Jɔnə 3
3
Yeso pó Nikodemɔsə
1Əghâ nə́ ŋwu Falasi yitsə̌ a nə ńchî ə́wɨ́ əlɛ́n yí pə́ Nikodemɔsə, lə́ nə ḿbə́ nətû nə́ Pəjusə. 2Ŋwu nə́ a nə ńgyǐəə á mbô Yeso á nətúʼ ńtíʼ ə́sóŋə á mbô yí ńgə́, “Ndzéʼkə, pəg jî ńgə́ gho lə́ ndzéʼkə páʼ Əsê a tú nə́. Ńté ńgə́ ŋwu tsə̌ a kě ə́wɨ́ chî təmbɔʼ a ghɛd əkyeʼmə́nu pɨ páʼ ghö ghɛd nə́ lɛ̌ pô, tə ńdéʼtə Əsê a chî pó yə́.” 3Yeso a kwěe yí ńgə́, “Maŋ fiʼtə̂ gho nə́ ndə̌ŋdəŋ ńgə́ təmbɔʼ ŋwunə a kě anuə Nəfoonə Əsê jɨ́ tə ńdéʼtə pə́ pɨ ḿbîə a yí ngǎ yitsə̌ pô.” 4Nikodemɔsə a sóŋə á mbô yí ńgə́, “Təmbɔʼ pə́ pɨ ḿbîə a ŋwu lə́ ə́lɛ́ páʼ a pɛ́d nə́ tə ńdɛnə̂? Təmbɔʼ a pɨ ḿbégnə ngǎ yitsə̌ ńkwúnə nəpəm mǎ əyǐ pə́ pɨ ḿbîə yí?”
5Yeso a kwěe yí ńgə́, “Maŋ fiʼtə̂ gho nə́ ndə̌ŋdəŋ ńgə́ tə ńdéʼtə pə pî a ŋwu nə́ nkǐ pó Ajwǐə, təmbɔʼ a kě á mə́m Anuə Nəfoonə Əsê kwú pô. 6Yí páʼ pə́ pî nə́ nə́ na mbɨ lə́ na mbəəmə, yí páʼ pə́ pî nə́ nə́ Ajwi lə́ ajwiə. 7Kɔ a kɨʼnə̂ a gho nə́ anu páʼ maŋ sóŋ nə́ á mbô pɨ ńgə́ pə́ shib ḿbîə gho ngǎ yitsə̌. 8Kəfəələ á kɔ́ʼə lə́ ndú páʼ á kɔŋ nə́, lə́ gho zóʼ ngye əjǐ, lə́ ḿbə́ ńkě ndú páʼ á lǒo nə́ ə́wɨ́ kɨ ndú páʼ á ghɛn nə́ ə́wɨ́ jî pô, á kə́ ḿbə́ lə́ tsɔʼə ə́lɨ́d nə́ ŋwu ntsəm páʼ pə́ pî nə́ yí nə́ Ajwǐə.”
9Nikodemɔsə a sóŋə á mbô yí ńgə́, “Təmbɔʼ ntê anu zɨ chî lə́ ə́lɛ́?”
10Yeso a kwěe yí ńgə́, “Gho lə́ ndzéʼkə pɔ́ pə́ Islɛlə, ḿbə́ ńkě anu zɨ́d zɨ jî?”
