Jɔ̃́ɔ́ 10
10
Nɔ́ɔ́ ɓá ɓáɖáá-dyí-gmɔ̀-nyɔ̀ɔ̀ jè dyíɛ
1Ké Jízɛ̀ cɛ̃ɛ ma ɖe, ké ɔ ɖá, “Ḿ cɛ̃ ɓě jǎà gbo, nyɔ ɓɛ́ ɔ se ɓáɖáá-kòòɔ̀ wɔ̃ɔ̀ gbo dyáìn, kɛɛ ɔ mu dà kà kò ɖò dyáìn nyɛɛ, ɔ mɔ̀ dyíɖíí-nyɔ̀ kè nyɔ-ɖɛ-gana-xwa-zàìn-nyɔ̀. 2Gàa ɓɛ́ ɔ dyáìn ɖé ɓáɖáá-kòòɔ̀ wɔ̃ɔ̀ múɛɛ, ɔ mɔ̀ ɓáɖáá ɓěɔ̀ dyí-gmɔ̀-nyɔ̀ɔ̀. 3Kòòɔ̀ wɔ̃ɔ̀ dyí-gmɔ̀-nyɔ̀ɔ̀ kaà ɔ dyí. Ɓáɖáá ɓěɔ̀ wɔ̃́ ɔ wuɖu. Ɔ ɖá ɔ mìɔùn nììn ɓáɖáá ɓěɔ̀ nyɛ́nɛ́ ɖò-ɖò, ké ɔ síìn wa. 4Ti ɓɛ́ ɔ ɖǎ wa síìn nyɛɛ ní, nìí, ɔ zi wa dyúa, ké ɓáɖáá ɓěɔ̀ sí ɔ kíɖíí, sepóɛɖé wa dyuò ɔ wuɖu dyí. 5Wa se ɖéè ɖò kíɖíí síɛ mu. Kɛɛ wa mu ɔ dyúa gbǔùn, sepóɛɖé wa se ɔ wuɖu dyí dyuò.”
6Jízɛ̀ po ma wa nɔ́ɔ́ nìà kɛ gbo, kɛɛ wa se ɖɛ ɔ nì ma kà wa gbo cɛ̃iń nyɛɛ múin wɔ̃́.
Jízɛ̀ mɔ̀ ɓáɖáá-dyí-gmɔ̀-nyɔ̀ nɔ̀mɔ̀ dyíinɔ̀
7Ɔ jèɛɛ, Jízɛ̀ cɛ̃ɛ ma ɖe, ké ɔ ɖá, “Ḿ cɛ̃ ɓě jǎà gbo, mɔ̄ mɔ̀ ɓáɖáá ɓěɔ̀ kòòɔ̀ wɔ̃ɔ̀. 8Nyɔ séín ɓě ɓɛ́ wa dyi ma kĩ́ín hwɛ̀ ɓɛ́ mɔ́ún dyi ma kà dyi kɛɛ mɔ̀ dyíɖíí-nyɔ̀ kè nyɔ-ɖɛ-gana-xwa-zàìn-nyɔ̀ ɓě. Kɛɛ ɓáɖáá ɓěɔ̀ se waà wuɖu ɓěɔ̀ ɖùǔ gbo tò. 9Mɔ̄ mɔ̀ kòòɔ̀ wɔ̃ɔ̀. Nyɔ ɖò dyi ɖé ḿ mú dyáìn ní, nìí, ɔ mu póùn. Ɔ mu dyáùn, ké ɔ mu síìn, ké ɔ mu pìǐ ɓɛ̀ɖɛ̀ɛ̀-ɓɛ̀ɖɛ̀ɛ̀ dyéìn. 10Dyíɖíí-nyɔ̀ ɓěɔ̀ dyi, ɓɛ́ wa ké ɖɛ dyíɖí, ɓɛ́ wa ké kú ɖáɓá, ɔ kè ɓɛ́ wa ké ɖɛ mú gbɔɔ̀ ɖòùn. Kɛɛ mɔ́ún dyi, ɓɛ́ nyɔǔn ké fɛ̀ɛ̀ ɓéɖé, ɓɛ́ wa kéɛ ɓéɖéɛń zi.
11“Mɔ̄ mɔ̀ ɓáɖáá-dyí-gmɔ̀-nyɔ̀ nɔ̀mɔ̀ dyíinɔ̀. Ɓáɖáá-dyí-gmɔ̀-nyɔ̀ nɔ̀mɔ̀ dyíinɔ̀ pɛ̃́ìn ɔ fɛ̀ɛ̀ɔ̀ dyi ɓó ɔ ɓáɖáá ɓěɔ̀ jè. 12Nyɔ mɔ̀ tɔ́mɔ́ìn-nyɔ̀, ké ɔ se ɓáɖáá-dyí-gmɔ̀-nyɔ̀ɔ̀, ké ɔ se ɓáɖáá ɓěɔ̀ kɔ̃̀ kɛɛ dyi ji ɖò dyiɛ dyéín, ɔ táà ɓáɖáá ɓěɔ̀ dyi, ké ɔ gbǔ. Ké jiɔ̀ kpɔ̃ ɓáɖáá ɓěɔ̀ ɖíɛ́ ɓě, ké ɔ ɓeìn ɓáɖáá tɔ̀ɔ̀ ɓěɔ̀ dyi. 13Gàaɔ̀ gbǔ ní, sepóɛɖé ɔ mɔ̀ tɔ́mɔ́ìn-nyɔ̀ pū, ké ɔ se ɓáɖáá ɓěɔ̀ jè gbo kɔ̃̀. 14-15Mɔ̄ mɔ̀ ɓáɖáá-dyí-gmɔ̀-nyɔ̀ nɔ̀mɔ̀ dyíinɔ̀. Kà ɓɛ́ Ɓǎɔ̀ dyuòà ḿ dyí, ké ḿ dyuòà ɔ mɔ̀ùn dyíɛɛ, kà dyúáɖòɔ̀ kǎà ḿ dyuò ní ɓáɖáá ɓěɔ̀ dyí, ké wa dyuò mɔ́ún dyí. Ḿ wɔ̃́ ɓɛ́ ḿ ké mɛ́ ɓó wa jè. 16Ḿ ɓéɖé ɓáɖáá tɔ̀ɔ̀ ɓě ɓɛ́ wa se kòò nìà kɛ mú nìɛ. Ḿ ɓéɖé ɓɛ́ ḿ ké wa mɔ̀ùn dyà ɖekè. Wa mu ní wuɖuɔ̀ ɖùǔ gbo tòùn, ké wa mu ɓáɖáá-dù dyúáɖò jǔùn, ké wa mu dyí-gmɔ̀-nyɔ̀ dyúáɖò ɓéɖéìn.
17“Ɓǎɔ̀ ɖɛ̀ɓɛ̀ ḿ mú, sepóɛɖé ḿ wɔ̃́ ɓɛ́ ḿ ké ní fɛ̀ɛ̀ɔ̀ dyi pɛ̃́ìn, ɓɛ́ ḿ kéɛ dyí ɖú ɖe. 18Nyɔ ɖò se ní fɛ̀ɛ̀ɔ̀ ḿ xwa zà. Ḿ tò ní fɛ̀ɛ̀ɔ̀ ɖé ḿ mìɔùn nììn hwòɖǒɛ̀-wɔ̃́-wɔ̃́ mú. Ḿ ɓéɖé kpé ɓɛ́ ḿ kéɛ dyi pɛ̃́ìn, ké ḿ ɓéɖé kpé ɓɛ́ ḿ kéɛ dyí ɖú ɖe. Ɖɛ ɓɛ́ ḿ Ɓǎ cɛ̃ ma ḿ gbo, ɓɛ́ ḿ ké nyuɛɛ nìàǒ wɛ̀.”
19Ɓó tia ɓaɖaa, Júù-nyɔ̀ ɓěɔ̀ ge ma mú ɖe ɓó wuɖu ɓě nìà kɛ jè. 20Wa pàɖǎ cɛ̃ɛ ma, ké wa ɖá, “Zùù gbà nì ɔ mú, ké sã̀à nì ɔ nyuɛń. Ɖɛ́ kɔ̃̀ jè ɓě tòà ɔ wuɖuɔ̀ ɖùǔ gboɛ́?”
