Lukasə 23
23
Pə́ Lɔgə̂ Yeso Ńgɛnə̂ á Mbi Payilɛlə
(Mat 27.1, 2, 11-14; Mag 15.1-5; Jɔn 18.28-38)
1Ənɔ pɨ wɨ́ ətsəm tíʼ ńdǒo á əsê ńdɔgə̂ yí ńgɛnə̂ á mbi Payilɛlə, 2Ńchúʼə a mə́ tə́m nə́ əsóomə atû yí ə́sóŋə ńgə́, “Pəg zə́ənə ŋwu nə lɛ̌ a tə́ ḿmaʼə̂ ajwaʼlə a mə́m pɨ pɛn, ə́sóŋə nə́ pó ńgə́ kɔ pó pɨ ńtû nchubə aláʼə á mbô Kasa, ḿbəənə̂ ə́fóŋ mbɨ əjǐ nə́ yi páʼ Əsê á tsəʼ nə́ ándó əfo.” 3Payilɛlə a pítə Yeso ńgə́ “Gho lə əfo Pəjus?” A kwěe ńgə́ “Gho sóŋ ə́lə́ələ́.”
4Payilɛlə a sɛdnə̂ ə́sóŋə á mbô Pətə́kɔʼ pə́ ngaŋə́pêsê ḿbéenə ŋwu ntsəm ńgə́ “Maŋ kě anu ŋwu nə́ á fankə̂ nə́ jɨ́ pô.”
5Pó ghɛn nə́ mbiə á mə́ něe nə́ ńgə́ “A tsəŋ məntɨ́ mə́ ŋwu ntsəm á mə́m Judya nə́ ndzeʼkə́ əjǐə. A kə chúʼ lə á Galiliə a pɛn ńtíʼ ńgyǐ ə́fɛ̂ əghâ nə́.”
Pə́ Túmə Yeso a Mbô Ɛlɔdə
6Payilɛlə a kə zóʼə atsáb jɨ lə́ ḿbítə ńgə́ “ŋwu ghɛn lə́ ŋwu Galiliə?” 7Ndzaŋə a kə zóʼ nə́ ńgə́ a lǒo lə́ á əláʼ əfo Ɛlɔd lə́, ńtúmə yə́ á mbô yə́. Ɛlɔd a kə chîə Jɛlusalɛm nə́ ndɛd yi wə́.
8Ndzaŋ Ɛlɔd a kə jɨ́ nə́ Yeso lə́, ńkɔŋtə̂ lɛ̌ tətətə ńté ńgə́ ndi sag páʼ a kə̈ lɔ nə́ á mə́ jɨ́ nə́ yə́. A kə zóʼ mənu mimə nɨ́ nə́ ńté yə́, ńtíʼə ńdoonə̂ mə jɨ́ nə yə́ a ghɛd əkɨʼnəmə́nuə. 9Ɛlɔd a kə pítə yí nə́ ətsáb pi nɨ́ nə́, a pə́ ńkě táʼ kwěe pô. 10Pətə́kɔʼ pə́ ngaŋə́pêsê pópə ngaŋə́zéʼkə pənoŋkə pó fɛ́d ńtɛ́nə ńtə́əmə á mbi ńtíʼə ə́fyáalə ńtə́m əsóomə atû yə́. 11Ɛlɔd pópə ngaŋə́maʼə́ntso əjí ə́ wágə yí ńtíʼə ńnyegnə̂ yə́, ńgwê chigə atsəʼ yitsə̌ á mbɨ yí ḿbɨ ńtúmə yə́ á mbô Payilɛlə. 12Ɛlɔd pó Payilɛd nə ḿbə́ lə́ ngaŋkə́peenə́, ə́fɛ́lə alě wə̂ pó tíʼ pəshunə́.
Pə́ Sóŋ Ńgə́ pə́ Jwítə Yeso
(Mat 27.15-26; Mag 15.6-15; Jɔn 18.39–19.16)
13Payilɛlə a tsɛntə̂ Pətə́kɔʼ pə́ ngaŋə́pêsê nə́ mətû mə́ aláʼ mətsəm ḿbá pɨ pi wə́, 14ə́sóŋə á mbô pó ńgə́ “Pɨ kə yǐ nə́ ŋwu nə́ á mbô maŋ ə́sóŋ ńgə́ a tə́ ḿmaʼə̂ ajwaʼlə á mə́mə aláʼə. Maŋ pɛn ńnáŋə yə́ á mbi pɨ lə́ ńkě zə́ənə anuə á fankə̂ nə́ á mə́m ndɛn mənu páʼ nə́ néŋ nə́ atû yí lə́ pô. 15Tsɔʼə Ɛlɔd a kě afankə́nuə ají kə́ ńjɨ́ pô, lə́ ghɛd ə́lə́ələ́ a pɨ ńtúmə yə́ á mbô pɛnə̂. Nə́ jî ńgə́ ŋwu nə́ a kě anu yətsə́ ghɛd mbɔʼ pə́ jwítə yí pô. 16Lə́ maŋ yǐ ə́shúmə yí ə́ pə́ mɛdtə̂ yə a ghɛnə̂.” 17#23.17 Pətsə́ əŋwaʼlə ə́ kě nkaŋ 17 túg pô. Pi pətsə́ pə́ pegə̂ zɨ́d ńgə́, “Ndɛd akɔŋtə Ndzáʼkə ntsəm ə́ kə koʼ lə́, Payilɛlə a shib fógə táʼ ngaŋə atsáŋə á mbô pɨ píə.”
18Pó pə́ ńkyéŋ nə́ táʼ ngye ə́sóŋ ńgə́ “Pə́ jwítə ŋwu nə́, ḿmɛdtə̂ Balabasə á mbô pəgə́.” 19(Pə́ kə néŋə Balabasə atsáŋ ńté ńgə́ a kə maʼə̂ ajwaʼlə á mə́mə aláʼə, ḿbɨ ńjwítə ŋwunə.)
20Payilɛlə a tséebə á mbô pó ngǎ yitsə̌ ńté ńgə́ a kə tə́ ńdoonə̂ á mə́ mɛdtə̂ nə́ Yeso. 21Pó pə́ ńkə́ ńjwáglə tsɔʼə jwáglə nə́ ńgə́, “Kwumtə̂ yə́, kwumtə̂ yə́!”
22Tə á pə́ ngǎ teelə́, Payilɛlə a pɛ́lə ḿbítə ághɔ́b ńgə́, “Ńkwumtə̂ yí ńté akə̂? Ŋwu nə́ a ghɛd lə́ ə́lɛ́? Maŋ kě zə́ənə anu yətsə́ páʼə a ghɛd nə́ təmbɔʼ pə́ jwítə yí pô. Ńdaŋ ə́lɨ́d, maŋ yǐ ghɛd pə́ ə́shúmə yí ḿmɛdtə̂ yə́.”
23Lə́ pó pə́ ńkə́ ńněe tsɔʼə něe nə́ nə́ pətə́kɔʼ pə́ ngye ńgə́ pə́ kwumtə̂ yə́, tə a pímə azóobə́. 24Payilɛlə a kwéʼnə ḿbí ńdzoŋ ndzəm əzoobə́. 25A mɛdtə̂ ŋwu páʼ pó kə sóŋ nə́ ńgə́ a mɛdtə̂ lə̂, á kə pə́ ḿbə́ lə́ ŋwu páʼ pə́ kə néŋ nə́ a yə́ atsáŋ ńté ńgə́ a kə maʼə̂ ajwaʼlə ḿbɨ ńjwítə ŋwu lə̂. Ḿbí ńdzoŋ ndzəm əzɔb ə́fɛ̂ Yeso á mbô pô.
Pə́ Kwumtə̂ Yeso
(Mat 27.32-44; Mag 15.21-32; Jɔn 19.17-27)
26Ndzaŋ pó kə lɔg nə́ Yeso ńtə́ ńgɛnə̂ lə́, ńdzə́ənə Saamun páʼ a fɛ́d nə́ á Silya lə̂, a tə́ ńkwə̂ afoonə. Pó waamə̂ yí ə́fyáalə yí ńgə́ a twáamə atǐə apagləpaglə zə̂ ńchîə á ndzəm Yeso nə́ zə́ələ́. Saamunə a kə lǒo lə́ á mə́mə aláʼ ńtíʼə ḿbəənə̂ yə́.
27Ənɔ ŋwuməsɔŋ ə́ kə chîə á ndzəm yə́, ḿbá pəngyě páʼ pó nə̈ ńkyéŋ nə́ ə́fɨnə̂ ńté yə́. 28Yeso sɛdnə̂ ə́sóŋə á mbô pó ńgə́ “Pəngyě pə́ Jɛlusalɛm, kɔ nə́ kyéŋ ńté pə́ mə, kyéŋ nə́ ńté məmbɨ mə́ənə́ ńkə́ ńkyéŋ ńté pɔ́ pə́ənə́. 29Ńté ńgə́ ndɛd ə́ tə́ ńgyǐəə páʼ pə́ yǒ nə́ ə́sóŋ ńgə́, mbɔŋə́ yə nkyě məngyě, pó məngyě páʼ a kě nə́ kə̈ pîə pô, nə́ mbɨ́ páʼ mə́ kě nə́ mɔ́ kə̈ nɔ́ŋkə pô. 30Pó yǒ tíʼə ə́sóŋə nə́ məŋnkwəənə ńgə́, wǔəə á ndu pəgə́, ə́ kə̈ ə́sóŋə nə́ məmbá ńgə́ kə́bkə áwə́gə́. 31Ńté ńgə́ mbɔʼ pɨ pó faʼ ndɛn mənu ghɛn nə́ atǐə yə féŋtə nə́, á yǐ ńtíʼ ḿbə́ pə́ ə́lɛ́ nə́ atǐ yə júm nə́?”
32Pə́ nə ńdɔg mbyâŋnə yitsə́ zɛ́n pɛ̌ páʼ pó nə ḿbə́ nə́ ngaŋə́fanə ńgɛnə̂ á mə́ jwítə nə́ ághɔ́b pópə Yeso. 33Pó nə ńgyǐ tə ńkoʼə̂ aliʼ yitsə̌ páʼ pə́ fóŋ nə́ ńgə́ Aghaglə́tûə, ńkwumtə̂ yí ə́wɨ́, ḿbá ngaŋə́fanə zə́ zɛ́n pɛ̌, táʼə á əlá apô yə tɨ, táʼə á əlá apô yí yə kwaabə. 34Yeso a sóŋ ńgə́, “Tǎ, ləgnə̂ fankə əghoobə́, ńté ńgə́ pó kě jîə anu pö ghɛd nə́ pô.” Pó tíʼ ńtə́m pilə́ á mə́ ghabtə̂ nə́ ətsəʼ əpíə.
35Pɨ pə́ nə ńtɨ́ ńtə́ ńnáŋə yə́, mətû mɔ́b mə̈ tûə ńnyegnə̂ yí ə́sóŋə ńgə́ “A kə̈ kwáalə pəənə, tíʼə a kwá mbɨ əjǐ páʼ təmbɔʼ a jî ńgə́ yí lə́ yi páʼ Əsê tsəʼ nə́ ńkə́ ńtúmə.”
36Ngaŋə́maʼə́ntso pó fɛ́d ńgyǐ ńtíʼə ńnyegnə̂ yə́, ə́fɛ̂ məloʼ mimə tsə́g nə́ nə́ yə́, 37ńtíʼə ə́sóŋə ńgə́, “Mbɔʼ gho pə́ əfo Pəjus gho chwádkə mbɨ əzo.”
38Pə́ kə ŋwaʼlə̂ aŋwaʼlə ḿbanə̂ atû yí páʼ á sóŋ nə́ ńgə́ “Lɛ̌ Əfo Pəjusə.”
39Táʼ ngaŋəfanə wə̂ yitsə̌ pə́ nə ńkwumtə̂ nə́ ághɔ́b po lə́ a tíʼə ńnyegnə̂ yí ə́sóŋə ńgə́, “Gho kě lə́ yi páʼ Əsê a tsəʼ nə́ lə́ pó, chwádkə mbɨ əzo ńkə́ ńchwádkə áwə́gə́.”
40Lə́ yitsə̌ ngaŋəfanə wə̂ a sáʼə yí ə́sóŋ ńgə́, “Mbɔʼ gho kě Əsê pɔ́g páʼ pə́ tsɔ́ʼtə nə́ əsáʼ əwɛn po ndə̌ŋdəŋ? 41Á koʼnə̂ ńgə́ pɔ̌ zɨ́ ngə́ʼ ńté ńgə́ pɔ̈ kwûə lə́ nə́ ngɛdmə́nu əghɔ̂, lə́ ŋwu nə́ a pə́ ńkě anuə təpɔŋ yətsə́ ghɛd pô.” 42Ḿbɨ ə́sóŋ ńgə́, “Yeso, kwúmtə mə á əghâ ándó páʼ gho kwú nə́ á mə́mə anuə nəfoonə azô.”
43Yeso a kwěe yí ńgə́ “Mäŋ fiʼtə̂ a gho nə́ ndə̌ŋdəŋ ńgə́ ə́sɛ̂n pɔ̌ yǐ chîə á paladayisə.”
