Jn 12
12
Əyi mɔʼɔ nyaʼa zɔʼ ə Yeso ə Betanì
(Mt 26.6-13; Mk 14.3-9)
1Ənɨ ɨni nyaʼa buʼ rɨ̀fuə bɔŋ mɨ̀Jû nyaʼa sɨə jɨg Əchwɨ̂ ə Che-ɨgun, Yeso nyaʼa wò ə Betanì, nɨ yeʼ əsɨ ze nɨ Lazarɔ̀s we nɨ wɨ̀ nyaʼa zwemnɨ nyaʼə chub əŋgu. 2Bə̂d mɔʼɔ rɨŋga əsɨ ze nyaʼa tekɨ ɨghɨjɨg ɨ bɔ əŋgu. À yɨə Màta nyaʼə nàʼ ɨghɨjɨg mbe əmbɨ ə bə̂d. Lazarɔ̀s yɨ wɨ mɔʼɔ rəbɔʼ bə̂d mbe nɨ nyaʼa chubɨ ɨ jɨg mbɨ məd. 3Ənɨ mbɨ nyaʼə jɨgə, Mèri nyaʼa nɨŋ əkwirɨ ə chəŋ mɨwud əka ɨnùn nɨ mbɨ nyaʼa tekɨ àmei ənɨ ə naàd, zɔʼ ɨwu Yeso əŋgu, bə̀ fu ənɨ ti nyôŋ rɨ ətu. Ɨfɔ rɨ ənɨ mɨwud mbe nyaʼa ghɨ̀ ni nəb ze jìm sɨə nyùʼrɨə. 4Ənɨ wɨ̀ nyaʼə zɔʼ əne, Judàs Iskàriɔ̀t nɨ nyaʼə wɨ mɔʼɔ rəbɔʼ mə̀mə̀ə̀nɨ̀-ɨnû Yeso, nɨ à yɨə məd nyaʼa wo fen ə Yeso, nyaʼa ghà ni, 5“Əton nɨ chəi mbɨ kəʼ fèn mɨwud mbɔ̂ ənɨ mɨ̀fraŋ chuʼ əkɨ ətad #12.5Ɨŋga Ə̀ŋwàʼnɨ̀ ə Ŋwiə̀ à yɨ ni 'mɨ̀denariùs əkɨ ətad'. Denariùs mɔʼ yɨ ɨkab ə̀fàʼì ənɨ ə fibɨ̀. nàʼ ɨkab we əmbɨ ə bə̂d ɨkwaŋ kɨ ɨmbə̀ʼ ə ye ə?” 6Wɨ̀ nyaʼa ghà ənû zɔ̂ kaʼi ɨmbə̀ʼ ɨghəm nɨ wɨ̀ nyaʼa zɨ ətu nɨ nəŋgɨ bə̂d ɨkwaŋ. Wɨ̀ nyaʼa ghà ɨmbə̀ʼ ɨghəm nɨ məd yɨə nyaʼə ɨjɨ, fɔrɨ ni ɨchî nɨ ə̀bàm ɨkab ə nyaʼa ɨ bɔ, wɨ̀ nyaʼə mɨ̀ə̀ chɨ̀ ɨkab rəbɔʼ we nɨ mbɨ nyaʼa zɨ ɨŋga ə̀bàm ze ghɨ̀ mbi ɨnû əŋgu.
7Ənɨ Yeso nyaʼa zu ənû ze, wɨ̀ nyaʼa ghà ni, “Tɨrə̀ chə e əyi wɔ̂! Wɨ̀ kə̀ʼ nùŋ mɨwud mbɔ̂ ɨmbə̀ʼ mbɨ zɔʼ əmɨ əŋgu əni ze nɨ mbɨ bɨrɨ tweŋ əmɨ. 8Bə̂d ɨkwaŋ mbɨ əkaʼ nən ɨghəm jìm, àyɨə chəi mbə̀ bɨrɨ zə əmɨ əkaʼ nən ɨghəm jìm.”
Bə̂d kyeŋ mbe rɨ ə mbàn Ŋwìə̀ nyaʼa taŋ ni mbə bɨrɨ zwiirɨ ə Lazarɔ̀s
9À nyaʼa ənɨ ə nyùmə̀ we, ɨnɔ̂n mɨ̀Jû we nɨ nyaʼa wo ənɨ əchwɨ̂ ze nyaʼa zu ni Yeso wɨ ə Betanì, əne mbɨ nyaʼa wò əŋgu. Chəi mbɨ nyaʼa wo əŋgu àmei nɨ zə ə Yeso. Mbɨ nyaʼa bə̀ wò ɨmbə̀ʼ zə ə Lazarɔ̀s we nɨ Yeso nyaʼa zwemnɨ. 10Əne bə̂d kyeŋ mbe rɨ ə mbàn Ŋwìə̀ nyaʼa taŋ ni mbə bɨrɨ bɨ zwiirɨ ə Lazarɔ̀s, 11ɨmbə̀ʼ ɨghəm nɨ ənû ze nɨ nyaʼa ghɨ̌ ənɨ ə Lazarɔ̀s ə nyaʼa ghɨ̌ ni mɨ̀Jû nɔnɔʼ saŋ mɨ̀mə̌d ben ə Yeso.
