Luka 16
16
Ala Lɛlɔ Ɔnune Ɔdi Útataabla Ala Ulu Lɛlɔ
1Yesu ɔ́su nwuna batɛyane ɔnini, “Dii ni, ɔlakɛne ɔdi ɔ́kya ɔni mbo kabla ɔblane ɔni mɔɔnu-nwu ala lɛlɔ. Amu na bábasu ɔlakɛne ɔmmɔ ka nwuna ala lɛlɔ ɔnune ɔmɛni uubile-nwu egulabi. 2Ɔmɛni ɔsu ɔlakɛne ɔmmɔ ɔ́lɔ nwuna ala lɛlɔ ɔnune ɔmɛni na ɔ́su-nwu ɔnini, ‘Bi ndi lɛla lɛni udu na línu lɛ́siku-ɔ lɛlɔ mɛni? Bu akunta na kalɛ na éti aanu mina ala lɛlɔ ƒui boku-mi, ɔsika asɔ alakana mina ala lɛlɔ bɔsɔ bɔnu lɛnɔ.’
3“Mmɔ na kabla ɔblane ɔmmɔ ɔ́su lɛlɔ ɔnii, ‘Mina Unwoti ɔdubo-mi bɔgya na mina kabla kemmo. Bi na ndubo bɔbla? Liiibo ɔyikun na makana kalɔ bubeyi. Na ala buvele lɛnɔ buukpó-mi kɔƒa. 4Ɛhɛɛn! Lɛ́ɛti lɛla lɛni mabla! Na si mina kabla kálɛ-mi enu kemmo muedi ni, na mina bakpana baƒɔ-mi na banu-mi lɛlɔ na bana kɔduli.’
5“Ɔmɛni ɔsu ɔ́lɔ bekyuli bani nda nwuna Unwoti kayu unwi unwi. Úye udeedi ɔnini, ‘Ɛlɛ kayu na ada mina Unwoti?’
6“Ɔyune ɔmmɔ údie kenye ɔnini, ‘Inɔ kutubui bonwu eti anyɔ.’
“Amu na ala lɛlɔ ɔnune ɔmmɔ ɔ́su-nwu ɔnini, ‘Aanu ƒula kayu ɔku mɛni. Sɔ lie kalɔ na enweni liti kani ese.’
7“Lɛni kani na úye ɔyune ɔbambadi ɔnii, ‘Awɔ nɔɔ? Ɛlɛ kayu na ada?’
“Ɔyune ɔmmɔ lɛnɔ ɔnini, ‘Ɔbla aani antabi aƒo apim unwi.’
“Mmɔ na ala lɛlɔ ɔnune ɔmɛni ɔ́su-nwu ɔnini, ‘Aanu ƒula kayu ɔku mɛni. Nweni eti leevu-maane se.’
8“Ɔmɛni ɔsu ni, Unwoti ɔmmɔ úmwi kabla ɔblane ɔmmɔ na lɛkwɛ lɛni na ɔ́bla mmɔ ɔsu. Sɔsɔ ni, bekyuli bani nli nte kayawi kamɛni lɛlɔ ala ni, baasia anu taabla bana lɛlɔ ala teetulo ama bani mɔɔsia Katɔti lɛga kadikɔ anu.” 9Mmɔ na Yesu úsie anumi na ɔ́su-ma ɔnini, “Biti bina kayawi lɛlakɛ bibunku bekyuli. Na si lɛkɛ lɛmmɔ lɛ́sa ni, na Katɔti waƒɔ-mii wakya nwuna ɔma kemmo.
10“Ukyuli ɔni mɔɔda ala ani nse blii suɛ na ulu lɛlɔ ni, ɔdubɔda ala enengudi lɛnɔ na ulu lɛlɔ. Na ukyuli ɔni naaasia ulu lɛlɔ ku ala ani nse blii suɛ ni, ulasia ulu lɛlɔ ku ala enengudi lɛnɔ. 11Ɔmmɔ ɔsu si bítada kayawi kamɛni kemmo lɛlakɛ na ulu lɛlɔ ni, dɛ na wabla asa na ukyuli waƒɔ-mii wadi ka bɛdubɔda kɔyu kemmo lɛlakɛ lɛni ndi Katɔti etela na ulu lɛlɔ? 12Na si átanu ukyuli bamba ala ani nse-ɔ kudɔ lɛlɔ na ulu lɛlɔ ni, dɛ wabla asa na banyonu awɔ ɔlati adi bete-ɔ?
13“Kabla ɔblane ɔdi ulakana benwoti inyɔ kabla bɔbla. Si ɔɔɔdi lɛni ni, ɔdubɔyɔ unwi na ukisi ɔkladi. Lɛnɔ ni, ɔdubunu unwi litemi na weni ɔkladi lɛdi. Bilakana Katɔti bɔsiaku na bɛsɔ bɛsiaku lɛlakɛ lɛnɔ.”
Yesu Ɔ́tina Ala Bamba Lɛnɔ
14Uwi ɔni na Ƒarisiƒuɔ bénu ala ani na Yesu ɔ́su ni, báma-nwu ɔsika baayɔ́ egulabi geen. 15Amu na Yesu ɔ́su-ma ɔnini, “Amii ndi bekyuli bani mɔɔtina lɛlɔ aani bekyuli babuni na bakladi anumi. Nsu Katɔti ɔgyi bina ƒui kayi kemmo. Ɔsika ala ani náƒɔ kuye na bekyuli anumi ni, aaadi lɛla lɛdi na Katɔti anumi.
16“Mose ɔda bubo ɔku ku Katɔti kenye bediene ala ani na bénweni bése ni, ábla kabla ábawɔ Ntu Ɔkpilane Yohane lebo. Na ɔ́si uwi ɔmmɔ lɛlɔ ni, biinú ka baasu litemi buni lɛni nkɛnku Katɔti lɛga kadikɔ lɛlɔ. Na ukyuli biala ɔɔnwanɛ lɛlɔ ka ɔkɛ nwuna ulu uduo Katɔti lɛga kadikɔ kammɔ kemmo. 17Nsu ni, use kpɛtɛ kpɛtɛ ka katɔ ku kayawi kakana na kavi utulo ɔni na bada ɔda bubo bɔmɛni litemi blii suɛ lɛdi muedi bedie.
18“Ɔnana biala ɔni manyonu ulekudi na weti ɔbambadi ni, ɔ́di kɔsɔnɔ. Na ɔnana ɔni meti uleku ɔni na bányonu mmɔ ni, anwu lɛnɔ ɔ́di kɔsɔnɔ.
Yesu Ɔ́su Ɔlakɛne Ɔdi Ku Lasaro Lɛlɔ Kɔtɛ
19“Dii ni, ɔnana ɔlakɛne ɔdi ɔkya ɔni mɔɔda adala ani náƒɔ kuye, na ebiti kemmo sɔɔn na ɔ́kya nwuna ngba emeyi kemmo ƒui. 20Na ɔwabane ɔdi na baalɔ banii Lasaro lɛnɔ ɔ́kya. Alɛbi áƒɔ ɔwabane ɔmɛni lɛlɔ ƒui ɔni na béteeti-nwu taabava ɔlakɛne ɔmmɔ ɔtɔ kayakun. 21Ubo lɛnunsia ka si ɔlakɛne ɔmmɔ ɔɔdi ni, kɔkɛ wɛlɛ wɛlɛ kɔni muuwi kalɔ kɔdubudu-nwu na ɔ́la ɔdi. Bakpɛwe muedi beebo taabayalɛ-nwu alɛbi ammɔ.
22“Ɔwabane ɔmmɔ úbekpi na Katɔti batu bébetiku-nwu bétésie Abraham kudɔ, na baadi limeyi na katɔ. Ɔlakɛne ɔmmɔ lɛnɔ úbekpi na báva-nwu. 23Na kekpine mmɔ ni, ɔ́nu ka ɔkya abi kebokɔ. Mmɔ ka ɔ́talaku anumi katɔ ni, ɔ́nu Abraham na katɔ kakaaka ka Lasaro ulie-nwu kudɔ. 24Amu na ɔ́kpali ɔnii, ‘Ati Abraham! Nu-mi kɔnyana na aya na Lasaro uti lɛnimi ɔkya ntu bɔdi kemmo na udu ubo-mi unyemi lɛlɔ na lɛlɔ lɛbla-mi buɛɛ. Ɔsika lɛlɔ lɛɛkywí-mi na ogya ɔmɛni kemmo!’
25“Nsu Abraham ɔ́su-nwu ɔnini, ‘Ubi, nyimo ka na ƒula ngba bɔni na élie kemmo ni, ala abuni sɔɔn na áƒɔ. Na Lasaro anwu ni, ala ekpidi sɔɔn na ɔ́ƒɔ. Nsu ɔƒɛni ni, ɔɔkɛ́ ebiti na awɔ eebó abi. 26Na ɔni mbunku ɔmmɔ ni, ubu bonwu ɔdi ɔkya abu ku-ɔ ntɛ. Na si ukyuli ɔdi ɔɔwia ka ɔvia ubo mmɔ ni, ulakana. Na lɛni kani na ɔdi lɛnɔ ulakana bɔvia bɔsi mmɔ bubo bula kudɔ mɛni.’
27“Mmɔ ni, ɔlakɛne ɔmmɔ ɔ́su-nwu ɔnini, ‘Ati Abraham, buvele nda-a nnii tala Lasaro na usie mina ɔti kesii. 28Mmɔ ni, mbo banwani bananabi ɛlɔ. Ya na utébo-ma ɔda kaduɛ kalɛ na ama belebo likpo lɛni na lɛbibo lɛkya mɛni.’
29“Amu na Abraham ɔ́su-nwu ɔnini, ‘Ƒula banwani bebo ala ani na Mose ku Katɔti kenye bediene bénweni bése. Na ɔdi ka benu na badi-nya lɛlɔ.’
30“Mmɔ na ɔlakɛne ɔmmɔ údie kenye ɔnini, ‘Ati Abraham, belénu-ma litemi! Nsu si banii ukyuli ɔdi ɔ́si kekpine mɛni úsie-ma kudɔ ni, badubunu-nwu litemi na benwini kama bakya bana ekpidi.’
31“Nsu Abraham ɔ́su-nwu ɔnini, ‘Si bétenu Mose ku Katɔti kenye bediene litemi ni, si ina ukyuli ɔdi ɔ́ta ɔ́si kekpine mɛni úsie-ma kudɔ muedi ni, baláƒɔ-nwu litemi!’ ”
Цяпер абрана:
Luka 16: lef
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.