yesuhi lalu'agita nohune lite bi'ahana yabe. Enali ya hite bite nehite loka babu lite heba heba hite fi taga hi etelenogo ai Yesu kaga bati hinaga lilifi to bati mehinaga nolinogomo naga ito le'mete sipi gamani bo nohinalo bilune lite mine'ahana yabe. 21Enali ya'mana Yesuhi mapahi fite bana bona'magi ma lite Yesuhi loka he'ahana: Tisa kai fotogo hina kaga lula to boana'magi hetofa kaga lu epilata nohanogo keheli ketolata nohuta yabe. Kai sipi enigihiti bomagihi koli'ani menohata yabe. Kai lusigago luto Hu'mamofihi mono ka'a boana'i lu epilata nohata yabe. 22Ya hulata nohata kai kehelitaba takisi bati huto epilata nohupi bati mehina suhi luto epilata nohune? 23Ya hana Yesu faga faga nelana ka'animofihi hapa'a akeheliloto ma luto lu epi'ehina: 24Efahi legeya'a mone li nelepilo. Kiyi'afihi okaba'a hiti gi'a hiti ya'mana efahi legeya'alo ni'ibe? 25Ya luto enoloka hago enali sipi bo Sisahi gi'a hiti okaba'a hiti ni'ibe li'ahana. Ya lago Yesu lu epi'ehina: Sisahi nana'a Sisahi emilo to Hu'mamofihi nana'a ya Hu'mamofitogago emilo. 26Yesu ka'anilo lu epina kagauba enoholago enelesa ligo babu bona'i minanalo Yesuhi naga ilupi naga meilupi lilete kaga melise enabaga hekini lelete fa'mene mine'ahana yabe.
Filise'naguti ho tisemofihi hapa'amu Yesuhi loka he'ahana
Mt 22:23-33; Mk 12:18-27
27Mono bona'i luga'a enali filise'naguti bona'i aku'i ho metilana'mu yabe lite lilata nehana enigi'ani Satusi bona'i enali Yesutoga e'ahana. Enali Yesuhi loka he'ahana: 28Tisao, Moseu ma kaga limi'ehina yabe: Bo moneuba yagapana'i meketose nohuto fililoto liha'a he'mi etoto nobinogomo ana bomofihi gona'auba liha'a lilenogo etali yagapana'i fili'ehina bomofito nona'a ketala'ina'mu yabe lu'ehina yabe. 29Mone yupahi koguna sebeni'a mine'ahana enogo'anifu liha'a liloto yagapana meketose fili'ehina. 30Ya higo ana megesalo gona'auba go'afihi liha'a koyo'i li'ehina yabe. 31Ai ana huto yagapana meketose filito nobigo ana bomofihi megesalo gona'auba koyo'i li'ehina. Ananago hite sebeni'a kogunamagi ana a'i yagapana ketalufi lite linamo enali asaga'i ana a'i hiti yagapana meketose fili su he'ahana. 32Ya hilago alihi ana a'i fili'ehina yabe. 33To asaga bona'i fili'ahanagati ho ti su halana yupahi ana koguna ho tilana ai ana a'iba kiyi'afihi liha'a minalina ni'ibe? luto Yesuhi loka he'ahana yabe. To asaga sebeni'a kogunamagi ana a'i liha'ani li etalafihe?
34Yesu ka'anilo nona'a lu epi'ehina: Boana'i yatai kana'alo neminana enali li bo alobo hilata nehabe. 35Ya hu'ehina boana'i Hu'mau lamana nehana yabe luto ho tilabe lu'ehina enali alihi kana'alo mine bati hilanamagi li bo alobo mehilana'mu yabe. 36Enali aku'i mefililana'mu yabe. Enali agelo bona'magi suhi lite minalana'mu yabe. Hu'mau fili'ahanaguti enele'mo ho tilina'mu yago enali ai'a yagapana'a minalana'mu yabe. 37To koyapa'i Moseu bona'i fili'ahanaguti aku'i ho tilana'mu yabe luto huto lelepi'ehina. Ai fayahi mone koyoto lu'ehinagi lagaso yafa logo lana guluya meha'aguti nogo'auba Sipi Bo kumu ya'ma Abalahagi Yakopugi to Isakagi Hu'ma, Sipi Bo'anifita nohube luto Mosehi lu emi'ehina. 38Ya hu'ehina Hu'mau ai filise bona'magihi Sipi Bo'anifu menohibe. Enali nehana bona'magi Sipi Bo'anifu nohibe. Ai Hu'mamofihi bu'alo asaga bona'i mefilise asaga'i ho tite nehabe, luto Yesu lu'ehina. 39Yesu ya luto noligo keya ka enelepise bona'magi ma lite li'ahana: Tisao, kai bati ka luto mana ka lane. 40Ya lilete enali koli hite aku aku'i Yesuhi mone ka loka mehe'ahana yabe.
Yesu bona'i Mesia kumu enoloka ho'ehina
Mt 22:41-46; Mk 12:35-37
41Ya hu'ehina Yesu ma luto enoloka ho'ehina: Hu'mau le'mo ho ti'ehina bo kumu hena hibe lite enali Tebitihi Pana'a yabe lite lilata nehabe? 42Mono nama buku monelugu Tebitiu ai'a ma luto lu'ehina:
Sipi Bo Hu'mau ma luto nani Sipi Bo'ni
lu emi'ehina:
Kai nayahi lamaga'aga minobo.
43Ya hu'ehitogo nani alihi fatehaka
kamanuga enele'mo malaluna'mu yabe.
44Tebitiu ai'a Sipi Bo'ni yabe lu'ehinamo aku'i hena hibe luto Mesiau Tebitihi pana'a lolo hilibe?
Keya ka enelepise bona'magihi hapa'ani
Mt 23:1-36; Mk 12:38-40
45Babu bona'magi Yesuhi kaga'alo kehelite nehago Yesu ma luto koko panana'a lu epi'ehina: 46Lenali keya ka babafi bona'i kaba hu bati hite minalo. Enali yatama yatama gukete li hekelelete enali yole'ale ite humofa'na nehago asaga bona'magi soso hu epelete enebe tigite hila asaga bona'i li nupa hite minelata nehana enubulo hilata nehabe. To enali mono nonugu asaga boana'magi enubulo minelete to sipi nose'na nelata nehanalo hepa'i bati'a lite minelata nehago asaga li nupa hite minana bona'magi, akae enali hetofa bona'i yabe lite lu epelelata nehabe. 47Enali keto ana'magihi fe'noha'ani mone yupaha'a enimi'i melete gumina lilete to mone yupaha'a bona'magi enubulo lali bati bo nohune lite sipi nunumu yatamalo hilata nehabe. Hu'mau foipa bona'i enahalina yupahi ma bona'i lusina huto enoho fala kilina'mu yabe, luto Yesu koko panana'a lu epi'ehina yabe.
Цяпер абрана:
Luku 20: bef
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 1982, Wycliffe Bible Translators, Inc. All rights reserved.