Luk 24
24
O Iesu i katutur melet gusun a minat
(Mt 28:1-10; Mk 16:1-8; Jn 20:1-10)
1Ra i kobot raut, una mugano bung una wik, a wardain det los a kum utna ra i sangsangnain wakak ra det sa waninar pasi, ra det wan utiro una kulam na minat. 2Ma det pastoromi ra di sa bulus gisen ru a wat gusun a matansako na kulam na minat. 3Det ruk, ikut ka det tama i mo a minatin a Labino o Iesu. 4Ra a nuknukin det i lokolokor utmakai uni, uniutra, aru musano, anunder arin namalu i pilpil doko, der wanpat torom det. 5Det ngara, ra det tudung piso ma a masarindet unago piso. Ikut, der watungi tandet lena, “Ilai ra mot sisio sur o naro ra i laun nin nisan a kum minat? 6#Lk 9:22Ke kis mo nin, i sa katutur melet. Mot in nuk pas a wasiso ra i sa watung tari tamot, ra i kis utmakai tomo nam mot tong o Galili. 7I sa watung tari lenri, ‘Din pitar tar a Nutun a Musano una laman a laulau na taro, ma din sak wati unin nanai kutus. Ra a tulu bung in rop in katutur melet.’” 8Ra det nuk melet pas a wasiso anun o Iesu.
9Ra det milet melet gusun a kulam na minat, det inanos nama kum utna rop ri torom a noino ma ra nat na ususer ma torom det rop kai, ra det ser mur o Iesu. 10A wardain ra det inanos a kum aposel det ri: O Maria Magdalen, o Joana, ma o Maria o nan o Jems, ma a ramano kum ino kai, ra det wan tomo nam detul. 11Ikut, a kum aposel det longoro a wasiso anun a wardain elar nama wasiso oros kut, ma ka det nurnur un det. 12Ikut o Pita i tur, i kalabor sur a kulam na minat. I par pirso, ra i kiet ma i tama a kum malu mukut, det inep gisen taru. Ra i milet melet, ma i nuknuk doko un asau ri i wanpat.
A inawan utong o Emaus
(Mk 16:12-13)
13Una bung ut ra, aru tagun det ra det ser mur o Iesu, der wan sur a tamon a risano o Emaus. A bakbakino i elar nama noino ma ara kilomita tagisapat o Jerusalem. 14Ra der wan nanan der wasiso etalai torom der una kum utna rop ri, ra i sa wanpat taru. 15Ra der wasiso ma der ting etalai der una kum utna ri, o Iesu ut i wanpat torom der, ma detul wan tomo. 16Ikut ara utna i pulus bat arin matander ra ka der tama lele pasi.
17O Iesu i ting der lena, “Asau ri mur wasiso nanan uni una numur a inawan?” Der tur taru kut ra der tamtama na tupunuk. 18Ma ara pasander a risano o Kliopas, i tingi lena, “Ui mukut ara musano ra u kis na usiro sapat o Jerusalem, ma ko tasman a kum utna ri ra i wanpat sapat una kum bung ri?” 19Ra i ting der lena, “A kum utna na sau?” Ma der balu i lena, “A kum utna un o Iesu a te Nasaret. I ara poropet, ra i ser pam a kum dekdek na pinapam, ma anun a wasiso kai i dekdek, umatan o God ma a taro rop. 20A kum lamlabino tene etabor torom o God ma anundat a kum mugumugu det pitar tari una warkurai sur in mat, ma di sak wati unin nanai kutus. 21#Lk 19:11; Ap 1:6Ikut, met nurnur uni lena, i ra, in ulangolango a taro Israel. Ma ara utna kai, i sa tulu bung bat tar a kum utna ri det pami. 22Ma i kai ri, a ramano kum ino tagun met, det ukisin met. Det wan kobot sur a kulam na minat, 23ikut ka det tama a minatino. Ra det milet melet, det watungi lena, det tama tar aru ensel una tamtama, ra der watungi lena i sa laun. 24#Jn 20:3-10Numur ara taro kai tagun met, det wan pas tiro una kulam na minat, ra det tama tar a utna ri, lenkutkai ra a kum wardain det inanos nami, ikut ka det tama o Iesu.”
