Marko 10
10
Yesu Ɔ́tina Ala Na Ɔgya Ku Ule Lɛlɔ Bɔnyonu Lɛlɔ
1Amu na Yesu ɔ́tɔlɔ mmɔ úsie Yudea kalɔ lɛlɔ, na útávia Yordan Ketu. Bekyuli pii básɔ bébo bábaka bámana-nwu mmɔ lɛnɔ, na ɔkya ɔɔtina-ma litemi buni aani kalɛ na ɔɔyɔ́ bɔbla kalɛ.
2Ƒarisiƒuɔ badi bébo-nwu kudɔ na nka báyɔ ka bakywɛ-nwu kakpagyuɛ. Béye Yesu banini, “Katɔti ɔda bubo uute kuƒi ka ɔnana ɔnyonu ulekudi?”
3Amu na Yesu lɛnɔ údie kenye na úye-ma ɔnini, “Bi ɔda bubo na Mose úte-mii?”
4Bédie kenye banini, “Mose úte kuƒi ka ɔnana ɔni nsɔ naaayɔ ulekudi unweni ɔku na uti ute bɔti asa na ɔnyonu-nwu.”
5Yesu ɔ́su-ma ɔnini, “Mose únweni ɔmɛni úte-mii lɛni ɔsika biidé ala bɔtina. 6Na kalɔ kesekɔ na kayawi budie kemmo ni, Katɔti údie ɔnana ku uleku. 7Bunweni Kedee Ɔku ɔɔsu ɔnini, ‘Na ɔmɛni ɔsu ni, ɔnana ɔdubɔmami ɔti ku uni lɛlɔ, na anwu ku ulekudi belie basala. 8Na bana inyɔ badubɔbla ɔlɔna unwi.’ Na Katɔti anumi ni, ukyuli unwi na ɔɔnu. Na ɔɔɔdi inyɔ! 9Anwuɔsu bekyuli bani na Katɔti úti ɔ́sala ni, ukyuli ɔyawine biala utegyingya-ma ntɛ!”
10Kama, uwi ɔni na bésie kaduli ni, nwuna batɛyane béye-nwu etemila básiku lɛla lɛni na ɔ́su na ɔda bubo bɔmmɔ lɛlɔ. 11Yesu údie kalɔ ɔnini, “Ɔnana ɔni nányonu ulekudi na ɔ́sɔ úti ɔbambadi ni, ɔ́di kɔsɔnɔ ɔ́ƒiɔ ulekudi ɔkukudi ɔmmɔ. 12Lɛni kani si uleku ɔ́nyonu ɔgyani na ɔ́sɔ útélie kɔgya kɔbambadi lɛnɔ ni, anwu lɛnɔ ɔ́di kɔsɔnɔ ɔ́ƒiɔ ɔgyani ɔkukudi ɔmmɔ.”
Yesu Úti Kusɛ Kusɛ Úte Banamu
13Uwi ɔmmɔ kani ni, bekyuli badi béti bana bebi béboku Yesu banii uti nwuna enu ɔsia-ma lɛlɔ. Nsu nwuna batɛyane bádɔnku-ma. 14Ka Yesu ɔ́nu lɛni ni, úbeti kɔnyi na ɔ́su nwuna batɛyane ɔnini, “Bɛya na banamu bebo-mi kudɔ, na bitetile-ma kuƒi. Ɔsika Katɔti lɛga kadikɔ kese kete bekyuli bani néboku lɛlɔ kalɔ aani banamu wɛlɛ wɛlɛ bamɛni udu kalɛ. 15Mɔɔsu-mii geen ka ukyuli ɔni naaadubo Katɔti lɛga bɔdi bɔƒɔ aani kalɛ na ɔnamu blii suɛ uuboku lɛlɔ kalɔ ni, uleduo Katɔti lɛga kadikɔ kudii.” 16Amu na ɔ́sala banamu bani nnye mmɔ lisu na úti nwuna enu ɔ́sia-ma lɛlɔ na ɔ́su-ma ɔnii, “Kusɛ kusɛ.”
Ɔlakɛne Úye Yesu Ulu Ɔni Lɛlɔ Baasia Taakɛ Ngba Ƒui
17Ka Yesu ɔ́ta ɔnii ɔɔtɔlɔ uteesie ulu ni, ɔnana ɔdi ɔkɛ usi úbo-nwu kudɔ úbalɛ akɔnkɔ na nwuna anumi, na úye-nwu ɔnini, “Ala ɔtinane buni, bi na ɔlɛka lɛbla asa makɛ ngba bɔni naaadubo bɔsa kudii?”
18Yesu úye-nwu ɔnini, “Agyi lɛla lɛni ɔsu na aalɔ-mi ɔbuni? Ukyuli ɔdi biala ɔɔɔdia ntu Katɔti lɛti pɛ. 19Agyi Katɔti ɔda bubo bɔmmɔ ƒui. Tadu ukyuli, tadi kɔsɔnɔ, teyu, tada ukyuli ɔdi kenye, tatɔlɔ ukyuli na aƒɔ-nwu ala, bu ƒ'ɔti ku ƒ'ini.”
20Ɔnana ɔmɛni ɔ́sɔ ɔ́su-nwu ɔnini, “Ala ɔtinane, ka ɔ́si uwi ɔni na nse ɔnamu úbedu ɔmwi ni, mɔɔdi ɔda bubo bɔmɛni ƒui lɛlɔ.”
21Yesu ɔ́nu-nwu ku bɔyɔ na ɔ́su-nwu ɔnini, “Lɛlakpa linwi kani nébu-ɔ bɔbla. Teesie na etéti ala ani na ebo ƒui eye na eti egulabi ammɔ ete bawabane, na adubunwini ɔlakɛne na katɔ. Ɔmɛni kama ni, na ebo abasiaku-mi kama ƒui!”
22Ka ɔnana ɔmɛni únu litemi lɛmɛni ni, enu áƒɛ-nwu na ɔ́tɔlɔ ku kɔnyana, ɔsika ubo ala pii.
23Yesu únwini ɔ́nu nwuna batɛyane ɔ́mana na ɔ́su-ma ɔnini, “Ubo ɔkplu geen asa na balakɛne badubɔkana na beduo Katɔti lɛga bɔdi kemmo.”
24Litemi lɛmɛni lɛ́bla nwuna batɛyane bamɛni kasusu dɛye dɛye. Nsu Yesu ɔ́sɔ ɔ́su-ma ɔnini, “Mina banamu, bɛnu kalɛ na ubo ɔkplu ute balakɛne ka bakɛ kuƒi na Katɔti lɛga kadikɔ! 25Bana mmɔ buduo ubo ɔkplu utulo kalɛ na ebuo ala utine ubendi ƒui ɔvi udila liƒi!”
26Ka ɔ́su-ma litemi lɛmɛni ni, ɔ́ya na bana kasusu kásɔ kábla kalɛ kadi kébu! Na bakya beeye bana lɛlɔ banini, “Na ɔma geen ndubɔkɛ bɔƒɔ?”
27Amu na Yesu údie ɔmɛni kalɔ ɔnini, “Ɔyawine biala ulakana ɔmɛni bɔbla. Nsu Katɔti anwu ni, ɔɔkana lɛla biala bɔbla.”
28Amu na Petro ɔ́su ɔnini, “Nu, bɔ́da bula lɛla biala búse na bɔkɛ bɔsiaku-ɔ. Bɔdubɔkɛ bɔƒɔ?”
29Amu na Yesu ɔ́su ɔnini, “Mɔɔsu-mii geen ka bɛdubɔkɛ ala ani ntulo ani bɛ́da bíse. Ɔsika ukyuli biala ɔni náda nwuna ɔma úse, iye banwani bananabi ku belekubi, iye uni, iye ɔti, iye nwuna banamu, iye kemo na mina bɔsiaku ku litemi buni lɛmɛni bugyingya ɔsu ni, 30ɔdubɔkɛ ala ammɔ akpa eti anyɔ ɔsia kama na kalɔ lɛlɔ mɛni. Ɔdubɔkɛ lɛtɔ ku banwani bananabi ku banwani belekubi ku beni ku bebi ku mmo. Nsu ni, bekyuli badubo-nwu bukpoku lɛnɔ. Na ɔmɛni kama ni, ɔdubɔkɛ ngba bɔni nsɔ naaadubo bɔsa kudii na kayawi kawɔdi kani ndububo kemmo. 31Nsu bekyuli pii bani ntɔ ɔƒɛni ni, badubɔvi bakpɛ kama. Na bani nkpɛ kama ɔƒɛni ni, badubɔvi batɔ.”
Yesu Ɔ́sɔ Ɔ́tɛmi Nwuna Kukpi Lɛlɔ Litemi
32Uwi ɔni na bákɛ ulu lɛlɔ bésela Yerusalem ni, Yesu ɔtɔ asa na nwuna batɛyane basia. Na ɔtɔtɔ ɔɔgyú batɛyane bammɔ, na liƒu lɛɛda bekyuli bani nsiaku-ma lɛnɔ. Yesu ɔ́sɔ ɔ́lɔ nwuna batɛyane úsienku kɔƒɛlɛ na ɔ́su-ma ala ani ndubo bɔlɛku-nwu. 33Ɔ́su-ma ɔnini, “Binu! Búsela Yerusalem kesii kani na badubuti ami, ɔni ndi Ukyuli Ɔyawine Ubi, bakya bakpane benengudi ku ɔda bubo ala batinane enu kemmo. Badubɔdu-mi kukpi kɔtɔ na beti-mi bakya Romaƒuɔ lɛkɔkɔ. 34Na ama lɛnɔ badubuwi-mi anumi kalɔ, na betuo lisuo bewi-mi, na bebo-mi, na badu-mi. Nsu limeyi lɛtɛdi lɛlɔ ni, nsɔ ndubɔta mbelie ngba.”
Yakobo Ku Yohane Bévele Yesu Keliekɔ Kenengudi
35Amu na Sebedeo bebi bani ndi Yakobo ku Yohane bébo Yesu kudɔ na básu-nwu banini, “Ala ɔtinane, lɛla lɛdi lɛkya na bɔɔyɔ́ ka abla ete-bu.”
