aYohana 2
2
aYeso shishing ashi na aKana niben aGalili
1Katuk afe ataar a nye riye̱ rikan kuwe̱ne̱ng nuwo̱p aKana niben aGalili. Anyining aYeso tuse azong 2A tak aYeso be álimazhiri wu kuwe̱ne̱ng'e gip. 3Ashi anap tá fa gang, yong anyining aYeso fe̱ be wu ye, “Ashi anap ba n gang cei.”
4Iyong aYeso fe̱ be wu ye, “Ango̱, akye̱ sak wan fe̱ be mi e̱? Izen'i n nye baꞌ.”
5Iyong anyining aYeso fe̱ be ásam'me ye, “Nye yin koakye ike̱ng a tana fe̱ ye i ru nye yin.”
6Nafeneng igataar nafe a tá nye be ata tuse bubarak azong, kuri naya áner aYahuda tin nye itomong ni igo̱o̱n ku naka kusu ba nong á ta te zhe̱l. Koakye kafeneng'e ta sok ágalon iso̱k ifa ka itaar ayi.
7Iyong aYeso fe̱ be ásam'me ye, “Shishing yin nafeneng'e be ashi.” Iyong ba shishing nafeneng'e be ashi cip cip.
8Ne a fe̱ be ba ye, “To̱, kyo̱o̱rna bo̱ yin ashi'me nong ta se no̱o̱k yin aner a tin sak riye̱ nuwe̱ne̱ng'e.”
Ne ba nye anong. 9Ne aner a tin sak riye̱ nuwe̱ne̱ng'e fok ashi'me tá kirik a tan te afe anap. A ren karo̱ afe a tú ku ne baꞌ, amma ásam áfe a ta be̱e̱n ashi'me ren. Iyong a yis aner a ta sok abining afas'e nukim. 10A fe̱ be wu ye, “Koangan san ku be̱e̱n ashi anap aya a tá ta ni ime̱se̱ng'e, nong izen iya ne átsen so̱ dide̱ng, ne a be̱e̱n be aya a ta mak a ta baꞌ nama. Amma wan won aya a tá ta dide̱ng ma kyo̱o̱rna!”
11Iyu ne i nye ike̱ng azhing ife ime̱se̱ng aYeso tá nye, a nye nuwo̱p aKana niben aGalili. A tonong kuyiik wu azong, yong álimazhiri wu ti no̱o̱k katsak ni wu.
aYeso ro ánerawe kaye̱e̱r agbang kutu kuya Adakunom iben
(aMat 21.12-13; aMar 11.15-17; aLuk 19.45-46)
12Nama anong, aYeso tseng na aKapanum be anyining ne áronyining be álimazhiri wu. Á sor azong inom cie̱k.
13Izen kunye riye̱ rikan aPasova #2.13: aPasova: fa: Akanang Ike̱re̱ Ikak, kaye̱e̱r nafarap'e nakak. ta fa be̱ barak, yong aYeso be na aUshalima. 14Kaye̱e̱r kubang agbang kutu kuya Adakunom iben'e, a se se̱ ákak á tá se be kure̱e̱s ínyak, be izha ne ábo̱p ne áfe kushishing itso̱m a tan sosok. 15Iyong aYeso nye awhereng kudun nong a tin ro áfe a tá se kaye̱e̱r kubang agbang kutu kuya Adakunom iben'e cei be izha be ínyak'e. A bun a tosom atebur afe kushishing itso̱m be itso̱m'e cei. 16Ne a fe̱ be áfe kure̱e̱s ábo̱p'e ye, “Turung yin ike̱re̱ na aze! Sang tu te yin be kasa Ada mi ta te karo̱ rizhik baꞌ.”
17Álimazhiri wu yiring ye i se ni izibir ye, “Kushim afe mi ta shim kasa wan ti ya riye̱ dide̱ng.”
18Ne áko̱k kasho̱o̱n áner aYahuda be̱ nufu ne á ku rip ye, “Akye̱ kuri itomong azhing ne wan ta kyem i ni tonong yir nong yir ta ren yir ye wan ta kyem i nye anong cei e̱?”
19aYeso tú shim ba'me ye, “Yirik yin kutu kuya Adakunom iben na, mi tà bun i no̱k kaye̱e̱r inom itaar.”
20Iyong áner aYahuda'me bun á fe̱ be wu ye, “A sok aye̱ iso̱k inaas be igataar a ta ra no̱k agbang kutu kuya Adakunom iben na, ne wan ra no̱k kaye̱e̱r inom itaar a?” 21Agbang kutu kuya Adakunom iben aYeso tin fe̱'me nye kuro̱m wu. 22Nama aYeso tá dorok nure̱k, álimazhiri wu yiring be ike̱ng ife wu tin fe̱ natoon'e. Iyong ba ti no̱o̱k katsak rife̱ Adakunom ne rife̱ aYeso tá tsang a fe̱ be ba.
aYeso ren riye̱ koangan
23Nizen aYeso tá rusek na aUshalima, nizen aPasova, ánerawe whe̱re̱ di itomong azhing wu tá nye ne á ni no̱o̱k katsak ni wu. 24Amma aYeso ti no̱o̱k katsak ni ba baꞌ, kamok wu ren aye̱ ánerawe cei. 25Wu shim akak tu ku tak ike̱ng ikak natoon akak baꞌ, kamok wu ren ike̱ng i ta se kaye̱e̱r riye̱ anerawe.
Цяпер абрана:
aYohana 2: izrNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Wycliffe Bible Translators, Inc