SOQQAMAASINETE LOOSO 2
2
QULLAAWU AYYAANI DIRRI
1Phenxeqosxe yinanni ayyaani barri iilli yannara, soqqamaasinesi baalanti mitto darga gamba yite no.#Lew 23:15-21; Maq 16:9-11 lai. 2Hedeweelcho lowo hombobolatte gede ikke luulu iiminni dayi; insa noo mineno wo'mi. 3Giirate buwani arrawo lawannori leellinsa; hakkiinni beehame mittu mittunku aana dirri. 4Baalunkura Qullaawu Ayyaani wo'minsa; Qullaawu Ayyaani uyinonsa jawaante garinni addi addi qaalinni coyidhu.
5Hakkiicho, gobba baalatenni dagge Yerusaalamete heedhannori Magano waajjitanno Ayihude no. 6Konne luulo macciishshe gamba yiinohu lowo manni, insa qaalinni coyidhanna macciishshe lowo geeshsha maala'le, 7«Kuri togoo coyidhannori baalu Galiilu manna di"ikkitino? 8Ninke baalunku gobbanke qaalinni coyidhanna macciishshineemmohu hiittoonniitiyya? 9Ninke Pharte, Meedi, Elaami Mesiphexoomiyu, Yihudu, Qaphadooqu, Phanxoosi, Issiyu, 10Firigiyu, Phinfiiliyu, Gibitsete, Qereenu mule Liibiyu gobbara hee'neemmo mannaati. Roomu gobbanni dangoommo Ayihudootinna dagate giddonni fulle Ayihudete widira hingoommorino hee'noommo. 11Qerxeesinna Arabete mannino no; kuneeti, hakkuri baalunku Maganunniha jawa looso ninke qaalinni coyidhanna macciishshinoommo!» yitu. 12Kunnira baalunku yitannore habbe maala'litanni, «Kuni coyi maati?» yite mimmito xa'mitu.
13Mitu mitu kayinni, «Haaro woyinete xajje agge dimbite ikkitanno» yitu.
PHEEXIROOSI KULINO SOKKA
14Hatte yannara Pheexiroosi tonaa mitunku ledo uurre qaalesi naggi asse mannaho,
«Ki'ne Yihudu gobba manninna Yerusaalamete heedhinanniri baalu, konne ikkino coye afate coyi'reemmore macciishshe. 15Xa soodihunni sase saateeti; ki'ne heddini garinni kuni manni didimbino. 16Kuni coyi ikkinohu kayinni himanaanchu Iyueeli,
17‹Maganu goofimarchu barra,
Ayyaana'ya mannu baalu aana duneemmo;
labballunna seennu ooso'ne himana coyidhanno;
aju manni'neno ajuuja la"anno;
geerri'neno haaqee haaqii'ranno.#Iyu 2:28-32 lai.
18Hakko barra,
labbaanna meyaa soqqamaano'ya aana,
Ayyaana'ya duneemmo.
Insano himana coyidhanno.
19Iima gordoho dhagge,
uulla baattote aana malaate leellisheemmo;
mundee, giiranna wiliilete tunnuuqi leellanno.
20Jawunna dhaggennihu Mootichu barri daara albaanni,
arrishsho tunsitanno;
aganu mundeete soorramanno.
21Mootichu su'ma woshshannohu baalu gatanno›
yaanno himani wo'manno gedeeti.
22«Israeelete manna! Konne qaale macciishshe; affininte gede Naaziretete Yesuusi ewelumma, Maganu Isi widoonni qole giddo'ne assinohu jawu coyi, maalalenna dhagge xawo fultino. 23Hakkuno Maganu umisi balaxe hedinonna egennino garinni, ki'nera sae aamamino; ki'neno haxawarrootu angara sayissine uyitinoonni. Insano dawete aana sutte shitino. 24Maganu kayinni reyote wolqa hune reyotenni kayisinosi. Kunnira reyo amadde hooltasira didandiitino. 25Daawiti isire,
‹Wo'manka woyite Mooticha alba'yaanni nooha afoommo;
qiniite'yaanni noo daafira dimaseemmo.
26Kunnira wodani'ya hagiidhanno;
arrawi'yano hisatanno.
Reyannohu maali'yano hexxo afi'ranno.
27Lubbo'ya jeennaateho diaguratto;
Qullaawakki waammate giddo hoqara worte dila"atto.
28Heeshshote doogo egensiisoottoe;
ane ledo hee'rakkira hagiirri'ya wo'ma ikkanno› yaanno.
29«Roduuwa'ya, albi annuwanke giddonni Daawiti ree waamaminota, moogisi techo geeshsha ninkewa noota xawise kuleemmo'ne. 30Ikkollana Daawiti konne coyi'rinohu, himanaancho ikkinohuraatinna Maganu, ‹Sirchikki giddonni mitto ate darga amadanno gede asseemmo› yiinoha hexxote qaale egennino daafiraati.#Far 132:11; 2Sam 7:12-13 lai. 31Maganu albillitte assara noore balaxe afe, Kiristoosi reyotenni ka"annota coyi'rino. 32Konne Yesuusa Maganu reyotenni kayisinosi; ninke wo'munku kunni coyira naqaashshete. 33Maganu qiniiteenni ofollara gordo ha'ri woyitenna Qullaawu Ayyaani hexxo Annuwiinni adhi yannara konne la'inannihanna macciishshitinanniha ninke aana dunino. 34-35Xa gordo fulinohu Daawiti ikkinokkita anfannihu, Daawiti umisinni,
‹Kaaliiqi Mootichi'yara,
baarigaarrakki lekkakkira woroonni qolammo geeshsha,
qiniite'yaanni ofolli› yee coyi'rino.#Far 110:1 lai.
36«Xa konne ki'ne suttini Yesuusa, Maganu Mootichanna Kiristoosa assinosita Israeelete manni baalu halaalinta afo!» yii.
37Mannu konne coye macciishshe wodanu maseennansa Pheexiroosiranna ledosi noo soqqamaasinera, «Roduuwa, xa ma assino?» yii.
38Pheexiroosino, «Aagintaabbine higge; cubbo'ne agurranni'ne gede, mitti mitti'ne Yesuusi Kiristoosi su'minni cuuamme; Qullaawu Ayyaani eltono adhitinannina. 39Hexxote qaali ki'neranna ooso'nera, Mootichu Maganinke isiwa woshshannonsarira xeertote noori baalahooti» yii.
40Wolu addi addi qaalinni farci'ranni, «Tenne shokkashsho ilama aana daanno qorichinni umo'ne gatisidhe!» yee seejjinsa. 41Insa giddonni lowo manni qaale macciishshe cuuami. Hakko barra sase kume ikkanno manni ammane lexxi. 42Insano soqqamaasinete roso macciishshite, mitteenni heedhanni, sagale mitteenni ittanni, huuccattotennino jawaattu.
AMMANAANOTE RODIIMMANNA MITTIMMATE HEESHSHONSA
43Hatte yannara soqqamaasinete widoonni lowo maalalenna dhagge loosantanni noo daafira baalunku waajjitu. 44Ammanaano baala mitteenni heedhu; afidhinori baalu wo'munkura gutoho. 45Uullansanna jajjansa hirte, woxe mittu mittunkura hasiisi deerrinni beekkanno. 46Barru barrunkunni Qullaawa Mine mitteenni gamba yitanno. Minensa sagale ittanni, hagiirrunninna hisatu wodaninni heedhanni, 47Magano galaxxitanna mannu baalu ayirrisinsa. Mootichu gattannore barru barrunkunni mittimmansa aana ledanni no.
Цяпер абрана:
SOQQAMAASINETE LOOSO 2: QulMax
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© The Bible Society of Ethiopia; Sidama Holy Bible BSE-UBS 262 P 2014