KA BUKE MUA A MOSE, I KAPA ʻIA KINOHI 27
27
MOKUNA XXVII.
1 Hoʻouna ʻia ʻo ʻEsau i ʻiʻo na ʻIsaʻaka. 6 Aʻo ʻia ʻo Iakoba e Rebeka. 18 Ko Iakoba hoʻopunipuni ʻana iā ʻIsaʻaka. 30 Ko ʻEsau hoʻi ʻana mai, 34 a me kona uē ʻana. 41 Huhū ʻEsau iā lakoba. 42 Ko Rebeka manaʻo iā Iakoba.
1¶ I ko ʻIsaʻaka manawa i ʻelemakule ai, a pōwehiwehi ai kona mau maka, a hiki ʻole iā ia ke ʻike aku; hea akula ʻo ia iā ʻEsau i kāna keiki mua, ʻī akula iā ia, “E kuʻu keiki,” ʻī maila kēlā, “Eia wau.”
2ʻĪ akula ʻo ia, “Eia hoʻi, ua ʻelemakule au, ʻaʻole hoʻi au i ʻike i kuʻu lā e make ai.
3“ʻĀnō hoʻi, e lawe ʻoe i kāu mau mea pana, i kāu ʻaʻa pua a me kāu kakaka, e hele aku ʻoe i ka nāhelehele e ʻimi i kahi ʻiʻo naʻu.
4“A e hana ʻoe i mea ʻono naʻu i ka mea hoʻi aʻu i ʻono ai, a e lawe mai ʻoe i oʻu nei, i pāʻina au, a i hoʻomaikaʻi aku kuʻu ʻuhane iā ʻoe ma mua o kuʻu make ʻana.”
5¶ Lohe aʻela ʻo Rebeka i ka wā a ʻIsaʻaka i ʻōlelo aku ai iā ʻEsau i kāna keiki. A hele aku ʻo ʻEsau i ka nāhelehele e ʻimi aku a e lawe mai i ka ʻiʻo o ka holoholona hihiu.
6ʻŌlelo akula ʻo Rebeka iā Iakoba i kāna keiki, ʻī akula, “Aia hoʻi, ua lohe iho nei au i kou makua kāne e ʻōlelo ana i kou kaikuaʻana iā ʻEsau, i ka ʻī ʻana aʻe,
7‘E lawe mai ʻoe i oʻu nei i ʻiʻo holoholona hihiu, a e hana i ka mea ʻono naʻu, i pāʻina au, a i hoʻomaikaʻi hoʻi au iā ʻoe i mua o Iēhova ma mua o kuʻu make ʻana.’
8“ʻĀnō hoʻi, e kuʻu keiki, e hoʻolohe mai ʻoe i koʻu leo, ma ka mea aʻu e kauoha aku nei iā ʻoe.
9“E hele koke aku ʻoe i ka poʻe holoholona, a e lawe mai i nā keiki kao maikaʻi i ʻelua; a naʻu nō e hana i ka mea ʻono na kou makua kāne, i kāna mea i ʻono ai.
10“A e halihali aku ʻoe ia mea i kou makua kāne, i ʻai iho ia, a i hoʻomaikaʻi mai ʻo ia iā ʻoe ma mua o kona make ʻana.”
11ʻŌlelo maila ʻo Iakoba iā Rebeka i kona makuahine, “Aia hoʻi, he kanaka huluhulu ʻo ʻEsau kuʻu kaikuaʻana, a he kanaka paheʻe nō wau.
12“A e hāhā mai paha kuʻu makua kāne iaʻu, a e ʻikea auaneʻi au e ia he mea hoʻopunipuni; a e hoʻoili mai au i ka hōʻino ʻia ma luna iho oʻu, ʻaʻole ka hoʻomaikaʻi ʻia.”
13ʻĪ akula kona makuahine iā ia, “Ma luna iho oʻu kou hōʻino ʻia, e kuʻu keiki; e hoʻolohe wale mai ʻoe i koʻu leo, e kiʻi aku, a e lawe mai i oʻu nei.”
14Kiʻi akula ia, a lawe maila ia mau mea i kona makuahine; a na kona makuahine i hana i ka mea ʻono, a kona makua kāne i ʻono ai.
