Jenesis-Agafa 10
10
Noa Mofavre naga'mokizmi zamagimofo naneke
1Rantima hageno mika'za ahe refitetegeno'a, Noana tgufa mofavre nagapinti maka'a vahera fore hu'naze. Ana kogna naga zamagi'a Semi'ma, Hamu'ma, Jafeti'e.
Jafeti mofavre naga zamagi'amofo naneke
2Hanki Jafeti mofavre naga zamagi'a ama'ne, Goma'e, Magogi'e, Madai'e, Javani'e, Tubali'e, Meseki'e, Tirasi'e. 3Hanki, Goma, amohe'i zamagi'a Asikenazi'e, Rifati'e, Togama'e. 4Hanki, Javani mofavre naga zamagi'a Elisa'e, Tarsisi'e, Kitimi'e, Dodanimi'e. 5Ana nagapintira refko hu'za hagerinkena mopa agerute agerute kognare famote ranra kuma erifore hu'za kva hutere hu'za mani'naze.
Hamu mofavre naga'mokizmi zamagimofo naneke
6Hanki Hamu naga mani'naza mopa agi'a Kusi'e (Etopia), Mizrami (Isipi), Puti'e (Libya), Kenani (Palestine). 7Hanki Kusi mofavre naga zamagi'a, Seba'e, Havila'e, Sabta'e, Rama'e, Sabiteka'e. Hanki Rama'a tare ne'mofavre znante'ne, znagi'a Sebake Dedanike. 8Kusi'a, Nimiroti nefa'e. Nimiroti'a agra harfa nere. 9Anumza'mofo avurera knare harfa vahe fore huno mani'nea nere. E'ina'ma hu'negu menina vahe'mo'za rumofo husga huntenakura, Nimroti kna vahe mani'ne nehaze. 10Nimroti kva hu'nea moparera tgufa ra kumara me'ne, zamagi'a, Babelie, Erekie, Akatie, Kalne, e'i ana kumatmina Sainar (Babiloni) mopafi me'ne. 11Nimroti'a Babiloni rankumara atreno, Asiria kaziga vuno rankumazga ome azeri otino ki'ne. Ana kuma zamagi'a Ninive, Rehobotir, Kala, Resenie. 12Hanki Reseni rankumara Ninive'ne, Kala kumamofo amu'nompi me'ne. 13-14Mizrami'e (Isipi), Ludim (zge hanati kaziga Afrika me'ne), Anamaits (Afrika magokziga) vahe'mokizmine, Lehabimi'e (Lybians) vahe'ma, Naftuhim (Nile Delta, tihane agupofine) vahe'ma, Patrusim (Isipi) vahe'ma, Kaslu (Isipine Keneni amunompi mani'naze), Kefraits (Kriti ti amunompi nemnize). 15Kenanina agonesa mofavrea Saidoni'e, hanki Heti'a Kenani negeho'e. 16Jebusi (Jerusalem), Amorie, Girgase, 17Hiva, Arkise, Sinie, 18Arvada, Zemara, ne Hamat, vahe'mokizmi nezmageho'e. Hanki henka'a Kenani, agehe'za mago mago hu'za ru mopare ru mopare mani'naze. 19Hanki, Kenani vahe mopamo'a, Saidoni kumateti eri agafa huno Gerari vuno Gaza uhanatiteno, ananteti vuno Sodom Gomora kaziga uhnatino Admati, Zeboim kaziga vuno Lasa uhnati'ne. 20Hamu agehe'za nagate nofite hu'za mani'neza ruzmegeru ruzmegeru neruza rankuma trohu'za kva hutere hu'za mani'naze.
Semi mofavre naga zamagimofo naneke
21Semina mago'a ne'mofavre'a fore humi'ne. Jafetina nempu amo'e. Semi'a, Eberi naga zamageho mani'ne. 22Semi mofavre naga zamagi'a, Elamu'e, Asari'e, Arpaksadi'e Ludiki Aramu'e. 23Aramu mofavre naga zamagi'a Uzi'e, Huli'e, Getari'e, Masi'e. 24Arpaksadi agra Sela nefa'e, Sela'a Eberi nefa'e. 25Eberi'a tare ne' mofavre znante'ne. Mago'mofo agi'a Peleki'e, Peleki'e, hu'nea kemofo agafa'a amanahure, mopa refko hu'za nagate nofite hu'ne. Hanki nefu agi'a Joktani'e. 26Joktani'ma zamante'nea naga zamagi'a, Almodati'e, Selepi'e, Hazarmaveti'e, Jera'e, 27Hadoramuki, Uzaliki, Dikla'e, 28Obali'e, Abimeleki, Seba'e, 29Ofiriki, Havilaki, Jobabi'e zamagra Joktani mofavre nagare. 30E'i ana naga'ma kuma trohuza mani'naza mopamo'a Mesati agafa huno Sefari zge hnatitega agonare uhanatine.
31Amana vahera Semipinti fore hu'naza vahere. Semi agehe'za nagate nofite mago mago hu'za manitere hu'neza zamagerute zamagerute hu'za mopa zamire mani'neza, rankuma trohu'za kva hu'za manitere hu'naze. 32Tima hagetegeno ana amefi'a Noa ahi'moza mofavre naga'afinti forehu anante anante nehu'za ranra kuma anteza mopafi hakare kaziga manime vu'naze.
Цяпер абрана:
Jenesis-Agafa 10: kbq
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2014, Wycliffe Bible Translators, Inc. All rights reserved.