11Maŋ fiʼtə̂ gho nə́ ndə̌ŋdəŋ ńgə́, “Pəg sóŋə lə́ anu pəg jî nə́, ńkə́ fiʼtə̂ lə́ anu páʼ pəg jɨ́ nə́, lə́ gho pə́ ńkě anu pəg sóŋ nə́ lə́ pí pô. 12Təmbɔʼ maŋ fiʼtə̂ a gho nə́ mənu mə́ ndu ndəsê nə́ pə́ ńchî pí pô, gho pə ńtíʼ ḿbí lə́ ə́lɛ́ páʼ mbɔʼ maŋ fiʼtə̂ áwɨ́ nə́ mənu mə́ nəpóolə? 13Ŋwu tsə̌ a kě nəpó kə kɔ́ʼə ghɛnə̂ pô, tə ńdéʼtə Mɔ́ Ŋwu páʼ a nə ńdǒ nə́ nəpó ńtsóolə.” 14Ndzaŋə ándó Mosisə a nə ŋ́ŋáŋkə nóolə á kɔŋ məŋkwâʼlə̌ lə́, lə́ ndzaŋ pə́ yǒ nə́ kə́ ə́shib ŋ́ŋáŋkə Mɔ́ Ŋwunə. 15Ńjî ńgə́ ŋwu ntsəm páʼ a pí nə́ yə́, a túg nchîntɨ páʼ ḿmɛdnə̂ ngǎ mɔʼə́. 16Ńté ńgə́ Əsê a nə ńkɔŋ mbî tə ə́fɛ̂ ndaʼ Mɔ́ əyǐ, ńgə́ ŋwu ntsəm páʼ a néŋ nə́ ntɨ́ nə́ yí a yǒ kě kwû pô lə́ pə́ túg nchîntɨ páʼ ḿmɛdnə̂ ngǎ mɔʼə́. 17Lə́ Əsê a nə ńkě túmə Mɔ́ əyǐ lə́ ńgə́ a yǐ néŋ əsáʼə á mbî pô, a nə ńtúmə a yí lə́ ńgə́ a yǐ ńchwádkə mbîə. 18Ŋwu páʼ a néŋ nə́ ntɨ́ nə́ yí, pə́ kě yə́ á mə́m əsáʼ yǐ néŋ pô, lə́ ŋwu páʼ a kě nə́ ntɨ́ néŋ pô a pɛ́d tə́ ńchîə á mə́m əsáʼ ńté ńgə́ a kě ntɨ́ əyí nə́ ndaʼ Mɔ́ Əsê néŋ pô 19Əsáʼ yi wɨ́ chî lə́ ńgə́, nkyaʼ ə́ yǐəə á mə́m mbî, ŋwu məsɔŋə́ á pə́ ńkɔŋ tsɔʼə ndzəmə́ ńtsɛ nkyaʼ ńté ńgə́ ngɛdmə́nu əyí lə́ yi təpɔŋə. 20Ŋwu ntsəm páʼ ä ghɛd nə təpɔŋ a pa nkyaʼ ńkě kɔŋə̂ á mə́ yǐ nə́ á mə́m nkyaʼ pô ńté ńgə́ pə yǐ kyaʼə̂ təpɔŋ əyǐə. 21Lə́ ŋwu páʼ ä ghɛd nə́ mənu mə́ tɨ́ nə́ ndə̌ŋdəŋ a yǐəə á mə́m nkyaʼ ńgə́ mbɔʼ pə́ pyádnə ńjɨ́ ńgə́ mənu páʼ a ghɛd nə́, a ghɛlə̂ lə́ nə́ əlɛ́n Əsê.
Yeso pó Jɔnə
22Ndzaŋə ándó Yeso a nə ḿməgtə̂ nə lə́, pópə ngaŋə́zoŋə́ndzəm əjí ghɛnə̂ á mboʼ Judya, ńchî ə́wɨ́ pó po nə́ ndɛd yitsə̌ á fɛ̂ nkǐ nə́ pəənə. 23Jɔnə a nə ńkə́ ńtə́ fɛ̂ nkǐə á Anonə, á chî nə́ ḿbáatə Salɛm lə́, ńté ńgə́ nkǐ nə ńchî ə́wɨ́ nə́ənə, pɨ pə́ tíʼə ńgyǐəə ńkwá nkǐə. 24Nə́ ndɛd zɨ́d zə̂ Jɔnə a nə ńkě atsáŋ kə́ kwúnə pô.