15Lawe aʻela ʻo Rebeka i ka ʻaʻahu maikaʻi o kāna keiki mua ʻo ʻEsau, i ka mea e waiho ana i loko o ka hale me ia, a hōʻaʻahu ihola iā Iakoba i kāna keiki muli iho ia mea.
16A hoʻopili akula ʻo Rebeka i nā ʻili o nā keiki kao ma luna o kona mau lima, a me ka paheʻe o kona ʻāʻī.
17Hāʻawi akula ia i ka mea ʻono, a me ka berena āna i hoʻomākaukau ai, i loko o ka lima o Iakoba ʻo kāna keiki.
18¶ A hele akula ia i kona makua kāne, ʻī akula, “E kuʻu makua kāne.” ʻĪ maila kēlā, “Eia nō wau; ʻo wai lā ʻoe, e kuʻu keiki?”
19ʻĪ akula ʻo Iakoba i kona makua kāne, “ʻO wau nō ʻo ʻEsau, ʻo kāu makahiapo; ua hana iho nei au i kāu mea i kauoha mai ai; ke noi aku nei au, e ala mai ʻoe, e noho a e ʻai iho i kaʻu ʻiʻo o ka mea hihiu, i hoʻomaikaʻi mai kou ʻuhane iaʻu.”
20ʻĪ maila ʻo ʻIsaʻaka i kāna keiki, “Pehea ka ʻemo ʻole o ka loaʻa ʻana o ia mea iā ʻoe, e kuʻu keiki?” ʻĪ akula kēlā, “No ka mea, na Iēhova na kou Akua i hoʻohālāwai ia mea me aʻu.”
21ʻĪ maila ʻo ʻIsaʻaka iā Iakoba, “Ke noi aku nei au iā ʻoe, e neʻeneʻe mai a kokoke, i hāhā aku au iā ʻoe, e kuʻu keiki, i ʻike au ʻo kaʻu keiki ʻo ʻEsau paha ʻoe, ʻaʻole paha.”
22Neʻeneʻe akula ʻo Iakoba i o ʻIsaʻaka lā i kona makua kāne; a hāhā maila ʻo ia iā ia, ʻī maila, “ʻO ka leo, ka leo nō o Iakoba; akā, ʻo nā lima, nā lima nō o ʻEsau.”
23ʻAʻole nō i ʻikea ʻo ia; no ka mea, ua huluhulu kona mau lima, e like me nā lima o kona kaikuaʻana, ʻo ʻEsau; a hoʻomaikaʻi mai ʻo ia iā ia.
24Nīnau maila ʻo ia iā ia, “ʻO ʻoe ʻiʻo nō anei ʻo kaʻu keiki ʻo ʻEsau?” ʻĪ akula kēlā, “ʻO wau nō.”
25ʻĪ maila ʻo ia, “E lawe mai ia mea a kokoke iaʻu, a e ʻai iho nō wau i ka ʻiʻo mea hihiu a kuʻu keiki, i hoʻomaikaʻi aku kuʻu ʻuhane iā ʻoe.” Lawe akula ʻo Iakoba a kokoke, a ʻai ihola kēlā; lawe akula hoʻi ʻo ia i ka waina, a inu ihola kēlā.
26ʻŌlelo maila kona makua kāne ʻo ʻIsaʻaka iā ia, “E hele mai ʻoe a honi iaʻu, e kuʻu keiki.”
27Hele akula ʻo Iakoba, a honi aʻela iā ia; honi ihola ʻo ʻIsaʻaka i ke ʻala o kona ʻaʻahu, hoʻomaikaʻi maila iā ia, ʻī maila,
“Aiʻa, ʻo ke ʻala o kuʻu keiki
Ua like me ke ʻala o ka mahina ʻai
A Iēhova i hoʻomaikaʻi ai!
28“E hāʻawi mai ke Akua iā ʻoe
I ka hau no ka lani mai,
Me ka momona o ka honua,
A me ka palaoa a me ka waina he nui.
29“E hoʻokauā mai nā kānaka nāu,
A e moe iho nā lāhui kanaka i mua ou,
E lilo ʻoe i haku ma luna o kou poʻe hoahānau,
A e moe iho nā keiki o kou makuahine i mua ou.
