Lukasə 7
7
Yeso a Tsóʼə Ngaŋəfaʼ Nətû nə́ Ngaŋə́maʼə́ntsoolə
(Mat 8.5-13)
1Ndzaŋ Yeso a kə məgtə̂ nə á mə́ sóŋ nə́ ndɛn mənu a pěʼ nə̈ ńdoonə̂ ńgə́ pɨ pə́ zóʼ lə́, ńkwú ńgɛnə̂ Kapanawumə. 2Nətû nə́ ngaŋə́maʼə́ntso nətsə́ nə́ kə chî ə́wə́, ngaŋəfaʼ əyǐ yitsə̌ páʼə a kə kɔŋ nə́ tə́shúnə́ a tə́ ńgoonə̂ tə ńtə́əmə á mə́ kwû nə́. 3Ndzaŋ nətû nə́ ngaŋə́maʼə́ntso zə̂ nə́ kə zóʼ nə́ anu ńté Yeso lə́, ńtú mətû mə́ pəjusə mətsə́ á mbô yí ńgə́ a yǐ ńtsóʼə ngaŋəfaʼ əyǐə. 4Pó yǐəə á mbô Yeso ńdánə ńchíg ḿbóʼmbô ə́sóŋə ńgə́, “Ŋwu nə́ a lánə ńkoʼnə̂ təmbɔʼ gho kwáalə yə́, 5ńté ńgə́ a kɔŋə̂ aláʼə azə́g ḿbɔ́ ndɛ̂ aghóʼkə Əsê á mbô pəgə́.”
6Pópə Yeso ghɛnə̂, ndzaŋ pó nə ńtíʼ nə́ ḿbáatə ndɛ̂ nətû nə́ ngaŋə́maʼə́ntso zə́ lə́, a tú ngaŋmə́ko əjí ńgə́ pə sóŋ nə́ Yeso ńgə́, Mmaʼmbî kɔ gho jwaʼ mbɨ əzo, “Maŋ kě koʼə̂ ŋwu mbɔʼ gho kwúnə á ndɛ̂ maŋ pô, 7kɨ ńkoʼə̂ ŋwu mbɔʼ maŋ tə́əmə á mbi gho pô. Lə́, sóŋ tsɔʼə táʼə anuə, ngaŋəfaʼə mə a yǐ yáŋə. 8Maŋ kə́ ḿbə́ azá lə́ ŋwu ńdzóʼə á mbô nətûə, ńkə́ ńtúg ngaŋə́maʼə́ntso pə́ kə̈ ńdzóʼə á mbô maŋə. Mäŋ sóŋə á mbô ghɛn ńgə́, ‘Ghɛnə̂,’ á ghɛnə̂, ə́sóŋə á mbô yǐ ńgə́, ‘yǐəə’ a yǐəə. Ḿbɨ ə́sóŋə á mbô ngaŋəfaʼə mə ńgə́ faʼ ńgə́, á kə́ ə́faʼə̂.”
9Ndzaŋ Yeso a kə zóʼ nə́ anu jɨ lɛ lə́, á kɨʼnə̂ yə a sɛdnə̂ ə́sóŋə á mbô ənɔ pɨ ə́ kə chî nə́ a ndzəm yí lə́ ńgə́, “Mäŋ fiʼtə̂ áwɨ́ ńgə́ tə ńkoʼə̂ pə́ á mə́m Islɛl maŋ kě mbimə́ ándó jɨ kə́ zə́ənə pô.” 10Pɨ pə̂ páʼ pə́ pěʼ nə́ ńtúmə ághɔ́b lə́ pó tə́ ḿbəənə̂ á ndɛ̂ ńdzə́ənə ngaŋəfaʼ nətû nə́ ngaŋə́maʼə́ntso zə̂ a yáŋə yə́.
Ndzaŋ Yeso a Júmkə nə́ Mɔ́ Nkog Məngyě Yitsə̌
11Mɔ́ akəmə ndɛd yitsə̌ á laŋ, Yeso a ghɛnə̂ aláʼ yitsə̌ pə̈ fóŋə ńgə́ Nɛnə. Ngaŋə́zoŋə́ndzəm əjí pópə mɛ́ ənɔ pɨ pətsə́ ə́ zoŋə̂ yə́. 12Ndzaŋ páʼə a kə koʼ nə́ á ndú páʼ ə́ kwú nə́ á aláʼ yi wɨ́ lə́, pə́ twáamə akwûə ŋwu ńtə́ ə́fɛ́lə nə́ zə́ələ́, a pə́ ndaʼ mɔ́ mbyâŋnə a kə chî nə́ á mbô nkog məngyě yitsə̌. Mɛ́ ənɔ pɨ pətsə́ á kə chîə á ndzəm məngyě yi wɨ ə́fɛ́lə aláʼ yi wə́. 13Mmaʼmbîə a kə zə́ənə nkog məngyě wɨ́d ghɛn ńtíʼ ńkó mələ́ŋ mí ə́sóŋə á mbô yí ńgə́, “Kɔ gho kyéŋə,” 14ńtíʼ ńgɛn ńkwum nkwumə akwûə ŋwu wə̂. Pɨ pə́ pěʼ nə́ ḿbeʼə̂ wɨ́d lə́ pó tə́əmə, a sóŋ ńgə́, “Mɔ́ ngwəshu, mäŋ sóŋə á mbô gho ńgə́ gho lǒo á əsê!” 15Akwûə ŋwu yəwə́ á lǒo á əsê ńnáanə ńchúʼə á mə́ tsáb nə́, Yeso a pɨ ńkə́ ńtíʼ ə́fɛ̂ yə́ á mbô mǎ əyǐə.
16Ŋwu ntsəmə nə ḿbɔ́gə anu yə wɨ́ lɛ tətətə, pó tíʼə ńgóʼkə Əsê ə́sóŋə ńgə́, “Ntûsê yi ngweŋə́ a yǐəə á mbô pɛnə̂, Əsê ə́ yǐəə á mə́ kwá nə́ pɨ píə!”
17Atsáb ńté anu jɨ páʼ Yeso a kə ghɛd nə́ lə́, á nə ńnyinə̂ á mə́m əlá aláʼə Judya tsɔʼə ntsəm ḿbá ngaŋmə́peelə.
Yeso pó Jɔn Əfɛ̂nkǐə
(Mat 11.2-19)
18Ngaŋə́zoŋə́ndzəm Jɔn nə ə́fiʼtə̂ yi nə́ ndɛn mənu ghɛn tsɔʼə ətsəmə. A fóŋə ághɔ́b pə́ pɛ̌ 19ńtúmə á mbô Mmaʼmbî ńgə́ pó pítə yí ńgə́, “Gho lə́ ŋwunə ándó pə́ nə ə́sóŋ nə́ ńgə́ gho tə́ ńgyǐəə lə́ kɨ pəg pyáabə yi ndaʼə?”