36Yesu úye-ma ɔnini, “Bi na ɔdi?”
37Básu-nwu banini, “Si ésie Katɔ Ɔga Ɔma etélie lɛga bɔdi liboku lɛlɔ ni, abu lɛnɔ bɔɔyɔ́ ka bubelie-ɔ kudɔ na mmɔ. Na bula akɔ unwi ulie-ɔ kɔdianu kakɛ, na unwi lɛnɔ ulie-ɔ kɔmiinu kakɛ.”
38Yesu ɔ́su-ma ɔnini, “Bɛɛɛgyi lɛla lɛni na biiye! Bɛ́ƒɔ bɛ́di ka bɛdubɔkana na bɛni lɛbibo ɔɔƒɛɛ ɔni na mɔɔní? Na bɛdubɔkana na bɛƒɔ bɔkpila ɔdi ɔni na mɔɔƒɔ́ na kayawi mɛni?”
39Amu na bédie kenye banini, “Bɔdubɔkana.”
Yesu ɔ́su-ma ɔnini, “Ɛɛn, bɛdubɔni ɔɔƒɛɛ ukpidi ɔni udu na mɔɔní, na bɛdubɔƒɔ bɔkpila ɔdi ɔni udu na mɔɔƒɔ́ mɛni. 40Nsu liiibo kuƒi ka lidie ukyuli ɔni ndubulie-mi kɔmiinu iye kɔdianu. Mina Ɔti ndubuti ute bekyuli bani na ɔ́klibi mmɔ úse úte.”
41Ka batɛyane leevu bakladi bénu etemila amɛni ni, béti kɔnyi bakya Yakobo ku Yohane. 42Anwuɔsu Yesu ɔ́lɔ bana ƒui ɔ́sala lisu na ɔ́su-ma ɔnini, “Bina ƒui bɛgyi ka aban lɛlɔ badine benengudi bebo ɔyikun na kalɔ bamba bekyuli lɛlɔ. Na lɛlɔ badine benengu bammɔ baanya-ma taamana na bana lɛlɔ bɔtina kemmo. 43Nsu útalɛka use lɛni na bina akɔ. Si bina akɔ ɔdi ɔɔyɔ́ ka ɔbla ɔtɔnkune ni, ɔlɛka uti lɛlɔ ɔbla bakladi ƒui kabla ɔblane. 44Na si bina akɔ ɔdi ɔɔyɔ́ ka ɔƒɔ lɛnyi ni, ɔlɛka uti lɛlɔ ɔbla aani ukyuli ɔni neeebo kenyekɔ biala na bakladi ƒui akɔ. 45Ɔsika Ukyuli Ɔyawine Ubi muedi útebo ɔnii babla-nwu kabla. Bubo na anwu ɔlatidi úbo ubabla kabla ute bekyuli na uti nwuna ngba ute na ɔƒɔ kayu na bekyuli pii ekpidi lili.”
Yesu Ɔ́bwi Ɔnumbwɛne Bartimeo
46Ɔmmɔ kama ni, Yesu ku nwuna batɛyane bésie bétéduo Yeriko. Na ɔni na baatɔlɔ ɔma ɔmmɔ ni, bekyuli pii badi básiaku-ma. Amu ka bákɛ ulu ni, bávi ɔnumbwɛne ɔdi baalɔ Bartimeo ɔni kalɔ ndi Timeo ubidi. Na ulie uuvele ala. 47Ka únu ɔnii Yesu Nasareni mɔɔví ni, ɔ́va ɔ́su ɔnini, “Yesu! Dawid kaba kemmo ubi! Nu-mi kɔnyana!”
48Bekyuli pii bani mɔɔví mmɔ bábɔku-nwu banii ɔba lɛsɛ. Nsu ɔƒɛni geen na ɔ́sɔ ɔɔva momoomo taasu ɔnini, “Dawid kaba kemmo ubi! Nu-mi kɔnyana!”
49Amu ka Yesu únu-nwu butemi ni, údi únye na ɔ́su ɔnini, “Bɛlɔ-nwu bite-mi.”
Anwuɔsu bálɔ ɔnumbwɛne ɔmɛni banini, “Kɛ kubiti! Ta pla, ɔsika ɔɔlɔ-ɔ.” 50Kɔnakunwi ni, údie nwuna kɔdi úwi na ɔ́ba lɛgyu úsie Yesu kudɔ.
51Yesu úye-nwu ɔnini, “Bi na aawia ka lɛbla lite-ɔ?”
Ɔnumbwɛne ɔmɛni ɔ́su-nwu ɔnini, “Unwoti, ya mina anumi alɛmi na ntaanu!”
52Amu na Yesu ɔ́su-nwu ɔnini, “Teesie. Ƒula bɔƒɔtaadi bɔ́bwi-ɔ.” Na kɔnakunwi ni, nwuna anumi ébimi na úse kalɔ ɔɔnu. Amu na ɔ́siaku Yesu, na bana ƒui bátɔlɔ bésie bana ulu.
Цяпер абрана:
Marko 10: lef
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.