E hōʻino ʻia aku nā mea a pau e hōʻino mai iā ʻoe,
A e hoʻopōmaikaʻi ʻia aku ka mea hoʻomaikaʻi iā ʻoe!”
30¶ A oki aʻela ka hoʻomaikaʻi ʻana mai a ʻIsaʻaka iā Iakoba, ʻaneʻane hoʻi ʻole mai ʻo Iakoba mai ke alo mai o ʻIsaʻaka ʻo kona makua kāne, puka maila hoʻi ʻo ʻEsau ʻo kona kaikuaʻana mai kona ʻimi mea hihiu ʻana.
31Hana nō hoʻi ʻo ia i ka mea ʻono, a lawe mai hoʻi ia mea i kona makua kāne, ʻī akula ia i kona makua kāne, “E ala mai ʻoe, e kuʻu makua kāne, a e ʻai iho i ka ʻiʻo mea hihiu a kāna keiki, i hoʻomaikaʻi mai kou ʻuhane iaʻu.”
32Nīnau maila ʻo ʻIsaʻaka ʻo kona makua kāne iā ia, “ʻO wai ʻoe?” ʻĪ akula kēlā, “ʻO wau nō ʻo kāu keiki, ʻo kāu makahiapo, ʻo ʻEsau.”
33Haʻalulu nui loa ihola ʻo ʻIsaʻaka, ʻī maila, “ʻO wai? ʻAuhea hoʻi ka mea i kiʻi i ka ʻiʻo mea hihiu, a i lawe mai hoʻi i oʻu nei, a ua ʻai iho nei au a pau, ma mua o kou hiki ʻana mai, a ua hoʻomaikaʻi au iā ia? ʻOiaʻiʻo, ʻo ia ke hoʻomaikaʻi ʻia.”
34A lohe aʻela ʻo ʻEsau i ka ʻōlelo a kona makua kāne, uē ihola ia me ka uē nui loa, ʻī akula ia i kona makua kāne, “E hoʻomaikaʻi mai iaʻu, iaʻu hoʻi, e kuʻu makua kāne!”
35ʻĪ maila kēlā, “Ua hele mai nei kou kaikaina me ka maʻalea, a ua lawe aku i kou hoʻomaikaʻi ʻia.”
36ʻĪ akula ʻo ia, “ʻAʻole anei i pono ke kapa ʻana iā ia ʻo Iakoba? No ka mea, eia ka lua o kona kāʻili ʻana i koʻu pono; kāʻili akula ʻo ia i ko ka hānau mua pono oʻu; eia hoʻi, ʻānō, ua kāʻili aʻela ʻo ia i koʻu hoʻomaikaʻi ʻia.” ʻĪ akula hoʻi ʻo ʻEsau, “ʻAʻole anei ʻoe i mālama noʻu kekahi hoʻomaikaʻi ʻana?”
37ʻŌlelo maila ʻo ʻIsaʻaka iā ʻEsau, “Aia hoʻi, ua hoʻolilo aku au iā ia i haku nou, a ua hāʻawi aku nō wau i kona poʻe hoahānau a pau i poʻe kauā nāna; ua mālama aku hoʻi au iā ia i ka palaoa a me ka waina; a he aha kaʻu e hana aku ai nāu, e kuʻu keiki?”
38ʻĪ akula ʻo ʻEsau i kona makua kāne, “Hoʻokahi wale nō anei āu hoʻomaikaʻi ʻana, e kuʻu makua kāne? E hoʻomaikaʻi mai ʻoe iaʻu hoʻi, e kuʻu makua kāne.” Hoʻokiʻekiʻe aʻela ʻo ʻEsau i kona leo, a uē ihola.
39ʻŌlelo maila ʻo ʻIsaʻaka, kona makua kāne, ʻī maila iā ia,
“Aia hoʻi, ma ka ʻāina momona kou noho ʻana,
A ma kahi o ka hau o ka lani mai luna iho.
40I kāu pahi kaua e ola auaneʻi ʻoe,
A e hoʻokauā aku ʻoe na kou kaikaina;
A i ka manawa e loaʻa ai iā ʻoe ke aliʻi ʻana,
A laila e haʻihaʻi iho ʻoe i kāna ʻauamo ma kou ʻāʻī.”