Yeso nyaʼa nyɨ ə Jèrusalèm ɨghabɨ ɨfɔ̀n
(Mt 21.1-11; Mk 11.1-11; Lk 19.28-40)
12À nyaʼa əni ze nɨ beenɨ, ɨnɔ̂n bə̂d nɨ nyaʼa kwàʼ wɨ kyeŋ, nɨ nyaʼa wo ənɨ əchwɨ̂ ze, nyaʼa zu ni Yeso wɨə yeʼe ə Jèrusalèm. 13Əne mbɨ nyaʼa nɨŋ ɨzaŋ ɨghəb jwɨ̀ wo bòm əməd. Mbɨ nyaʼə kyeŋə rɨ̀kǎ ghàə̀ ni,
“Tɨ̀ yiirɨ ə Ŋwiə̀!
Ŋwìə̀ zɨ əbɔrəbɔd ɨgun ə wə̀d we nɨə yeʼe ənɨ ɨkum məd.
Ŋwìə̀ zɨ əbɔrəbɔd ɨgun ɨfɔ̂n mɨ̀Izre!”
14Yeso nyaʼa nɨŋ wan jàkas kɔʼ ɨgun, ɨchî nɨ mbɨ nyaʼa ŋwaʼnɨ ni,
15“Bə̂d mbɨ rɨ ə Jèrusalèm, tɨ mbə̀ bɔ ə!
Mbə̀ zə, ə ɨfɔ̂n wɨə yeʼe,
wɨ̀ kɔʼ wan jàkas.”
16Chəi ɨtu mə̀mə̀ə̀nɨ̀-ɨnû ɨməd nyaʼa kɨrɨ zeŋ ɨmbə̀ʼ ənû zɔ̂ ənɨ ə nyùmə̀ we. Àyɨə ənɨ Ŋwìə̀ nyaʼa zwemnɨ əməd naʼ ɨwumnɨ ɨ bɔ, mə̀mə̀ə̀nɨ̀-ɨnû mbe nyaʼa sɨ kɔndɨ ni mbɨ nyaʼa ŋwàʼnɨ̀ ənû zɔ̂ ɨmbə̀ʼ əməd ɨŋga Ə̀ŋwàʼnɨ̀ ə Ŋwiə̀. Mbɨ nyaʼa bə̀ kɔndɨ ni mbɨ fə ghɨ ənû rəŋgu ənɨ məd.
17Ɨnɔ̂n bə̂d we nɨ nyaʼa mbɨ məd ənɨ wɨ̀ nyaʼa tɔŋ ə Lazarɔ̀s rɨŋga ɨsì zwemnɨ əməd nyaʼa ghà ənû ze nɨ nyaʼa ghɨ̌ əmbɨ ə bə̂d cherə. 18Əton nɨ ɨnɔ̂n bə̂d we nyaʼa wo bòm əməd yɨ ni mbɨ nyaʼa zu ni wɨ̀ nyaʼa ghɨ̀ ənû ə yiirɨ zɔ̂. 19Əne mɨ̀Farisiî nyaʼa ghà mbənə mbənə ni, “Mbə̀ zə, chəi ənɨ tɨ rɨ ghɨ̀ ənû ə mɔʼɔ. Ɨsɨg jìm fə sɨə beenɨ əbɔʼ məd!”
Bə̂d mɔʼɔ nɨ kaʼi mɨ̀Jû nyaʼa kəb zə ə Yeso
20Bə̂d mɔʼɔ nɨ kaʼi mɨ̀Jû nyaʼa əbɔʼ ə bə̂d mbe nɨ nyaʼa wo wumnɨ ə Ŋwiə̀ ənɨ mbɨ nyaʼə jɨg Əchwɨ̂ ə Che-ɨgun ze. 21Mbɨ nyaʼa wò əsɨ Filip, nɨ nyaʼa rɨ ə Bètsaidà ə Galiliî, pè ghà ɨ bɔ ni, “Masà, tɨ̀ kəb zə ə Yeso.” 22Filip nyaʼa wò ghà ənû ze əmbɨ Andrù. Əne mɨ̀mə̌d mbe mɨbe nyaʼa wò ghà əmbɨ Yeso.