25Ra o Iesu i watungi tander lena, “Mur longlong kut. Nangisin mur in nurnur una kum wasiso rop ra a kum poropet det sa watung tari? 26#Lk 9:22Det watungi lena, a Karisito in taramo a kum ngunungut ri, ra numur in ruk una nun a minamar.” 27#Sng 22:1-21; Ais 53:1-12Turpasi una kum buk anun o Moses ma a kum poropet rop, o Iesu i papalos torom der una kum utna, ra di sa tumus tari uni ut, una Buk Tabu. 28Ra detul wan milau sur a tamon ra der wan suri, o Iesu i lari sur in nan sakit mukut. 29Ma der turbat dekdeki lena, “Un kis tomo nam mir, uni i sa lirop. In matanas i ling na sup mo.” Ra detul ruk ma i kis tomo nam der.
30Ra detul kis sur detul in nangon, o Iesu i los pas a beret, i watung wakak pas uni, i tibik pasi, ma i tabor der nami. 31Ra a matander i tapalos, ra der tama lele pasi maragom, ra i rorom pas mut gusun der. 32Ra der wasiso etalai torom der lena, “I lingmulus ut, in balandar i pirok nama gasgas ra i wasiso torom dar, ra datul wan nanan una kisapi ma i palos tar a wasiso na Buk Tabu torom dar.”
33 #
1 Kor 15:4-5
Uniutra, der katutur ma der milet melet usapat o Jerusalem, ra der wan torom a noino ma ra nat na ususer ma ara taro kai ra det kis tomo. 34Det watungi lena, “A lingmulus ut! A Labino i sa katutur melet, ma i tur pat torom o Saimon.” 35Ra der inanos un asau ra i wanpat torom der una kisapi, ma una nunder a tamtama lele kai uni, ra i tibik a beret.
O Iesu i tur pat torom anun a kum nat na ususer
(Mt 28:16-20; Mk 16:14-18; Jn 20:19-23; Ap 1:6-8)
36Ra der wasiso utmakai una kum utna ri, o Iesu ut i tur epotor tandet, ma i watungi tandet lena, “A malmal torom mot.” 37#Mt 14:26A pinindet i sursurin ma det ngara doko, det nuki lena, a nion kut ra det tama i. 38Ma i watungi tandet lena, “Ilai ra mot ngara? Ma ilai ra mot wur nuknuk? 39Mot in tama aru lamang ma aru kiking. Iau mulus ut ri. Mot in tuk iau, ma mot in tama iau. A nion kalako pinino, ma kalako sursur kai. Ikut a pining ut ma a sursur na pining utkai, ra uniri mot tama i.” 40Ra i sa watung tari lenri, i ese aru lamano ma aru kikino tandet. 41Det gas ma det kisin, ikut ka det nurnur utmakai. Ma i ting det lena, “Katu utna kuri sur an nani?” 42Ma det tabori nama lik kiripo ra di sa tun tari. 43Ra i rakon pasi, ma i wani umatandet.
44 #
Lk 9:22
Ma i watungi tandet lena, “Ra a kis utmakai tomo nam mot, a sa inanos tar mot lenri: A kum utna rop ra di sa tumus tari un iau, una Warkurai anun o Moses, una wasiso anun a kum poropet ma una Kum Kelekele anun o Dewid din pam sot rop pasi.” 45Ra o Iesu i utalapor a nuknukin det sur det in talapor una Buk Tabu. 46I watungi tandet lena, “Di sa tumus tari lenri: A Karisito in iru, ra a tulu bung in rop, in katutur melet gusun a minat, 47ma din warawai una risano torom a taro tagun a kum gapman rop, turpasi sapat o Jerusalem. Din warawai torom det lena, det in nukpukus ma o God in unus ru anundet a kum sakino petutna. 48#Jn 15:27; Ap 1:8Mot a kum tene wasiso una kum utna ri mot sa tama tari. 49#Jn 14:16; 15:26; Ap 1:4Tama i, i ra o Tita i sa uliliman taru uni, an tulu ru i torom mot. Ikut mot in kis ut nin una tamon ri, tuk ra din mar tar mot nama dekdek tagisapat netes.”
O Iesu i wan toto usapat una langit
(Mk 16:19-20; Ap 1:9-11)
50Numur i ben pirso pas det gusun a tamon Jerusalem, ra det wanpat un ara nubual milau o Betani, ra i kodos aru lamano, ma i watung udan det. 51Ra i watung udan det utmakai, i wan gusun det, ra o God i ben toto pasi usapat una langit. 52Det lotu toromi, ra det milet melet usapat o Jerusalem nama labino gasgas. 53A kum bung rop det kis tiro ubalan in noworo ina rumu na etabor, det ser watung ulabo pas o God.
Цяпер абрана:
Luk 24: kqw
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2019 Wycliffe Bible Translators, Inc. All rights reserved.