Maarko 2
2
Aaꞌnyĩk Yeesu eet hũbũna
(Tigiil Maatteeo 9:1-8; ꞌLuuka 5:17-26)
1Ma baa urutaa cĩ waathinniook ꞌcĩg abadtẽc haaga, ikia õbõdõõthĩ Yeesu ũũk ĩĩcĩ ꞌtaaũn cĩ Kapernaumĩ nẽ ĩꞌthanothoothĩk nyeemuut looc hĩdĩĩkoothong, ĩthĩhĩt eeta aĩ ikia nẽẽ õlõ. 2Nĩngĩtĩ allũnganniaanĩ eeta ꞌcĩg mẽẽlĩg auuni hĩbbĩt ꞌcieeth hõdõlan hattũũg, hiittiõõ nĩngĩtĩ idiongan tõõ. Nẽ ikia illimaneek Yeesu ĩhõõggõ thõõth cĩ Nyekuci. 3Ma ho, uppwaatta eeta ꞌwec ꞌcĩg irriongana eet umwa ꞌcĩ alalliaa ẽlẽ. 4Baa aꞌnyaman ĩhõõggõ ꞌgõõl ꞌcĩ õdõlanĩ Yeesu, hĩnĩngĩtĩ lothippit cobbi ho. Nĩngĩtĩ õtõdĩ nẽẽg ꞌcieeth nẽ õõt erreccia hutuli ꞌcieetha lokora, ngaatĩ aayyi Yeesu dẽẽdẽ. Ma baa erreccia ẽlẽk, iita õyõyyõõratta nẽẽg eet ꞌcĩ alalliaa ẽlẽ ho ĩꞌthõng hõdõlan looc ngaatĩ aayyi Yeesu. 5Ma baa acĩn Yeesu lemiinit cĩnĩĩng ko, ikia uduhaak eet ꞌcĩ õmmõõrĩ ho ĩĩnnĩk, “Loholeec caannĩ, ũtũngtoothĩk nganiit ꞌthẽccanẽẽta cugunnẽẽgĩ.”
6Baa aattĩg ꞌlimmanniooha cĩg nyattal cĩ Mũũꞌtha iccioloongan nĩngaata nẽ ummuhit ẽmmẽn ĩĩtõ, 7“Inni ꞌthẽk hõthõõth ẽẽtĩ ciee hoti ho? Ĩĩn ciee doominit hĩ Nyekuc. Nganĩ gõõng ꞌcĩ occa ammaannĩk eet, hĩnĩngĩtĩ ꞌthẽccanẽẽt cĩggĩĩng ko? Nyekuc dioo ꞌcĩ occa ammaannĩhĩ.”
8Baa aga Yeesu muhẽẽnĩt cĩnĩĩng ko hĩdĩĩkoothong nẽ ijin ĩhõõggõ ĩĩnnĩk, “Inni ummuhit niig thooꞌthiok ꞌcĩg aattĩg noho ho? 9Thõõth iina ꞌcĩ ammũjĩ, ꞌcĩ hannẽẽkĩ eet icci õmmõõrĩ ho, ‘Ũtũngtoothĩk nganiit ꞌthẽccanẽẽta,’ hode ꞌcĩ hannẽẽkĩ, ‘Tĩnga, dũhan lotoonu cunni bĩtõ?’ 10Nẽẽthĩ hátĩ agaac ĩĩtõ, aꞌnyak Ngeertĩ Eeto#2:10 Ngeertĩ Eeto: Avvĩ Yeesu ẽlẽ cĩnnĩ anneek Ngeertĩ Eeto, hĩnĩngĩtĩ ẽtẽrꞌtha nẽẽ aĩ, ĩĩn nẽẽ Krĩstõ nẽ ĩĩ habu cĩ habuccieet ꞌcĩ aalla ũdũt. Tigiil ꞌBuuk cĩ Danieele 7:13-14. makaaꞌthĩt ꞌcĩ ammaannĩkĩ eet, hĩnĩngĩtĩ ꞌthẽccanẽẽt loota nĩnga.” Nĩngĩtĩ aduhaakĩ eet ꞌcĩ alalliaa ẽlẽ ho annẽẽkĩ, 11“Hanneekii naa nganiit tĩnga, dũhan lotoonu cunni bĩĩt ĩĩcĩ olu.” 12Ma ho, ĩtĩnga ẽẽtĩ nicciee hẽbẽrẽẽnnĩĩ cĩg eet vẽlẽk nẽ ũdũhan lotoonu cĩnnĩ nĩngĩtĩ õkõõĩ, acĩn lothippiti vẽlẽk. Baa abulan thõõth ciee eet vẽlẽk nẽ ĩdĩhĩthĩt nẽẽg Nyekuc gẽrrẽẽt ĩĩtõ, “Gõõng nga hĩcĩtta thõõth ꞌcĩ aaĩ hoti ũdũt!”
