Jɔ̃́ɔ́ 2
2
Nyɔ́nɔ́-dyi-kpɔ̃-hwɔ̀ nì ɖé Kéénà-hwɔ̀ɖɔ̀ɔ̀ múɛ
1Ti wé sɔ̃́ ɖǎ ma ziɛɛ, wa pa ma nyɔ́nɔ́-dyi-kpɔ̃-hwɔ̀ ɖò ɖé Kéénà-hwɔ̀ɖɔ̀ɔ̀ mú, ɖé Gáɖàɖíì-ɓòɖòɔ̀ kɔ̃. Jízɛ̀ ɖe nì ma ɖé. 2Wa ɖá ma Jízɛ̀ kè ɔ ɖeín-nà-nyɔ̀ ɓěɔ̀ ɖé hwɔɔ̀ kɔ̃ ɖekè. 3Ti nyɔ ɓěɔ̀ ɖǎ ma wã́ìn séín ɓěɔ̀ náa hwɔɛɛ, Jízɛ̀ ɖe cɛ̃ɛ ma ɔ gbo, ké ɔ ɖá, “Wa se wã́ìn ɖò ɓéɖé ɖeo.”
4Ké Jízɛ̀ zà ma ɖé wuɖu, ké ɔ ɖá, “Noò, m̀ se ɓéɖé ɓɛ́ m̀ ké ɖɛ ḿ ké nyuɛɛ ḿ gbo cɛ̃. Ɔ séè ní tiɔ̀ ke.”
5Kɛɛ Jízɛ̀ ɖe cɛ̃ɛ ma gbo-nì-nyɔ̀ ɓěɔ̀ gbo, ké ɔ ɖá, “Ɓě mɛ nyu ɖɛ séín ɓɛ́ ɔ cɛ̃ ɓě gboɛo.”
6Ɔ nì ma náa, Júù-nyɔ̀ ɓěɔ̀ ɓéɖé gma ɓá bũ̌in dèɖè jè dyí. Ɔ jèɛɛ, mɛ-dyàà mɛ̀nɛ̌ìn-ɖò nì ma ɓó, ɓó ní mú po jè. Ní gbǎ-wĩín-wè hm̀m̌ mɔɔ ní gbǎ-wĩín-wè mɛ̀nɛ̌ìn-ɖò ɓɛ́ìn ma wa dyúáɖò mú kpáa. 7Jízɛ̀ cɛ̃ɛ ma gbo-nì-nyɔ̀ ɓěɔ̀ gbo, ké ɔ ɖá, “Ɓě dyíìn mɛ-dyàà ɓěɔ̀ ní mú.” Ké wa dyíìn ma wa té-té. 8Ké ɔ cɛ̃ɛ ma wa gbo ɖe, ké ɔ ɖá, “Ɓě píní ɖé níɔ̀ ɖò, ɓɛ́ ɓě kéɛ hwɔ-ɓǎɔ̀ gbo kpa.” Ké wa kpaa ma. 9Hwɛ̀ ɓɛ́ hwɔ-ɓǎɔ̀ ké ma níɔ̀ wɔ̃ dɔ̃̌ɛɛ, Jízɛ̀ ɖǎa ma wã́ìn mú zɛ̃̀ìn. Hwɔ-ɓǎɔ̀ se dɛ̀ wã́ìn nìà kɛ sɔ̀ ma kɛɛ dyí dyuò, kɛɛ gbo-nì-nyɔ̀ ɓě ɓɛ́ wa píní ma kà níɔ̀ kɛɛ dyuòɛ̀ ma dyí. Ɔ jèɛɛ, ɔ ɖá ma nyɔ́nɔ́-ɓǎɔ̀. 10Ké ɔ cɛ̃ɛ ma ɔ gbo, ké ɔ ɖá, “Nyɔǔn séín nyí ɖéè ɓě wã́ìn nɔ̀mɔ̀ dyíinɔ̀ kĩ́ín, ké wa ɖǎa pàɖǎ náín, nìí, hwɛ̀ ké wa dyà wã́ìn seà ná dyíin nɔ̀mɔ̀ mìɔ kɛ. Kɛɛ mɔ̀ùn ɖǎ wã́ìn nɔ̀mɔ̀ dyíinɔ̀ dyi dè, ké tiɔ̀ ɖǎ kà nì hwɛ̀.”