41Inaina akula ʻo ʻEsau iā Iakoba, no ka hoʻomaikaʻi ʻana a kona makua kāne i hoʻomaikaʻi aku ai iā ia; ʻī ihola ʻo ʻEsau i loko o kona naʻau, “Ua kokoke mai nā lā e kanikau ai i kuʻu makua kāne; a laila au e pepehi ai i kuʻu kaikaina iā Iakoba.”
42Ua haʻi ʻia aku kēia ʻōlelo ʻana a ʻEsau iā Rebeka; hoʻouna akula ia e hea iā Iakoba i kāna keiki muli iho, ʻī akula iā ia, “Aia hoʻi, ʻo kou kaikuaʻana ʻo ʻEsau, e hōʻoluʻolu ana ʻo ia iā ia iho nou, e pepehi iho iā ʻoe.
43“ʻĀnō hoʻi, e kuʻu keiki, e hoʻolohe mai ʻoe i kuʻu leo; e kū aʻe ʻoe, e holo aku i o Labana lā, i kuʻu kaikunāne ma Harana.”
44“E noho me ia i kekahi mau lā, a huli aʻe ka inaina o kou kaikuaʻana mai ou aku lā,
45a huli aʻe ka inaina o kou kaikuaʻana mai ou aku lā, a poina iā ia kāu mea i hana aku ai iā ia; a laila e hoʻouna aku nō wau e hoʻihoʻi mai iā ʻoe; no ke aha lā e hoʻonele ʻia mai au iā ʻolua a ʻelua i ka lā hoʻokahi?”
46¶ ʻŌlelo akula ʻo Rebeka iā ʻIsaʻaka, “Ua pauaho nō wau i kuʻu ola ʻana, no nā kaikamāhine a kā Heta; inā e lawe ʻo Iakoba i kekahi kaikamahine a kā Heta i wahine nāna, e like me nā kaikamāhine o ka ʻāina, pehea lā wau e pono ai i kuʻu ola ʻana?”
Цяпер абрана:
KA BUKE MUA A MOSE, I KAPA ʻIA KINOHI 27: KBH
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ka Baibala Hemolele © Partners Development Foundation, 2018.
KA BUKE MUA A MOSE, I KAPA ʻIA KINOHI 27
27
MOKUNA XXVII.
1 Hoʻouna ʻia ʻo ʻEsau i ʻiʻo na ʻIsaʻaka. 6 Aʻo ʻia ʻo Iakoba e Rebeka. 18 Ko Iakoba hoʻopunipuni ʻana iā ʻIsaʻaka. 30 Ko ʻEsau hoʻi ʻana mai, 34 a me kona uē ʻana. 41 Huhū ʻEsau iā lakoba. 42 Ko Rebeka manaʻo iā Iakoba.
1¶ I ko ʻIsaʻaka manawa i ʻelemakule ai, a pōwehiwehi ai kona mau maka, a hiki ʻole iā ia ke ʻike aku; hea akula ʻo ia iā ʻEsau i kāna keiki mua, ʻī akula iā ia, “E kuʻu keiki,” ʻī maila kēlā, “Eia wau.”
2ʻĪ akula ʻo ia, “Eia hoʻi, ua ʻelemakule au, ʻaʻole hoʻi au i ʻike i kuʻu lā e make ai.
3“ʻĀnō hoʻi, e lawe ʻoe i kāu mau mea pana, i kāu ʻaʻa pua a me kāu kakaka, e hele aku ʻoe i ka nāhelehele e ʻimi i kahi ʻiʻo naʻu.
4“A e hana ʻoe i mea ʻono naʻu i ka mea hoʻi aʻu i ʻono ai, a e lawe mai ʻoe i oʻu nei, i pāʻina au, a i hoʻomaikaʻi aku kuʻu ʻuhane iā ʻoe ma mua o kuʻu make ʻana.”
5¶ Lohe aʻela ʻo Rebeka i ka wā a ʻIsaʻaka i ʻōlelo aku ai iā ʻEsau i kāna keiki. A hele aku ʻo ʻEsau i ka nāhelehele e ʻimi aku a e lawe mai i ka ʻiʻo o ka holoholona hihiu.
