Matthew 18
18
An awen maauch naakaaneyihtaakusit
Mark 9.33-37; Luke 9.46-48
1Naanaacheshiish maak ekw Jesus kaa pechi nituwaapamikut aniyuu uchischinuhamuwaakanh, kaa kakwechimikut e itikut, “Awen maauch e niikaaneyihtaakusit anite kihchikiishikw chisheuchimaawinihch.”
2Ekw Jesus kaa wiishaamaat awaasha, kaa uhchishkuukaapuhaat anit e ihtaatwaau. 3Ekw kaa itwet, “Taapwe chiwiihtamaatinaawaau, chiishpin ekaa kweskaatisiyekwe ekaa iteyihtaakusiyekwe muyaam awaash e iteyihtaakusit, namui wiiskaat chika chii piihchenaawaau kihchikiishikw chisheuchimaawinihch. 4An awen che tipihteyimisukwe kaye mwehch awaash che iteyihtaakusikwe eukw an maauch che niikaaneyihtaakusit anite kihchikiishikw chisheuchimaawinihch. 5Awen e utinaat peyakw awaasha nitishinihkaasuwinihch uhchi, mwehch kaye niya e utinit ekun e ishinaakuniyich.”
Taan e ishi kakwechihiikuyihkw chechii machituutamuhkw
Mark 9.42-48; Luke 17.1, 2
6“An awen che ihtuutawaakwe chechii machituutamiyich peyakw uyuuh awaasha kaa taapweyimiyich uste kata miywaayuu chechii maahkupitaakanuyich e mihchaapischisiyich asiniih ukuyaahch ekw maak chechii nistaapaawet anite e mihchaakamiyich chihchikamiihch. 7Taapwe maayaatan chekwaayuuh e ishi ihtakuhkwaauh utah aschiihch ati chechii uhchi machituutahkwaau awenichii. Muush kata ihtakuniyuu chekwaayuu che kakwechihiikutwaau awenichii chechii machituutahkwaau, mikw maak Chishemanituu kata waweshiheu aniyuu kaa ihtuutawaayich kutak aweyuu chechii machituutamiyich.”
8“Ihtuutaakuyine peyakw chitihchii maak chisit chechii wanituutaman, manishah, che wepinaman. Uste miywaau chechii piihcheyin pimaatisiiwinihch e maaschipayin maak e maaschisiyin ishpish wii chechii ayaayin niishu mitihchii kaye niishu misith che ishiwepinikuyin maak anite ishi an ishkuteu ekaa nihtaa che aastuwech. 9Maak kaye ihtuutaakuyine peyakw chischiishikw chechii machituutaman kuikupit che wepanaman an chischiishikw. Uste miywaashuu chechii piihcheyin pimaatisiiwinihch e napateyaapiyin, ishpish wii taapishkun chischiishikw chechii ayaayin machishkutehch e ishiwepinikuyin.”
Tipaachimuwin chiskutamaachewin kaa wanishihk maanishchaanish kaa aayimuumaakanuut
Luke 15.3-7
10“Yaakwaamiikw maak ekaa chechii aatuweyimekuch uchii awaashach, wesh chiwiihtamaatinaawaau, utenchilamuwaau kihchikiishikuhch kaa ihtaayich muush ayimishtamaakuuch e uhchishkuukaapuushtawayich Nuuhtaawii kihchikiishikuhch kaa ihtaayich. 11Pechi naanituwaapameu Iinuu Ukusisa aniyuuh aweyuuh kaa wanishiniitwaauh chechii pimaachihaat.”
12“Maamituneyihtamukw maa uu, naapeu aahch ayaawaat mitaahtumitanuu maanishchaanisha peyakw maak aniyuu wanishiniyich. Chika nikateu aniyuu peyakushtemitanuu peyakushteu anit e piskutauhkaayich che nituu naanituwaapamaat aniyuu peyakw kaa wanishiniyich maanishchaanisha. 13Iskutak maak meskawaat, chiwiihtamaatinaawaau uste miyeyihtam uyuu peyakw umaanishchaanishimh kaa wanishiniyich e miskuwaat ishpishaat wii e chii ayaawaat aniyuu peyakushtemitanuu peyakushteu maanishchaanisha ekaa uhchi wanishiniyich. 14Ekun maak mwehch kaye Nuuhtaawii kihchikiishikuhch kaa ihtaat e ihtit, namui nituweyimeu waachipeyakw uyuu awaasha chechii wanishiniyich.”
Taan che ihtuutuut chiichishaan e waanihtutaask
15“Wanituutaaske chiichishaan, nituwaapam che wiihtamuut taan e ishi wanituutaask, mikw chiyawaau e niishiyekw che wiihtamuut uyuu. Nituhtaaske maak, ekw kiipaa miin che miyupayekw e wiichishaanihtuyekw. 16Ekaa maak nituhtaaske ekw miin kutak awen maak niishu awenichii che wiishaamatwaau chechii wiicheuskwaau chechii pehtaaskwaau taan e ishi ayimihiimat ekw maak kaye wiyawaau chechii ayimihaatwaau. Wes misiwe taan e itashtech anite masinahiikanihch misiwe chekwaan ekun che ishinaakuhch taan aniyuu kaa itwetwaau anichii niishu maak nishtu kaa wiishaamaakanuutwaau chechii nituhtahkwaau. 17Ekaa maak pishichistahke kaye aniyuu kutak aweyuu ekaa pishichihaate, ekw che wiihtamuumat umaamuuayimihaauh taan kaa ishi machituutaask, ekaa maak pishichihaate kaye aniyuuh umaamuuayimihaauh ekaawii chika uhchi aapateyimaakanuu mwehch awen ekaa kaa chischeyimaat Chishemanituu ekun che ishi kanawaapamaakanuut maak awen ekaa kaa wii kweskaatisiit ekun che ishi kanawaapamaakanuut.”
18“Wesh taapwe chiwiihtamaatinaawaau, an chekwaan che maahkupatamuwane utah aschiihch chika maahkupitaakanuu anite kihchikiishikuhch, kaye an chekwaan che aapihkunamuwane utah aschiihch chika aapihkunakanuu anite kihchikiishikuhch.”
19“Kaye maak chiwiihtamaatinaawaau, niishu awenichii taapishkun e iteyihtamihiikutwaau chekwaayuu taan e ishi ayimihchiketwaau ekun nihaau che ishi ihtuutamaakutwaau Nuuhtaawii kihchikiishikuhch kaa ihtaayich. 20Wesh aat mikw niishu maak nishtu awenichii e maauchihiitutwaau nitishinihkaasuwinihch uhchi, ekut kaye niya e ihtaauch anit e ihtaatwaau.”
Jesus kaa tipaachimaat aapachihaakanh ekaa kaa wii wepeyihtamuwaayich wiichiaapachihaakaniyuuh
21Ekw Peter kaa pechi nituwaapamaat aniyuu Jesus kaa itaat, “Utipeyihchikeu, niichishaan maak wii ekaa puuniite e pechi wanituutuut, taan tahtwaau che wepeyihtamuuk, niishwaashwaau aa.”
22Ekw Jesus kaa itaat, “Namui, namui mikw niishwaashwaau, tahtwaau e wanituutaask chipaa wepeyihtamuwaau taan e ishi wanituutaaskw. 23Wesh maau e ishinaakuhch kihchikiishikw chisheuchimaawin. Muyaam chisheuchimaau e chii nituweyimaat utaapachihaakan kaa masinahamaakut chechii piikushinihiicheyich, 24aniyuu maak kaa wii ihtuutahk misiwe chii wiishaameu aniyuu kaa masinahamaakut utaapachihaakan ekw kaa uhchi peshuwaakanuyich peyakw aniyuu utaapachihaakan uste mitaahtwaau chishemitaahtumitanuu kaa ishpish uhaasuumikut. 25Aniyuu maak utaapachihaakan namui uhchi ishpish ayaayuu shuuliyaayuu chechii chiiwetaapishtwaakut aniyuu kaa uhaasuumikut, ekw kaa itashuwet an chisheuchimaau chechii aataawaanuyich aniyuu utaapachihaakan kaye misiwe taan e ishi tipiiweusiyich kaye utawaashiimiyuu kaye wiichiskeuyuu anite kutak aweyuu chechii utinikut chechii utaapachihaakanitutaakut. ekute chipaa uhchi chiiwetaapishtaayuu aniyuu shuuliyaayuu taan kaa ishi masinahamaakut an chisheuchimaau. 26Ekw aniyuu utaapachihaakan kaa uchihchiihkunipayihuyich anit uhchishkuu an chisheuchimaau e ihtaat, ekw kaa itikut, ‘Uchimaau ekaawii pitamaa pechi chishuwaasiistuu ashuwaapam maa miin weipishchiish ekw misiwe che chiiwetaapishtwaataan taan e ishpish masinahaamataan chekwaan.’ 27Ekw an chisheuchimaau chii chistimaacheyimeu aniyuu utaapachihaakan kaye chii iteu ekaa ekush che chiiwetaapishtwaakut aniyuu taan kaa ishpish uhaasuumikut, ekw kaye kaa pachishtinaat.”
28“Ekw an aapachihaakan kaa chistuhtet, kaa nachishkawaat wiich aapachihaakan e chii uhaasuumikut apishiish shuuliyaayuu. Ekw kaa maakunaat e wii chiputaaminaat kaa itaat, ‘Maachiih pechi chiiwemii an shuuliyaau taan kaa ishpish uhaasuumiyin.’ 29Ekw aniyuu wiich aapachihaakan chii uchihchiihkunipayihuyuu uhchishkuu e ihtaat e itikut, ‘Ekaawii pitamaa pechi chishuwaasiistuu ashuwaapam maa miin weipishchiish chechii chiiwemiitaan an taan kaa ishpish uhaasuumitaan.’ 30Mikw maak namui uhchi nituhtuweu aniyuu wiichaapachihaakan, ekw kaa itishuwaataat chechii maakunaakanuyich paatish chii taapishtwaakute taan aniyuuh kaa ishpish uhaasuumikut. 31Iskutak maak anichii kutakach aapachihaakanich wiyaapahtahkwaau uyuu e ispayihch, naashch chii mukushkaateyihtamihiikuuch ekw kaa nituu wiihtamuwaatwaau aniyuu Chisheuchimaau misiwe taan kaa ispayiyich. 32Ekw an Chisheuchimaau kaa wiishaamaat aniyuu utaapachihaakanh, kaa itaat, ‘Chiya aapachihaakan taapwe chimachituuten, namui mitun chuuhchi chiiwe nituweyihtamaatin wesh chiya chichii pukuseyimin chechii chistimaacheyimitaan. 33Namui aa maak chipaa uhchi chistimaacheyimaau chiya an aapachihaakan mwehch niya taan kaa ishi chistimaacheyimitaan.’ Eukw uyuu kaa itaat an chisheuchimaau aniyuu utaapachihaakanh. 34Naashch maak chii chishuwaasuu an chisheuchimaau ekw kaa itashuwet chechii maakunaakanuyich aniyuu aapachihaakan anite chechii nanehkaachihaakanuyich paatish misiwe chii chiiwe taapishtwaakute taan kaa ishpish uhaasuumikut.”
35Ekw Jesus miin kaa itwet, “Ekun maak mwehch che ihtuutaakuyekw Nuuhtaawii kihchikiishikuhch kaa ihtaat, ekaa wepeyihtamuwekwenich chiichishaanuwaauch chitehiiwaahch uhchi.”
Цяпер абрана:
Matthew 18: crjrNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.