23Yeso nyaʼa wììrɨ̀ əmbɨ mɨ̀mə̌d ni, “Nyùmə̀ fə kùʼi nɨ Ŋwìə̀ bɨrɨ ghɨ ni mbɨ wumnɨ Wan Wə̀d. 24Mə ghà rəsìʼ ɨ nən ni fɨtam kywɨ̀ mɨ rɨ nyɨ i ɨŋga si, kwɨ, fɨ bɨrɨ ten tə̀zìʼ wi. Fɨ mɨ kwɨ, fɨ bɨrɨ kɔ rɨtam nɔnɔʼ. 25Wə̀d we nɨ ghaʼ i ɨ̀tènɨ̀ bɨrɨ sam ɨ̀tènɨ̀ we. We nɨ ban i ɨ̀tènɨ̀ ɨŋga ɨsɨg wɔ̂ bɨrɨ wɨrɨ jɨg ɨ̀tènɨ̀ we ɨmbə̀ʼ ten i koŋ. 26Wə̀d mɔʼɔ mɨ kəb fàʼ ɨ num, wɨ̀ berɨ beenɨ əbɔʼ num, ɨmbə̀ʼ əsɨ ze nɨ mə yeʼ əŋgu, mɨ wə̀d ə̀fàʼì bɨrɨ bɨ yeʼ əŋgu. Mɨ Mbǎʼ bɨrɨ wumnɨ wə̀d mɔʼɔ we nɨə faʼ ɨ num.”
Yeso nyaʼa ghà ɨmbə̀ʼ i ɨvɨ
27Yeso nyaʼa ghà ni, “Tɨ̀nîn mɨ fîŋ zɨə tɔb əmɨ. Mə kɨə wo gha ni yè ə? Tɨ̀ mə ghà ni, mɨ Mbǎʼ, tɨrə̀ ben e ni nyùmə̀ wɔ̂ yeʼe ɨgwɨ num ə? Chə̂, mə nyaʼa yeʼe ɨmbə̀ʼ nyùmə̀ wɔ̂. 28Mɨ Mbǎʼ, ghɨ ni bə̂d wumnɨ əwe!”
Ənɨ wɨ̀ nyaʼa ghà əne, gɨ̂ mɔʼɔ nyaʼa ghàm rɨkaŋ ghà ni, “Mə fə ghɨ̀ ni bə̂d wumnɨ əmɨ. Mə bɨrɨ wɨrɨ ghɨ əne ɨghəm cherə.”
29Ɨnɔ̂n bə̂d we nɨ nyaʼa təmbɨ ɨban ɨban nyaʼa zu gɨ̂ ze. Mbɨ mɔʼɔ nyaʼa zu ghà ni mbə̀ŋ fə kùm, àyɨə mbɨ cherə nyaʼa ghà ni, “Aŋgɨrə̀ fə ghàm ɨ bɔ.”
30Yeso nyaʼa ghà əmbɨ mɨ̀mə̌d ni, “Gɨ̂ zɔ̂ ə ghàm yeʼ ɨmbə̀ʼ əwən, kaʼi ɨmbə̀ʼ əmɨ. 31Nyùmə̀ fə kùʼi nɨ Ŋwìə̀ bɨrɨ saʼ ɨsɨg wɔ̂. Wɨ̀ bɨrɨ fid məd we nɨə tùmbɨ̀ ɨsɨg wɔ̂. 32Əne mɔ̌, ənɨ mbɨ fə nɔ əmɨ ɨkaŋ, mə bɨrɨ suŋ bə̂d mɨjìm ənɨ ə num.” 33Wɨ̀ nyaʼa ghà ənû zɔ̂ ɨmbə̀ʼ chwi ɨkwɨ ɨchî nɨ wɨ̀ bɨrɨ kwɨ.
34Ɨnɔ̂n bə̂d we nyaʼa wììrɨ̀ ɨ bɔ ni, “Ə zɨ ɨŋga tɨkə rɨ Mose ni Wə̀d we nɨ Ŋwìə̀ zɔʼɔ bɨrɨ ten i koŋ. À sɨ chè rɨ ye ghà ni mbɨ berɨ nɔ Wan Wə̀d ɨkaŋ ə? Wan Wə̀d wɔ̂ kɨə be əwe ə?” 35Yeso nyaʼa ghà əmbɨ mɨ̀mə̌d ni, “Ɨzeŋɨ zeŋɨ wɨə kɨrɨ əkaʼ nən ənɨ ɨkə nyumə̀. Mbə̀ yen ənɨ ɨsɨ ə kɨrɨ zeŋə, ɨmbə̀ʼ tɨ əfub ə kən i əwən. Chəi wə̀d we nɨə yèn əkaʼ əfub kyerɨ əsɨ ze nɨ wɨə wò əŋgu. 36Ənɨ ɨsɨ ə kɨrɨ zeŋə, mbə̀ nuŋ fîŋ ɨgun ɨzeŋɨ zeŋɨ we, ɨmbə̀ʼ mbə̀ chub ɨŋga ɨzeŋɨ zeŋɨ.”
Ənɨ Yeso nyaʼa fə gha ɨnû mbɔ̂, wɨ̀ nyaʼa nɔ̀ʼ rəkaʼ mɨ̀mə̌d wò nə̀mbɨ̀ i.