21Kɛɛ ɖíɛ́ ɓě ɖá, “Gàa ɓɛ́ ɔ ɓéɖé zùù gbà kɛɛ se kà wùɖùɛ̀ ɓɛ́ìn. Zùù gbà ɓɛ́ìn nyɔ ɓě kpè dyéɖéín dyiɛɛ dyéɖé kaà?”
Júù-nyɔ̀ ɓěɔ̀ ɖíɛ́ ɓě ɓɔ́ Jízɛ̀
22Ɔ mɔ̀ ma ti ɓɛ́ wa ké ma hwɔ ɓɛ́ ɔ dyà wa Gèɖèpɔ́ɔ̀ gbǒɔ̀ xwáɖáún zà jè hwìɖǐiɛɛ pa ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Ɔ mɔ̀ ma sɔ̃̀ɔ̀-tì. 23Jízɛ̀ nì ma Sã́ɖómàà Gbáá wɔɖɔɔ ɓɛ́ ɔ nì ma ɖé Gèɖèpɔ́ɔ̀ gbǒɔ̀ wáún wɛ̃ɛ múin nàǔn. 24Púɛɛ, Júù-nyɔ̀ ɓěɔ̀ poìn ma ɓó ɔ ɖei dyí, ké wa cɛ̃ɛ ma ɔ gbo, ké wa ɖá, “Tiɔ̀ nyɛ́ nì mu à hwòɖǒ kɔ̃in cɛ̃ìn nyɛ́? Ɔ jǔ ké m̀ dyi Kɛ́ɖɛ́ìɔ̀ jǔǐn, cɛ̃ɛ à gbo wáɖáá.”
25Ké Jízɛ̀ zà ma ɖé wuɖu, ké ɔ ɖá, “Ḿ ɖǎa ma ɓě gbo cɛ̃, kɛɛ ɓě se ma ní wuɖuɔ̀ jǎà po. Kũ̀à ɓě ɓɛ́ ḿ nyuà ɖé ḿ Ɓǎà nyɛ́nɛ́ múɛɛ mɔ̀ ní zàse. 26Kɛɛ ɓě se ma ní wuɖuɔ̀ jǎà po, sepóɛɖé ɓě se ní ɓáɖáá ɓěɔ̀ ɖò. 27Ní ɓáɖáá ɓěɔ̀ wɔ̃́ ní wuɖu. Ḿ dyuò wa dyí, ké wa sí ḿ kíɖíí. 28Ḿ nyí wa sè-ná-sèɛ̀ fɛ̀ɛ̀, ké wa se mɛ́ɛ mu fɔɔ. Nyɔ ɖò se wa ḿ xwaún zàà ɓɛ́ìn. 29Ɖɛ ɓɛ́ ḿ Ɓǎ ɖǎ ḿ nyíɛɛ kpa ɖɛ ké ɔ zi ɖɛ séín dyí. Ké nyɔ ɖò se wa ḿ Ɓǎ xwaún zàà ɓɛ́ìn. 30Ḿ kè Ɓǎɔ̀ mɔ̀ nyɔ dyúáɖò.”
31Púɛɛ, Júù-nyɔ̀ ɓěɔ̀ ɖú ma sɔ́ɔ́-kpò dyí ɖe, ɓɛ́ wa kéɛ ma ɔ dyi taɓaìn. 32Ké Jízɛ̀ cɛ̃ɛ ma wa gbo, ké ɔ ɖá, “Ḿ ɖǎ kũ̀à nɔ̀mɔ̀ dyíin ɓě ɓɛ́ Ɓǎɔ̀ nyí ma ḿ ɓɛ́ ḿ ké ma nyuɛɛ pàɖǎ nyu ɓó ɓě dyúa. Ɔ nyɛ́ kɔ̃̀ jè ɓě mɔ́ ɓɛ́ ɓě kéà ḿ sɔ́ɔ́-kpò dyi taɓaìn nyɛ́?”
33Ké Júù-nyɔ̀ ɓěɔ̀ ɖá, “À se m̀ sɔ́ɔ́-kpò dyi taɓaìn mɔ́ ɓó kũ̀à nɔ̀mɔ̀ dyíin ɖò nyu jè. Kɛɛ ɔ mɔ̀ kà m̀ nyuà Gèɖèpɔ́ɔ̀ ɖɛ gbà kɔ̃ún cɛ̃ɛ kɛɛ jè. M̀ mɔ̀ gàa, kɛɛ m̀ nì vɔ̃uń ɓɛ́ m̀ ké m̀ mìɔùn Gèɖèpɔ́ɔ̀ mú nyu.”
34Hwɛ̀ ké Jízɛ̀ zà ma ɖé wuɖu, ké ɔ ɖá, “Ɔ céè ɖé ɓě mìɔùn nììn gmaɔ̀ mú kà ɓɛ́ Gèɖèpɔ́ɔ̀ cɛ̃ɛ, ké ɔ ɖá, ‘Ɓě mɔ̀ gèɖèpɔ́ɔ̀ ɓěɛ.’ 35À dyuò kà ɓɛ́ ɖɛ Gèɖèpɔ́ɔ̀-cèè-ɖɛ̀ cɛ̃à kɛɛ mɔ̀ jǎà kánáá pūɛ. Ké Gèɖèpɔ́ɔ̀ ɖáìn nyɔ ɓě kɔ̃̀ gbo ɓɛ́ ɔ tò ma kà ɔ wuɖuɔ̀ kɛɛ gèɖèpɔ́ɔ̀ ɓě. 36Ɔ dyi mɔ́ún jè jǔǐn, Ɓǎɔ̀ gã ma ḿ, ké ɔ tò ma ḿ ɓóɖó-kpàà kɔ̃. Nìí, xwɛ̌ ɓě ɓɛ́ìn cɛ̃ɛ kà ɓɛ́ ḿ cɛ̃ Gèɖèpɔ́ɔ̀ ɖɛ gbà kɔ̃ún, sepóɛɖé ḿ cɛ̃ɛ, ké ḿ ɖá, ḿ mɔ̀ Gèɖèpɔ́ɔ̀ Dyú-gààɔ̀ jè kɛ́? 37Ɔ jǔ ké ḿ se ḿ Ɓǎà kũ̀à ɓě nyuɛń nìǐn, nìí, ɓě ɓɔ́ ní wuɖuɔ̀ jǎà poɛ. 38Kɛɛ ḿ dyi kũ̀à ɓěɔ̀ nyuɛń nìǐn, nìí, ɓě mɛ dè wa mɔ̀ùn hwòɖǒ kɔ̃, kɛbì ɓě mɛ se mɔ́ún hwòɖǒ kɔ̃ dè kɛ. Ɓě mɛ nyuɛ náa ɓɛ́ ɓě kéɛ dyí dyuò kánáá pū kà ɓɛ́ Ɓǎɔ̀ nì ḿ mú, ké ḿ nì ɖé Ɓǎɔ̀ mɔ̀ùn múɛ.”
39Ti ɓɛ́ ɔ ɖǎ ma ɖɛ ɓěa cɛ̃ɛ, wa vɔ̃ ɓɛ́ wa ké ma ɔ kpɔ̃ ɖe, kɛɛ ɔ sɔ̀ ma wa xwaún. 40Ké Jízɛ̀ mu ma ɖé Jɔ́nì-nìɔ̀ ɖeín ɖe, ɖé dɛ̀ ɓɛ́ Jɔ̃́ɔ́ pòìn ma kà nyɔǔn níɔ kĩ́ín nyɛ, ké ɔ nì ma ɖé. 41Nyɔ pàɖǎ mu ma ɖé ɔ gbo, ké wa ɖá, “Jɔ̃́ɔ́ se ma zɛ̃̀ìn-ɖɛ̀ ɖò nyu, kɛɛ ɖɛ séín ɓě ɓɛ́ ɔ cɛ̃ ma ɓá gàa nìà kɛ dyíɛɛ mɔ̀ jǎà.” 42Ké nyɔ ɓáún-ɓáún nì ma ɖéɛɛ taɓa ma Jízɛ̀ hwìɖǐǐ.
Цяпер абрана:
Jɔ̃́ɔ́ 10: ƁB02
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Bassa Bible © Bible Society Liberia, 2002.