Luka 24
24
Yesu Doot ma̱ng Swuan ma̱ Á̱niet ba̱ ka̱n Kwi a̱ni
(Mat 28:1-10; Ma̱r 16:1-8; Yon 20:1-10)
1A̱wot mi̱ shong a̱tson a̱tuk Ladi,#24:1 Lyuut cha̱chaat: “A̱tuk nang á̱ na ntsa fang mmam Sati na a̱ni.” á̱nyiuk ba si̱ kyiak nkyuo turare na ma̱ng a̱myia̱ na̱ byia̱ swam nyinyang nang ba̱ wai a̱ni. Ba̱ si̱ nat ma̱ a̱bi Yesu ka. 2A̱wot ba̱ ku si̱ shya̱ nang á̱ byuut a̱gba̱ndang a̱fang wu, nang á̱ nkup a̱nu lyak ka a̱ni, á̱ sak zan!
3Mat a̱nia, ba̱ si̱ nwuo mami lyak ka. Da̱ mba, ba̱ li kwom A̱tyoli Yesu hu bah! 4Nang ba̱ mbwuok á̱ yong ma̱ a̱tai a̱zanu a̱bi ka a̱ni, á̱tyok a̱feang ba̱ kup a̱yaatoot ba̱ ya á̱ghyi ma̱ mya̱myat a̱myat a̱ni; si̱ kin tyai á̱pyia̱ mba kpa̱sai da̱ a̱vwuo á̱nyiuk a̱kya, ma̱nang but á̱ghyi a̱ni!
5A̱wun si̱ ta̱bat á̱nyiuk a̱bya ba̱t. A̱wot ba̱ si̱ beak, ba̱ si̱ ta̱tong pyipyia̱ mba hu a̱byin. Á̱tyok a̱bya si̱ nyia̱ ma̱ng á̱nyiuk ba, “Yihwa mbyia̱ nang nyi nchat a̱tyu nswuan ma̱ á̱niet ba̱ ka̱n kwi a̱ni? 6Yesu shya̱ a̱ji bah. A̱ wa ka̱n doot ma̱ á̱niet ba̱ ka̱n kwi a̱ni! Nyi jhyung a̱lyiat na nang gu ku hyia̱ ma̱ng a̱nyin nang gu ni̱ shya̱ ndung ma̱ng a̱nyin mi̱ fam a̱byin Ga̱lili hu a̱ni,
“Yesu ku nyia̱, 7‘Ku yet ta hwa á̱ tyia̱ Nggwon A̱tyubishyi mbwak á̱niet á̱ka̱tuk nyia̱, ba̱ kpang nka da̱ a̱team a̱khwu. A̱wot a̱tuk mam tat ka, ka̱ na doot ma̱ng swuan ma̱ á̱niet ba̱ ka̱n kwi a̱ni.’ ”
8A̱jawa á̱nyiuk a̱bya si̱ kin jhyung a̱lyiat nang Yesu ku hyia̱ ma̱ng a̱mba a̱ni. 9Mat a̱nia, ba̱ si̱ doot da̱ a̱vwuo a̱bi ka. Ba̱ si̱ ghan á̱ nat. Ba̱ si̱ shya̱ mman ta̱m swak ma̱ a̱nyiung Yesu na, mbeang á̱kum á̱niet khwi ka. Ba̱ si̱ hyia̱ ma̱ng a̱mba kyang hu ba̱ li, a̱wot ba̱ si̱ fa̱k a̱ni.
10Á̱nyiuk a̱bya, bibya yet; Ma̱ryamu Ma̱ga̱daliya, Yowana, ma̱ng Ma̱ryamu a̱yang Yakubu wu, mbeang á̱kum á̱nyiuk á̱ghyang. Bibya ku yong mi̱ di̱ shei mman ta̱m na nkhang nani. 11Nang mba mman ta̱m Yesu na nfa̱k nkhang na a̱ni, na̱ si̱ li mba nang a̱buk a̱lyiat wa a̱ni! Mat a̱nia, ba̱ si̱ nwuak a̱chuchuk da̱ na bah.
12A̱mgba̱m ma̱ng a̱nia, Bitut si̱ kin tat a̱ doot. A̱ si̱ tyia̱ kwak chung a̱ nat ma̱ a̱bi ka. Nang gu si̱ ntat a̱bi ka a̱ni, a̱ si̱ beak, a̱ si̱ ta fwuo nggu hu mami lyak hu. A̱ si̱ li a̱toot nang á̱ ku nniat kwom Yesu hu a̱ni. A̱ si̱ fa̱k a̱ga̱de di̱ kyang ku bai a̱ni! A̱ si̱ bwuok a̱ nat a̱mali.
Mman Ta̱m A̱feang Tyia̱ Gba̱ng ma̱ng Yesu di̱n Vak naat Imuwasu
(Ma̱r 16:12-13)
13Ma̱ a̱tuk Ladi a̱kya, nang Yesu ku ndoot ma̱ng swuan ma̱ á̱niet ba̱ ka̱n kwi a̱ni; á̱niet a̱feang mami á̱niet khwi Yesu ba ku doot Urusha̱lima, á̱ naat a̱bakeang a̱ghyang nang á̱ ngyei Imuwasu a̱ni. Doot Urusha̱lima nat a̱bakeang a̱kya yet met a̱natat#24:13 Lyuut cha̱chaat: “Sta̱diya swak a̱taa.” wa. 14Nang mman ta̱m a̱feang a̱nia nshya̱ di̱n vak, ba̱ chong á̱ bwoi nkhang tazwa nkyang na nang á̱ nyia̱ mi̱ Urusha̱lima a̱ni.
15A̱wot nang ba̱ nchong á̱ bwoi nkhang na a̱ni, Yesu ma̱ a̱pyia̱ nggu si̱ kin tyia̱ gba̱ng ma̱ng a̱mba! A̱ si̱ ta̱bat a̱chyet ka ma̱ng a̱mba.
16A̱wot ku nang ba̱ ku ndi Yesu a̱ni, A̱gwaza ku shim ba̱ fi̱k a̱tyu nang gu yet a̱ni bah. 17Yesu si̱ lyip ba nyia̱, “Zang tangka̱i nkhang hwa nang nyi chong bwoi nyin ma̱ a̱feang di̱n vak hu a̱nia?”
Ba̱ si̱ bwuok, á̱ yong ma̱ chi̱k, nang lilyia̱ hu ya mba! 18A̱jawa a̱tyo a̱nyiung ma̱ mba nang á̱ ngyei Kiliyobat a̱ni, si̱ nyia̱ ma̱ng Yesu, “Nwan wa ma̱nyin ang yet a̱nietchen ma̱ a̱keang Urusha̱lima ka, a chyi nkyang na na̱ bai mi̱ mam nani a̱ni a?”
19Yesu si̱ bu lyip ba, nyia̱ “Zang ntangka̱i nkyang nia?” Ba̱ si̱ bu nyia̱ ma̱ng a̱nggu, “Nkyang na na̱ shya̱ Yesu a̱ neet ma̱ a̱keang Na̱za̱ra̱t ka a̱ni. A̱ ku yet a̱tsak a̱ta̱m a̱kwonu A̱gwaza wa. A̱ si̱ nyia̱ nkyang a̱ri̱bi̱di na̱ byia̱ chet a̱ni. A̱wot a̱ si̱ yet a̱gba̱ndang a̱tyu tyiet wa a̱zaghyi A̱gwaza mbeang a̱mgba̱m á̱nietbishyi ba.
20“A̱cha̱chet a̱yaapris nzi̱t ba, ma̱ng a̱yaagwak tyiet doka ba si̱ tyia̱ Yesu mbwak gwomna Bilatut, a̱ si̱ faat gu shi̱ri̱ya a̱khwu. Ba̱ si̱ tyia̱, á̱ si̱ kpang nggu da̱ a̱team a̱khwu. 21A̱wot nzi̱t meang, zi̱ ku tyia̱ fwuo Yesu wa yet Kristi wu a̱ chobai a̱ san á̱niet Isi̱rela ba da̱ a̱vwuo á̱niet ba̱ lak li mba a̱ni. A̱wot mam tat hwa a̱fwun, nang á̱ nkpang Yesu da̱ a̱team a̱khwu a̱ni.
22“A̱wot á̱nyiuk á̱ghyang ba̱ shya̱ dundung ma̱ng a̱nzi̱t mi̱ sot á̱niet khwi Yesu ji a̱ni, nat ma̱ a̱bi nggu ka mi̱ shong a̱tson hu. A̱wot ba̱ si̱ bwuok á̱ bai, á̱ ba̱ bwuo nzi̱t nkhang a̱ga̱de! 23Ba̱ si̱ nyia̱, di̱ ba̱ li kwom Yesu hu ma̱ a̱bi ka bah! A̱wot ba̱ si̱ li a̱yaata̱m tswá A̱gwaza, á̱ si̱ hyia̱ ma̱ng a̱mba nang Yesu ndoot ma̱ng swuan ma̱ á̱niet ba̱ ka̱n kwi a̱ni! 24Mat a̱nia, á̱tyok á̱ghyang ma̱ nzi̱t si̱ tyong chung á̱ nat ba̱ si̱si̱ li. A̱wot ba̱ si̱ shya̱ nang kwom Yesu hu nshya̱ ma̱ a̱bi ka bah, ma̱ cha̱chaat ma̱nang á̱nyiuk a̱bya nhyia̱ a̱ni!”
25A̱jawa Yesu si̱ nyia̱ ma̱ng a̱mba, “Kwot, nyin á̱niet sang mumwang! Nyi si̱ bu byia̱ á̱kpa̱p nfwuo di̱ nwai nwuak a̱chuchuk da̱ a̱lyiat nang a̱yaata̱m a̱kwonu A̱gwaza ba ku lyuut ma̱ A̱lyiat A̱gwaza na a̱ni! 26N wa ngyei á̱ ku tak á̱zanson kpa̱sai; nang Kristi na nswuo a̱bung di̱ nkyang nani, a̱ sii du san a̱kyenkyai shi nggu wu a?” 27A̱wot Yesu si̱ wa̱i mba a̱mgba̱m A̱lyiat A̱gwaza na, kyiak neet di̱ doka Musa ji, ba̱ng ba̱ tat shei á̱zanson nang a̱mgba̱m a̱yaata̱m a̱kwonu A̱gwaza á̱ghyang ku lyuut a̱ni.
28Jen nang ba̱ mbai kpa̱mkpaan ma̱ng a̱bakeang Imuwasu ka nang mman ta̱m a̱feang na nnaat a̱ni, Yesu si̱ tyia̱, a̱ na swak a̱ ya a̱son ma̱ng a̱chyet ka. 29A̱wot mman ta̱m na si̱ naai nggu nyia̱, “Ma̱sa̱kut, kwai a̱ji ma̱ng a̱nzi̱t la! Mat jenshyung nyia̱, mam hu naat a̱kwa kya ka.” Mat a̱nia, Yesu si̱ khwi mba a̱ nat a̱mali mba ka. 30Nang ba̱ nswan á̱ na ya kyayak a̱ni, Yesu si̱ kyiak burodi wu, a̱ si̱ naai A̱gwaza. A̱wot a̱ si̱ kpa̱ra̱m di̱ gbi̱ngba̱ra̱m, a̱ si̱ ka̱u mbaa. 31Mi̱ di̱ yong a̱hwa, á̱ghyi mba ba si̱ kin tat, ba̱ si̱ fi̱k nang Yesu wa! A̱wot di̱n jen a̱ja, a̱ si̱ kin ta̱yuut!
32Mman ta̱m na si̱ lyiat tsi̱tsak mba nyia̱, “A̱tsak a̱lyiat, jen nang zi̱ nshya̱ di̱n vak hu nang Yesu ku ngwa̱i nzi̱t A̱lyiat A̱gwaza na nang á̱ lyuut a̱ni; zi̱ ku byia̱ a̱gwai ba̱t mi̱ nfwuo nzi̱t na baa?!”
33A̱jawa mman ta̱m a̱feang a̱nia, si̱ kin doot, ba̱ si̱ bwuok á̱ nat Urusha̱lima. Ba̱ si̱si̱ shya̱ mman ta̱m swak ma̱ a̱nyiung ma̱ng mman ta̱m á̱ghyang di̱ tyan jhyung nang ba̱ ntung ndung a̱ni.
34Á̱kum mman ta̱m ka si̱ hyia̱ ma̱ng mman ta̱m a̱feang na nyia̱, “A̱tsak a̱lyiat wa za̱m! Yesu A̱tyoli nzi̱t wu doot ma̱ng swuan ma̱ á̱niet ba̱ ka̱n kwi a̱ni! A̱ wa ka̱n tyai a̱pyia̱ nggu da̱ a̱vwuo Bitut#24:34 Lyuut cha̱chaat: Siman.!”
Yesu Tyai A̱pyia̱ nggu da̱ a̱vwuo Á̱kum Mman Ta̱m nggu ka
(Mat 28:16-20; Ma̱r 16:14-18; Yon 20:19-23)
35A̱jawa mman ta̱m a̱feang na ba̱ neet Imuwasu a̱ni, si̱ ntak ma̱ng á̱kum mman ta̱m ka si̱sak nang Yesu ntyai a̱pyia̱ nggu kpa̱sai da̱ a̱vwuo mba di̱n vak hu a̱ni; ma̱ng si̱sak nang ba̱ nfi̱k A̱tyoli Yesu di̱n jen nang gu mkpa̱ra̱m mba burodi wu a̱ni. 36A̱wot ma̱nang ba̱ nshya̱ da̱ a̱lyiat tazwa Yesu a̱ni, a̱ si̱ kin chyok a̱ yong ma̱ tsi̱m ma̱ a̱ka̱wa̱tyia̱ mba! A̱ si̱ byiat ba nyia̱, “Swat nyinyang ku shya̱ dundung ma̱ng a̱nyin!” 37A̱wot a̱mgba̱m sot mman ta̱m ji si̱ kin ta̱dyuut! Ba̱ si̱ fa̱k a̱wun, ba̱ si̱ kyiak á ngyei a̱tyu nshyit wa nang ba̱ li!
38Yesu si̱ lyip ba nyia̱, “Yihwa mbyia̱ nang nyi nta̱dyuut a̱nia? Yihwa mbyia̱ nang nyi mbut mi̱ fwuo ba̱t? 39Nyi nwuan mbwak nung na, ma̱ng tazwa kpai a̱ti̱tak nung ji, nyi lii. Nung gwa ma̱ a̱pyia̱ nung za̱m! Nyi byiam nung nyi fa̱a̱k; nyi ka lyen nang n gyet a̱tyu nshyit wa bah. Mat á̱niet shyit byia̱ nvam ma̱ng nkunkup nang nyi ndi n byia̱ a̱ni bah!” 40Nang gu ndyiat ma̱ng a̱mba a̱ tyak a̱ni, a̱ si̱ tak ma̱ng a̱mba mbwak nggu na, ma̱ng tazwa kpai a̱ti̱tak nggu ji.
41Ma̱ng a̱nia, ba̱ si̱ bwuok á̱ yong ma̱ jak! Ku si̱ vwuo mba a̱khwu ba̱ nwuak a̱chuchuk, mat a̱gwai ma̱ng a̱ga̱de nang ba̱ fa̱k da̱ a̱ka̱nyiung a̱ni. A̱jawa Yesu si̱ lyip ba nyia̱, “Nyi byia̱ kyayak a̱ji nang n na gya a̱ni a?”
42Mman ta̱m na si̱ nang Yesu a̱fa̱n nang ba̱ shwai a̱ni. 43A̱wot a̱ si̱ ya a̱fa̱n ka a̱zaghyi mba, nang ba̱ nwuan.
44A̱jawa Yesu si̱ nyia̱, “Jen nang n ku nshya̱ ndung ma̱ng a̱nyin a̱ni, n ku ntak ma̱ng a̱nyin á̱zanson nang kuzang a̱lyiat nang á̱ lyuut tazwa nung mi̱ doka Musa ji ma̱ng a̱yaata̱m a̱kwonu A̱gwaza ba, mbeang Za̱bura a̱ni; ku yet ta hwa na̱ bai da̱ a̱nu ka.”
45A̱jawa Yesu si̱ bu ntat mba á̱ghyi ba, ba̱ ka fi̱k A̱lyiat A̱gwaza nang á̱ ku lyuut a̱ni. 46A̱wot a̱ si̱ nyia̱ ma̱ng a̱mba, “A̱tsak a̱lyiat, á̱ ku lyuut mami A̱lyiat A̱gwaza na gbangbang; nyia̱ Kristi na swuo a̱bung, a̱ khwu, a̱wot a̱tuk mam tat ka, a̱ doot ma̱ng swuan ma̱ á̱niet ba̱ ka̱n kwi a̱ni.
47“A̱wot á̱ na shei A̱sham Nkhang kani, mami tyok a̱lyoot nung, mi̱ kuzang nwap mi̱ bibyin swanta hu. Á̱ na tsa shei A̱sham Nkhang kani neet mi̱ Urusha̱lima, nyia̱: A̱mgba̱m á̱niet ba ba̱ ghwon a̱ka̱tuk nyia̱, ba̱ si̱ khwi A̱gwaza a̱ni, á̱ na chi a̱ka̱tuk nyia̱ mba wu! 48Nyi ka̱n di nkyang nani ma̱ng á̱ghyi nyin ba. Nyin bya na shei ma̱ng á̱ghyang á̱niet naa!
49“A̱wot á̱ na labeang bah, n na nta̱m ma̱ng a̱nyin A̱za̱za̱rak Ntswa wu; ma̱nang A̱tyia̱ nung wu ku nnyia̱ a̱li̱ka̱uli a̱ na ta̱m ma̱ng a̱nyin dyo a̱ni. A̱wot nyi ya ndabeang mi̱ Urusha̱lima. Nyi fwuong jen nang A̱za̱za̱rak Ntswa wu na mbai, a̱ tyia̱ nyin chet gba̱mgbam ku neet Ma A̱gwaza tswazwa a̱ni.”
Yesu Bwuok a̱ Nat Ma A̱gwaza Tswazwa
(Ma̱r 16:19-20)
50A̱jawa Yesu si̱ ghwut mi̱ Urusha̱lima ma̱ng mman ta̱m nggu na. Ba̱ si̱ nyeak á̱ nat fam a̱keang Ba̱ta̱ni#24:50 Wa̱i a̱lyiat Ba̱ta̱ni yet a̱keang ka̱ shya̱ fam a̱tyin di̱ gbi̱ngba̱ra̱ng Tsok Za̱itun kpa̱mkpaan ma̱ng Urusha̱lima a̱ni.. A̱wot a̱ si̱ ta̱ngam mbwak nggu na tswazwa, a̱ si̱ tyia̱ mba a̱li̱ba̱rka. 51Neet nang gu ni̱ shya̱ di̱ tyei mba a̱li̱ba̱rka wu, á̱ si̱ kan nwuo ya̱ngam nggu, á̱ naat ndyo Ma A̱gwaza tswazwa.
52Mat a̱nia, mman ta̱m Yesu na si̱ kyuak gu ntong. A̱wot ba̱ si̱ bwuok á̱ nat Urusha̱lima ma̱ng a̱lyia̱ sai gba̱mgbam! 53Kuzang a̱tuk ba̱ ni̱ nat A̱mali Nwuat Za̱nang A̱gwaza ka, ba̱ dyep A̱gwaza á̱ nchi̱ri̱ng a̱ja.
Цяпер абрана:
Luka 24: TyapNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2015, The Nigeria Bible Translation Trust and Wycliffe Bible Translators, Inc. All rights reserved.