Eyɔɔ 6

Yeso ndee bɔ ètɔɔshin tan

1Aŋu abwa zɔnɔ à fɔɔ ngɛ, Yeso mane bɔ bɛɛrɛ abwa mɔ kpɛ̀n ngɔɔ anjid angli Galilii yɛ â gɛrɛ ma zɔʼrɔ kpe angli Tibɛryas ngɛ. 2Ebaŋabɔ à kiri engɔ mbɔʼnga â shi zɔ anɛ̂ abwa yɛ engɔ à shi le aŋu à gli bɔ aŋwan ngɛ. 3Éngɛ Yeso kwaʼ ngɔɔ tsɔmɔ eba egu nè bɔ bɛɛrɛ abwa mɔ. 4Antara fɔɔ ekere bɔ Juu à shi mbín. 5Aŋu Yeso à kɔʼɔ è zɔ ebaŋabɔ ma tù à zeʼe ebe engɔ ngɛ, engɔ ga ebe Firiboʼ kpe, “Ntsɔ ba ngo zɔn ala deʼ awe shi abɔ bɔnɔ nde ngà.” 6Yeso à ga énde é kpèrè Firiboʼ. Engɔ à shi nɛɛ efwɔ etaa mɔ ebwa wɛ engɔ ma ngo le ngɛ. 7Firiboʼ gíì kpe, “Ntsɔ ba ngo nu ekɛb awe é zɔn ende ebe ebaŋabɔ wunɔ tyetye gho ŋwàʼaŋwàʼ nde è zo? Ntsɔ ba ngo ke ekɛb tye e nɛ̀rɛ̀ bɔ afwɛʼ anyi ene ata efwɔ̧ɔ dye e shi kɔʼ.” 8Gho bɛ̀ɛrɛ abwa ngɔ bi wɛ ekumu ngɔ à mwɔ Andere, wɛ a mwɔ ghongwaanɔm Shimun Petoro ngɛ ga kpe 9“Ághò deʼ wa anɔ nè ebɔʼ ǹgoŋ tan mane bwo Shuuru deʼ fyee. Ewunɔ shi na ayɛ é ndee ebaŋabɔ wunɔ anyi?” 10Yeso gâ ebe bɔ bɛɛrɛ abwa mɔ kpe, “Mbɔn le bɔ tsɔmɔ a chwâ.” Egɛ â ne ena afwɔ yɛ eghɛʼ. Bɔ â tsɔmɔ a chwâ. Ânɔm à ne na bɔ ètɔɔshin tan nɔ. 11Yeso shi nu ebɔʼ ǹgoŋ byɛ mane shuuru chɛ ndɛ̀ʼ ebɛrɛ ebe Ngwe, shi ndɛ̀ʼ ebe bɔ bɛɛrɛ abwa mɔ e gɛbbɛ ndɛ̀ʼ ebe abɔ à me tsɔmɔ a chwâ ngɛ, gho ŋwàʼaŋwàʼ nde e zo. 12Èndzobo chɛ angɔ à shi nde e zo ngɛ, Yeso ga ebe bɔ bɛɛrɛ abwa mɔ kpe, “Mbɔn shunu etseʼre yɛ e me tye ngɛ, mbɔn ke tsɔŋɔ ala deʼ bo.” 13Bɔ â nde zo, bɔ bɛɛrɛ abwa shunu etseʼre ǹgoŋ yɛ â tye ngɛ e shwe ènkàm wum ǹchwɔ̀ fyee. 14Aŋu bɔ â zɔ anɛ̂ abwa yɛ Yeso à le ngɛ, angɔ sa ga kpe, “Éŋwaʼa, ewùnɔ na àmɛnɛkɔn Ngwe wɛ à ma ngo zeʼe efwɔ ese ngɛ.” 15Yeso buʼ nɛɛ kpe angɔ ba ke é bere angbe é zhwaʼa ene m̀fɔ̀ ene ekama, è nyɛn kwaʼ ngɔɔ edɔm egu, tsɔmɔ zhiʼ.

Yeso zhin edɔm ndim

16Etiʼdi, bɔ bɛɛrɛ abwa ngɔ kla ngɔɔ ewee angli. 17Angɔ à nu ekpe wu kpɛn angli ngɔɔ a Kapɛnaum. Afub à koo Yeso ne shi zèʼ gɛ̀rɛ̀ kla angɔ bo. 18Efùu kamakam klada sa fùu, ndim sa gbɛɛrɛ ekpe wɛ. 19Angɔ à shi ngɔɔ na emayl tɛd kà ekwɛ̀ nɔ efwɔ ndim. Angɔ sa kɔʼ e zɔ Yeso sa zeʼe ebara ekpe wɛ ma zhiri edɔm ndim, èklɔ̀ bere angɔ. 20Bɛʼngɛ Yeso gâ ebe angɔ kpe, “Mbɔn ka bum, na mmɛ.” 21Angɔ à ne gɛnɛ amɔ é nu engɔ efwɔ ekpe. Afwɔ sa ndada, ekpe bwɛn eba eji afwɔ yɛ angɔ à ma ngɔɔ ngɛ. 22À tam enchwe aŋu, ebaŋabɔ wɛ à me nɔ anjid eji ngɛ, zɔ nɛɛ kpe ne ekpe ŋwaʼ a me tye, bɔ bɛɛrɛ abwa ngɔ shi nu ngɔ̀ɔ, Yeso me tsɛʼ abwaʼ angɔ bo. 23Éngɛ ekpe deʼ nyɛn a Tibɛryas bwɛn afwɔ yɛ ebaŋabɔ â shi nde ǹgoŋ, aŋu Yeso à shi ndɛʼ ebɛrɛ ebe Ngwe ngɛ. 24Éngɛ ebaŋabɔ zɔ kpe Yeso mane bɔ bɛɛrɛ abwa mɔ ke bli aŋu bo, angɔ nyii efwɔ akpe yɛ ngɔɔ é zɛʼ Yeso a Kapɛnaum.

