Matyo 8

Yeso gli gho akɔ̂m

(Mak 1:40-45; Luk 5:12-16)

1Èndzobo chɛ Yeso à kla egu ngɛ, ebaŋabɔ kiri engɔ. 2Gho deʼ wɛ à ma gwɔ̀n akɔ̂m ngɛ zeʼ gunu amɔ efàarà engɔ ga kpe, “Masakɛ, mala ngwo me doʼ, ngwo we né le mmɛ pɛ” 3Yeso ndɛrɛ abwo mɔ mɔ̀mɔ̀ engɔ ga kpe, “Mmɛ wa ke, ngà pɛ.” Ekyɛ ŋwaʼ akɔ̂m myɛ ekwa egho wɛ. 4Éngɛ Yeso gâ ebe engɔ kpe, “Ngà zhuru, ke toʼro ebwa wunɔ ebe gho deʼ bo, bɛʼngɛ ngà ngɔɔ ebe àtɛ zhiri shi engɔ pɛɛrɛ awɛ é tee ebe bɔ kpe ngwo shi pɛ, gɛ̀rɛ̀ ndɛʼ etɔ̧ɔrɔ yɛ Mose à tsɛrɛ ngɛ.”

Yeso gli gho afwɛʼ ato ebe bɔ ebiri a Rom

(Luk 7:1-10)

5Èndzobo chɛ Yeso à nyii a Kapɛnaum ngɛ, ato deʼ ebe bɔ ebiri kla ngɔɔ gɛ̀rɛ̀ bii ekpede ebe engɔ kpe, 6“Masakɛ, gho afwɛʼ ngu we etan a ndɔ mbu mà gwɔ̀n. Engɔ ke né zhiri bo, è wa zɔ ǹgoʼ ghɛʼ.” 7Yeso gâ ebe engɔ kpe, “Mmɛ wa zeʼe gli engɔ” 8Egho Rom wɛ gâ ebe Yeso kpe, “Masakɛ, keʼ, mmɛ ke me koʼro tyè ngwo zeʼe a ndɔ mbu bo, ga ega deʼ, gho afwɛʼ ngu wa bwada. 9Mmɛ mɔ wa fwɛʼ enji abɔ tsɛrɛ gɛ̀rɛ̀ me le bɔ ebiri enji ndza, mmɛ ga ebe êwù kpe ‘ngɔ̀ɔ,’ engɔ ngɔɔ, mmɛ gɛrɛ ga ebe êwè kpe ‘zeʼe,’ engɔ zeʼ. Mmɛ gɛrɛ we le àdzob, mmɛ na ga ebe angɔ kpe fwɛʼ énde angɔ fwɛʼ.” 10Èndzobo chɛ Yeso à zo ega wunɔ ngɛ è kɔn, è ga ebe abɔ byɛ â ma kìrì engɔ ngɛ kpe, “Mmɛ ga éŋwaʼa endɔn kpe mmɛ ke shi zɔ gho deʼ abwaʼ bɔ Israel nè M̀pè ebɛrɛtaa ne egho wunɔ nɔ bo. 11Shi mmɛ le mbɔn nɛɛ kpe bɔ akɛkɛ ba ngo nyɛrɛ é zeʼ efwɔ ebɛ abɛɛ gli etaranchwe mane abɛɛ turu etaranchwe é tsɔmɔ ma nde antara nè Abraham Ayzik, mane Yakɔb efwɔ ebwa m̀fɔ̀ ekere. 12Bɛʼngɛ abɔ byɛ â me koʼro é mwɔ efwɔ ebwa m̀fɔ̀ Ngwe ngɛ, e ba ngo ndwa angɔ ese efwɔ akwâ di, aŋu angɔ ba ngo ma ku̧u, ma kwo ashwɔ àmɔ̀ ngɛ.” 13Éngɛ Yeso gâ ebe ato ebe bɔ ebiri wɛ kpe, “Ngà ngɔɔ a ndɔ, ebwa wɛ ngwo me le ebɛrɛ anyi ngɛ wa ngo fwɛʼ engɛ̂.” Èndzobo chɛ ekwa gho afwɛʼ ngɔ bwada.

Yeso gli bɔ akɛkɛ

(Mak 1:29-34; Luk 4:38-41)

14Yeso à ngɔɔ efwɔ ndɔ Petoro, dù zɔ aghoo Petoro ma gwɔn efɔɔ edɔm etan. 15Yeso mɔmɔ abwo ngɔ, efɔɔ tsɛddɛ ekwa aye wɛ, engɔ tam ekere klada sa fwɛʼ ebe Yeso. 16Endzobo etiʼdi, bɔ akɛkɛ bwɛ bɔ byɛ ezhwɛɛrɛ bɔɔbɔɔ â me nyii akwa angɔ ngɛ zeʼe ebe Yeso. Yeso fli ezhwɛɛrɛ bɔɔbɔɔ bɔnɔ ene ega, gɛ̀rɛ̀ gli bɔ gimkpaʼ byɛ â ma gwɔn ngɛ. 17Engɔ à fwɛʼ ebwa wunɔ é le kpe ebwa wɛ àmɛnɛkɔn Ngwe Azaya à ga kpe, “Engɔ mɔmbwo à le ntsɔ bwada ene eŋwan bɔ è chi abɔ efwɔ ǹgoʼ” ngɛ e gli éŋwaʼa.