Ũtũvvũ Yeesu ꞌLeevi
(Tigiil Maatteeo 9:9-13; ꞌLuuka 5:27-32)
13Ma baa ikia õbõdõõthĩ Yeesu ũũk ĩĩcĩ dẽmẽt cĩ Bũlũc cĩ ꞌGalileea tarĩ, baa aku lothippiti cobbi gẽrrẽẽt irriamaneek ĩnõõnnõ, nĩngĩtĩ iꞌthianaanĩ nẽẽ allimanĩ ĩhõõggõ. 14Ma baa nga õvvõ nẽẽnĩ, ẽdẽẽnyõthĩ ꞌLeevi#2:14 ꞌLeevi: Haĩ ꞌthaar cĩg ꞌLeevi ũgĩ Maatteeo, ꞌcĩ baa hikia hĩĩ ꞌthooyyiahit cĩ Yeesu. ngeertĩ Aliveo, iccioloongan ngaatĩ adũmanĩ eeta occoro. Nĩngĩtĩ annẽẽkĩ ĩnõõnnõ, “Nũaa nganĩĩta!” Ma ho, ikia ĩtĩnga ꞌLeevi nẽ ũnũ ĩnõõnnõ.
15Ma baa uruta, iita udukto Yeesu hĩ eet ꞌcĩg mẽẽlĩg ꞌcĩg alũt occoro hĩ ꞌthẽccanniook, hĩ nuyyiook#2:15 Nuyyiook: Baa ĩĩn nuyyiooha eet ꞌcĩg ẽlẽmĩ ꞌlimman cĩ Yeesu nẽ ĩthĩhĩt ĩnõõnnõ. Baa ẽbẽra Yeesu nuyyiook õmmõtõ hĩ ꞌramma, hiita hĩĩtõ ꞌthooyyiak cĩgĩnnĩg. Baa ĩꞌthõ Yeesu ĩhõõggõ makaꞌthĩta, hõõt hĩdĩmanit thooꞌthiok ꞌcĩg ĩnaat eeta nẽ illimanit eet nyeemuut ꞌcĩ abũnnaa cĩ Yeesu. cĩgĩnnĩg õlõõ cĩ ꞌLeevi. Baa mẽẽlĩg eeta gẽrrẽẽt ꞌcĩg anũ ĩnõõnnõ. 16Ma baa acĩn ꞌlimmanniooha cĩg nyattal cĩ Mũũꞌtha ꞌcĩg baag ĩĩn Variꞌtheei#2:16 Variꞌtheei: Ĩĩn Variꞌtheei lothippit cĩ ꞌJudeei ꞌcĩg aꞌthũũnnĩ nyattal cĩ Mũũꞌtha nẽ elemit thõõth ꞌcĩ arũgnaanĩ daakiaha tarĩ nẽ elemit aajĩlẽẽt hĩ loriẽẽta. Tigiil ꞌBuuk cĩ Dtiicanĩ cĩg ꞌThooyyiahu 23:8. Yeesu, ngaatĩ aduhẽẽnĩ hĩ eet ꞌcĩg alũt occoro hĩ ꞌthẽccanniook ko, ijinit nẽẽg nuyyiook cĩgĩnnĩg ĩĩttĩk, “Inni hudukto Yeesu hĩ eet ꞌcĩg alũt occoro hĩ ꞌcĩg ĩĩn ꞌthẽccanniook hõdẽĩ ho?”
17Ma baa athĩhĩ Yeesu thõõth icci ho, ẽdẽc ĩhõõggõ ĩĩnnĩk, “Aitiõõ hõllõngaa eet ꞌcĩg abũnnaa ꞌcĩg adiim akĩĩm, ĩĩn eet ꞌcĩg õmmõõrĩ diooni ꞌcĩg adiim ĩnõõnnõ. Baa hõllõngaa hakuu naa, hĩnĩngĩtĩ eet ꞌcĩg abũnnaa, hakuu naa, hĩnĩngĩtĩ ꞌthẽccanniook.”
