Ruuka 19
19
Yeesu aragya owa omusarya Jakaayo
1Yeesu hanú yaasoha mumugi gwa Yeriko, akabha arahita gati wa omugi guyo. 2Mumugi guyo, yaaringa-mo omuniibhi umwi, eriina ryaye yaabhirikirwanga Jakaayo. Jakaayo uyo, ngʼo yaaringa omukuru wa abhatobhya bha erigooti. 3Weeki yaaringa areenda okumurora Yeesu, ega, m-muntu wa egaki. Nawe, ataatura kwa ekisigo kya omuganda omunene gwa abhantu, na kwa okubha yaaringa omwengʼi bhukongʼu. 4Kwa ego, akakenya, akakangata embere, akariina kumukuyu, naho amurore Yeesu, arahita kunjira iyo.
5Mbe, Yeesu hanú yaahika kumukuyu harya, akamaaha eguru kumukuyu, akagamba ega, “Jakaayo, ituuma bhwangu! Reero ndeenderwa okubha omugeni iika owaaho.” 6Rumwigo, Jakaayo akeetuuma bhwangu, akamugenihya Yeesu iika owaaye kwa obhujomerwa.
7Abhantu bhonsego, hanú bhaarora gayo, bhakaamba okujujuuma ega, “Agiiri okugeniha owa obhusarya!”#19:7 Agiiri okugeniha owa obhusarya! Abhayahudi bhaaringa bhamanyiri ega, abhatobhya bha erigooti m-basarya bhukongʼu. Maaha Abhatobhya bha erigooti mu Moonjooro eguru ya Amangʼana Amakongʼu. 8Nawe, Jakaayo akeemirira, akamukeerya Omukuru Yeesu ega, “Omukuru, itegeerera! Bhoono, etuugati rya ebhintu bhyani, ndabhagabhira abhatobhu. Na nyoore naaruusya omuntu wowonse ekintu kwa okumwihonera, ndamuhunjukirya mara kane ya kinú naamuruusya.”
9Yeesu akamukeerya ega, “Reero inu, obhutuurya bhubhahikiiri abhantu bha enyumba inu, kwa okubha omuntu unu wonse yeeyorokerye omwene ega, m-mwana wa oruganda rwa Abhurahamu.#19:9 Abhurahamu. Maaha eringʼana rinu mu Moonjooro eguru ya Amangʼana Amakongʼu. 10Kwa okubha, Omwana wa Adamu yaajiri okutuna na okutuurya abhantu bhanú bhaabhura.”
Abhakori bha emirimu abhaheene nabhanú bhataringi abhaheene
(Mataayo 25:14-30)
11Abhantu hanú bhaaringa bhakyeetegeerera amangʼana gayo, Yeesu akoongerya okubhakeerya ekirengyo ekimwi. Abhantu bhayo bhaakanyanga ega, eginsiku gya obhukama bhwa Waryubha girahika kwibhaga riyoriyo, kwa okubha Yeesu yaaringa ahikiri haangʼi mumugi gwa Yerusaremu.#19:11 Abhayahudi bhaamanyanga ega, Kiristu Omutuurya obhukama bhwaye bhuryambira mumugi gwa Yerusaremu, gunú gwaringa omugi gwa omukama Daudi. 12Ego, akagamba ega, “Yaaringa-ho omuntu umwi wa obhutungi obhukuru. Omuntu uyo, akeemuka okugya orugendo mukyaro kya hare, naho anyoore obhukama, amare ahinde okutunga ekyaro kyaye.
13“Hanú yaaringa ataraamba orugendo, akabhabhirikira abhakori bha emirimu bhaaye ekumi, akabhahaana egimbirya eginjaru#19:13 Akabhahaana egimbirya eginjaru. Ekiyunani kiragamba ega, akabhahaana kira oumwi mina. Mina eimwi yaaringa amariho ga emyeri esatu kumukori wa emirimu umwi. kira oumwi, akabhakeerya ega, ‘Mukore ebhyasara okuhikira hanú ndihunjuka.’ 14Nawe omuntu uyo, abhantu bha ekyaro kyaye, bhaaringa bhamusokeri bhukongʼu. Ego, bhakatuma abhachaama bhamuseete, bhagambe ega, ‘Tutakwenda omuntu unu, abhe omukama weetu!’ 15Nawe omuntu uyo, akahaanwa obhukama, akahunjuka mukyaro kyaye. Hanú yaahunjuka, akabhirikira abhakori bha emirimu bhaaye bhanú yaaringa atigiiri egimbirya eginjaru, naho amanye obhwera bhunú kira oumwi yaanyoora.