20Pɨ pipə wɨ́ pó yǐəə á mbô Yeso ə́sóŋ ńgə́, “Jɔn Əfɛ̂nkǐə a ghə́ pəg yǐ ḿbítə gho ńgə́, ‘Gho lə́ ŋwunə ándó páʼ pə́ kə sóŋ nə́ ńgə́ a lǒo yǐ lə́ kɨ pəg pyáabə yi ndaʼə?’ ”
21Tsɔʼə əghâ yi wɨ́, Yeso a tsóʼ pɨ pi nɨ́ nə́ nə́ məghɔ mɔ́b, ńtsóʼ məghɔ mə́ təpɔŋ, ńkəm əjwi təpɔŋə á mbɨ pɨ, ńkə́ ńgɛd pəfəg pə́ jɨ́ əliʼə́. 22Ńtíʼ ńkwěe ngaŋə́zoŋə́ndzəm Jɔn ńgə́, “Ghɛn nə́ ə́sóŋə Jɔn nə́ anu páʼ pɨ yǐ nə́ ńjɨ́ ńkə́ ńdzóʼə: pəfəg pə́ jɨ́ əliʼə́, pəkɔ́ŋə́sê pə́ nyinə̂, ngǎŋnkaʼ ə́ ŋwaʼə̂, əkə̌tû ə́ zóʼ əliʼə́, pəkwû pə́ júmnə, pə́ kə́ ńnáŋkə nkɨ yi əshîʼnə á mbô pəpóŋə. 23Mbwɔ́dnə ə́ chîə á mbô ŋwu páʼ atûə ajíə á kě nə̈ koʼlə̂ ńté mə pô.”
24Əghâ ándó məntú mə́ Jɔn mə́ nə ńgɛn nə́ lə́, Yeso a chúʼə á mə́ fiʼtə̂ nə́ pɨ nə́ anu ńté Jɔn ə́sóŋə ńgə́, “Əghâ ándó pɨ nə ńgɛn nə́ á kɔŋ məŋkwâʼlə̌ á mə́ tég nə́ Jɔn lə́, pɨ nə ńkwaŋ ńgə́ pɨ yǐ jɨ́ lə́ akə̂? Á nəyeŋ páʼ kəfəələ á chiʼ nə́? 25Ńchî ə́lɨ́d pô, pɨ nə ə́fɛ́d ńgɛn lə́ á mə́ jɨ́ nə́ akə̂? Á ŋwu páʼə a wê nə́ ətsəʼ pi əshîʼnə? Ngá, pɨ pə̈ wê nə́ ətsəʼ pi əshîʼnə ḿbəənə̂ ńtúg əpú nkáb pö chîə lə́ á mə́m məntɔ́ʼə. 26Fiʼtə̂ nə́ mə, nə́ kə ghɛnə̂ apeŋ lə́ á mə́ jɨ́ nə́ akə̂? Á ntûsê? Lə́ ndə̌ŋdəŋ mäŋ fiʼtə̂ nə́ áwɨ́ ńgə́ pɨ kə zə́ənə ŋwu páʼə a tsɛ nə́ ntûsê. 27Ńté ńgə́ Jɔn lə́ ŋwu páʼ atséebə Əsê á sóŋ nə́ ńgə́, ‘Əsê a sóŋ ńgə́, lɛ̌ ntúmə mə, maŋ yǐ nə́ ə́ túmə yə́ á mbi pəənə́ a ghɛn ŋ́ŋáʼ ndúmə á mbô pəənə́.’ ” 28Yeso a ghɛn nə́ mbiə á mə́ sóŋ nə́ ńgə́, “Mäŋ kyaʼə̂ áwɨ́ ńgə́, á mə́m pɨ páʼ lə́ pî nə́ mengyě ḿbîə ághɔ́b, ŋwu tsə̌ páʼ a tsɛ nə́ Jɔnə a kě ə́wɨ́ chî pô. Lə́, chigə mɔ́ kə́nyaŋ ŋwunə á mə́mə anuə nəfoonə Əsê, a tsɛɛlə̂ yə́.”
29Ŋwu ntsəm páʼə a kə chî nə́ aliʼ yi wɨ́ tə ḿbá ngaŋə́kwáalə́ nchubə aláʼ, əghâ ándó pó kə zóʼ nə́ atséebə Yeso lə́, ḿbí ńgə́, ndú Əsê lə́ yi ŋwaʼ nə́. Ńté ńgə́ pó nə ńkwá nkǐə á mbô Jɔnə. 30Lə́ Pəfalasi pópə ngaŋə́zéʼkə pənoŋkə, pó kǐə ághóobə́ akwaŋə anu páʼ Əsê a nə ńtúg nə́ ńté ághóobə́. Ńté ńgə́ pó nə ńkě nkǐə á mbô Jɔn kwá pô.