6ʻŌlelo akula ʻo Rebeka iā Iakoba i kāna keiki, ʻī akula, “Aia hoʻi, ua lohe iho nei au i kou makua kāne e ʻōlelo ana i kou kaikuaʻana iā ʻEsau, i ka ʻī ʻana aʻe,
7‘E lawe mai ʻoe i oʻu nei i ʻiʻo holoholona hihiu, a e hana i ka mea ʻono naʻu, i pāʻina au, a i hoʻomaikaʻi hoʻi au iā ʻoe i mua o Iēhova ma mua o kuʻu make ʻana.’
8“ʻĀnō hoʻi, e kuʻu keiki, e hoʻolohe mai ʻoe i koʻu leo, ma ka mea aʻu e kauoha aku nei iā ʻoe.
9“E hele koke aku ʻoe i ka poʻe holoholona, a e lawe mai i nā keiki kao maikaʻi i ʻelua; a naʻu nō e hana i ka mea ʻono na kou makua kāne, i kāna mea i ʻono ai.
10“A e halihali aku ʻoe ia mea i kou makua kāne, i ʻai iho ia, a i hoʻomaikaʻi mai ʻo ia iā ʻoe ma mua o kona make ʻana.”
11ʻŌlelo maila ʻo Iakoba iā Rebeka i kona makuahine, “Aia hoʻi, he kanaka huluhulu ʻo ʻEsau kuʻu kaikuaʻana, a he kanaka paheʻe nō wau.
12“A e hāhā mai paha kuʻu makua kāne iaʻu, a e ʻikea auaneʻi au e ia he mea hoʻopunipuni; a e hoʻoili mai au i ka hōʻino ʻia ma luna iho oʻu, ʻaʻole ka hoʻomaikaʻi ʻia.”
13ʻĪ akula kona makuahine iā ia, “Ma luna iho oʻu kou hōʻino ʻia, e kuʻu keiki; e hoʻolohe wale mai ʻoe i koʻu leo, e kiʻi aku, a e lawe mai i oʻu nei.”
14Kiʻi akula ia, a lawe maila ia mau mea i kona makuahine; a na kona makuahine i hana i ka mea ʻono, a kona makua kāne i ʻono ai.
15Lawe aʻela ʻo Rebeka i ka ʻaʻahu maikaʻi o kāna keiki mua ʻo ʻEsau, i ka mea e waiho ana i loko o ka hale me ia, a hōʻaʻahu ihola iā Iakoba i kāna keiki muli iho ia mea.
16A hoʻopili akula ʻo Rebeka i nā ʻili o nā keiki kao ma luna o kona mau lima, a me ka paheʻe o kona ʻāʻī.
17Hāʻawi akula ia i ka mea ʻono, a me ka berena āna i hoʻomākaukau ai, i loko o ka lima o Iakoba ʻo kāna keiki.
18¶ A hele akula ia i kona makua kāne, ʻī akula, “E kuʻu makua kāne.” ʻĪ maila kēlā, “Eia nō wau; ʻo wai lā ʻoe, e kuʻu keiki?”
19ʻĪ akula ʻo Iakoba i kona makua kāne, “ʻO wau nō ʻo ʻEsau, ʻo kāu makahiapo; ua hana iho nei au i kāu mea i kauoha mai ai; ke noi aku nei au, e ala mai ʻoe, e noho a e ʻai iho i kaʻu ʻiʻo o ka mea hihiu, i hoʻomaikaʻi mai kou ʻuhane iaʻu.”
20ʻĪ maila ʻo ʻIsaʻaka i kāna keiki, “Pehea ka ʻemo ʻole o ka loaʻa ʻana o ia mea iā ʻoe, e kuʻu keiki?” ʻĪ akula kēlā, “No ka mea, na Iēhova na kou Akua i hoʻohālāwai ia mea me aʻu.”
21ʻĪ maila ʻo ʻIsaʻaka iā Iakoba, “Ke noi aku nei au iā ʻoe, e neʻeneʻe mai a kokoke, i hāhā aku au iā ʻoe, e kuʻu keiki, i ʻike au ʻo kaʻu keiki ʻo ʻEsau paha ʻoe, ʻaʻole paha.”