Chəi bə̂d mbe nyaʼa ben ə Yeso
37Ka à bè yeʼi ni Yeso wɨə nyaʼə ghɨ̀ ɨnû yiirɨ nɔnɔʼ əkaʼ bə̂d mbe, chəi mbɨ nyaʼa ben əməd, 38ɨmbə̀ʼ ɨŋgam we nɨ wə̀d ɨ̀kə̀n Ŋwìə̀ Aizayà nyaʼa ŋwaʼnɨ wɨ jwɨ ənɨ rəsìʼ ni,
“Ə̀nùŋɨ̀sɨg, à kɨə we nyaʼa ben ɨkə̂n we nɨ tɨ̀ nyaʼə ghàə̀ ə?
À kɨ əmbɨ we nɨ Ŋwìə̀ nyaʼa chwi i ɨka ə?”
39Əne chəi ənɨ tɨ̀ mbɨ nyaʼa benɨ. Aizayà nyaʼa bə̀ yì ghà ni,
40“Ŋwìə̀ fə ghɨ əghə mɨ̀mə̌d ə fɨ̀gə̀,
bə̀ ghɨ̀ fîŋ tɨ mɨ̀mə̌d tu,
ɨmbə̀ʼ tɨ əghə mɨ̀mə̌d zə i ɨsɨ,
tɨ fîŋ tɨ mɨ̀mə̌d bɨ kyerɨ i ɨnû,
njɨ mbɨ bɨrɨ beŋ yeʼe əsɨ num
ɨmbə̀ʼ mə vɨ mɨ̀mə̌d.”
41Aizayà nyaʼa ghà ənû zɔ̂ ɨmbə̀ʼ ɨghəm nɨ wɨ̀ nyaʼa fə zə ɨchî nɨ bə̂d bɨrɨ wumnɨ ə Yeso, əne wɨ̀ nyaʼa ghà ɨmbə̀ʼ əməd.
42Ka à bè yeʼi əne, bə̂d mɨ̀nɔnɔʼ rəbɔʼ mbe nɨ nyaʼə tekɨ ɨnû ɨŋga əbeŋ mɨ̀Jû nyaʼa ben ə Yeso, àyɨə chəi mbɨ nyaʼa gha əsaŋ əsaŋ ɨmbə̀ʼ ɨghəm nɨ ɨ mbɨə nyaʼə bɔə mɨ̀Farisiî. Mɨ̀Farisiî nyaʼa mɨ kyerɨ, njɨ mbɨ bɨrɨ fid mɨ̀mə̌d tɨ̀ ɨŋga nəb ə̀kàtɨ̀. 43Mɨ̀Farisiî nyaʼa ghaʼ ni bə̂d wumnɨ mɨ̀mə̌d chè ɨchî nɨ tɨ̀ Ŋwìə̀ wumnɨ mɨ̀mə̌d.
44Yeso nyaʼa ghàm rɨ̀kǎ ghà ni, “Wə̀d mɔʼɔ we nɨ ben əmɨ, kaʼi wɨ̀ ben àmei əmɨ. Wɨ̀ fə bə̀ ben yeʼ məd we nɨ nyaʼa tom əmɨ. 45Wə̀d mɔʼɔ we nɨ zə əmɨ wɨə bə̀ zə əməd we nɨ nyaʼa tom əmɨ. 46Mə fə yeʼe ɨŋga ɨsɨg ɨghabɨ ɨzeŋɨ zeŋɨ, ɨmbə̀ʼ tɨ wə̀d mɔʼɔ we nɨ ben əmɨ wɨrɨ chub i ɨŋga ɨsɨ firɨ. 47Chəi mə̀ bɨrɨ saʼ wə̀d mɔʼɔ we nɨ zu ɨnû mbɔ̂ nɨ mɨə ghàə̀ àyɨə chəi wɨ̀ ghɨ̌, ɨmbə̀ʼ ɨghəm nɨ chəi mə nyaʼa yeʼe ɨŋga ɨsɨg ɨmbə̀ʼ saʼ bə̂d. Mə nyaʼa yeʼe ɨmbə̀ʼ chɨ bə̂d rəŋgəʼ. 48Wə̀d we nɨ ton əmɨ, nɨ chəi wɨə zu ɨnû mbe nɨ mɨə ghàə̀, berɨ wə̀d nɨ bɨrɨ saʼ əməd. Ɨnû mbe nɨ mə fə ghà bɨrɨ saʼ əməd əni ze nɨ sɨ nwìə̀. 49Chəi mə̀ gha ɨnû mbɔ̂ ənɨ mɨ ɨghəm. Mɨ Mbǎʼ ziə we nɨ nyaʼa tom əmɨ fə nàʼ ɨkə ɨ num ɨmbə̀ʼ ənû ze nɨ mə berɨ nɨ ghà bə̀ ghàm. 50Mə kyerɨ ni ɨkə məd wɨə nàʼ ɨ̀tènɨ̀ rɨ mì. Əne ənû ze nɨ mə̀ gha yɨ ənû ze nɨ mɨ Mbǎʼ fə gha ni mə̀ gha ə.”