31“Əghâ nə lɛ̌, mbɔʼ maŋ lánə ə́fiʼkə̂ pɨ pə́ ngoʼ pɨ lə nə́ akə̂? Pó chî lə́ ándó akə̂? 32Pó chî lə́ ándó pɔ̂nkə̂ pə́ náanə á aliʼə́ məteenə́, ńtíʼə ə́fóŋ ngaŋmə́ko əzɔ́b ə́sóŋə ńgə́, ‘Pəg póʼə apɛ́nə́ndzɔ́ʼə́ á mbô pəənə́, lə́ nə́ pə́ ńkě pɛ́n pô. Ńdzɔb mənkǐ mə́ nəwûə á mbô pəənə́, lə́ nə́ pə́ ńkě kyéŋ pô.’ 33Jɔn Əfɛ̂nkǐə a kə yï ńchîə tə́ jî məjî ńkə̈ ńchîə tə́ nô məloʼ, nə́ sóŋ ńgə́, ‘A túgə pɛ̌sê!’ 34Mɔ́ ŋwunə a pɛn ńgyǐəə, ńtə́ ńjîə ńkə́ ńnô, nə́ sóŋ ńgə́, ‘A jîə tə́shú ńkə́ ḿbɛ́ɛlə məloʼə, ḿbɨ ḿbə́ ngaŋəko ngaŋə́kwáalə́ nchubə aláʼ pópə ngaŋə́ghɛlə təpɔŋə!’ 35Pɨ páʼ pó pí nə́ ajíənuə Əsê pö nəələ̂ ńgə́ zə́ələ́ á koʼnə̂.”
Yeso á Ndɛ̂ Ŋwu Falasi Yitsə̌
36Ŋwu Falasi yitsə̌ a kə láʼ ńgwúnə Yeso ńgə́ a yǐ pó yí jî məjîə á ndɛ̂ yə́. Yeso a ghɛnə̂ á ndɛ̂ yí ńnáanə á əsê á mə́ jî nə́ məjîə. 37Məngyě yitsə̌ a kə chîə aláʼ wɨ́d wə̂ páʼə a kə pə́ nə́ ngɛdtəpɔŋə, ńdzóʼ ńgə́ Yeso a tə ńjîə məjîə á ndɛ̂ ŋwu Falasi wə̂ ńtíʼ ńgyǐ nə́ fúfú ntsə́ŋ məghɔ́d mə́ azɔ́ʼə́kwub mimə ləmkə̂ nə́ á mə́m ntsə́ŋ pə́ tsoŋkə̂ nə́ nə́ fúfú ngɔʼ, 38ńtə́əmə á ndzəm məko Yeso ńkyéŋə, nkǐmə́g əyí ə́ tsóolə ńnwáakə məko mə́ Yeso. A lɔg mənoŋ mə́ atû mí ə́shíg ə́wə́, ńdɔg ntso yí ńchweg məko mə́ Yeso ə́wɨ́ ńtíʼ ńdzɔ́ʼ nə́ məghɔ́d mimə ləmkə̂ nə́ mə̂. 39Ŋwu Falasi wə̂ páʼ a kə wú nə́ Yeso á ndɛ̂ yí lə́, a jɨ ndɛn mənu ghɛn tsɔʼə ətsəm ńtíʼ ə́sóŋə á ntɨ́ yí ńgə́, “Mbɔʼ ŋwu nə a pěʼ ḿbə́ lə́ Ntûsê, tə ḿbə́ a pěʼ ńdánə ńjî ntê məngyě páʼ ə́ kwum nə́ yə́, tə ḿbə́ a pěʼ ńjî ńgə́ lə́ chigə ngɛdtəpɔŋə.”