16“Omukori wa emirimu wa mbere akaaja, akagamba ega, ‘Omukuru, naanyoora obhwera bhwa egimbirya ekumi okurwa kuirya waaringa untigiiri.’ 17Omukama uyo, akamukeerya ega, ‘Okoreri bhwaheene, omukori wa emirimu wa heene! Kwa okubha obheeri wa heene kuringʼana eriike, oraabhenga oratunga emigi ekumi.’
18“Omukori wa emirimu wa kabhiri wonse akaaja, akagamba ega, ‘Omukuru, naanyoora obhwera bhwa egimbirya etaanu okurwa kuirya waaringa untigiiri.’ 19Omukama uyo, akamukeerya ega, ‘Na uuwe, oraabhenga oratunga emigi etaanu.’
20“Omukori wa emirimu oundi akaaja, akagamba ega, ‘Omukuru, embirya yaaho n-ginu hanu. Naaringa ngʼibhisiri mukitambaara, naho etabhura. 21Naakora ego, kwa okubha naakoobhoha. Uuwe m-mururu, oragega hanú otaatuura ekintu, na oragesa hanú otaahamba.’ 22Omukama uyo, akamukeerya ega, ‘Uuwe omukori wa emirimu omubhiibhi. Bhoono ndakubhuturira ekiina okuringʼaana na obhugambi bhwaho omwene. Ogambiri ega, omanyiri oni m-mururu, ndagega hanú ntaatuura ekintu, na ndagesa hanú ntaahamba ekintu. 23Nyoore niigo ndingi, kwaki otaatuura embirya yaani mubhenki, naho, hanú nkaahunjukiri, ngʼigege hamwi na obhwera?’
24“Kimwi omukama uyo, akabhakeerya abhantu bhanú bhaaringa bheemiriiri haangʼi hayo ega, ‘Mumuruusye egimbirya giyo, muhaane unú yaanyoora obhwera mara ekumi.’ 25Bhakamukeerya ega, ‘Nawe omukuru, unu amariri okunyoora obhwera bhwa ekumi egindi.’
26“Wonse akabhakeerya ega, ‘Omuntu wowonse unú aratumira bhujomu enonkwe inú Waryubha amuheeri, arigendererya okunonkwa bhukongʼu. Nawe, omuntu unú atakutumira enonkwe inú Waryubha amuheeri, kora inú yaanayo yonse ariruusibhwa. 27Bhoono, abhasigu bhaani bhanú bhateendanga oni mbe omukama waabho, mubhareete embere waani hanu, mubheete!’”
Abhantu bharamuturuungʼana Yeesukwa obhujomerwa Yerusaremu
(Mataayo 21:1-11; Mariko 11:1-11; Yoana 12:12-19)
28Yeesu hanú yaamara okugamba gayo, akagendererya na orugendo rwaye rwa okuriina okugya mumugi gwa Yerusaremu. 29Mbe, hanú yaaringa ahikiri haangʼi na ebhijiji bhya Bhetifage na Bhetania, munkuku ya Emijeituni, akabhatuma bhabhiri gati ya abheehigira bhaaye, 30akabhakeerya ega, “Mugende mukijiji kinú kiringi embere yeenyu. Hanú mwakasohe muyo, mwakanyoore ekimoori kya entikiri, kinú kitareekarwa-ko na omuntu wowonse kibhoherwe, mukisibhure mukindeetere. 31Nyoore omuntu yaakabhabhuurye ega, ‘Kwaki murakisibhura?’ mumukeerye ega, ‘Omukuru weetu arakyenda.’”
32Mbe, abheehigira bhayo bhakagya, bhakanyoora ekimoori kya entikiri kya ego Yeesu yaabhakeerya. 33Hanú bhaaringa bharakisibhura, abheene ekimoori kiyo, bhakabhabhuurya ega, “Kwaki murasibhura ekimoori kiyo?” 34Bhakabhakyukya ega, “Omukuru weetu arakyenda.” 35Kimwi, bhakakireeta ekimoori kiyo ku Yeesu, bhakabharya-ko emyenda gyabho, bhakamara, bhakamuriinʼya-ko Yeesu.#19:35 Bhakamuriinʼya-ko Yeesu. Abhakama bha eribhaga riyo, bhaagenderanga kugifaraasi gya eriihe. Kwa ego, Yeesu okugendera kukimoori kya entikiri hanú yaaringa arasoha Yerusaremu, yaaringa aroorokya ega, weeki araaja kwa obhunyoohu.
36Hanú Yeesu yaaringa aragya, abheehigira bhaaye, bhaabharyanga emyenda gyabho kunjira. 37Hanú yaahika haangʼi kumuhiringito gwa enkuku ya Emijeituni, omuganda gonsego gwa abheehigira bhaaye, bhakaamba okukiririrya kwa obhujomerwa, bharamutogoonʼya Waryubha kurusumo rwa ebhika bhyonsego bhinú bhaarora. 38Bhakagamba ega,
“Anonkerwe omukama unú araaja kwa eriina rya Omukuru Waryubha.#19:38 Maaha mukitabho kya Egijabhuri 118:26.
Habhe na omurembe gati ya Waryubha na abhantu bhaaye.
Na agungibhwe Waryubha wa eguru ya bhyonsego.”
39Mumuganda guyo, bhaaringa-mo Abhafarisaayo. Mbe, bhakamukeerya Yeesu ega, “Omwihigirya, obhakaanʼye abheehigira bhaaho, bhatige okugamba ego!” 40Yeesu akabhakyukya ega, “Ndabhakeerya ega, nyoore bhayo bharaakire, kora amagina garaajiirire!”
Yeesu aragukuurira omugi gwa Yerusaremu
41Yeesu hanú yaarora omugi gwa Yerusaremu, akaamba okugukuurira. 42Akagamba eguru ya abhantu bha mumugi guyo, ega, “Naari ndeenda kora reero inu, mutune enjira ya omurembe. Nawe bhoono, mumariri okutigita, omurembe gwibhisiri, mutakutura okugurora. 43M-buheene ega, kuginsiku ginú giraaja, abhasigu bheenyu bharihagaaja ekintu kya okubharwanirya-ko, bharibheenarya omugi omugima na bharibharwanʼya mbaara gyonsego. 44Bharihaanyurira hansi omugi gonsego na bharisikya abhantu bhonsego. Abhasigu bhayo, bhataritiga kora erigina rimwi riikarireeni na erindi kugingito gya omugi, kwa ekisigo mutaamanya eribhaga rinú Waryubha yaaja okubhatuurya.”
Yeesu arakenyia abhakori bha ebhyasarabharwe mwisyengerero rya Waryubha
(Mataayo 21:12-17; Mariko 11:15-19; Yoana 2:13-22)
45Kimwi, Yeesu akasoha murubhanja rwa erisyengerero erikuru rya Waryubha, akaamba okukenyia abhantu bhanú bhaaringa bharagurya ebhintu muyo.#19:45 Abhantu bhanú bhaaringa bharagurya ebhintu muyo. Abhantu bhaaringa bharagurirya abhantu ebhintu murubhanja rwa erisyengerero kurusumo rwa okuruusya ekimwenso. 46Akabhakeerya ega, “Engʼoorerwe mu Mangʼoore Amarabhu ega, ‘Erisyengerero ryani erikuru riribha enyumba ya amasabho.’#19:46a Maaha mukitabho kya Isaaya 56:7. Nawe bheenyu, muikoreri okubha erisana rya abheebhi!”#19:46b Maaha mukitabho kya Jeremia 7:11.
47Yeesu yaaringa areehigirya abhantu murubhanja rwa erisyengerero erikuru rya Waryubha, kira orusiku. Abhasyengeri abhakuru, hamwi na abheehigirya bha amaragiriryo na abhakuru bha abhayahudi, bhakabha bharatuna omweya gwa okumwita. 48Nawe, bhataanyoora omweya, kwa okubha abhantu bhonsego bhaaringa bharamwitegeerera bhujomu bhukongʼu.
Цяпер абрана:
Ruuka 19: Kabwa
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2022, Wycliffe Bible Translators, Inc. All rights reserved.