Yuhana 2
2
Mandə̀ɗà daala a bəra i kwite Kana
1I dəba mehinne sula ya ka, tə ndə̀ɗ daala a bəra i kwite Kana ika ahəɗ Galile. Məmər Yesuw ibam, a riŋ i fata. 2Dite tàa zal a gà Yesuw nda gà ɓəzla mazazama ŋgat mbaŋa.
3I təv ana ta gìrìv a ya ka, meɗwìtsè mawà dukw duwa makwàsà ŋa a ndəv aà tar a. Mama Yesuw a fə̀r, aka ndəv ka, a dara a təv Yesuw a, a dara, a gwaɗar: «Dukw aaha ka, aka ndəv.» 4Ama Yesuw a gwaɗar: «Dukw ana i ge a ya ana, kər à na a tsikiŋ a ya, mama ga? Ama ka, aka sle biy gà zukw tsa.» 5Dite mama Yesuw a tsaraka kataya tsara ka, a daha, a gwaɗa a gà ɓəzla meslire ana i fataya: «Gwim gà dukw ana Yesuw a tsik a kurum a ya fit.»
6Gà gah duwa a riŋ i fata ndilik, gà Yahuda tə dzawa aɗəm yam aà məbàrà dər duwa nda ahər, kamala ana fəla tar a tsik a. Gà gah ata ka, yam a da a gà biy ŋgiɗ iɗəm ka, lìter dərməka, a gà biy ŋgiɗ ibam, lìter dərməka nda dzik səla. 7Ama Yesuw a daha, a gwaɗa a gà ɓəzla meslire ata: «Dumara, tafum yam a gà gah aka.» I dəba ŋa ya, tə daha, tə dzaya aɗəm yam ata pèslìsle pèslìsle. 8I dəba taŋa ya asa, Yesuw a gwaɗa a tar: «Tə̀fum yam aaha zaakwa, ka dum dərraha a təv batsah mala meslire wele ana a zal à dukw mezime ya, mə̀ mə̀ndzər te.» Tə tə̀f yam ata, tə dar dərraha. 9Batsah mala meslire wele ata a mə̀ndzər yam ata ka, a ne aaka meɗwìtsè mawà dukw ata makwàsà ŋa ya. A dzəm həmbasləslsla lele. Tə dara à dukuməŋa ana i ŋga ya ka, a sər tsa. Ama gà ɓəzla meslire ana tə tafaraha ya ka, tə sər, Yesuw na a ne dər duwa ya. Batsah mala meslire ata a zal a zal məkəs ana a zla ya, 10a gwaɗar: «Ku weke na aka zal a mburma ka, a vile a ter a dukw ana a dzəm a dzekwiŋ. Tàa sa aba ya ka, i dəba ŋa ya a vile a ter a na a dzəm tsiye kuɗa. Ama kər ka, kà tike aba ŋgwal ŋana ya haa kinehe.»
11Yesuw a lah mege dukw mene aà mburma ata ka, i kwite Kana, ika ahəɗ Galile. Kərga taŋa ya, a pàt à ndzəɗa mezlibe ŋgar ana a za duwa tserdze ya. Aɗaba taŋa na gà ɓəzla mazazama ŋgat ta gəs ŋgat nda gəzləŋ tar a. 12I dəba ŋa ya ka, gà Yesuw ta mah ba i fataya, tə da a kwite Kafarnahum nda gà mama ŋgar, nda gà damər ŋgar, dite nda gà ɓəzla mazazama ŋgat. Tə ndza riŋ i fata mehinne zaakwa.
Yesuw a da a ga Mbulum batsah ŋana
Mata 21:12-13; Markus 11:15-17; Luka 19:45-46
13Aləka i təv ana *megirive Paska gà Yahuda aka à mendzera ya ka, Yesuw a da a Yeruzalem. 14A daha ka, a da a ga Mbulum batsah ŋana. A leha aɗəm aà gà ɓəzla madzàwà à gà sla, nda gà təmaŋ, nda gà huɗgum, dite gà ɓəzla məmbùrùɗà siŋgwe a riŋ ika tabəl tar mbaŋa. 15A zla liɓir, a slàslapa akaba, dite a ràrə̀slar, a daha, a dalawa dərra iɗəm gà sla nda gà təmaŋ a tserdze a bəra ya. A mbaɗa à gà tabəl gà ɓəzla məmbùrùɗà siŋgwe a bəɗ. A dzaya a tar à siŋgwe ŋa a bəɗ gwits gwits. 16I dəba ŋa ya, a gwaɗa a gà ɓəzla madzàwà à gà huɗgum ata: «Ndzəkum gà dukw aaha i faha ya, ka dum. Kà nwim à ga Tsir gà ka, ga tsakala tsa.» 17Gà ɓəzla mazazama ŋgat ta ŋgatar kataya ka, dukw ana mewetse ŋa i wakita Mbulum a, a ma a tarra a gər a. Ta wetse, ti tsik ahər, ta gwa ka: «Ga yak aaha ka, i waya hinne. I tike aɗəm madzala gà gər fit dze ka, a fata.»*fa*
18Ama gà bàba gà Yahuda tə tsam ahər, ta gwaɗar: «Ki sle a aà mege dukw mene aà mburma awara, na dite mìi sir a dər ka, tàa vəlak ndzəɗa aà mege dukw ata ya?» 19Yesuw a gwaɗa a tar aaka: «Yaw, taŋa ka, mbazlum à ga Mbulum batsah ŋa aaha, na dite ka, i huɗ mehinne makər a ka, na Yàa zlàzl aɗəm tsiye.» 20Gà bàba gà Yahuda ata tə tsaraka taŋa ka, ta gwaɗar: «Yweh, taŋa ana, meme? Tə zlàzl ga Mbulum aaha batsah ŋa ya ka, mive dzik faɗ gəra ndilik ka, dite kər ka, i huɗ mehinne makər a ka, tseerì ki zlèzl a dze ana, meme, na taŋa ya?»
21Ama ga Mbulum ata Yesuw a riŋ ihər a tsik ahər a ya ka, a live dər aba à ba ŋgar a. 22Aləka i təv ana a mət, a mbəlara i məməta ya ka, dukw ana a tsik ndeɗiŋa ya ka, aka màra a gər a gà ɓəzla mazazama ŋgat a kuɗa. Dite ta gəs bazlam ana ta wetse i wakita Mbulum a, nda bazlam ana Yesuw a tsik a.
Yesuw a sər dukw ana i gəzləŋ mburma ya tserdze
23Akahər *megirive Paska ana Yesuw a riŋ i Yeruzalem a ka, gà mburma hinne ta ŋgat a gà dukw mene aà mburma ana a gewa ya, dite ta gəs ŋgat nda gəzləŋ. 24Ama Yesuw ka, aka tike aà zləm tsa, aɗaba a sər madzala gà gər tar tserdze. 25Ŋgat ka, wura a tsiker a dukw ana i ba mburma ya tə tsa, a sər dukw ana i gəzləŋ tar a tserdze.
Цяпер абрана:
Yuhana 2: gnd
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Wycliffe Bible Translators, Inc. All rights reserved.