22Neʻeneʻe akula ʻo Iakoba i o ʻIsaʻaka lā i kona makua kāne; a hāhā maila ʻo ia iā ia, ʻī maila, “ʻO ka leo, ka leo nō o Iakoba; akā, ʻo nā lima, nā lima nō o ʻEsau.”
23ʻAʻole nō i ʻikea ʻo ia; no ka mea, ua huluhulu kona mau lima, e like me nā lima o kona kaikuaʻana, ʻo ʻEsau; a hoʻomaikaʻi mai ʻo ia iā ia.
24Nīnau maila ʻo ia iā ia, “ʻO ʻoe ʻiʻo nō anei ʻo kaʻu keiki ʻo ʻEsau?” ʻĪ akula kēlā, “ʻO wau nō.”
25ʻĪ maila ʻo ia, “E lawe mai ia mea a kokoke iaʻu, a e ʻai iho nō wau i ka ʻiʻo mea hihiu a kuʻu keiki, i hoʻomaikaʻi aku kuʻu ʻuhane iā ʻoe.” Lawe akula ʻo Iakoba a kokoke, a ʻai ihola kēlā; lawe akula hoʻi ʻo ia i ka waina, a inu ihola kēlā.
26ʻŌlelo maila kona makua kāne ʻo ʻIsaʻaka iā ia, “E hele mai ʻoe a honi iaʻu, e kuʻu keiki.”
27Hele akula ʻo Iakoba, a honi aʻela iā ia; honi ihola ʻo ʻIsaʻaka i ke ʻala o kona ʻaʻahu, hoʻomaikaʻi maila iā ia, ʻī maila,
“Aiʻa, ʻo ke ʻala o kuʻu keiki
Ua like me ke ʻala o ka mahina ʻai
A Iēhova i hoʻomaikaʻi ai!
28“E hāʻawi mai ke Akua iā ʻoe
I ka hau no ka lani mai,
Me ka momona o ka honua,
A me ka palaoa a me ka waina he nui.
29“E hoʻokauā mai nā kānaka nāu,
A e moe iho nā lāhui kanaka i mua ou,
E lilo ʻoe i haku ma luna o kou poʻe hoahānau,
A e moe iho nā keiki o kou makuahine i mua ou.
E hōʻino ʻia aku nā mea a pau e hōʻino mai iā ʻoe,
A e hoʻopōmaikaʻi ʻia aku ka mea hoʻomaikaʻi iā ʻoe!”
30¶ A oki aʻela ka hoʻomaikaʻi ʻana mai a ʻIsaʻaka iā Iakoba, ʻaneʻane hoʻi ʻole mai ʻo Iakoba mai ke alo mai o ʻIsaʻaka ʻo kona makua kāne, puka maila hoʻi ʻo ʻEsau ʻo kona kaikuaʻana mai kona ʻimi mea hihiu ʻana.
31Hana nō hoʻi ʻo ia i ka mea ʻono, a lawe mai hoʻi ia mea i kona makua kāne, ʻī akula ia i kona makua kāne, “E ala mai ʻoe, e kuʻu makua kāne, a e ʻai iho i ka ʻiʻo mea hihiu a kāna keiki, i hoʻomaikaʻi mai kou ʻuhane iaʻu.”
32Nīnau maila ʻo ʻIsaʻaka ʻo kona makua kāne iā ia, “ʻO wai ʻoe?” ʻĪ akula kēlā, “ʻO wau nō ʻo kāu keiki, ʻo kāu makahiapo, ʻo ʻEsau.”
33Haʻalulu nui loa ihola ʻo ʻIsaʻaka, ʻī maila, “ʻO wai? ʻAuhea hoʻi ka mea i kiʻi i ka ʻiʻo mea hihiu, a i lawe mai hoʻi i oʻu nei, a ua ʻai iho nei au a pau, ma mua o kou hiki ʻana mai, a ua hoʻomaikaʻi au iā ia? ʻOiaʻiʻo, ʻo ia ke hoʻomaikaʻi ʻia.”
34A lohe aʻela ʻo ʻEsau i ka ʻōlelo a kona makua kāne, uē ihola ia me ka uē nui loa, ʻī akula ia i kona makua kāne, “E hoʻomaikaʻi mai iaʻu, iaʻu hoʻi, e kuʻu makua kāne!”
35ʻĪ maila kēlā, “Ua hele mai nei kou kaikaina me ka maʻalea, a ua lawe aku i kou hoʻomaikaʻi ʻia.”
36ʻĪ akula ʻo ia, “ʻAʻole anei i pono ke kapa ʻana iā ia ʻo Iakoba? No ka mea, eia ka lua o kona kāʻili ʻana i koʻu pono; kāʻili akula ʻo ia i ko ka hānau mua pono oʻu; eia hoʻi, ʻānō, ua kāʻili aʻela ʻo ia i koʻu hoʻomaikaʻi ʻia.” ʻĪ akula hoʻi ʻo ʻEsau, “ʻAʻole anei ʻoe i mālama noʻu kekahi hoʻomaikaʻi ʻana?”
37ʻŌlelo maila ʻo ʻIsaʻaka iā ʻEsau, “Aia hoʻi, ua hoʻolilo aku au iā ia i haku nou, a ua hāʻawi aku nō wau i kona poʻe hoahānau a pau i poʻe kauā nāna; ua mālama aku hoʻi au iā ia i ka palaoa a me ka waina; a he aha kaʻu e hana aku ai nāu, e kuʻu keiki?”
38ʻĪ akula ʻo ʻEsau i kona makua kāne, “Hoʻokahi wale nō anei āu hoʻomaikaʻi ʻana, e kuʻu makua kāne? E hoʻomaikaʻi mai ʻoe iaʻu hoʻi, e kuʻu makua kāne.” Hoʻokiʻekiʻe aʻela ʻo ʻEsau i kona leo, a uē ihola.
39ʻŌlelo maila ʻo ʻIsaʻaka, kona makua kāne, ʻī maila iā ia,
“Aia hoʻi, ma ka ʻāina momona kou noho ʻana,
A ma kahi o ka hau o ka lani mai luna iho.
40I kāu pahi kaua e ola auaneʻi ʻoe,
A e hoʻokauā aku ʻoe na kou kaikaina;
A i ka manawa e loaʻa ai iā ʻoe ke aliʻi ʻana,
A laila e haʻihaʻi iho ʻoe i kāna ʻauamo ma kou ʻāʻī.”
41Inaina akula ʻo ʻEsau iā Iakoba, no ka hoʻomaikaʻi ʻana a kona makua kāne i hoʻomaikaʻi aku ai iā ia; ʻī ihola ʻo ʻEsau i loko o kona naʻau, “Ua kokoke mai nā lā e kanikau ai i kuʻu makua kāne; a laila au e pepehi ai i kuʻu kaikaina iā Iakoba.”
42Ua haʻi ʻia aku kēia ʻōlelo ʻana a ʻEsau iā Rebeka; hoʻouna akula ia e hea iā Iakoba i kāna keiki muli iho, ʻī akula iā ia, “Aia hoʻi, ʻo kou kaikuaʻana ʻo ʻEsau, e hōʻoluʻolu ana ʻo ia iā ia iho nou, e pepehi iho iā ʻoe.
43“ʻĀnō hoʻi, e kuʻu keiki, e hoʻolohe mai ʻoe i kuʻu leo; e kū aʻe ʻoe, e holo aku i o Labana lā, i kuʻu kaikunāne ma Harana.”
44“E noho me ia i kekahi mau lā, a huli aʻe ka inaina o kou kaikuaʻana mai ou aku lā,
45a huli aʻe ka inaina o kou kaikuaʻana mai ou aku lā, a poina iā ia kāu mea i hana aku ai iā ia; a laila e hoʻouna aku nō wau e hoʻihoʻi mai iā ʻoe; no ke aha lā e hoʻonele ʻia mai au iā ʻolua a ʻelua i ka lā hoʻokahi?”
46¶ ʻŌlelo akula ʻo Rebeka iā ʻIsaʻaka, “Ua pauaho nō wau i kuʻu ola ʻana, no nā kaikamāhine a kā Heta; inā e lawe ʻo Iakoba i kekahi kaikamahine a kā Heta i wahine nāna, e like me nā kaikamāhine o ka ʻāina, pehea lā wau e pono ai i kuʻu ola ʻana?”
Цяпер абрана:
:
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ka Baibala Hemolele © Partners Development Foundation, 2018.