11Ɖɛ nìà kɛ mɔ̀ ma Jízɛ̀ɛ̀ zɛ̃̀ìn-ɖɛ̀ ɓě ɓɛ́ ɔ nyu ma kɛɛ kĩ́ín-kĩ́ínɔ̀. Ɔ nyuɛ ma ɖéɛ Kéénà-hwɔ̀ɖɔ̀ɔ̀ mú, ɖé Gáɖàɖíì-ɓòɖòɔ̀ kɔ̃. Ɖéɛ̀ ɔ tɛ̀mɛ̀ìn ma ɔ dĩ́ín-dĩ̀ìnɔ̀ nyɔǔn ɓě dyí, ké ɔ ɖeín-nà-nyɔ̀ ɓěɔ̀ taɓa ma ɔ hwìɖǐǐ.
12Ti ɖɛ nìà kɛ ɖǎ ma dyi ziɛɛ, Jízɛ̀ kè ɔ ɖe kè ɔ ɖíí ɓěɔ̀ ɔ kè ɔ ɖeín-nà-nyɔ̀ ɓěɔ̀ mu ma ɖé Kɔ̀pánìà-hwɔ̀ɖɔ̀ɔ̀ mú, ké wa nyu ma ɖé wé gbɛ̀ǐ-gbɛ̀ǐ.
Jízɛ̀ mu ɖé Gèɖèpɔ́ɔ̀ gbǒɔ̀ mú
(Máfíò 21:12-13; Máà 11:15-17; Ɖúù 19:45-46)
13Ti ɓɛ́ Júù-nyɔ̀ ɓěɔ̀ nì ma waà Zĩ̀ìn-Kɔ̃in-hwɔ̀ɔ̀ pauń wɛ̃ɛ, Jízɛ̀ mu ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. 14Ké ɔ dyé ma nyɔ ɓě ɓɛ́ wa nì ma ɓìɖǐ ɓě kè ɓáɖáá ɓě ɔ kè gbúɛ́ ɓě peɖeɛń nyɛɛ ɖé Gèɖèpɔ́ɔ̀ gbǒɔ̀ mú, ké wíɖí-gbo-zĩàìn-nyɔ̀ ɓěɔ̀ kò ma waà téɓèɖè ɓěɔ̀ gbɔi. 15Ɔ nyu ma ɖúú ɓě gbàtò mú, ké ɔ kúmú ma nyɔ ɓěɔ̀ kè ɓáɖáá ɓěɔ̀ kè ɓìɖǐ séín ɓěɔ̀ ɖé Gèɖèpɔ́ɔ̀ gbǒɔ̀ múin. Ɔ dè ma wíɖí-gbo-zĩàìn-nyɔ̀ ɓěɔ̀ téɓèɖè ɓěɔ̀ kíé, ké ɔ ɓeìn ma waà wíɖí ɓěɔ̀ dyi. 16Ké ɔ cɛ̃ɛ ma gbúɛ́-peɖe-nyɔ̀ ɓěɔ̀ gbo, ké ɔ ɖá, “Ɓě zà nɔ̄ ɖɛ ɓě nìà kɛ. Ɓěǐn ɖá ɓɛ́ ɓě kéɛ nyu ɓɛ́ ḿ Ɓǎà gbǒɔ̀ ké ɖɛ-pèɖèìn-naín jǔ.” 17Ɖɛ céèà ɖé Gèɖèpɔ́ɔ̀-cèè-ɖɛ̀ɔ̀ múɛɛ dyi Jízɛ̀ɛ̀ ɖeín-nà-nyɔ̀ ɓěɔ̀ hwìɖǐi. Ɖɛ ɔ cɛ̃à kɛɛ, ɔ kɛ̀.