Yeso na ǹgoŋ etyê

25Èndzobo chɛ angɔ à zɔ Yeso anjid ndim ze ngɛ, e biiri ebe engɔ kpe, “Àtee abwa, ngwo a zeʼe anɔ endzobo tse?” 26Yeso gíì ebe angɔ kpe, “Mmɛ ga éŋwaʼa endɔn kpe, mbɔn ke ma zɛʼ angu ene anɛ̂ abwa yɛ mmɛ à le ngɛ bo, mbɔn na zɛʼ angu mbɔʼnga mbɔn à nde ǹgoŋ zo. 27Mbɔn ke fwɛʼ ene ande yɛ a ma bɔɔ ngɛ bo. Ankɔmɔ engɛ̂, mbɔn ke ma ande yɛ a ma ndɛ̀ʼ etyê kengudu wɛ Ŋwɔ Gho ma ndɛ̀ʼ ngɛ mbɔʼnga Ngwe àtɛ a shi ge anɛ̂ mɔ ene engɔ é le engɛ̂.” 28Éngɛ abɔ byɛ shi biiri ebe engɔ kpe, “Mbyɛɛ shi le ene, é fwɛʼ ebwa wɛ Ngwe ma ke kpe mbyɛɛ fwɛʼ ngɛ?” 29Yeso gíì kpe, “Ebwa wɛ Ngwe ma ke ngɛ ne ga kpe mbɔn bɛrɛ ene engɔ wɛ engɔ à tɔm efwɔ ese ngɛ.” 30Éngɛ angɔ wu biiri ebe engɔ kpe, “Ngwo wa ndɛ̀ʼ ma anɛ̂ ze mbɔʼtye mbyɛɛ zɔ e bɛrɛ? Ngwo wa le ene? 31Ètɛ sam mbyɛɛ à nde ende wɛ â ma zɔʼrɔ kpe manaa ngɛ efwɔ ebɔrɔńked, aŋu e me ŋwɛʼrɛ ngɛ. Engɔ à ndɛʼ ende wɛ à me zeʼe ezob ngɛ ebe angɔ e nde.” 32Yeso ga ebe angɔ kpe, “Mmɛ ga éŋwaʼa endɔn kpe, ende wɛ Mose à ndɛʼ endɔn ngɛ à ke me ende wɛ à me zeʼe ezob ngɛ bo. Na àtɛ ngu a ma ndɛʼ ende wɛ e ma zeʼe ezob ngɛ. 33Mbɔʼnga mmɛ na ǹgoŋ Ngwe yɛ me zeʼe ezob gɛ̀rɛ̀ ma ndɛʼ etyê ebe ese ngɛ.” 34Angɔ ga kpe, “Masakɛ, ngà sa bwò à ndɛʼ ǹgoŋ zɔnɔ endyɛɛ akyɛ gimkpaʼ.” 35Éngɛ Yeso toʼro apɛpɛ kpe, “Mmɛ ne ende wɛ e ma ndɛ̀ʼ etyê kemyɛ ebe bɔ ngɛ. Egho wɛ ma zeʼe ena ngɛ wa ka nchwɔrɔ gwɔn. Gho wɛ ma bɛ̀rɛ ene mmɛ ngɛ wa ka fi̧ri fe. 36Mmɛ à ga endɔn kpe mbɔn shi zɔ angu, shi ne bɛrɛ bo. 37Abɔ ngɔ byɛ àtɛ ma ndɛ̀ʼ ena ngɛ ba zeʼe ena. Egho wɛ zeʼe ena ngɛ mmɛ wa ke engɔ fli, 38mbɔʼnga mmɛ ke me kla zeʼe ezob é fwɛʼ engu ebwa bo, ne é fwɛʼ ebwa wɛ egho wɛ à sàa angu ma ke ngɛ. 39Ezhuŋu egho wɛ à sàa angu ngɛ ne ga kpe, mmɛ ke nyiimi gho deʼ abwaʼ abɔ byɛ engɔ à ndɛʼ ena ngɛ bo, bɛʼngɛ mmɛ yà zhwɛɛmɛ angɔ anji ngùdu. 40Enga ebwa àtɛ ngu ne ga kpe gho ŋwàʼaŋwàʼ wɛ è zo ŋwɔ è bɛ̀rɛ ene engɔ ngɛ è yà nde etyê kemyɛ. Mmɛ wa ngo zhwɛɛmɛ angɔ anji ngùdu.” 41Aŋu Yeso à ga énde ngɛ, bɔ Juu byɛ â mwɔ aŋu ngɛ klada sa kùmù engɔ mbɔʼnga engɔ à ga kpe, “Mmɛ ne ende wɛ â kla zeʼe ezob ngɛ.” 42Abɔ byɛ biiri kpe, “Ke mwɔ Yeso ŋwɔ Yɔsɛf bo? Ntsɔ be nɛɛ àtɛ ngɔ mane áʼɔ̧̀ ngɔ. Engɔ shi sa ga enjitsɔ kpe mbè à zeʼe ezob ngɛ ene?” 43Yeso gíì ebe angɔ kpe, “Mbɔn ke kumu mbɔrɔmbɔn bo 44Gho deʼ ke né zeʼ ena wɛ àtɛ wɛ à tɔm angu ngɛ ne nu engɔ zeʼe bo, mmɛ gɛrɛ ma ngo zhwɛɛmɛ engɔ anji ngùdu. 45E be ŋwɛʼrɛ efwɔ aŋwɛʼrɛ bàmɛnɛkɔn Ngwe kpe ‘Ngwe ya tee abwa ebe angɔ. Gho wɛ ma zo gɛ̀rɛ̀ ma bɛ̀ɛrɛ ebwa ebe àtɛ ngɛ wa zeʼe ena. 46Gho deʼ ke shi zɔ àtɛ bo à tye engɔ wɛ me zeʼe ebe Ngwe ngɛ a shi zɔ àtɛ. 47Mmɛ ga endɔn éŋwaʼaŋwâʼ kpe, egho wɛ me bɛrɛ ene mmɛ ngɛ shi nde etyê kemyɛ. 48Mmɛ ne ende wɛ e ma ndɛʼ etyê ebe bɔ ngɛ. 49Ètɛ sam mbɔn à nde ende wɛ â ma zɔʼrɔ kpe manaa ngɛ ebɔrɔńked, bɛʼngɛ angɔ à da kudu. 50Bɛʼngɛ ewunɔ ne ende e me kla zeʼe ezob, gho nde è wa ka ku. 51Mmɛ ne ende wɛ e me kla zeʼe ezob ngɛ. Egho wɛ è nde ende wunɔ ngɛ wa tye ekyɛ ŋwaʼ. Ende wunɔ na nyɛm ekwa ndza yɛ mmɛ ma ndɛʼ mbɔʼtye bɔ efwɔ ese tye àkɔʼɔ ngɛ.” 52Abɔ Juu byɛ bɔɔ etaa ene ebwa wɛ engɔ à ga ngɛ, klada sa ga àmɔ̀ àmɔ̀ kpe, “Egho wunɔ na ndɛ̀ʼ nyɛm ekwa mɔ ntsɔ nde ngɛ ene?” 53Yeso ga ebe angɔ kpe, “Mmɛ ga éŋwaʼa endɔn kpe, mbɔn ne nde nyɛmekwa gɛ̀rɛ̀ ŋwɔ anɔm Ŋwɔ Gho bo, shi mbɔn gɛrɛ ke mwɔ àkɔʼɔ bo. 54Egho wɛ e nde nyɛm ekwa ndza gɛ̀rɛ̀ ŋwɔ anɔm ndza ngɛ shi le etyê kemyɛ. Mmɛ wa ngo zhwɛɛmɛ engɔ anji ngùdu. 55Enga ekwa ngu ne ende mɔmbwo anɔm ndza gɛ̀rɛ̀ mwɔ mɔm mɔmbwo. 56Egho wɛ nde nyɛm ekwa ndza gɛ̀rɛ̀ ŋwɔ anɔm ndza ngɛ we tye nè mmɛ, mmɛ gɛrɛ tye nè engɔ. 57Nkirinkin àtɛ wɛ è mwɔ ekɔʼɔ ngɛ à tɔm angu, mmɛ ne mwɔ ekɔʼɔ mbɔʼ àtɛ, egho wɛ nde nyɛm ekwa ndza ngɛ wa ngo nɔ ekɔʼɔ mbɔʼ mmɛ. 58Ewunɔ ne ende wɛ â kla zeʼe ezob ngɛ. Ewunɔ ke me ende wɛ â ma zɔʼrɔ kpe manaa wɛ ètɛ sam mbɔn à nde gɛ̀rɛ̀ kudu ngɛ bo. Bɛʼngɛ egho nde nyɛm ekwa ndza ngɛ wa tye ekɔʼɔ ekyɛ ŋwaʼ.” 59Yeso à ga énde aŋu engɔ à ma tee abwa a ndɔ bɛ̀ɛrɛ abwa bɔ Juu abɛ Kapɛnaum ngɛ.

Ega Yeso na zeʼe nè etyê

60Aŋu bɔ akɛkɛ byɛ â ma kìrì Yeso, â zo ega wunɔ ngɛ, e ga kpe, “Ega wunɔ we kama, awɛ me né bɛrɛ.” 61Yeso à nɛɛ egha mɔ kpe bɔ bɛɛrɛ abwa â na kumu mbɔʼ ebwa wɛ engɔ à ga ngɛ. Engɔ biiri ebe angɔ kpe, “Ega wunɔ we mɔmɔ angɔn de? 62E mwɔ engɛ̂, mbɔn gɛ zɔ Ŋwɔ Gho kwaʼ ngɔɔ afwɔ yɛ à dye mwɔ ngɛ nyɛ? Mbɔn ba ngo zhuŋu kpe ayɛ? 63Na azhwɛɛrɛ Ngwe a ma ndɛʼ etyê ebe bɔ. Nyɛmekwa gho na ala bli. Aga yɛ mmɛ à shi ga endɔn ngɛ na azhwɛɛrɛ gɛ̀rɛ̀ mwɔ etyê. 64Bɛʼngɛ abɔ deʼ abwaʼ ndzɔn de bli shi bɛrɛ bo.” Enyɛrɛ aŋu Yeso à klada tee abwa ngɛ, engɔ a shi nɛɛ ene eklada abɔ byɛ e ne ma ngo bɛrɛ bo ngɛ mane engɔ wɛ à ma ngo fɛrɛ engɔ ngɛ. 65Engɔ fɔɔ embè ga kpe, “Ne ǹji yɛ mmɛ à ga endɔn kpe gho deʼ ke né zeʼ ena wɛ àtɛ ne le kpe engɔ zeʼ ngɛ bo.” 66Ne ǹji yɛ enyɛrɛ ene endzobo zɔnɔ, bɔ bɛɛrɛ abwa akɛkɛ â kɔmɔchim ne wu kiri engɔ bo ngɛ. 67Éngɛ Yeso biiri ebe bɔ bɛɛrɛ abwa wum ǹchwɔ̀ fyee mɔ ngɛ kpe, “Mbɔn gɛrɛ ba ngɔɔ mbɔn achim?” 68Shimun Petoro gíì kpe, “Masakɛ mbyɛɛ ngɔɔ ebe wɛ? Ngwo a me le ega wɛ e ma ndɛʼ etyê kemyɛ ngɛ. 69Mbyɛɛ shi zeʼe bɛ̀rɛ gɛ̀rɛ̀ nɛɛ kpe ngwo na Ǹtɔmzhwaʼa Ngwe wɛ è me zeʼe ezob ngɛ.” 70Éngɛ Yeso shi gìi kpe, “Ke ma mmɛ à chidi angɔn bɔ wum ǹchwɔ̀ fyee bo? Gho bi abwaʼ ndzɔn shi mwɔ dɛbli.” 71Engɔ à two Judas ŋwɔ Shimun Iskariyɔd wɛ à mwɔ abwaʼ angɔ bɔ wum ǹchwɔ̀ fyee, shi ma ngo fɛrɛ engɔ ngɛ.

Цяпер абрана:

Eyɔɔ 6: nbt

Пазнака

Падзяліцца

Капіяваць