Jinẽẽnĩt cĩ thõõth ꞌcĩ hẽdẽtaanĩ eleeti ꞌgẽẽna
(Tigiil Maatteeo 9:14-17; ꞌLuuka 5:33-39)
18Kõr umwa, baa ẽdẽta nuyyiooha cĩg Yõaannẽ Batitta hĩ eet ꞌcĩg ĩĩn Variꞌtheei eleeti ꞌgẽẽna.#2:18 Ẽdẽta eeta eleeti ꞌgẽẽna: Baa gõõng ẽdẽta eeta cĩg ꞌJudeei eleeti ꞌgẽẽna waathinnioohĩ ũgẽẽgĩ, halayyiõõĩ eleeti cĩggĩĩng hĩ Nyekuc. Ma ho, iita eeta ũgẽẽgĩ ijinit Yeesu ĩĩttĩk, “Inni nuyyiooha cĩg Yõaannẽ Batitta hĩ nuyyiook cĩg Variꞌtheei hedettia eleeti ꞌgẽẽna nẽ iittiõõ cugunnig hõllõngaa ẽdẽta eleeti ho?”
19Ẽdẽcĩ Yeesu ĩhõõggõ anneek, “Hõllõngaa occa ẽdẽta eeta ꞌcĩg ĩĩn ꞌgõõnõgĩ nyattaraanak eleeti ꞌgẽẽna, hatĩ nga arũmĩ nẽẽ hĩ ĩhõõggõ. 20Nẽẽthĩ, aaĩ hatĩ kõrra umwaa ꞌcĩ ũũnnĩkĩ nyattaraan ĩhõõggõ nẽ hatĩ edettia nẽẽg eleeti kõr niccia.
21“Aitiõõ ẽẽtĩ umwaa ꞌcĩ occa ahubeek cẽrẽm ꞌcĩ ĩĩn ngeju cẽrẽmaa ꞌcĩ ũnũũk tõõ. Má uhubeeha, ẽrrẽẽc hinnia hatĩ cẽrẽm ꞌcĩ ĩĩn ngeju cẽrẽm ꞌcĩ ũnũũk ko, hĩĩ maka loppulacĩ. 22Nẽ aitiõõ ẽẽtĩ ꞌcĩ occa adũddeek mẽrtĩ cĩ viinoo ꞌcĩ ĩĩn ngeju hutubaawa ꞌcĩ ũnũũk#2:22 Hutuba ꞌcĩ ũnũũha: Haarĩk naag mẽrtĩ hutubaawa, nẽẽthĩ, baa alũũlla eeta cĩg ꞌJudeei cẽrẽm cĩ eetho nẽ utududdeek mẽrtĩ cĩ viinoo. Baa õthõõth Yeesu thõõth cĩ ꞌlimman cĩnnĩ ꞌcĩ ĩĩn ngeju, baa ĩthakꞌtheek nẽẽ ꞌlimman cĩnnĩ mẽrtĩ ꞌcĩ ĩĩn ngeju cĩ viinoo. tõõ, má ũtũdũdeeha, alibi hinnia hatĩ hutuba hudduuti mẽrta. Abũnnaa ngaatĩ adũddẽẽkĩ ẽẽtĩ mẽrtĩ cĩ viino ꞌcĩ ĩĩn ngeju hutubaawa ꞌcĩ nga ĩĩn ngeju.”
Makayyioohit cĩ Kõr cĩ ꞌYiommaanõ
(Tigiil Maatteeo 12:1-8; ꞌLuuka 6:1-5)
23Ma baa Kõrraa umwaanĩ ĩcĩ ꞌYiommaanõ, baa õõkõr Yeesu hĩ nuyyiook cĩgĩnnĩg ẽꞌngẽrkẽẽthan mana umwa cĩ ꞌgẽẽmẽ nẽ weetaa cĩnĩĩng ko, ajatta nuyyiooha cĩgĩnnĩg ꞌgẽẽmẽ ũgĩ. 24Nĩngĩtĩ annẽẽkĩ Variꞌtheei Yeesu, “Cĩĩn nõõ, inni hĩdĩmanit nuyyiooha cugunnig ꞌgii ꞌcĩ aꞌngirannii Kõrraa cĩ ꞌYiommaanõ ho?”