40Akwe Yeso á pə́ ńgə́, “Saamun, maŋ túgə anu yətsə̌ á mə́ fiʼtə̂ nə́ gho.” Saamun a ghə́ “Ndzéʼkə, fiʼtə̂ mə.”
41Yeso a ghə́, “Ŋwu tsə̌ páʼ ä tsɔ́ʼkə nə́ nkéebə a nə́ ńdáʼ ńtsɔ́ʼkə nkéebə á mbô pɨ pətsə́ pə́ pɛ̌, táʼ a tsɔ́ʼ tɔsə məghə́m mɛ́n tênə, yitsə̌ a tsɔ́ʼ tɔsə nkɛd tênə. 42Ŋwu tsə̌ a mə́m pó mbɔʼ a nə ńtû a nə ńkě ə́wɨ́ chî pô. A kwéʼnə ə́sóŋ ńgə́ pó lɔgə̂ ághóobə́ zə́ələ́. Nə́ kwaŋ ńgə́ á mə́m pó pə́ pɛ̌, wə́ənə́ a yǐ kɔŋə̂ yí tsɛɛlə̂ yitsə̌?”
43Saamunə a kwěe ńgə́ “Maŋ kwaŋ ńgə́ lə́ ŋwu páʼə a nə ńtúg nə́ tə́kɔʼ nəkyɛ́ɛlə.” Yeso a sóŋ nə́ yí ńgə́, “Akwe azô á koʼə̂.” 44A sɛdnə̂ ńnáŋə məngyě wə́ ńtíʼ ə́sóŋə á mbô Saamun ńgə́, “Gho zə́ənə məngyě nə́? Maŋ pěʼ ńgyǐəə á ndɛ̂ gho, gho kě fɛ̂ nkǐ ńgə́ maŋ sog məkoolə mə ə́wɨ́ pô, a pɛn ə́sog məkoolə mə nə́ nkǐmə́g əyíə, ə́shíg nə́ mənoŋ mə́ atû míə. 45Maŋ pěʼ ńgyǐ lə́, gho kě mə chweg pô, a pɛn ńkě kə́ mɛdtə̂ á mə́ chweg nə́ məkoolə mə nə́ ntso əyí ə́fɛ́d páʼ maŋ pěʼ nə́ ńkwúnə á ndɛ̂ nə́ pô. 46Gho pěʼ ńkě atûə mə nə́ məghɔ́d zɔ́ʼ pô, a pɛn ńdzɔ́ʼ məkoolə mə nə́ məghɔ́d mimə ləmkə̂ nə́. 47Mäŋ pɛn ə́fiʼtə̂ gho ńgə́, ndɛnə akɔŋnə nə́ páʼ a nɨd nə́ lə́ ə́ nəələ̂ ńgə́ pə́ ləgnə̂ təpɔŋ əyǐ yi nɨ́ nə́. Ŋwu páʼ pə́ ləgnə̂ nə́ təpɔŋ əyǐ tsɔʼə mɔ́ aliʼə́ a kə̈ ńnəələ̂ lə́ mɔ́ aliʼə́ akɔŋnə.”
48Yeso a tíʼ ə́sóŋ nə́ məngyě yi wɨ́ ńgə́, “Pə́ ləgnə̂ təpɔŋ əgho.”
49Apuʼə pɨ páʼ pó po pěʼ nə́ ńnáanə ńtə́ ńjîə məjî pó tíʼə ńtséebə ə́sóŋə nə́ məmbɨ mɔ́b ńgə́, “lɛ̌ əwə ŋwu tə ńtíʼə ńdəgnə̂ pətəpɔŋ pə́ pəənə?”
50Lə́ Yeso a pə́ ə́sóŋ nə́ məngyě wə̂ ńgə́, “Mbimə́ əzo ə́ chwádkə gho: ghɛn nə́ mbwɔ́dnə.”
Цяпер абрана:
Lukasə 7: azo
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце