മത്തായി ഈ ബൊക്കുന പറ്റി സ്‌ന്ന ഒന്റു സേദി
ഈ ബൊക്കുന പറ്റി സ്‌ന്ന ഒന്റു സേദി
ആള്‌ഗാള്‌ന കാപാറ്റ്യ ഒരുത്താന്‌ന സൊല്ലി ബ്‌ഡ്‌വെ എന്റ് സാമി പള്യ ഒപ്പന്ത ബെത്ത കാലാത്ത്‌ല ആള്‌ഗാള്‌ക്ക് ബാക്ക് കൊഡുത്തിന്താന്. അദ് അത്തെ നഡാക്ക്യ ബേ്ണ്ടി സാമി സൊല്ലി ബ്‌ട്ട് ബന്ത ഏസ്സ്‌ന പറ്റ്യുള്ള നല്ല സേദിന പറ്റിത്തെ മത്തായി എ്ള്‌ദ്‌ന നല്ല സേദില് സൊല്ലിര്‌ക്കുവാദ്. ഏസ്സ് പ്‌റാന്ത് ബളാന്ത എഗുദാര് ജാദിക്ക് ബേ്ണ്ടി താനേമല്ല, ഉലഗാത്ത്‌ല എല്ലാവാര്‌ക്ക്‌മ് ബേ്ണ്ട്യുള്ളാദ്‌ത്തെ ഈ നല്ല സേദി.
ഏസ്സ് എത്തെ പ്‌റാന്താന് എന്റ് മുദാല് സൊല്ലി കൊണ്ടുത്തെ മത്തായി ഈ സേദിന എ്ള്‌ദ്യ പ്‌ഡിക്കുവാദ്. പ്‌റ ഏസ്സ് നീര്‌ക്ക് മുളുഗുവാദ്‌ന പറ്റിമ് സോദണെപഡുവാദ്‌ന പറ്റിമ് ഗലീലാല് സാമി സേദി സൊല്ലുവാദ്, പഡുസുവാദ്, നോയിഗാറാര്‌ന തെ്ള്‌സുവാദ്‌ഗാള്‌നെല്ല പറ്റിമ് ഒന്റൊന്റായി എ്ള്‌ദിര്‌ക്ക്‌ന്റാന്. അദ്‌ക്ക് പ്‌റ ഏസ്സ് ഗലീലാലിന്ത് എര്‌സലേമ്‌ക്ക് പോവാദ്, ഏസ്സ് സാവാദ്‌ക്ക് മുദാല്‌ല ബാരാത്ത്‌ല് നഡാന്ത കാര്യഗാള് ആന കുരുസുക്കു സേത്തി ആണി അഡിത്ത് കൊല്ലുവാദ്, താന് ഉജുര്‌ളാഗുവാദ്‌ഗാള്‌നെല്ല പറ്റി എ്ള്‌ദിര്‌ക്ക്‌ന്റാന്.
സാമി ആളുവ കാലന പറ്റി പഡ്‌സ്‌ന്റവാന്‌മ് സാമി സൊല്ലുസുലാക്കാക്ക് ഇര്‌ക്കുവ അര്‌ത്തന സൊല്ലുന്റവാന്‌മ് ആന ഒന്റു മ്‌ഗ്‌ന്ത ബാത്ത്യാനായി ഏസ്സ്‌ന ഈ സേദില് മത്തായി കാട്ടി തന്ത്‌റ്‌ക്ക്‌ന്റാന്. ഏസ്സ് പഡ്‌സ്‌ന കാര്യഗാള്‌ന അയിദ് കാര്യഗാളായി പ്‌റ്‌ത്ത്‌റ്‌ന്റാന്. ഒണ്ണാവാദായി സാമി ആളുവാദ്‌ക്ക് പട്ടവാര്‌ക്കുള്ള ഗുണഗാള്, ബാഗ്യഗാള്, കഡാമെഗാള് എന്നുവാദ്‌ഗാള്‌നെല്ല പറ്റി ഏസ്സ് മലേല് ബെത്ത് സൊല്ലുവ നായഗാള് (5-7). റണ്ടാവാദായി ഏസ്സ് സൊല്ലുപഡി നഡാക്കുവ പന്നന്റാള് തമ്മ് ഗിലാസ എത്തെ ഗേഡൊ എന്നുവാദ്‌ക്കുള്ള ബുദ്ദിനായ (10). മൂറാവാദായി സാമി ആളുവാദ്‌ന പറ്റി എ്ണേത്ത് സൊല്ലിര്‌ക്കുവ കദെഗാള് (13). നാലാവാദായി തന്ന് സൊല്ലുപഡി നഡാക്ക്‌ന്റവാര് ആഡൊ എന്റ് സൊല്ലുവാദ്‌ക്കുള്ള അര്‌ത്തന പറ്റി പഡ്‌സുവ കാര്യഗാള് (18). അയിദാവദായി ഉലഗാത്ത്‌ല് ഇര്‌ക്കുവാദ്‌ഗാള് ഒട്ടുക്കു അളിവാദ്‌ന പറ്റിമ് സാമി ആളുവാദ് ബരുവാദ്‌ന പറ്റിമ് (24-25).
ഈ ബൊക്കുലു അഡാങ്കിര്‌ക്കുവാദ്
ഏസ്സ് ക്‌റ്‌സ്‌ത്ത്‌ത്ത് പാട്ടനാമ്‌മ് അയാള് പ്‌റാവിമ്1:1—2:23
നീര്‌ക്ക് മുളുഗുസുവ ഓഗന്നാന് ഗിലാസ 3:1–12
ഏസ്സ് ക്‌റ്‌സ്‌ത്ത് നീര്‌ക്ക് മുളുഗുവാദ്‌മ് സോദണെപഡുവാദ്‌മ് 3:13—4:11
ഏസ്സ് ഗലീലാല് എദ്‌ക്ക ഗിലാസ ഗേന്റാന് 4:12—18:35
ഏസ്സ് ഗലീലാലിന്ത് എര്‌സലേമ് മാട്ട്‌ക്ക് പോവാദ് 19:1—20:34
ഏസ്സ് സാവാദ്‌ക്ക് മുദാല് എര്‌സലേമ് പട്ടണാത്ത്‌ല്‌മ് അദ്‌ക്ക് ബെ്ളിഗേമ് 21:1—27:66
ഏസ്സ് ക്‌റ്‌സ്‌ത്ത് ഉജുര്‌ളാഗുവാദ്‌മ് കണ്ണ്‌ക്ക് കാട്ടുവാദ്‌മ് 28:1–20
Цяпер абрана:
മത്തായി ഈ ബൊക്കുന പറ്റി സ്‌ന്ന ഒന്റു സേദി: സാമി സേദി
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
New Life Computer Institute