“Nì gbǒɔ̀ jè kpɔ̃ ḿ hwòɖǒ mìɔ,
ké ní hwòɖǒ-dyùà nì sĩɛń ɓóɛ jè.”
18Ti ɓɛ́ Jízɛ̀ nyu ma ɖɛa ɖé Gèɖèpɔ́ɔ̀ gbǒɔ̀ múɛɛ, Júù-nyɔ̀ ɓěɔ̀ diè ma ɔ dyi, ké wa ɖá, “Zɛ̃̀ìn-ɖɛ̀ɔ̀ nyɛ́ m̀ ɓɛ́ìn nyuɛ, ɓɛ́ ɔ kéɛ nyɔ dyí tɛ̀mɛ̀ìn kà ɓɛ́ m̀ ɓéɖé kpé ɓɛ́ m̀ ké ɖɛa kɛɛ nyuɛ́?”
19Ké Jízɛ̀ zà ma ɖé wuɖu, ké ɔ ɖá, “Ɓě wáɖá Gèɖèpɔ́ɔ̀ gbǒ nìà kɛ, ké wé tã dyi ziín, ní mu ɔ poùn ɖe.”
20Ké Júù-nyɔ̀ ɓěɔ̀ ɖá, “Nyɔ ɓě ɓɛ́ wa po ma gbǒ nìà kɛɛ, wa pòɛ̀n ma zɔ̃ kpáɖá-nyɔ sɔ̃́ sè mɛ̀nɛ̌ìn-ɖò, ké m̀ ɖá m̀ ɓɛ́ìn poɛ ɖe wé tã nyɛ̀nɛ̀ɛ̀ múù?”
21Kɛɛ gbǒ kɔ̃̀ jè Jízɛ̀ nì ma kà cɛ̃iń nyɛɛ, ɔ mɔ̀ ma ɔ kpóɖó-dyùàɔ̀ jè. 22Ɔ jèɛɛ, ti ɓɛ́ ɔ wóɖó ma gĩɔ kɛɛ, ɖɛ ɓɛ́ ɔ cɛ̃ ma kà kɛɛ dyi ma ɔ ɖeín-nà-nyɔ̀ ɓěɔ̀ hwìɖǐi. Ké wa po ma ɖɛ céè ma ɖé Gèɖèpɔ́ɔ̀-cèè-ɖɛ̀ɔ̀ múɛ kè wuɖu ɓě ɓɛ́ Jízɛ̀ cɛ̃ ma kɛɛ jǎà.
Jízɛ̀ dyuò kà nyɔǔn-dyù nyu nìɛ̀ kɛɛ dyí
23Zĩ̀ìn-Kɔ̃in-hwɔ̀ɔ̀ tiín nyɛɛ, Jízɛ̀ nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Ké nyɔ pàɖǎ taɓa ma ɔ hwìɖǐǐ ti ɓɛ́ wa dyé ma zɛ̃̀ìn-ɖɛ̀ ɓě ɓɛ́ ɔ nyu ma kɛ. 24Kɛɛ Jízɛ̀ se ma wa hwòɖǒ kɔ̃ dèɛ̀ ɓɛ́ìn, sepóɛɖé ɔ dyuò ma nyɔǔn séín dyí nɔ̀mɔ̀ dyíin. 25Nyɔ ɖò se ɓéɖé ɓɛ́ ɔ ké ma nyɔǔn jè ɔ gbo cɛ̃, sepóɛɖé ɔ mìɔùn dyuò ma ɖɛ nì ma ɖé wa hwòɖǒ-dyùà múɛɛ dyí.
Цяпер абрана:
Jɔ̃́ɔ́ 2: ƁB02
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Bassa Bible © Bible Society Liberia, 2002.