Цяпер абрана:
Jn 12: mgo
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2013, Cameroon Association for Bible Translation and Literacy
Jn 12
12
Əyi mɔʼɔ nyaʼa zɔʼ ə Yeso ə Betanì
(Mt 26.6-13; Mk 14.3-9)
1Ənɨ ɨni nyaʼa buʼ rɨ̀fuə bɔŋ mɨ̀Jû nyaʼa sɨə jɨg Əchwɨ̂ ə Che-ɨgun, Yeso nyaʼa wò ə Betanì, nɨ yeʼ əsɨ ze nɨ Lazarɔ̀s we nɨ wɨ̀ nyaʼa zwemnɨ nyaʼə chub əŋgu. 2Bə̂d mɔʼɔ rɨŋga əsɨ ze nyaʼa tekɨ ɨghɨjɨg ɨ bɔ əŋgu. À yɨə Màta nyaʼə nàʼ ɨghɨjɨg mbe əmbɨ ə bə̂d. Lazarɔ̀s yɨ wɨ mɔʼɔ rəbɔʼ bə̂d mbe nɨ nyaʼa chubɨ ɨ jɨg mbɨ məd. 3Ənɨ mbɨ nyaʼə jɨgə, Mèri nyaʼa nɨŋ əkwirɨ ə chəŋ mɨwud əka ɨnùn nɨ mbɨ nyaʼa tekɨ àmei ənɨ ə naàd, zɔʼ ɨwu Yeso əŋgu, bə̀ fu ənɨ ti nyôŋ rɨ ətu. Ɨfɔ rɨ ənɨ mɨwud mbe nyaʼa ghɨ̀ ni nəb ze jìm sɨə nyùʼrɨə. 4Ənɨ wɨ̀ nyaʼə zɔʼ əne, Judàs Iskàriɔ̀t nɨ nyaʼə wɨ mɔʼɔ rəbɔʼ mə̀mə̀ə̀nɨ̀-ɨnû Yeso, nɨ à yɨə məd nyaʼa wo fen ə Yeso, nyaʼa ghà ni, 5“Əton nɨ chəi mbɨ kəʼ fèn mɨwud mbɔ̂ ənɨ mɨ̀fraŋ chuʼ əkɨ ətad #12.5Ɨŋga Ə̀ŋwàʼnɨ̀ ə Ŋwiə̀ à yɨ ni 'mɨ̀denariùs əkɨ ətad'. Denariùs mɔʼ yɨ ɨkab ə̀fàʼì ənɨ ə fibɨ̀. nàʼ ɨkab we əmbɨ ə bə̂d ɨkwaŋ kɨ ɨmbə̀ʼ ə ye ə?” 6Wɨ̀ nyaʼa ghà ənû zɔ̂ kaʼi ɨmbə̀ʼ ɨghəm nɨ wɨ̀ nyaʼa zɨ ətu nɨ nəŋgɨ bə̂d ɨkwaŋ. Wɨ̀ nyaʼa ghà ɨmbə̀ʼ ɨghəm nɨ məd yɨə nyaʼə ɨjɨ, fɔrɨ ni ɨchî nɨ ə̀bàm ɨkab ə nyaʼa ɨ bɔ, wɨ̀ nyaʼə mɨ̀ə̀ chɨ̀ ɨkab rəbɔʼ we nɨ mbɨ nyaʼa zɨ ɨŋga ə̀bàm ze ghɨ̀ mbi ɨnû əŋgu.
7Ənɨ Yeso nyaʼa zu ənû ze, wɨ̀ nyaʼa ghà ni, “Tɨrə̀ chə e əyi wɔ̂! Wɨ̀ kə̀ʼ nùŋ mɨwud mbɔ̂ ɨmbə̀ʼ mbɨ zɔʼ əmɨ əŋgu əni ze nɨ mbɨ bɨrɨ tweŋ əmɨ. 8Bə̂d ɨkwaŋ mbɨ əkaʼ nən ɨghəm jìm, àyɨə chəi mbə̀ bɨrɨ zə əmɨ əkaʼ nən ɨghəm jìm.”
Bə̂d kyeŋ mbe rɨ ə mbàn Ŋwìə̀ nyaʼa taŋ ni mbə bɨrɨ zwiirɨ ə Lazarɔ̀s
9À nyaʼa ənɨ ə nyùmə̀ we, ɨnɔ̂n mɨ̀Jû we nɨ nyaʼa wo ənɨ əchwɨ̂ ze nyaʼa zu ni Yeso wɨ ə Betanì, əne mbɨ nyaʼa wò əŋgu. Chəi mbɨ nyaʼa wo əŋgu àmei nɨ zə ə Yeso. Mbɨ nyaʼa bə̀ wò ɨmbə̀ʼ zə ə Lazarɔ̀s we nɨ Yeso nyaʼa zwemnɨ. 10Əne bə̂d kyeŋ mbe rɨ ə mbàn Ŋwìə̀ nyaʼa taŋ ni mbə bɨrɨ bɨ zwiirɨ ə Lazarɔ̀s, 11ɨmbə̀ʼ ɨghəm nɨ ənû ze nɨ nyaʼa ghɨ̌ ənɨ ə Lazarɔ̀s ə nyaʼa ghɨ̌ ni mɨ̀Jû nɔnɔʼ saŋ mɨ̀mə̌d ben ə Yeso.
Yeso nyaʼa nyɨ ə Jèrusalèm ɨghabɨ ɨfɔ̀n
(Mt 21.1-11; Mk 11.1-11; Lk 19.28-40)
12À nyaʼa əni ze nɨ beenɨ, ɨnɔ̂n bə̂d nɨ nyaʼa kwàʼ wɨ kyeŋ, nɨ nyaʼa wo ənɨ əchwɨ̂ ze, nyaʼa zu ni Yeso wɨə yeʼe ə Jèrusalèm. 13Əne mbɨ nyaʼa nɨŋ ɨzaŋ ɨghəb jwɨ̀ wo bòm əməd. Mbɨ nyaʼə kyeŋə rɨ̀kǎ ghàə̀ ni,
“Tɨ̀ yiirɨ ə Ŋwiə̀!
Ŋwìə̀ zɨ əbɔrəbɔd ɨgun ə wə̀d we nɨə yeʼe ənɨ ɨkum məd.
Ŋwìə̀ zɨ əbɔrəbɔd ɨgun ɨfɔ̂n mɨ̀Izre!”
14Yeso nyaʼa nɨŋ wan jàkas kɔʼ ɨgun, ɨchî nɨ mbɨ nyaʼa ŋwaʼnɨ ni,
15“Bə̂d mbɨ rɨ ə Jèrusalèm, tɨ mbə̀ bɔ ə!
Mbə̀ zə, ə ɨfɔ̂n wɨə yeʼe,
wɨ̀ kɔʼ wan jàkas.”
16Chəi ɨtu mə̀mə̀ə̀nɨ̀-ɨnû ɨməd nyaʼa kɨrɨ zeŋ ɨmbə̀ʼ ənû zɔ̂ ənɨ ə nyùmə̀ we. Àyɨə ənɨ Ŋwìə̀ nyaʼa zwemnɨ əməd naʼ ɨwumnɨ ɨ bɔ, mə̀mə̀ə̀nɨ̀-ɨnû mbe nyaʼa sɨ kɔndɨ ni mbɨ nyaʼa ŋwàʼnɨ̀ ənû zɔ̂ ɨmbə̀ʼ əməd ɨŋga Ə̀ŋwàʼnɨ̀ ə Ŋwiə̀. Mbɨ nyaʼa bə̀ kɔndɨ ni mbɨ fə ghɨ ənû rəŋgu ənɨ məd.
17Ɨnɔ̂n bə̂d we nɨ nyaʼa mbɨ məd ənɨ wɨ̀ nyaʼa tɔŋ ə Lazarɔ̀s rɨŋga ɨsì zwemnɨ əməd nyaʼa ghà ənû ze nɨ nyaʼa ghɨ̌ əmbɨ ə bə̂d cherə. 18Əton nɨ ɨnɔ̂n bə̂d we nyaʼa wo bòm əməd yɨ ni mbɨ nyaʼa zu ni wɨ̀ nyaʼa ghɨ̀ ənû ə yiirɨ zɔ̂. 19Əne mɨ̀Farisiî nyaʼa ghà mbənə mbənə ni, “Mbə̀ zə, chəi ənɨ tɨ rɨ ghɨ̀ ənû ə mɔʼɔ. Ɨsɨg jìm fə sɨə beenɨ əbɔʼ məd!”
Bə̂d mɔʼɔ nɨ kaʼi mɨ̀Jû nyaʼa kəb zə ə Yeso
20Bə̂d mɔʼɔ nɨ kaʼi mɨ̀Jû nyaʼa əbɔʼ ə bə̂d mbe nɨ nyaʼa wo wumnɨ ə Ŋwiə̀ ənɨ mbɨ nyaʼə jɨg Əchwɨ̂ ə Che-ɨgun ze. 21Mbɨ nyaʼa wò əsɨ Filip, nɨ nyaʼa rɨ ə Bètsaidà ə Galiliî, pè ghà ɨ bɔ ni, “Masà, tɨ̀ kəb zə ə Yeso.” 22Filip nyaʼa wò ghà ənû ze əmbɨ Andrù. Əne mɨ̀mə̌d mbe mɨbe nyaʼa wò ghà əmbɨ Yeso.