Nəwû Yeso
(Mat 27.45-56; Mag 15.33-41; Jɔn 19.28-30)
44A kə pə́ á ntɨ̌numnə, mə́numə pə́gnə, ndzəmə́ ə́ wǔəə apeŋ tə ńkoʼ nə́ pəmə́nu pə́ teelə́, 45atsəʼə́ a kə chî nə́ á mə́m tə́kɔʼndɛ̂sê á ghabnə̂ əpag pɛ̌. 46Yeso fóŋnə nə́ tə́kɔʼ ngye ńgə́, “Tǎ, maŋ fɛ̂ ajwiə mə á mə́mə atéelə apô azô.” A kə sóŋ ə́lɨ́d lə́, ńtíʼ ńkwûə yə́.
47Nətû nə́ ngaŋə́maʼə́ntso nə́ kə zə́ənə anu páʼ á laŋ nə́ ńtíʼə ńgóʼkə Əsê ə́sóŋə ńgə́, “Lə́ ndə̌ŋdəŋə́, ŋwu nə́ a nə ḿbə́ lə́ ŋwu yi əshîʼnə!” 48Ŋwu ntsəm páʼ a kə chî nə́ aliʼ yi wɨ́ ńdzə́ənə anu páʼ á laŋ nə́, a kə póʼə apaʼ ńkwə̂ yə́. 49Lə́ ŋwu ntsəm páʼ a kə jî nə́ yí, ḿbá pəngyě páʼ pó kə zoŋ nə́ yí ə́fɛ́lə Galili, pó kə tə́əmə á ndi yi sɛ ńtíʼə ńnáŋ ndɛn mənu ghɛnə́.
Pə́ Twə́ŋə Yeso
(Mat 27.57-61; Mag 15.42-47; Jɔn 19.38-42)
50Ŋwu tsə̌ a nə ńchî ə́wɨ́ pə̈ fóŋə nə́ Jɔsɛfə, a nə ə́fɛ́d lə́ aláʼə Alimatya á mboʼ Judya. A nə ḿbə́ lə́ ŋwu yi əshîʼnə ńkə́ ńtɨ́ ndə̌ŋdəŋə́. 51A nə ḿbǎtə ḿbə́ pə́ táʼ ngaŋə́sáʼə́məsáʼ lə́, ḿbə́ ńkě kɔŋ əsêndú páʼ pɨ pɨ pə́ nə̈ əsáʼ nə̈ məsáʼ ə́wɨ́ pô, A nə ńkě kə́ ḿbímə anu pó nə̈ faʼ nə́ pô. A nə ńtə́ ḿbyáabə anuə nəfoonə Əsê. 52A kə ghɛnə̂ á mbô Payilɛd ḿbítə akwûə Yeso, 53ńtíʼ ńtsóokə zə́ələ́ á əsê ńdə́mə yí nə́ fúfúə apagə atsəʼ yə əshîʼnə ńnéŋə á mə́mə aghəʼ páʼ a nə ńtóŋ nə́ á mə́m ngwúb páʼ pə́ kě nə́ ŋwu tsə̌ ə́wɨ́ kə̈ néŋə pô. 54Alě yəwə́ á nə ḿbə́ ńkə́ ḿbə́ alě achwíʼtə əpúmə, ńté ńgə́ alěláʼə́sê #23.54 Alěláʼə́sê: Alěláʼə́sê nə ḿbə́ lə́ alě pə nə̈ ńkě anu yitsə́ faʼə̂. á nə ńtə́ ḿbáatə.
55Pəngyě pə́ páʼ pópə Yeso ə́ kə lǒo nə́ Galili lə́, pó zoŋə̂ Jɔsɛf ńgɛn ńdzə́ənə aghəʼ zə̂ ńkə́ ńjɨ́ ndzaŋə ándó akwûə yə́ noŋnə̂ nə́ ə́wə́. 56Ńtíʼ ńkwə̂ ńtsoŋkə̂ məghɔ́d mə́ azɔ́ʼə akwub mimə azagə́ yə əshîʼnə pópə əpú náʼə á mə́ zɔ́ʼ nə́ akwûə Yeso ə́wə́, Alěláʼə́sê a nə ḿbɛn ńkoʼ lə́ pó jwitə̂ ndzaŋ páʼ noŋkə á kə nɨd nə́.
Цяпер абрана:
Lukasə 23: azo
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце