Mateo 9
9
Pinegulinan i Jesus Sembatung Pangkul
(Markus 2:1-12; Lukas 5:17-26)
1Siminakat si Jesus dut gubang diminipag peuliꞌ dut sembelaꞌ neng dagat bekeꞌ siminurung dut diri ye neng lungsud, Kapernaum.
2Na dut Kapernaum, duun mengeꞌ senung ketawan nibit dut ki Jesus et sembatung pangkul na pebubuntul dut demdam. Pegkebiriꞌ i Jesus et kelang pegandel dye, kwan ye dut taaw neng pangkul, “Yegang, kepenggeraꞌ seled mu! Inampun ne salaꞌ mu.” 3Sabab et itueng pinegberes i Jesus, mengeꞌ menulduꞌ et Keseraan nemegberes dye dut diriꞌ dye, kwan dye, “Pepeempuꞌempuꞌ itueng taaw na itue!” 4Segwaꞌ pegsesewren i Jesus kedyeng pegpipikiren, kwan ye, “Manu meraat ne nepikir myu? 5Banar, lebing merugey sugiren, ‘Teyeg ne bekeꞌ panew ne,’ kasga sugiren, ‘Dimung salaꞌ inampun ne,’ 6sabab Empuꞌ lang mekeampun et keselaan, segwaꞌ supaya mesewran myu na ating Yegang et Taaw maya kepengdyarian na mengampun et salaꞌ atuʼt dunyaꞌ, indaniꞌ itue.” Pegketbes kwan ye dut taaw neng pangkul, “Teyeg ne, bikyataꞌ ne iganigan mu bekeꞌ muliꞌ ke ne.” 7Angkansa ating taaw timinyeg bekeꞌ nuliꞌ dut benwa ye. 8Pegkebiriꞌ et kineldaman et taaw, nemengliluꞌ dye banar, bekeꞌ binantug dye Empuꞌ neng negey et mengeꞌ taaw et kepengdyarian na samat kwantin.
Pegpiliꞌ i Jesus ki Mateo
(Markus 2:13-17; Lukas 5:27-32)
9Pegpelembus i Jesus et panew ye nebiriꞌ ye sembatung taaw na ingaran ye si Mateo na megarung dut benwa neng susukutan et buwis. Na sinugid i Jesus dut kenye, kwan ye, “Mibut ke daken!” Timinyeg si Mateo bekeꞌ nibut kenye.
10Ganang megkekaan si Jesus et penengeldewan ye dut benwa i Mateo, mekansang menunukut et buwis bekeꞌ mengeꞌ ibang tegekeselaan na liminamud mengaan dut ki Jesus bekeꞌ dut mengeꞌ pepengenaran ye. 11Pegkebiriꞌ itue et mengeꞌ pariꞌ na Pariseo, nengingkut dye dut mengeꞌ pepengenaran ye, kwan dye, “Manu Menunulduꞌ myu pepelamud mengaan dut mengeꞌ menunukut et buwis bekeꞌ dut mengeꞌ tegekeselaan?” 12Pegkingeg i Jesus, kwan ye, “Kaya nengengeilangan et mengunguru sebarang kaya sakit, segwaꞌ nengengeilangan et mengunguru sebarang maya sakit. 13Manew kew ne bekeꞌ retiaꞌ myu baꞌ enu ingin bersen ye itueng Kesuratan et Empuꞌ, kwan, ‘Ingasiꞌ ingin ku, diki lang mengeꞌ simayaꞌ.’ Sabab diki ku natuꞌ supaya pilinen sebarang keblan dye metitignaꞌ, segwaꞌ natuꞌ supaya tebangen ku et mengeꞌ mekeselaan.”#9:13 Oseas 6:6.
Iningkut si Jesus pasal et Pegpuasa
(Markus 2:18-22; Lukas 5:33-39)
14Indyari nepekabiꞌ dut kenye mengeꞌ pepengenaran i Juan neng Mememewtismu, kwan dye, “Enungkwan itue na kami bekeꞌ mengeꞌ Pariꞌ na Pariseo pegpuasa, segwaꞌ dimung pepengenaran kaya lang pemegpuasa?” 15Kwan i Jesus, “Enungkwan rumupuk mengeꞌ mengluluruk sementaraꞌ lelaki neng ibulun esentin nega? Diki lang! Segwaꞌ dumateng timpu na ibulun neng lelaki ugaren dut kedye. Atin peꞌ memegpuasa ne.” Neglahyun ne si Jesus neres.
16Kwan ye, “Kaya sinu meketempel et bagung kumut dut lelagi neng badyuꞌ, sabab melanut dut tinimpelan et bagu na tinempel, lebi ne dumeklaꞌ ne banar uyat ye. 17Diki gasi mekedyari isunuꞌ et taaw bagung alak dut lelagi neng susunuan.#9:17 susunuan - dut Griego: ‘bebtangen neꞌ kulit’. Sabab baꞌ isunuꞌ dye duntin, mekedyaring lumput ating susunuan, indyari meulaꞌ ne inumen neng alak in bekeꞌ mepsaꞌ ne ating susunuan. Erapun, subaliꞌ isunuꞌ bagu neng alak dut bagung susunuan gasi supaya saliꞌsaliꞌ dye meipat et menunga.”
Patey neng Yegang et Pegibuten bekeꞌ Libun neng Kiminutew et Badyuꞌ i Jesus
(Markus 5:21-43; Lukas 8:40-56)
18Sementaraꞌ megbebres nega si Jesus et itue, sembatung pegibuten et mengeꞌ Judio nepekabiꞌ bekeꞌ siminelukud dut teteyumanan ye, kwan ye, “Ingga peꞌ nekwit pegpatey et yegang ku neng budyang. Segwaꞌ baꞌ mekedyari teyen bayaꞌ kew daken sabab mengarap ku na baꞌ depnen mu ya, asal ya megbiyag.” 19Timinyeg si Jesus bekeꞌ nayaꞌ dut kenye, bekeꞌ mengeꞌ pepengenaran ye nayaꞌ gasi.
20Naꞌ, maya gasi sembatung libun na megkesandalen et sakit neꞌ pegduruguan et sempuluꞌ duwang teun ne, kaya megtuug tapis ye. Na nepekabiꞌ dut lilikuran i Jesus ampaꞌ ye kinutew bingbiring et badyuꞌ i Jesus. 21Kwan et sedseled ye, “Baꞌ mekutew ku lang bingbiring et badyuꞌ ye, megulinan ku ne.” 22Liminingew si Jesus kwan ye dut kenye, “Yegang, kepenggeraꞌ seled mu. Dimung pegandel negpenunga dimu.” Atin negang masa megtuy negulinan libun. Neglahyun gasi si Jesus dut benwa et pegibuten.
23Ganang nekerateng, siminled ne si Jesus dut benwa et pegibuten et mengeꞌ Judio bekeꞌ nebiriꞌ ye mengeꞌ menunuling et kelebengen bekeꞌ kineldaman na memeggikgibek. 24Kwan ye dut kedye, “Liwan kew! Ating budyang ingga patey, segwaꞌ megigaꞌ lang!” Segwaꞌ nemengsit dye lang dut kenye. 25Pagkaꞌ mengeꞌ taaw nepeliwan ye ne, siminled gasi i Jesus bekeꞌ kimpetan ye dut keremut et budyang neng libun, angkansa negbangun budyang. 26Tuturan pasal itue limingkep dut sengkelungsuran na atin.
Pinegulinan i Jesus Duwang Beleg bekeꞌ Sembatung Umew
27Ganang nugad ne si Jesus teyeg dut lungsud naꞌ atin, maya nepesunud kenye duwang mengeꞌ beleg. Indyari timiningkag dye, kwan dye, “Inupuꞌ i Surutan Dabid, meingasiꞌ ke damen!”#9:27 Inupuꞌ i Surutan Dabid tagnaꞌ - itue ibang ngaran i Kristo, ingin bersen ating itue na si Jesus ating Mesias piniliꞌ i Empuꞌ apang mengmilik dut ginsaʼt tawʼt sengkedunyaan. 28Pegseled i Jesus dut benwa, negpekabiꞌ dut kenye mengeꞌ beleg neꞌ lelaki. Iningkut dye i Jesus, kwan ye, “Mengandel kew be dut daken na itue mebuwat ku supaya megulinan kew?” “Eꞌ, Begerar, andel kay,” sambag dye. 29Indyari kinutew ye ne kedyeng mata ampaꞌ ne neres, kwan ye, “Kuyun dut pengandel myu dut Empuꞌ, meinabu teyen atin samat keendelen myu.” 30Indyari negnunga ne penyek dye. Pegketbes negbilin si Jesus, kwan ye, “Amay-amay banar, kasi myu pegsugiraꞌ itueng ginis dut misan sinu!” 31Segwaꞌ nugad dye bekeꞌ masi ga pineabar dye kebentugan i Jesus dut ginsaʼt mengeꞌ lungsud pelibut duun.
32Ganang megugad dye ne, aluꞌ, maya gasi sembatung lelaki binibit dut ki Jesus na sembatung pegselban et meraat angkan kaya mekebres. 33Pagkaꞌ nepeliwan ne ating meraat, ating lelaki nekebres ne. Indyari mengeꞌ kineldaman nemengliluꞌ, kwan dye, “Atuʼt Israel kayangga peꞌ nebiriꞌ na neinabu samat kwantin!” 34Segwaꞌ kwan ga et mengeꞌ Pariꞌ na Pariseo in, kwan dye, “Sabab lang binggey atin kependyarian et pengibuten et mengeꞌ mereraat in, angkan si Jesus maya basag supaya nekepeliwan et mereraat.”
Sesenu Ga mengeꞌ Mengengeradya
35Pegketbes siminurung si Jesus dut ginsaʼt mengeꞌ lungsud bekeꞌ dut mengeꞌ kebenbenwanan. Penulduꞌ ye dut mengeꞌ pegpengempuan et mengeꞌ Judio, na pepabar pasal et Menungang Abar et Pengmilikan et Empuꞌ, bekeꞌ pepenunga ye sebarang mengeꞌ maya misan enung reresanen bekeꞌ ginsaʼt mengeꞌ sakit. 36Ganang nebiriꞌ ye mengeꞌ kineldaman, nekeingasiꞌ dut kedye sabab dye samat pegelamen mene bekeꞌ mengeꞌ melulumek, samat mengeꞌ ipatan neng bibili na kaya mengingipat. 37Indyari kwan ye dut mengeꞌ pepengenaran ye, “Mengeꞌ keldamen antangan dye samat mengeꞌ uma panyap ne keygen. Mekansang ne kekeygen, segwaꞌ kaya mekansang mengengeyg. 38Angkansa mengangat kew dut Empuꞌ et itueng kekeygan, supaya megpebibit ya et mengengeradya dut kenyeng kekeygan.”
Цяпер абрана:
Mateo 9: plw
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2018, Wycliffe Bible Translators, Inc. All rights reserved.
Mateo 9
9
Pinegulinan i Jesus Sembatung Pangkul
(Markus 2:1-12; Lukas 5:17-26)
1Siminakat si Jesus dut gubang diminipag peuliꞌ dut sembelaꞌ neng dagat bekeꞌ siminurung dut diri ye neng lungsud, Kapernaum.
2Na dut Kapernaum, duun mengeꞌ senung ketawan nibit dut ki Jesus et sembatung pangkul na pebubuntul dut demdam. Pegkebiriꞌ i Jesus et kelang pegandel dye, kwan ye dut taaw neng pangkul, “Yegang, kepenggeraꞌ seled mu! Inampun ne salaꞌ mu.” 3Sabab et itueng pinegberes i Jesus, mengeꞌ menulduꞌ et Keseraan nemegberes dye dut diriꞌ dye, kwan dye, “Pepeempuꞌempuꞌ itueng taaw na itue!” 4Segwaꞌ pegsesewren i Jesus kedyeng pegpipikiren, kwan ye, “Manu meraat ne nepikir myu? 5Banar, lebing merugey sugiren, ‘Teyeg ne bekeꞌ panew ne,’ kasga sugiren, ‘Dimung salaꞌ inampun ne,’ 6sabab Empuꞌ lang mekeampun et keselaan, segwaꞌ supaya mesewran myu na ating Yegang et Taaw maya kepengdyarian na mengampun et salaꞌ atuʼt dunyaꞌ, indaniꞌ itue.” Pegketbes kwan ye dut taaw neng pangkul, “Teyeg ne, bikyataꞌ ne iganigan mu bekeꞌ muliꞌ ke ne.” 7Angkansa ating taaw timinyeg bekeꞌ nuliꞌ dut benwa ye. 8Pegkebiriꞌ et kineldaman et taaw, nemengliluꞌ dye banar, bekeꞌ binantug dye Empuꞌ neng negey et mengeꞌ taaw et kepengdyarian na samat kwantin.
Pegpiliꞌ i Jesus ki Mateo
(Markus 2:13-17; Lukas 5:27-32)
9Pegpelembus i Jesus et panew ye nebiriꞌ ye sembatung taaw na ingaran ye si Mateo na megarung dut benwa neng susukutan et buwis. Na sinugid i Jesus dut kenye, kwan ye, “Mibut ke daken!” Timinyeg si Mateo bekeꞌ nibut kenye.
10Ganang megkekaan si Jesus et penengeldewan ye dut benwa i Mateo, mekansang menunukut et buwis bekeꞌ mengeꞌ ibang tegekeselaan na liminamud mengaan dut ki Jesus bekeꞌ dut mengeꞌ pepengenaran ye. 11Pegkebiriꞌ itue et mengeꞌ pariꞌ na Pariseo, nengingkut dye dut mengeꞌ pepengenaran ye, kwan dye, “Manu Menunulduꞌ myu pepelamud mengaan dut mengeꞌ menunukut et buwis bekeꞌ dut mengeꞌ tegekeselaan?” 12Pegkingeg i Jesus, kwan ye, “Kaya nengengeilangan et mengunguru sebarang kaya sakit, segwaꞌ nengengeilangan et mengunguru sebarang maya sakit. 13Manew kew ne bekeꞌ retiaꞌ myu baꞌ enu ingin bersen ye itueng Kesuratan et Empuꞌ, kwan, ‘Ingasiꞌ ingin ku, diki lang mengeꞌ simayaꞌ.’ Sabab diki ku natuꞌ supaya pilinen sebarang keblan dye metitignaꞌ, segwaꞌ natuꞌ supaya tebangen ku et mengeꞌ mekeselaan.”#9:13 Oseas 6:6.
Iningkut si Jesus pasal et Pegpuasa
(Markus 2:18-22; Lukas 5:33-39)
14Indyari nepekabiꞌ dut kenye mengeꞌ pepengenaran i Juan neng Mememewtismu, kwan dye, “Enungkwan itue na kami bekeꞌ mengeꞌ Pariꞌ na Pariseo pegpuasa, segwaꞌ dimung pepengenaran kaya lang pemegpuasa?” 15Kwan i Jesus, “Enungkwan rumupuk mengeꞌ mengluluruk sementaraꞌ lelaki neng ibulun esentin nega? Diki lang! Segwaꞌ dumateng timpu na ibulun neng lelaki ugaren dut kedye. Atin peꞌ memegpuasa ne.” Neglahyun ne si Jesus neres.
16Kwan ye, “Kaya sinu meketempel et bagung kumut dut lelagi neng badyuꞌ, sabab melanut dut tinimpelan et bagu na tinempel, lebi ne dumeklaꞌ ne banar uyat ye. 17Diki gasi mekedyari isunuꞌ et taaw bagung alak dut lelagi neng susunuan.#9:17 susunuan - dut Griego: ‘bebtangen neꞌ kulit’. Sabab baꞌ isunuꞌ dye duntin, mekedyaring lumput ating susunuan, indyari meulaꞌ ne inumen neng alak in bekeꞌ mepsaꞌ ne ating susunuan. Erapun, subaliꞌ isunuꞌ bagu neng alak dut bagung susunuan gasi supaya saliꞌsaliꞌ dye meipat et menunga.”
Patey neng Yegang et Pegibuten bekeꞌ Libun neng Kiminutew et Badyuꞌ i Jesus
(Markus 5:21-43; Lukas 8:40-56)
18Sementaraꞌ megbebres nega si Jesus et itue, sembatung pegibuten et mengeꞌ Judio nepekabiꞌ bekeꞌ siminelukud dut teteyumanan ye, kwan ye, “Ingga peꞌ nekwit pegpatey et yegang ku neng budyang. Segwaꞌ baꞌ mekedyari teyen bayaꞌ kew daken sabab mengarap ku na baꞌ depnen mu ya, asal ya megbiyag.” 19Timinyeg si Jesus bekeꞌ nayaꞌ dut kenye, bekeꞌ mengeꞌ pepengenaran ye nayaꞌ gasi.
20Naꞌ, maya gasi sembatung libun na megkesandalen et sakit neꞌ pegduruguan et sempuluꞌ duwang teun ne, kaya megtuug tapis ye. Na nepekabiꞌ dut lilikuran i Jesus ampaꞌ ye kinutew bingbiring et badyuꞌ i Jesus. 21Kwan et sedseled ye, “Baꞌ mekutew ku lang bingbiring et badyuꞌ ye, megulinan ku ne.” 22Liminingew si Jesus kwan ye dut kenye, “Yegang, kepenggeraꞌ seled mu. Dimung pegandel negpenunga dimu.” Atin negang masa megtuy negulinan libun. Neglahyun gasi si Jesus dut benwa et pegibuten.
23Ganang nekerateng, siminled ne si Jesus dut benwa et pegibuten et mengeꞌ Judio bekeꞌ nebiriꞌ ye mengeꞌ menunuling et kelebengen bekeꞌ kineldaman na memeggikgibek. 24Kwan ye dut kedye, “Liwan kew! Ating budyang ingga patey, segwaꞌ megigaꞌ lang!” Segwaꞌ nemengsit dye lang dut kenye. 25Pagkaꞌ mengeꞌ taaw nepeliwan ye ne, siminled gasi i Jesus bekeꞌ kimpetan ye dut keremut et budyang neng libun, angkansa negbangun budyang. 26Tuturan pasal itue limingkep dut sengkelungsuran na atin.
Pinegulinan i Jesus Duwang Beleg bekeꞌ Sembatung Umew
27Ganang nugad ne si Jesus teyeg dut lungsud naꞌ atin, maya nepesunud kenye duwang mengeꞌ beleg. Indyari timiningkag dye, kwan dye, “Inupuꞌ i Surutan Dabid, meingasiꞌ ke damen!”#9:27 Inupuꞌ i Surutan Dabid tagnaꞌ - itue ibang ngaran i Kristo, ingin bersen ating itue na si Jesus ating Mesias piniliꞌ i Empuꞌ apang mengmilik dut ginsaʼt tawʼt sengkedunyaan. 28Pegseled i Jesus dut benwa, negpekabiꞌ dut kenye mengeꞌ beleg neꞌ lelaki. Iningkut dye i Jesus, kwan ye, “Mengandel kew be dut daken na itue mebuwat ku supaya megulinan kew?” “Eꞌ, Begerar, andel kay,” sambag dye. 29Indyari kinutew ye ne kedyeng mata ampaꞌ ne neres, kwan ye, “Kuyun dut pengandel myu dut Empuꞌ, meinabu teyen atin samat keendelen myu.” 30Indyari negnunga ne penyek dye. Pegketbes negbilin si Jesus, kwan ye, “Amay-amay banar, kasi myu pegsugiraꞌ itueng ginis dut misan sinu!” 31Segwaꞌ nugad dye bekeꞌ masi ga pineabar dye kebentugan i Jesus dut ginsaʼt mengeꞌ lungsud pelibut duun.
32Ganang megugad dye ne, aluꞌ, maya gasi sembatung lelaki binibit dut ki Jesus na sembatung pegselban et meraat angkan kaya mekebres. 33Pagkaꞌ nepeliwan ne ating meraat, ating lelaki nekebres ne. Indyari mengeꞌ kineldaman nemengliluꞌ, kwan dye, “Atuʼt Israel kayangga peꞌ nebiriꞌ na neinabu samat kwantin!” 34Segwaꞌ kwan ga et mengeꞌ Pariꞌ na Pariseo in, kwan dye, “Sabab lang binggey atin kependyarian et pengibuten et mengeꞌ mereraat in, angkan si Jesus maya basag supaya nekepeliwan et mereraat.”
Sesenu Ga mengeꞌ Mengengeradya
35Pegketbes siminurung si Jesus dut ginsaʼt mengeꞌ lungsud bekeꞌ dut mengeꞌ kebenbenwanan. Penulduꞌ ye dut mengeꞌ pegpengempuan et mengeꞌ Judio, na pepabar pasal et Menungang Abar et Pengmilikan et Empuꞌ, bekeꞌ pepenunga ye sebarang mengeꞌ maya misan enung reresanen bekeꞌ ginsaʼt mengeꞌ sakit. 36Ganang nebiriꞌ ye mengeꞌ kineldaman, nekeingasiꞌ dut kedye sabab dye samat pegelamen mene bekeꞌ mengeꞌ melulumek, samat mengeꞌ ipatan neng bibili na kaya mengingipat. 37Indyari kwan ye dut mengeꞌ pepengenaran ye, “Mengeꞌ keldamen antangan dye samat mengeꞌ uma panyap ne keygen. Mekansang ne kekeygen, segwaꞌ kaya mekansang mengengeyg. 38Angkansa mengangat kew dut Empuꞌ et itueng kekeygan, supaya megpebibit ya et mengengeradya dut kenyeng kekeygan.”
Цяпер абрана:
:
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2018, Wycliffe Bible Translators, Inc. All rights reserved.