SOQQAMAASINETE LOOSO 4
4
PHEEXIROOSINNA YOHAANNISI AYIHUDETE SONGOWA SHIQQU
1Pheexiroosinna Yohaannisi mannaho coyidhanni heedheenna qeesootu, Qullaawa Mine agartannori hajajaanonna Saduqootu insawa dagge, 2lamunku soqqamaasine Yesuusi reyotenni kaino yitanni mannaho rosiissinohuranna reyotenni ka"a noota kultino daafira hanqitu. 3Kunnira amadde ka'e yanna hashshitinohura sooda geeshsha usuru mine gashshitunsa. 4Qaale macciishshitinori giddonni kayinni lowo manni ammani. Ammantinori kiirono onte kumeeti.
5Layinki barra Yihudu roorrootinna geerru, seeru rosiisaano Yerusaalamete songitu. 6Songino manni mereero qeesootu roorrichi Hannanna Qeyaafa, Yohaannisinna Alekisaanderi, hattono qeesootu qari mini manni baalu ledonsa no. 7Insano lamenka soqqamaasine mereeronsa uurrisse, «Konne assitinihu mayi wolqanniiti woy aye su'minniiti?» yite xa'mitunsa.
8Hatte yannara Pheexiroosira Qullaawu Ayyaani wo'meennasi, «Ki'ne gosate gashshaanonna geerru, 9ninke xa'mammeemmohu mittu laanshaawu manchira assinoonni danchumma daafiraatinna ikke hurino gara afateeti. 10Kuni manchi hure alba'neenni uurrinohu, ki'ne suttinihunna Maganu reyotenni kayisisihu Naaziretete Yesuusi Kiristooosi su'minni ikkinota ki'ne baalunkunna Israeelete manni baalu afo.
11Ki'ne mine mintinanniri mishshine agurtinoonni kinchi isooti;
isi dhaawate kincho ikkino.#Far 118:22 lai.
12Gato wolewa ayewano dino. Gatote hasiisannonkehu mannaho uyinoonni su'mi gordoho woroonni wolu dino» yii.
13Pheexiroosinna Yohaannisi waajjitukkinni coyidhino daafira, songite noori roso afidhinokkire mulla manna ikkitinota affino daafira maala'litu. Yesuusi ledo keeshshitinotano huwattu. 14Huri manchi insa ledo uurre noota la'anni noo daafira, mittoreno yaa didandiitino. 15Kunnira songotewiinni ka'a shiqqi yitanno gede assite, insa insanaawa, 16«Xa konne manna hiissino? Tini lowo dhagge insa anga loosantinota Yerusaalamete hee'ranno manni baalu macciishshino. 17Kunni ka'a kayinni kuni coyi mannu mereero hala'lannokki gede, kunni ka'a konne su'ma gantanni ayerano kultannokki gede qorophisiinso» yite amaalantu.
18Hakkunni gedensaanni insa woshshite, Yesuusi su'ma kayisse coyidhannokki gede woy rosiissannokki gede duudhe hajajju. 19Pheexiroosinna Yohaannisi kayinni, «Maganoho hajajama agurre ki'nera hajajama Maganu albaanni dancha coyetini? Hanni Ki'nenni yiiyye. 20Ninke anfoommorenna macciishshinoommore kula diagurreemmo» yite qoltunsa. 21Songono insa qorichisha dandiitannokkita affe, mannuno kunni coyira Magano galatanni noo daafira waajjite ledde qorophisiisse hadhanno gede assitu. 22Tenne maalalenni huri manchira dirisi shoyillaaho.
AMMANAANO QARRU YANNARA ASSIDHINO HUUCCATTO
23Pheexiroosinna Yohaannisi tidhante jaallansawa higge, qeesootu roorrootinna Yihudu geerri yitinonsare baala kultunsa. 24Insano konne coye macciishshite qoonqonsa naggi assite mitteenni Magano, «Gordonna baatto, baaranna baaru giddo noore baala kalaqoottohu Wo'munkura Aliidi Mooticha!#Ful 20:11; Neh 9:6; Far 146:6 lai. 25Qullaawu Ayyaani widoonni qolte borojjichikki anninke Daawitira,
‹Daga mayira hanqitu?
Gosano mayira beebbatenni gano gantu?
26Tenne gobba mootoolla ka'e,
Mootoollano mitteenni songite,
Kaaliiqinna Buuraminohu aana ka'u›
yite coyi'roottohu ateeti.#Far 2:1-2 lai.
27«Halaaleho Heeroodisinna Phenxenichu Philaaxoosi dagatenna Israeelete manni ledo kunni katamira gamba yite, buuraminohu Qullaawu soqqamaanchi Yesuusi aana ka'ino. 28Kuni ikkinohuno, ati balaxxe wolqakkinna hedoottori wo'manno gedeeti. 29Xaano Mootichanke, assitannore afilla; soqqamaanokki qaalekki waajjitukkinni jawaatte kultanno gede assi. 30Qullaawu soqqamaanchikki Yesuusi su'minni dhiwantinori hurtara, dhaggenna maalale assitanno gede angakki diriirsi» yite huuccidhu.
31Huuccidhe ka'uta, gamba yite noo dargi shashshafami. Baalunkura Qullaawu Ayyaani wo'meennansa Maganu qaale waajjitukkinni kultu.
AMMANAANONNITA MITTIMMATE HEESHSHO
32Ammanaano baalate mittu wodaninna mitte hedo noonsa. Aye manchino, «Kuni aneho» yaannori dinosi. Afidhinori baalu gutoho. 33Soqqamaasineno Mootichu Yesuusi kaore lowo wolqanni farcidhanni no. Baalunkura jawa Maganu elto noonsa. 34Baattonna mine afidhinori baalu hirte woxe abbitanno daafira, giddonsa gadadaamu mittuno dino. 35Woxeno abbite soqqamaasinete uyitanno. Mittu mittunkura hasiisanno bikkinni iillishshanno.
36Qophiroosi ilama ikkinohu mittu Leewichu Yooseefi yinannihu no. Soqqamaasine iso, «Barnabaasi» yite woshshitannosi. Hatto yaano, «Jawaantete beetti» yaate. 37Isino baattosi hire woxe abbe soqqamaasinete uyi.
Цяпер абрана:
SOQQAMAASINETE LOOSO 4: QulMax
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© The Bible Society of Ethiopia; Sidama Holy Bible BSE-UBS 262 P 2014