23Yeso nyaʼa wììrɨ̀ əmbɨ mɨ̀mə̌d ni, “Nyùmə̀ fə kùʼi nɨ Ŋwìə̀ bɨrɨ ghɨ ni mbɨ wumnɨ Wan Wə̀d. 24Mə ghà rəsìʼ ɨ nən ni fɨtam kywɨ̀ mɨ rɨ nyɨ i ɨŋga si, kwɨ, fɨ bɨrɨ ten tə̀zìʼ wi. Fɨ mɨ kwɨ, fɨ bɨrɨ kɔ rɨtam nɔnɔʼ. 25Wə̀d we nɨ ghaʼ i ɨ̀tènɨ̀ bɨrɨ sam ɨ̀tènɨ̀ we. We nɨ ban i ɨ̀tènɨ̀ ɨŋga ɨsɨg wɔ̂ bɨrɨ wɨrɨ jɨg ɨ̀tènɨ̀ we ɨmbə̀ʼ ten i koŋ. 26Wə̀d mɔʼɔ mɨ kəb fàʼ ɨ num, wɨ̀ berɨ beenɨ əbɔʼ num, ɨmbə̀ʼ əsɨ ze nɨ mə yeʼ əŋgu, mɨ wə̀d ə̀fàʼì bɨrɨ bɨ yeʼ əŋgu. Mɨ Mbǎʼ bɨrɨ wumnɨ wə̀d mɔʼɔ we nɨə faʼ ɨ num.”
Yeso nyaʼa ghà ɨmbə̀ʼ i ɨvɨ
27Yeso nyaʼa ghà ni, “Tɨ̀nîn mɨ fîŋ zɨə tɔb əmɨ. Mə kɨə wo gha ni yè ə? Tɨ̀ mə ghà ni, mɨ Mbǎʼ, tɨrə̀ ben e ni nyùmə̀ wɔ̂ yeʼe ɨgwɨ num ə? Chə̂, mə nyaʼa yeʼe ɨmbə̀ʼ nyùmə̀ wɔ̂. 28Mɨ Mbǎʼ, ghɨ ni bə̂d wumnɨ əwe!”
Ənɨ wɨ̀ nyaʼa ghà əne, gɨ̂ mɔʼɔ nyaʼa ghàm rɨkaŋ ghà ni, “Mə fə ghɨ̀ ni bə̂d wumnɨ əmɨ. Mə bɨrɨ wɨrɨ ghɨ əne ɨghəm cherə.”
29Ɨnɔ̂n bə̂d we nɨ nyaʼa təmbɨ ɨban ɨban nyaʼa zu gɨ̂ ze. Mbɨ mɔʼɔ nyaʼa zu ghà ni mbə̀ŋ fə kùm, àyɨə mbɨ cherə nyaʼa ghà ni, “Aŋgɨrə̀ fə ghàm ɨ bɔ.”
30Yeso nyaʼa ghà əmbɨ mɨ̀mə̌d ni, “Gɨ̂ zɔ̂ ə ghàm yeʼ ɨmbə̀ʼ əwən, kaʼi ɨmbə̀ʼ əmɨ. 31Nyùmə̀ fə kùʼi nɨ Ŋwìə̀ bɨrɨ saʼ ɨsɨg wɔ̂. Wɨ̀ bɨrɨ fid məd we nɨə tùmbɨ̀ ɨsɨg wɔ̂. 32Əne mɔ̌, ənɨ mbɨ fə nɔ əmɨ ɨkaŋ, mə bɨrɨ suŋ bə̂d mɨjìm ənɨ ə num.” 33Wɨ̀ nyaʼa ghà ənû zɔ̂ ɨmbə̀ʼ chwi ɨkwɨ ɨchî nɨ wɨ̀ bɨrɨ kwɨ.
34Ɨnɔ̂n bə̂d we nyaʼa wììrɨ̀ ɨ bɔ ni, “Ə zɨ ɨŋga tɨkə rɨ Mose ni Wə̀d we nɨ Ŋwìə̀ zɔʼɔ bɨrɨ ten i koŋ. À sɨ chè rɨ ye ghà ni mbɨ berɨ nɔ Wan Wə̀d ɨkaŋ ə? Wan Wə̀d wɔ̂ kɨə be əwe ə?” 35Yeso nyaʼa ghà əmbɨ mɨ̀mə̌d ni, “Ɨzeŋɨ zeŋɨ wɨə kɨrɨ əkaʼ nən ənɨ ɨkə nyumə̀. Mbə̀ yen ənɨ ɨsɨ ə kɨrɨ zeŋə, ɨmbə̀ʼ tɨ əfub ə kən i əwən. Chəi wə̀d we nɨə yèn əkaʼ əfub kyerɨ əsɨ ze nɨ wɨə wò əŋgu. 36Ənɨ ɨsɨ ə kɨrɨ zeŋə, mbə̀ nuŋ fîŋ ɨgun ɨzeŋɨ zeŋɨ we, ɨmbə̀ʼ mbə̀ chub ɨŋga ɨzeŋɨ zeŋɨ.”
Ənɨ Yeso nyaʼa fə gha ɨnû mbɔ̂, wɨ̀ nyaʼa nɔ̀ʼ rəkaʼ mɨ̀mə̌d wò nə̀mbɨ̀ i.