25Əghâ nə́, ngaŋə́zoŋə́ndzəm Jɔn pópə ŋwu Jusə yətsə̌ nə tə ńdzɔŋnə̂ ńté noŋkə Pəjusə páʼ á sóŋ nə̈ ńgə́ pə tə́ sogtə̂ mbəəmə. 26Pó tíʼ ńgyǐəə á mbô Jɔn ə́sóŋ ńgə́, “Ndzéʼkə, ŋwu ə́wə́ páʼ pɨ yí nə ńchî nə́ á nkǐ Jodan á əlá əsáʼ mənu, páʼ gho nə sóŋ nə́ anu ńté yí lə́ a tə́ fɛ̂ nkǐə aliʼə́ nə́, ŋwu ntsəm a tíʼə ńgɛnə̂ á mbô yə́.”
27Jɔnə á kwěe ńgə́, “Təmbɔʼ ŋwunə a kě ajûtsə́ kwá tə́ ghə́ á fɛ̂ Əsê nə́ yí páʼə á lǒo nə́ á nəpó pô. 28Təmbɔʼ pɨ pətsəm nô ngoolə mə ńgə́ maŋ nə sóŋ ńgə́, maŋ kě lə́ Yi Ńtsəʼ nə́ wə́ pô, lə́ pə́ nə ńtúmə mə ńgə́ maŋ kwá mbi əjǐə. 29Ŋwu páʼ a túg nə́ mɔ̂ məngyě lə́ tǎdndzɔʼə́, əshu tǎdndzɔʼə́ páʼ a tɨ́ nə́ nəpɛnə́ yí ńdzóʼə atséebə ají, a chígə́ ńkɔŋtə̂ á mə́ zóʼ nə́ ngye tǎdndzɔʼə́, lə́ələ́ pə ńgə́ akɔŋtə mə a lwɛ́nkə ntə́əmə mə əghâ nə́. 30Ńté ńgə́ nəgháʼ əyǐ á yǐ shib ghɛn nə́ mbi, maŋ tə́ ńkə́gə ńgɛnə̂.”
Ŋwu Páʼ a nə Ńdǒ nə Nəpó Ńtsóolə
31Ŋwu páʼ a lǒo nə nəpó ńtsóolə á tsɛɛlə̂ ŋwu ntsəmə. Ŋwu páʼ a pə nə́ ŋwu mbî a chî lə́ á ndu mbîə, ńkə̈ sóŋə lə́ mənu mə́ chî nə́ á ndu mbîə. Lə́ ŋwu páʼ a lǒo nə́ nəpó ńtsóolə a tsɛ pɨ pətsəmə. 32Ä sóŋə lə́ mənu páʼ a jɨ́ nə́ ńkə́ ńdzóʼə, Lə́ ŋwu tsə̌ a pə ńkě atséebə ají pí pô. 33Lə́ ŋwu páʼ a pí nə́ nkɨ yi ə́wə́, a pí ńgə́ Əsê atsáb ndə̌ŋdəŋə́. 34Ńté ńgə́ ŋwu páʼ Əsê a tú nə́ yə́ a sóŋ lə́ atséebə Əsê, ńté ńgə́ Əsê a fɛ̂ Ajwiə ajíə á mbô yí tsɔʼə tə ŋɔʼtə̂. 35Tǎ a kɔŋə̂ Mɔ́ əyǐə ńtíʼ ə́fɛ̂ ajúmə atsəm á mbô yə́. 36Ŋwu páʼ a néŋ nə́ ntɨ́ nə́ Mɔ́ əyǐ, a túg nchîntɨ páʼ ə́ mɛdnə̂ nə́ ngǎ mɔʼə́, ŋwu páʼ a kě nə́ nə́ Mɔ́ əyǐ zóʼnə pô a yǒ kě mbî jî pô, atsáŋə Əsê á kə́ ńchîə mbɨ yə́.
Цяпер абрана:
Jɔnə 3: azo
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце