Mata 9
9
Yesuw a mbəl à mala magàha a bəɗ duwa
Markus 2:1-12; Luka 5:17-26
1I dəba ŋa ya, Yesuw a tsəl a slə̀làh yam, a da dər aka lìdè ŋgiɗ ndàra a kwite ŋgar. 2A ndzeha a fata ka, tə zlaraha mala magàha a bəɗ duwa madzàwà ŋa aà slə̀làh. Yesuw a samata gà mburma ana tə zlaha mala magàha a bəɗ ata ya ka, ta gəs ŋgat nda gəzləŋ lele. A gwaɗa a mala magàha a bəɗ ata: «Kəla gà, arəv ma da aà kər a tsa, Yàa pə̀lak à bakal yak.» 3I fata ka, gà asiŋ gà ɓəzla medzeŋge məpala ahəm Mbulum duwa tar riŋ mbaŋa. Tə dzala i gər tar, ta gwa: «Wele aaha ka, aka tsik dukw ana ŋgwala tsiye, a ndavaya a Mbulum.» 4Ama Yesuw a sər a taraha aka dukw ana tə dzala i gər tar a tsara. A gwaɗa a tar: «Aàmala na kà dzalum madzala gà gər ata ŋgwala tsa i gəzləŋ kurum a? 5Magwàɗà a mala magàha a bəɗ: <Yàa pə̀lak à bakal yak> nda bazlam masakəŋa ka, a wur ba tsa. Kige tsa: <Hitse, ka zla slə̀làh yak, dite ka da> ka, taŋa ka, a wur ba. 6Ama a sèsiŋ ka, sərum dər, iye, *wur ana a dara i təv Mbulum a, iye riŋ nda gà ndzəɗa, aà məpəla à bakal ika gər ahəɗ.» I dəba ŋa ya, a gwaɗa a mala magàha a bəɗ ata asa: «Kinehe ka, hitse, zla slə̀làh yak, ka daba a ma.»
7Tsam ka, tsèwrèw wele ata a hitse, a daba a ma tsara. 8Ama gà mburma ana tar riŋ i fata tserdze ya, ta ŋgat a dukw mene à mburma ata Yesuw a ge ya ka, ta ge magəɗa hinne, tə zàmbaɗa à Mbulum, aɗaba ana a dara, a vəl ndzəɗa a mburma kataya ya.
Yesuw a zal a Mata
Markus 2:13-17; Luka 5:27-32
9I dəba ŋa ya, Yesuw a mah ba i fataya. I təv ana tar riŋ ti de a ika vatwa ya ka, a ŋgat a wele duwa a riŋ mandza ŋa i ga duwan, zləm ŋgar Mata. Aɗaba ŋgat ka, mala duwan. Yesuw a daha a təv ŋgar, a gwaɗar: «Dara, zezem iye.» Mata a tsaraka kataya tsara ka, a hitsera i fataya, a zazam ŋgat.
10I təv ana tar riŋ ti de a ya ka, tə da akaba a bəra Mata. A daha, a der ɗaf. Mata a zal dər a gà ɓəzla duwan ŋgiɗ mbaŋa, dite nda gà asiŋ gà mburma ana i liwiŋ tar meɗè zləm tar ŋgwala tsiye hinne asa. Tə daha, tə zəm akaba ɗaf ata nda gà ɓəzla mazazama Yesuw tserdze a təv ilik ŋa. 11I fata ka, gà *Farisa duwa tar riŋ mbaŋa. Tar riŋ ta fir a aà Yesuw ana ti zim akaba a ɗaf nda gà mburma ata tserdze ya ka, ta gwaɗa a gà ɓəzla mazazama ŋgat ata: «Aàmala dze ya, na Əbay kurum aaha ti zim akaba a ɗaf nda gà ɓəzla duwan, dite nda gà mburma aka meɗè zləm tar ŋgwala tsiye asa ya?» 12Ama Yesuw a tsaraka dukw ana ti tsik ahər kataya ya tsara ka, a gwaɗa a tar: «Wura a de a a dàkwtar tsa na ba ŋgar a riŋ lele ya, say na a riŋ nda gà dukw məməta ya dzekwiŋ. 13Ama kinehe ka, dzalum aka dukw ana a ne i huɗ bazlam ata ya, na Mbulum a gwa: <I waya ka, dukw ana ki betswimiŋ a taf masakəŋa ya tsa, say i waya ka, na ki gwim a ŋgwal ŋa a mburma ya ivaɗ.>*fa* Ama i dara ka, aà mazàlà a gà na ta gweɗe a, waytsà mər ka, gà ŋgwal ŋa ika miɗ Mbulum a tsa, say a gà ɓəzla bakal ivaɗ.»
Mege ndəra i təv Yesuw
Markus 2:18-22; Luka 5:33-39
14I dəba ŋa ya, gà ɓəzla mazazama Yuhana metsìlwìɓè à mburma a yam duwa tə daha a təv Yesuw, ta gwaɗar: «Naha ana, meme na mər nda gà *Farisa mì gewa ndəra ka, ama gà ɓəzla mazazama kər ka, ta ge a ti tsiye?» 15I dəba ŋa ya, Yesuw a live dər aba à ba ŋgar a nda mazla daala ya. A gwaɗa a tar: «Na kinehe wura a zla daala, à ndìɗ a daala ŋgar ata a bəra, a zelewe a a mburma, aɗaba dukw mezime ana, pat ata ya ana, gà mburma ta ge a ndəra ya? Ti sle a aà mendze aà dukw mezime ya, dite ta ge a ndəra tsa. Ama i təv gà mburma gà tekeɗe, kamala taŋa ya mbaŋa. Na iye riŋ i təv tar mba ka, ti sle a aà mege ndəra tsa. Say a pat ana iye riŋ i təv tar asa tsiye dzekwiŋ, na ta ge a ndəra ya.»
16Yesuw a tsik a tar ahəm minew ŋgiɗ pam asa. A live dər aba nda guma ŋgar ana awiya ŋa ya. A gwaɗa a tar: «Wura a sle a aà medepe awiya petek aà miviye ŋana tsa. Aɗaba miviye ŋana ka, a nis a ihər a, à sìkèh ahər a à biye hinne asa. 17Kamala taŋa ya asa mbaŋa, wura a sle a aà medzè guzum himmè ŋa, a duwa kwiye ana miviya ŋa ya tsa, aɗaba guzum ata ka, a kwesiŋa, duwa kwiye ata miviya ŋa ya tekeɗe, à zlìrìt a asa tsa, ə̀nduh à ndìzliŋa, dite guzum ata tekeɗe, aka nəs. Say mandza guzum himmè ŋana ka, a duwa kwiye awiya ŋana mbaŋa, dite na gà duwa kwiye nda guzum ata ti nis a asa tsiye.»
Yesuw a mbəl à gà dəm Əbay gà Yahuda
nda məkəs duwa ŋgwala tsa
Markus 5:21-43; Luka 8:40-56
18I təv ana Yesuw a riŋ a tsik a ter a gà bazlam ata mba ya ka, wele duwa batsah gà mburma ana i ga mahàmà a Mbulum i kwite ata ya, a daha a təv ŋgar. A ndzeha a təv ŋgar ka, a dzar gurmits a bəɗ aka miɗ ŋgar. A gwaɗar: «I dara ka, dəm ga duwa aka mət kinehe. Kamkam dara, tikiŋ aakahər, ka mbiliŋ dər te.» 19Yesuw a hitse, a mah ba tsara. Dite gà ɓəzla mazazama ŋgat tə dəɗ aaka.
20I təv ana ti de a ya ka, məkəs duwa a riŋ a sèwèrewa are hinne. Məmbəz a zlalawara ihər a. Aka ge ihər ka, mive kurwa gəra sula dze. A sìrìkeha a təv Yesuw ndaà dəba, a daha, a ləm aà gùva petek ŋgar. 21Aɗaba a dzala i gər ŋgar, a gwa: «Na Yàa ləm aà petek ŋgar àsla pəra ka, i mbiliŋa.» 22I dəba ŋa ya, ə̀ba Yesuw a fə̀r aakaha ka, aka ŋgat a məkəs ata. A gwaɗar: «Dəm gà, arəv ma da aà kər a tsa, megìse yak ana kì gis iye nda gəzləŋ a ka, aka mbəl à kər.» I fataya tsara ka, tsèwrèw məkəs ata a mbəl.
23I dəba ŋa ya, Yesuw a ndze a bəra Əbay gà Yahuda aaha ndeɗiŋa ya kuɗa. A ta medeha ka, a ŋgat a gà mburma ana a riŋ mayahaba gər ŋa hinne ya, nda gà na ta vèt a tsìtsèkw, ti tiwe a dàhum dàhum a. 24A gwaɗa a tar: «Dum i faha ya, aɗaba dəm aaha ka, aka mət tsa, a riŋ ka, ika mendze are.» Gà mburma ata tə tsaraka kataya ka, tə sawla aà ŋgat. 25I təv ana tə dalawa gà mburma ata, tə da iɗəm a ka, Yesuw a daha a ga, a təv məməta ata. A daha ka, a gəs dəm ata i ahər a, a mbəl tsara. Dzeŋ a hitse dər aà mbulum. 26Ama dukw ata Yesuw a ge a ya ka, a ɗe zləm ika ahəɗ ata i fataya fit dze.
Yesuw a mbala à gà ɓəzla guluf duwa sula
27Aləka i təv ana Yesuw a mah ba, a de a i fataya ka, gà ɓəzla guluf duwa sula tə zazam ŋgat nda gà Mewideye, nda magala hinne. Ta gwaɗar: «Yesuw gwala Dawda, mì ndzek are tsehe ti tsiye? Zlak mər te.» 28Aləka a pəts a ga ana a dza aɗəm ba ya ka, gà ɓəzla guluf ata sula ya, tə daha a təv ŋgar. I təv ana tar riŋ i təv ŋgar a ka, a tsam aà tar, a gwaɗa a tar: «Wànà kàa gəsum iye nda gəzləŋ kurum, kà sərum dər ka, ndzəɗa gà a riŋ aà mazlàkà kurum a?» Ta gwaɗar aaka: «Haya Əbay, mì sər ka, ndzəɗa yak a riŋ aà mazlàkà mər ndzer.» 29Yesuw a tsaraka kataya ka, a daha, ə̀dap a ləm aà are tar. A gwaɗa a tar: «Aɗaba megìse kurum ana kə̀ gəsum iye nda gəzləŋ a ka, a ge a ba kataya kaɗəŋ, kamala ana ka dzalum a. Are kurum ma handaka ba.» 30Tsam ka, are tar ndwa ndwa a handaka ba tsara kaɗəŋ. I dəba ŋa ya, Yesuw a pala a tar ahəm, a gwaɗa a tar: «Wura ilik ma tə sər dukw aaha i ge a kurum kinehe ya tsidze.» 31Ama tar ta mah ba i fataya tsara ka, tə daha, ti tsikeye dukw ana Yesuw a ge nda tar a. Tə suwaya dər ika ahəɗ ata tserdze.
Yesuw a dalawa sitene aà wele duwa mandək ŋa ya
32Aləka i təv ana gà mburma ata sula ya, tə da iɗəm a ka, gà mburma ŋgiɗ tə daha à wele duwa a Yesuw. Wele ata ka, ndəkəmma a mba aà mifefile tsa. Aɗaba sitene aka danar aka bazlam. 33I dəba ŋa ya, Yesuw a dalawa ikəka sitene ata ya. A da ikəka ya tsara ka, wele ata a dza ba aà mifefile wìlè wìlè lele kuɗa. Gà mburma ana tar riŋ i fataya, ta ŋgatar kataya tsara ka, a ge aà tar kamala dukw mene aà mburma ya. Ta gwa: «Maa ŋgat a duwa ika ahəɗ kwa gà Isərayel ilik kamala naha ya tsa.» 34Ama gà *Farisa duwa tekeɗe, tar riŋ i fata mbaŋa. Ta gwa: «Əbay sitene na a vəl ndzəɗa a Yesuw, dite na a sle aà madalawa gà sitene aà mburma ya kərga naha ya ya.»
Gà mburma ti ndze are tsehe a Yesuw hinne
Markus 6:34; Luka 10:2
35I dəba ŋa ya, Yesuw a sùwaya i gà kə̀sà gà bàba ŋana nda gà ɓəza gà kwite fit dze. A ɗif à metsehe a gà Yahuda ana mayahaba gər ŋa i gà ga mahàmà a Mbulum tar a. A tsik a tar bazlam ŋgwal ŋa ana biy mekwere Əbay Mbulum a. A mbala à gà ɓəzla dukw məməta, nda gà mburma ana gà magàha a bəɗ ŋa ya fit dze. 36I dəba ŋa ya, a fə̀r aà gà mburma ata mbə̀rzə̀zza mayahaba gər ŋa ya ka, ti ndzer are tsehe hinne. Aɗaba ti ndze a hìriɓ hìriɓ nda magəɗa ŋa, tì sèwèr a are hinne. Ti ne ka, kamala gà təmaŋ ana mala makəva tar a riŋ tsiye. 37Aɗaba taŋa, a live aba à gà mburma ata nda dukw mezime ana ta pele a i bəɗ a. A gwaɗa a gà ɓəzla mazazama ŋgat: «Gà dukw mezime a riŋ i bəɗ ka, hinne na biy mipele ya. Ama gà ɓəzla məpala ŋa aà mada dər a ma ka, ti sle tsa. 38Aɗaba taŋa, hamum a mala gùvàh, dite mà sə̀kàhara à gà ɓəzla meslire ŋgar a, aà mandzàkà ŋa a ma.»
Цяпер абрана:
Mata 9: gnd
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Wycliffe Bible Translators, Inc. All rights reserved.