Chəi bə̂d mbe nyaʼa ben ə Yeso
37Ka à bè yeʼi ni Yeso wɨə nyaʼə ghɨ̀ ɨnû yiirɨ nɔnɔʼ əkaʼ bə̂d mbe, chəi mbɨ nyaʼa ben əməd, 38ɨmbə̀ʼ ɨŋgam we nɨ wə̀d ɨ̀kə̀n Ŋwìə̀ Aizayà nyaʼa ŋwaʼnɨ wɨ jwɨ ənɨ rəsìʼ ni,
“Ə̀nùŋɨ̀sɨg, à kɨə we nyaʼa ben ɨkə̂n we nɨ tɨ̀ nyaʼə ghàə̀ ə?
À kɨ əmbɨ we nɨ Ŋwìə̀ nyaʼa chwi i ɨka ə?”
39Əne chəi ənɨ tɨ̀ mbɨ nyaʼa benɨ. Aizayà nyaʼa bə̀ yì ghà ni,
40“Ŋwìə̀ fə ghɨ əghə mɨ̀mə̌d ə fɨ̀gə̀,
bə̀ ghɨ̀ fîŋ tɨ mɨ̀mə̌d tu,
ɨmbə̀ʼ tɨ əghə mɨ̀mə̌d zə i ɨsɨ,
tɨ fîŋ tɨ mɨ̀mə̌d bɨ kyerɨ i ɨnû,
njɨ mbɨ bɨrɨ beŋ yeʼe əsɨ num
ɨmbə̀ʼ mə vɨ mɨ̀mə̌d.”
41Aizayà nyaʼa ghà ənû zɔ̂ ɨmbə̀ʼ ɨghəm nɨ wɨ̀ nyaʼa fə zə ɨchî nɨ bə̂d bɨrɨ wumnɨ ə Yeso, əne wɨ̀ nyaʼa ghà ɨmbə̀ʼ əməd.
42Ka à bè yeʼi əne, bə̂d mɨ̀nɔnɔʼ rəbɔʼ mbe nɨ nyaʼə tekɨ ɨnû ɨŋga əbeŋ mɨ̀Jû nyaʼa ben ə Yeso, àyɨə chəi mbɨ nyaʼa gha əsaŋ əsaŋ ɨmbə̀ʼ ɨghəm nɨ ɨ mbɨə nyaʼə bɔə mɨ̀Farisiî. Mɨ̀Farisiî nyaʼa mɨ kyerɨ, njɨ mbɨ bɨrɨ fid mɨ̀mə̌d tɨ̀ ɨŋga nəb ə̀kàtɨ̀. 43Mɨ̀Farisiî nyaʼa ghaʼ ni bə̂d wumnɨ mɨ̀mə̌d chè ɨchî nɨ tɨ̀ Ŋwìə̀ wumnɨ mɨ̀mə̌d.
44Yeso nyaʼa ghàm rɨ̀kǎ ghà ni, “Wə̀d mɔʼɔ we nɨ ben əmɨ, kaʼi wɨ̀ ben àmei əmɨ. Wɨ̀ fə bə̀ ben yeʼ məd we nɨ nyaʼa tom əmɨ. 45Wə̀d mɔʼɔ we nɨ zə əmɨ wɨə bə̀ zə əməd we nɨ nyaʼa tom əmɨ. 46Mə fə yeʼe ɨŋga ɨsɨg ɨghabɨ ɨzeŋɨ zeŋɨ, ɨmbə̀ʼ tɨ wə̀d mɔʼɔ we nɨ ben əmɨ wɨrɨ chub i ɨŋga ɨsɨ firɨ. 47Chəi mə̀ bɨrɨ saʼ wə̀d mɔʼɔ we nɨ zu ɨnû mbɔ̂ nɨ mɨə ghàə̀ àyɨə chəi wɨ̀ ghɨ̌, ɨmbə̀ʼ ɨghəm nɨ chəi mə nyaʼa yeʼe ɨŋga ɨsɨg ɨmbə̀ʼ saʼ bə̂d. Mə nyaʼa yeʼe ɨmbə̀ʼ chɨ bə̂d rəŋgəʼ. 48Wə̀d we nɨ ton əmɨ, nɨ chəi wɨə zu ɨnû mbe nɨ mɨə ghàə̀, berɨ wə̀d nɨ bɨrɨ saʼ əməd. Ɨnû mbe nɨ mə fə ghà bɨrɨ saʼ əməd əni ze nɨ sɨ nwìə̀. 49Chəi mə̀ gha ɨnû mbɔ̂ ənɨ mɨ ɨghəm. Mɨ Mbǎʼ ziə we nɨ nyaʼa tom əmɨ fə nàʼ ɨkə ɨ num ɨmbə̀ʼ ənû ze nɨ mə berɨ nɨ ghà bə̀ ghàm. 50Mə kyerɨ ni ɨkə məd wɨə nàʼ ɨ̀tènɨ̀ rɨ mì. Əne ənû ze nɨ mə̀ gha yɨ ənû ze nɨ mɨ Mbǎʼ fə gha ni mə̀ gha ə.”
Цяпер абрана:
:
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2013, Cameroon Association for Bible Translation and Literacy