25Ẽdẽcĩ Yeesu aĩ, “Nga nooyyia itigiilit niig thõõth baa adĩman habuui Daavide,#2:25 Daavide: Baa ẽbẽra Nyekuci Daavide hikia hĩĩ habu cĩ Ĩꞌthĩraẽlĩ nẽ uduha ĩĩ, aku hatĩ habuui cobbi lõhõlẽẽnĩĩ cĩg lõhõlĩ cĩgĩnnĩg, hikia haggam looc hĩĩ habu ũdũt. Baa habu tĩho Yeesu Krĩstõ. Tigiil thõõth icci ꞌBuuhaa cĩ Tegellwaanu 132:11-12. Baa arũgĩ Daavide irkiꞌnyia ꞌcĩg occa ũũppan aalib hõdẽĩ, baa nga hittirria Yeesu. Tigiil thõõth cĩnnĩ ꞌBuuhaa ꞌcĩ ĩĩn 1 ĩcĩ Thamueele 16-30; 2 Thamueele 1-24; 1 Habueet 1-2. kõr baa adiimi nẽẽ hĩ eet cĩgĩnnĩg#2:25 Thõõth ꞌcĩ adĩman Daavide hĩ eet baag õõkõr hĩ ĩnõõnnõ: Tigiil thõõth cĩnnĩ ꞌBuuhaa ꞌcĩ ĩĩn 1 ĩcĩ Thamueele 21:1-6. ꞌgẽẽn baa adak magĩthĩ? 26Baa aduhun nẽẽ ꞌCieeth cĩ Nyekuci waathinnioohĩĩ baag ĩĩnnĩ Abiatharĩ paadĩr cobbi,#2:26 Paadĩr cobbi: Maka paadĩrĩ cobbi ĩllõõan paadĩrꞌnya vẽlẽk, hĩnĩngĩtĩ paadĩr cobbi dioo ꞌcĩ aduhun Nĩngĩtĩ Aꞌngirannii ꞌcĩ Ẽllẽẽmĩth Gẽrrẽẽt ꞌCieethaa cĩ Nyekuci tabattĩ hõdẽẽthõng irkita. Baa aayyi Nyekuci Nĩngĩtĩ icci Aꞌngirannii ho bulẽẽtta, ĩnõõ ꞌcĩ adukni paadĩrĩ cobbi Nĩngĩtĩ icci nẽ ũũk urwacan biyyiẽẽtĩ, hátĩ hatamaatĩk Nyekuci eet, hĩnĩngĩtĩ ꞌthẽccanẽẽt cĩggĩĩng ko. Tigiil ꞌBuuk cĩ Levitiko 16; Ebereei 9. nẽ ũũk uduk ꞌgẽẽn ꞌcĩ aggatanĩ ẽlẽk, ꞌcĩ occa aduk paadĩrꞌnya diooni nẽ ẽꞌngẽra umwa aaꞌnyĩk eet baag õõkõr hĩ ĩnõõnnõ.”
27Nĩngĩtĩ aduhaakĩ Yeesu ĩhõõggõ annẽẽkĩ, “Baa aarĩhoothĩk Kõrra cĩ ꞌYiommaanõ hĩĩ bũnnai cĩ eetu nẽ baa hõllõngaa ẽhẽnytaa eeta hĩĩtõ bũnnai cĩ Kõr cĩ ꞌYiommaanõ. 28Nẽẽthĩ ꞌyioko, ĩĩn Ngeertĩ Eeto Makayyioohit cĩ Kõr cĩ ꞌYiommaanõ.”#2:28 Makayyioohit cĩ Kõr cĩ ꞌYiommaanõ: Baa aduhaak Nyekuci eet cĩg ꞌJudeei hummuhuttõõthĩ kõr baa ẽhẽnytaanĩ nẽẽ hẽẽtkujjieen hĩ looc. Ĩnõõ ꞌcĩ ĩĩnnĩ Teheꞌnyioohiti Nyekuci dioo Makayyioohit cĩ Kõr cĩ ꞌYiommaanõ ho. Nẽẽthĩ ꞌyioko, hĩcĩ õthõõth Yeesu aĩ, hĩĩnĩ Makayyioohit cĩ Kõr cĩ ꞌYiommaanõ ho, aĩ nẽẽ hĩĩnĩ Nyekuc Teheꞌnyioohit. Tigiil ꞌBuuk cĩ Luugithõõ 20:8-11.
Цяпер абрана:
Maarko 2: did
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2017, Wycliffe Bible Translators, Inc., All rights reserved.