Abɔ e ma ngo kìrì Yeso ngɛ

(Luk 9:57-62)

18Èndzobo chɛ Yeso à zɔ kpe ebaŋagho we kɛɛrɛ engɔ sɔ̀ ngɛ, engɔ ga ebe bɔ bɛɛrɛ abwa mɔ kpe angɔ kpɛn ngɔɔ anjid angli ze. 19Àtee atsɛrɛ deʼ zeʼ ebe engɔ ga kpe, “Àtee abwa, mmɛ wa kìrì awɛ ngɔɔ akwâ gimkpaʼ yɛ ngwo ma ngɔɔ ngɛ” 20Yeso gíì ebe engɔ kpe, “Ǹdɔmɔrɔ tse le eblara, ènɔ̀n ekere me le ndɔrɔ àmɔ̀, bɛʼngɛ Ŋwɔ Gho ke le afwɔ deʼ é naa ato mɔ aŋu bo.” 21Gho bɛ̀ɛrɛ abwa tsɛrɛ gâ ebe Yeso kpe, Masakɛ, ngà saara angu shi mmɛ dye ngɔɔ achim è kpa àtɛ ngu. 22Bɛʼngɛ Yeso gâ ebe engɔ kpe, “Kiri angu gɛ̀rɛ̀ shi bɔ kudu kpa bɔ kudu àmɔ̀.”

Yeso bwaara efùu kamakam

(Mak 4:35-41; Luk 8:22-25)

23Yeso à nyii efwɔ ekpe, bɔ bɛɛrɛ abwa ngɔ gɛrɛ kìrì ngɔ. 24Sa klikɔ̀ʼ, efùu kamakam kwaʼ efwɔ angli sa ke ŋwɛɛrɛ ekpe efwɔ eji, bɛʼngɛ Yeso à na fùumu m̀bwɛrɛ mɔ. 25Bɔ bɛɛrɛ abwa ngɔɔ zɛɛmɛ engɔ ga ebe engɔ kpe, “Masakɛ ngà pweere angbɛɛ, mbyɛɛ ba ngo kudu.” 26Yeso gíì kpe, “Mbɔn na bumu ayɛ? Na ampiʼ ebɛrɛtaa ze mbɔn me le!” Éngɛ engɔ tam ekere, bwe ebe efùu mane awawa kpe e ba, akwâ gɛrɛ ba tuuu. 27Bɔ gimkpaʼ à kɔ̂n sa ga kpe ne m̀pè gho we wunɔ wɛ efùu mane awawa ma zo engɔ?

Yeso gli anɔm fyee byɛ ezhwɛɛrɛ bɔɔbɔɔ à shi nyii ekwa angɔ ngɛ

(Mak 5:1-20; Luk 8:26-39)

28Èndzobo chɛ Yeso à kpɛn angli ngɔɔ abɛɛ ze efwɔ abɛ Gadara ngɛ, bɔ deʼ èfyee byɛ â me le ezhwɛɛrɛ bɔɔbɔɔ gɛrɛ me gli zeʼe efwɔ afwɔ yɛ â ma kpa bɔ kudu ngɛ gɛrɛ kla engɔ. Bɔ ma bumu é fɔɔ ene aghɛʼ yɛ mbɔʼnga angɔ à ma byɛdɛ. 29Aŋu angɔ à zɔ Yeso ngɛ, angɔ flaba akwâ kpe, “Ŋwɔ Ngwe, ngwo na ke ayɛ endyɛɛ, ngwo shi zeʼ é ge enyii ekwa ngbɛɛ wɛ endzobo etsɛrɛ esɛʼ ne shi zeʼe bo ngɛ?” 30Bɔ deʼ à na ndee enɔrɔ kunyɛm àmɔ̀ ebara aŋu. 31Éngɛ ezhwɛɛrɛ bɔɔbɔɔ byɛ bii Yeso kpe, “Mala ngwo ma ngo chi angbɛɛ efwɔ akwa abɔ bɔnɔ, ngà saa angbɛɛ efwɔ enɔrɔ kunyɛm wénde.” 32Yeso gíì ebe ezhwɛɛrɛ bɔɔbɔɔ byɛ kpe, “Mbɔn ngɔɔ.” E glini gɛ̀rɛ̀ nyii efwɔ kurunyɛm chɛ. Egha ŋwaʼ kurunyɛm chɛ gimkpaʼ dɔrɔ ngɔɔ kla ene m̀bɛ̀rɛ̀, turu efwɔ angli gɛ̀rɛ̀ kudu. 33Abɔ byɛ à ma kɔʼ kurunyɛm chɛ ngɛ dɔrɔ ngɔɔ efwɔ antiri abɛ àmɔ̀ gɛ̀rɛ̀ tòʼrò abwa gimkpaʼ yɛ a me gli ene abɔ byɛ ezhwɛɛrɛ bɔɔbɔɔ à mwɔ efwɔ akwa angɔ ngɛ. 34Éngɛ bɔ gimkpaʼ efwɔ abɛ yɛ nyɛrɛ ngɔɔ é kla Yeso. Èndzobo chɛ â zɔ engɔ ngɛ, angɔ bii engɔ kpe engɔ gli efwɔ abɛ ndzɔɔ.

Цяпер абрана:

Matyo 8: nbt

Пазнака

Падзяліцца

Капіяваць

Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце

Больш падрабязна Аб Aŋwɛʼrɛ Ebuumu Fe Nè Ngwe

Matyo 8

Папулярныя біблейскія вершы з
Matyo 8

Біблія:

Ngwo

Пераклад: Aŋwɛʼrɛ Ebuumu Fe Nè Ngwe - nbt

Matyo 8

Matyo 8

Папулярныя біблейскія вершы з Matyo 8

Біблія:

Ngwo

Пераклад: Aŋwɛʼrɛ Ebuumu Fe Nè Ngwe - nbt

Matyo 8

Папулярныя біблейскія вершы з
Matyo 8